Forum Replies Created
-
Replies
-
Okkar klúbbur er því miður að mínu mati stefnulaus og sinnir ekki þeirri hagsmunagæslu sem hann á að gera. Ímynd klúbbsins er því miður þannig að fólk sér okkur sem samtök klíkukalla á stórum jeppum sem vilja keyra hvar sem er, en í raun ætti ímyndin að vera að við séum baráttusamtök almennings sem vilja tryggja frjálsa ferðamennsku um hálendi Íslands þar sem ferðast er af ábyrgð fyrir íslenskri náttúru.
Er til einhver áætlun hjá nýrri stjórn F4x4 um aðgerðir og stefnumörkun í okkar hagsmunamálum. Því hefur verið hafnað að stjórnin ráði starfsmann til að sinna okkar hagsmunamálum á sama tíma og til er mikið fjármagn í félaginu sem hægt væri að nota til að setja í þetta.
Við liggjum undir áróðri frá mönnum eins og Páli Ásgeiri, Magnús Einarssyni og fleirum um utanvegaakstur og stjórnvöld eru um leið markvisst að loka okkar umhverfi á hálendinu. Á sama tíma er áhugafólk og landeigendur að stuðla að stofnun Geopark þjóðgarða þar sem í framtíðinni verður hugsanlega ekki hægt að ferðast nema greiða aðgangseyri eða gjald fyrir leiðsögumann.
Ferðaklúbburinn 4×4 þarf að sameina hinn almenna ferðamann á fjórhjóladrifnum bílum í baráttu fyrir ferðafrelsi til framtíðar. Valið stendur um að fara norsku leiðina þar sem allt er bannað eða sænsku leiðina þar sem hinum almenna ferðamanni eru tryggð réttindi til að ferðast um landið sitt.
Ég lýsi því því eftir markvissri stefnu okkar hjá Ferðaklúbbnum 4×4 í hellstu hagsmunamálum og hvet stjórn klúbbsins til að leggja grunn að öflugum talsmanni (formann, stjórnarmann eða framkvæmdastjóra) eins og öll alvöru samtök gera. Að láta félagsmenn koma fram eftir einhverri hentistefnu með sínar eigin skoðanir er ekki góð leið til árangurs (Sveinbjörn er þó undantekning frá þessu og er vel inn í flestum málum). Það þarf að vinna þessa hagsmunagæslu báráttu eftir nákvæmri stefnumótun innan klúbbsins, hafa markvissar upplýsingar fyrir hendi um stefnu klúbbsins í öllum hellstu hagsmunamálum og öflugan talsmann til að koma þessu á framfæri.
Guðmundur G. Kristinsson
Það er gaman að fylgjast með umræðunni hér á spjallinu um utanvegaakstur, en allir þeir sem hafa tjáð sig (nema líklega Óli og Dagur) eiga það sameiginlegt að tala hér sem einstaklingar og þá hver fyrir sig. Enginn stjórnarmaður í F4x4 hefur tjáð sig um þessi mál og því spurning hver sé stefna klúbbsins í þessum málum. Er einhver stefna til og ef svo er, hvar er hana að finna?
Utanvegaakstur og ferðafrelsi er stór hagsmunaflokkur og gama væri að heyra undir hvaða nefndir í klúbbnum þessir málaflokkar heyra og verkaskiptingu ef þetta er hjá fleiri en einni nefnd. Gaman væri einnig að heyra hvaða nefndir klúbbsins hafi þessi mál í sínum verkahring og hvort það séu fleiri en ein nefnd og þá hver verkaskiptingin sé á milli þeirra? Er verið að vinna einhver verkefni eða er eitthvert samstarf fyrir hendi í Þessum málum í klúbbnum?
Það er líka spurning um ákvæði í lögum klúbbsins eins og Óli nefndi hér áður á spjallinu „samtök um ábyrga ferðamennsku á hálendi Íslands“ og „að standa vörð um ferðafrelsið“. Hver er síðan ábyrgð stjórnar hverju sinni að fylgja því eftir að klúbburinn vinni samkvæmt ákvæðum í sínum lögum? Eins og Óli sagði hér áður á spjallinu „Klúbburinn hlýtur að fordæma utanvegaakstur sem leiðir af sér landspjöll en jafnframt að berjast fyrir að leiðum sé ekki lokað fyrir umferð ökutækja“.
Klúbburinn okkar hefur eins og Óli sagði í áraraðir staðið fyrir fræðslu, upplýsingagjöf og leiðbeiningum um ábyrga ferðamennski, en aðrir aðilar hafa síðan barið sér á bak fyrir árangur sem örugglega má rekja að miklu leiti til aðgerða á vegum klúbbsins. Klúbburinn hefur lengi verið í samstarfi við Umhverfisstofnun með ferlaskráningu á vegslóðum sem mjög líklega verður grunnur að því skráningarkerfi sem opinberir aðilar hafa ákveðið að byggja upp. Munum við njóta þess að hafa unnið með hinu opinbera í þessu verkefni og hafa áhrif á þróun þessa umhverfis? Er klúbburinn að skoða þessi mál eða liggja þau bara einhverstaðar í möppu upp í hillu. Hvaða afstöðu hefur núverandi stjórn í þessu máli og ætlar hún að beita sér fyrir því að ná einhverri stöðu til að hafa áhrif.
Guðmundur G. Kristinsson (óbreyttur klúbbfélagi)
Það þarf samt að gera miklu betur og sérstaklega í þeirri baráttu um ferðafrelsi sem við stöndum í þessa dagana. Það er ekki sjálfgefið að geta í framtíðinni ferðast um landið okkar á eigin vegum eða að leyfilegt verði að fara um þá vegi og slóða sem í dag eru fyrir hendi. Þess vegna verður klúbburinn að standa fyrir öflugri hagsmunagæslu á þessu sviði og koma í veg fyrir að stórum náttúrusvæðum ásamt vegum (sjá https://old.f4x4.is/attachments/1151_ferdafrelsi.pdf ) verði lokað fyrir aðgengi nema í gegnum fjárplógsstarfsemi aðila sem jafnvel hafi einkarétt á ferðamennsku á þessum tilteknu svæðum.
Undanfarið hefur það samstaf sem stjórnvöld hafa boðið upp á varðandi þessi hagsmunamál s.s. Vatnajökulsþjóðgarð, Þjórársver og fleiri verið algjör sýndarmennska. Síðasta dæmið um þetta er nefnd sem nýlega var stofnuð um að endurskoða niðurstöður varðandi lokanir og umgengni í Vatnajökulsþjóðgarði. Það er nokkuð víst að niðurstaða þeirrar nefndar verður eins og var í öllu undirbúningstarfinu varðandi þjóðgarðinn „haft hefur verið samráð við alla hagsmunaaðila og tekin ákvörðun um að breyta ekki fyrri niðurstöðum varðandi Vatnajökulsþjóðgarð“.
Það hefur undanfarin ár verið troðið á hagsmunum hins almenna ferðamanns í öllum málum sem snúa að hálendinu og það sýndarsamráð sem þessum hagsmunaaðilum og félagsamtökum hefur verið sýnt er yfirgengilegt ( sjá blaðagreinar frá 9 félagasamtökum og ferðaþjónustuaðilum https://old.f4x4.is/attachments/952_Ferd … es2010.pdf og http://www.ferdafrelsi.is/felagsamtok_g … rs2011.pdf ).
Ég tek því undir það hjá Óla að hvetja stjórn F4x4 til að setja á fund sem fyrst um þessi brýnu hagsmunamál sem snúa að því að tryggja freðafrelsi félagsmanna til framtíðar.
Guðmundur G. Kristinsson
Mig langar að minna félagsmenn Ferðaklúbbsins 4×4 á síðuna http://www.ferdafrelsi.is ( http://www.ferdafrelsi.is/index_greinar.htm ) og samantekt á þeim greinum sem skrifaðar hafa verið undanfarna mánuði um okkar hagsmunamál. Þar er t.d. ein grein "Ferðafrelsi á Íslandi er í mikilli hættu" sem ég held að alltof fáir hafi lesið. Lesið þessa grein sem birtist í Morgunblaðinu, en þar er fjallað um sjö málefni þar sem við þurfum að spyrna við fótum og tryggja eðlilega meðhöndlun og umræðu til ekki fari illa. Þessi málefni eru:
1. Ný náttúruverndarlög
2. Skipulagsmál vegslóða í tugum sveitarfélaga
3. Lokun landeigenda á vegslóðum
4. Stjórnunar- og verndaráætlun um Vatnajökulsþjóðgarð
5. Stækkun Þjórsárvera
6. Landnýtingaráætlun
7. Geopark-garðarÞar stendur m.a.:
[i:3pjx6bcu]"Eins og sést í þessari upptalningu hér að framan, þá er ferðafrelsi á Íslandi að ganga í gegnum miklar
breytingar og er í mikilli hættu. Það sem gerir þetta allt flókið og erfitt er vöntun á heildarsamræmi í þessum
verkefnum og reynsla þeirra sem vinna að þessum verkefnum er kannski ekki alltaf nógu mikil. Auka
þarf gegnsæi og efla upplýsingagjöf til almenning ásamt því hafa virka samvinnu við útivistarfélög og ferðaþjónustuaðila".[/i:3pjx6bcu]Ég sem félagi í Ferðaklúbbnum 4×4 geri kröfu til þess að stjórn klúbbsins gerir grein fyrir stöðu sinni í þessum hagsmunamálum, þeirri vinnu sem er í gangi á vegum klúbbsins og að sett verði fram stefnuyfirlýsing klúbbsins í þessum málefnum og öðrum sem snúa að því að tryggja ferðafrelsi mitt og annarra klúbbfélaga.
Guðmundur G. Kristinsson
Gaman að sjá loksins umræðu hér á netinu sem byggir á skynsemi. Enn og aftur er það Páll Ásgeir sem setur fram sleggjudóma og ábyrgðalausa gagnrýni. Hann væri nokkuð góður ef hann héldi sig við staðreyndir og beitti skynsamlegri málefnaflutningi. Þetta er nefnilega sameiginlegt vandamál allra þeirra sem koma að ferðamennsku á hálendinu, hvort sem um er að ræða almennt ferðafólk eða aðila sem stunda hálendisferðir í ágóðaskyni.
Það sem ég hef áhyggjur af er að öll orka okkar sem ætti að fara í að leysa þetta vandamál og fleiri sem tengjast hálendinu, er að fara í karp og röfl á milli þessara aðila. Þessir aðilar eru svo uppteknir við þetta að Umhverfisráðherra veður áfram án samráðs og kemst upp með það. FÍ hefur sagt sig úr Samút og ekkert heyrist frá nýju landssamtökunum Ferðafrelsi sem stofnuð voru í desember.
Það sem ég hef meiri áhyggjur af er staða og aðgerðir í okkar félagi Ferðaklúbbnum 4×4. Er verið að vinna í okkar hagsmunamálum og mun ruglinu og bullinu í Páli Ásgeiri vera svarað? Er til einhver áætlun hjá nýrri stjórn F4x4 um aðgerðir og stefnumörkun í okkar hagsmunamálum. Því hefur verið hafnað að stjórnin ráði starfsmann til að sinna okkar hagsmunamálum á sama tíma og til er mikið fjármagn í félaginu sem hægt væri að nota til að setja í þetta. Ekkert hefur heyrst frá Ferðafrelsisnefndinni í marga mánuði og það læðist að manni sá grunur að engin vinna sé í gangi í okkar hagsmunamálum.
Við í Ferðaklúbbnum 4×4 þurfum að hafa áhyggjur af ímynd okkar í samfélaginu. Sér fólk okkur sem samtök klíkukalla á stórum jeppum sem vilja keyra hvar sem er eða eins og ætti að vera, baráttusamtök almennings sem vilja tryggja frjálsa ferðamennsku um hálendi Íslands þar sem ferðast er af ábyrgð fyrir íslenskri náttúru. Stjórnvöld eru markvisst að loka okkar umhverfi á hálendinu og koma umsjón ferða yfir á Ferðafélag Íslands. Á sama tíma er áhugafólk og landeigendur að stuðla að stofnun Geopark þjóðgarða þar sem í framtíðinni ekki verður hugsanlega ekki hægt að ferðast nema greiða aðgangseyri eða gjald fyrir leiðsögumann.
Ferðaklúbburinn 4×4 ætti að stefna að því að fjórfalda fjölda félagsmanna og stunda markvissa og stefnumarkaða vinnu í hagsmunamálum félagsmanna til að ferðast um landið okkar. Sameina hinn almenna ferðamann á fjórhjóladrifnum bílum í baráttu fyrir ferðafrelsi til framtíðar. Valið stendur um að fara norsku leiðina þar sem allt er bannað eða sænsku leiðina þar sem hinum almenna ferðamanni eru tryggð réttindi til að ferðast um landið sitt. Það má ekki leyfa vinstri umhverfisgönguöfgasinnum eins og Páli Ásgeiri með sína rugluðu hugmyndafræði færa Ferðafélagi Íslands allt hálendið á silfurfati til að græða peninga. Við þurfum alvöru hagsmunagæslu innan F4x4 og marga stuðningsaðila með sama baráttuhug eins og Pál Ásgeir sem þora að berjast fyrir eðlilegum hagsmunum hins almenna ferðamanns til að tryggja ferðafrelsi okkar til framtíðar.
Guðmundur G. Kristinsson
Þetta er algjör endurtekning á aðferðafræði núverandi stjórnvalda í mótun á ferðstefnu hálendisins til þessa. Hlusta, biðja um frest til að vinna að málinu, óska eftir þolinmæði til að ná samráði og senda síðan út yfirlýsingu um að ekkert verði gert og fullt samráð hafi verið haft um að gera ekki neitt.
Þessi sömu vinnubrögðu verða viðhöfð um öll mál sem tengjast náttúru landsins út þetta kjörtímabil. Friðanir og lokanir svæða um allt land án samráðs við nokkra aðila og á sama tíma færir Ferðafélagið út sitt yfirráðasvæði í góðu samstarfi við stjórnvöld. Innan skamms tíma verður ekki hægt að ferðast um landið nema í skipulögðum hópum á vegum FÍ og greiða fyrir það og gistingu samkvæmt gjaldskrá sem þeir einir ákveða.
Það er verið að ferðamannavæða landið okkar fyrir erlenda ferðamenn og markvisst verið að loka fyrir frjálsa ferðamennsku hins almenna íslendings. Öllu verra er að okkar klúbbur er ekkert að gera til að spyrna við fótum í þessu. Að hafa fulltrúa í svæðaráðum og áheyrnarfulltrúa í stjórn Vatnajökulsþjóðgarðs skiptir engu máli, það er búið að festa þar allar ákvarðanir í lög og reglur í samráði við FÍ.
Guðmundur G. Kristinsson
Mig langar að vekja athygli á grein sem ég skrifaði í Fréttablaðið á síðasta ári um sama mál þegar frétt birtist á vef Umhverfisstofnunar: https://old.f4x4.is/attachments/952_GGKgreinnov2010.pdf
Ráðherra er hér að sveipa sig stolnum fjöðrum til að hilma yfir aðgerðarleysi. það sem er öllu alvarlegra er að ráðherra og þar með ríkisstjórnin er hægt og örugglega að vinna að því að loka slóðum og vegum á hálendinu til að geta kært fólk fyrir utanvegaakstur á þeim.
Stefnan stjórnvalda í náttúruvernd virðist byggist á því að hefta aðgengi sem mest og leggja síðan aðgengið í hendur ákveðinna félagsamtaka sem eru með skipulagðar ferðir inn á ákveðin svæði. Ferðir á vegum þessara félagasamtaka kosta að sjálfsögðu mikinn pening og eru meira og minna skipulagðar og settar upp fyrir erlenda ferðamenn. Íslendinga að stærstum hluta vilja ferðast á eigin vegum og skipuleggja ferðir eins og þeim hentar sjálfum hverju sinni. Það vantar talsmann fyrir þennan hóp íslendinga og þó nokkrir aðilar (F4x4, skotveiðimenn og sjálfstæðir ferðaþjónustuaðilar aðallega) hafi undanfarið reynt að halda upp baráttu fyrir sjónarmiðum þessa hóps hefur ekkert gengið. Landssamtökin Ferðafrelsi sem stofnuð voru í desember 2010 áttu að koma þarna inn sem sterkur aðili og mótvægi gegn þessari stefnu ríkisstjórnarinnar, ráðherra og þeirra einkavinum í atvinnu ferðaþjónustu.
Umræða um náttúruvernd hefur hingað til mest snúist um hina svokölluðu sjálfbærni eða að hún fái að þróast á eigin vegum. Til að þetta náist hefur þetta meira og minna snúist um að loka af svæði eða hefta aðgengi að þeim. Sá aðili sem hefur mest verið gagnrýndur fyrir að skaða náttúruna er Landsvirkjun, en þessi aðili hefur með vegalagningu tengt virkjunum opnað náttúruna fyrir almenningi. Þetta samspil á uppbyggingu virkjana og opnun á íslenskri náttúru fyrir almenningi er sá grunnur sem við þurfum að leggja áherslu á.
Við þurfum að koma með nýjan vinkil í umræðu um náttúruvernd sem byggist á því að blanda saman skynsamlegri nýtingu á náttúru landsins ásamt því að auka aðgengi hins venjulega borgara. Náttúra landsins skiptir miklu máli fyrir alla íslendinga og eðlilegt aðgengi að henni fyrir hinn venjulega íslending er mannréttindamál. Það mætti í raun oft túlka baráttu öfgasinna fyrir verndun á náttúrunni sem árás á mannréttindi hins venjulega íslendings, vegna þess að þeirra sjónarmið heftir aðgengi mikils meirihluta íslendinga að íslenskri náttúru. Við þurfum að byggja upp öfluga og sterka rödd fyrir hinn venjulega íslending sem vill nálgast íslenska náttúru á eðlilegan og skynsamlegan hátt án þess að borga einkavinum ráðherra og ríkisstjórnar fyrir það.
Guðmundur G. Kristinsson
Mig langar að koma því á framfæri að samkvæmt nýjustu fréttum virðist hafa orðið stefnubreyting í vefmálum og sveigja tekin í átt að því sem rýnihópurinn lagði til. Einnig heyrði ég að Hafliði hefði leitt þessa stefnubreytingu, þannig að með því hefur hann svarað því sem ég spurði um hér að framan. Við þurfum einmitt aðila inn í starfið hjá klúbbnum okkar sem eru tilbúnir að leiða breytingar og leggja grunn að skilvirkari útfærslum í umhverfinu. Þessa vegna vill ég lýsa yfir persónulegum stuðningi við framboð Hafliða til formanns, hann ætlar greinilega að legga grunn að breytingum!!!
Guðmundur G. Kristinsson
Það hefur komið fram að Hafliði Sigtryggur Magnússon ætlar að bjóða sig fram til formanns. Hvaða stefnumörkun ætlar Hafliði að hafa fyrir klúbbinn í sínu starfi sem formaður. Það væri sérstaklega gaman að sjá og heyra hans stefnumörkun í málefnum vefnefndar og varðandi vefsíðu klúbbsins, en hann hefur tengst þeim málum í nokkuð langan tíma.
Ég skora á Hafliða að setja fram þær áherslur sem hann ætlar að beita sér fyrir í starfi klúbbsins sem formaður.
Guðmundur G. Kristinsson
Til gamans þá langar mig að setja hér inn tillögu fyrrverandi rýnihóps um útlitsbreytingu á vefsíðu F4x4 http://www.ferdafrelsi.is/ggk/f4x4.htm. Þessi myndræna tillaga var byggð á þeirri hugmyndafræði að gera andlitið skilvirkara og auðvelda félagsmönnum að finna það sem verið væri að leita að hverju sinni. Hafa verður í huga að þetta útlit var sett fram sem hugmynd að grunni til að þróa áfram. þetta er einföld html mynd með flashi og því engin virkni á þessu andliti. þetta er bara hugsað sem hugmynd að útliti.
Guðmundur G. Kristinsson
Ég tek undir þetta hjá þér Elías um að Sveinbjörn og félagar hafi gert marg gott s.s. samstarf við deildir. Ég veit frá fyrstu hendi hversu ötull Sveinbjörn og hans stjórn hafa verið síðustu árin, en þeir tóku við klúbbnum við einstaklega erfiðar aðstæður fyrir þremur árum og hefur tekist að koma á ró og friði eftir mikið stríð og ósætti.
Klúbburinn hefur bara ekki verið nógu skipulagður, vinna í hagsmunagæslu ekki nógu markviss síðustu árin og alltof fáir aðilar sem hafa dregið vagninn. Við höfum innan félagsins mikinn fjölda fólks sem hefur mikla reynslu og þekkingu, en af einhverjum ástæðum hefur þetta fólk ekki nema í litlum mæli gefið kost á sér í starf fyrir klúbbinn.
Klúbburinn hefur ekki verið með starfmenn síðustu árin og fólk kannski þess vegna veigrað sér við því að gefa kost á sér í sjálfboðavinnu. Vinna í þessari hagsmunagæslu er mikil og alltaf hætt við því að þeir sem gefa kost á sér í sjálfboðaliðsstarf drukkni í þessu. Það þekki ég frá fyrstu hendi.
Það er líka eins og flestir innan klúbbsins séu smeikir við að tjá sig um breytingar eða hafa skoðanir á starfi klúbbsins á spjallinu, en líklega má rekja það til þess ástands sem var í félagsstarfinu fyrir nokkrum árum. Þetta sést vel á því hversu fáir hafa tjáð sig hér um mínar tillögur sem ég setti fram hér á spjallinu, en því miður virðist einhver þöggun eða hræðsla hafa skapast innan klúbbsins síðustu árin í þessum málum. Við verðum samt að ræða saman og hafa skoðanir til að ná betri árangri í okkar málum. Opin málefnaleg og heiðarleg umræða getur aldrei skaðað og er áríðandi til að leggja grunn að því hvert við ætlum með klúbbinn okkar.
Guðmundur G. Kristinsson
Það er misskilningur að þetta sé einhver framboðsræða, ég verð ekki í framboði í nein embætti hjá klúbbnum á komandi aðalfundi. Tek einnig heilshugar undir það að halda verði í þann anda að klúbburinn sé og verði klúbbur, en ekki fyrirtæki. Við höfum orðið undir í okkar hagsmunamálum undanfarin ár, en hlutverk klúbbsins okkar er fyrst og fremst að standa fyrir okkar hagsmunum og þar þarf að gera betur.
Guðmundur G. Kristinsson
Hvert viljum við sjá klúbbinn okkar stefna?
Grunn hagsmunamál Ferðaklúbbsins 4×4:
..leggja grunn að innleiðingu á reglugerðum varðandi breytingar á bílum til ferðalaga á hálendinu.
..stuðla að viðhorfsbreytingu varðandi utanvegaakstur og fyrirbyggja skaða í náttúrunni sem því fylgir.
..byggja upp öryggi ferðafólks á hálendi Íslands með neti VHF endurvarpa um allt land.
..berjast fyrir frelsi félagsmanna og almennings til að ferðast um hálendi Íslands.Við eigum að vera ráðandi aðili um málefni hálendisins
Ferðaklúbburinn 4×4 á að vera öflugur hagsmunagæsluaðili í þeim málaflokkum sem hann stendur fyrir og til að skapa öflugan slagkraft þarf að hafa sterkt bakland með miklum fjölda félagsmanna. Staða í hagsmunagæslu á hverjum tíma er í beinu hlutfalli við fjölda meðlima, vinnu sem klúbburinn framkvæmir og ímynd sem hann hefur skapað í samfélaginu. Klúbburinn á að vera öflugur þátttakandi í stefnumótun um ferðamennsku, vinna að því að tryggja almannarétt til ferðalaga og leggja grunn að því að klúbbmeðlimir og annað ferðafólk geti notið íslenskrar náttúru á skynsamlegan og ábyrgan hátt. Ferðaklúbburinn á að vinna markvisst með stjórnvöldum að heildarstefnumótun um ferðaumhverfi hálendisins og í samvinnu við þau leggja grunn að stefnumarkandi verkefnaáætlun um hvernig eigi að umgangast okkar náttúruperlur af ábyrgð og skynsemi. Þetta hafa stjórnvöld reynt að gera í áratugi og algjörlega mistekist og á meðan hefur Ferðafélag Íslands tekið völdin og nánast fengið alræðisvald á hálendinu.Fleiri klúbbmeðlimir og markviss vinnubrögð gerir okkur áhrifameiri
Það er hægt er að ná miklu meiri árangri með því að efla starfsemi Ferðaklúbbsins 4×4, vinna markvissa stefnumótun í hagsmunamálum, setja metnaðarfull markmið og skipuleggja starfsemi klúbbsins faglega til að ná þeim markmiðum. Fleiri meðlimir skila auknum tekjum og meira afli til að berjast í hagsmunamálum. Stunda þarf markvissa sókn til að fjölga meðlimum og senda ákveðnum markhópum reglulega upplýsingar um klúbbinn og fræðslu um ábyrga ferðamennsku og hvernig hægt sé að stuðla að skynsamlegri náttúruvernd og tryggja almannarétt til ferðalaga með þátttöku í starfi klúbbsins. Leggja þarf grunn að faglegri hagsmunagæslu, stunda kerfisbundið áróðurstríð í hagsmunamálum og skapa góð tengsl við okkar fólk í opinberu umhverfi.Gott skipulag og fagleg vinna í hagsmunagæslu skilar meiri árangri
Klúbburinn hefði fyrir löngu átt að setja í gang málefnahópa um einstaka málaflokka í öllum hagsmunamálum og forgangsraða markvisst skammtíma og langtímaverkefnum. Láta þessa hópa hafa umsjón með einstökum verkefnum s.s. Vatnajökulsþjóðgarði, Þjórsárverum, náttúruverndarlögum, landnýtingaráætlun o.s.fr. Sumar nefndir hafa stundum verið með eitthvað af þessum málum, en flest þessi mál hafa flakkað fram og aftur á milli stjórnar og nefnda ár eftir ár. Sjálfboðastarf stjórnar- og nefndarmanna og klúbbmeðlima þarf síðan að styðja með aðgangi að starfsfólki hjá klúbbnum, en með því væri hægt að margfalda þeirra framlag.Við þurfum að:
• Skipta málefnum markvisst upp á milli stjórnar, nefnda og starfshópa
• Vinna samkvæmt ákveðnum markmiðum og áætlunum í öllum hagsmunamálum.
• Finna okkar fólk í opinberu umhverfi og leiðbeina því um hvernig það geti stutt við okkar málstað.
• Skilgreina þá aðila sem eru mest á móti okkur og greina fyrir hvaða málstað þeir eru að berjast.
• Skilgreina aðila með sömu markmið í hagsmunagæslu og leggja grunn að öflugu samstarfi við þá.
• Koma upp PR hópi sem hefur það markmið að dæla út greinum, umsögnum og fara í viðtöl og fleira.
• Setja upp PR aðgerðaráætlun til næstu ára brotið niður á hvern mánuð. Vinna þetta markvisst og reglubundið og útbúa gögn fyrir þá aðila sem við ætlum að nota í fjölmiðlum.Nota innra starf klúbbsins til að styrkja ímyndina
Innra starf klúbbsins er kjörið til að kynna hann og koma honum á framfæri s.s. starf Litlunefndar og þær nýliðaferðir og námskeið sem hún stendur fyrir. Auglýsa þarf þessar ferðir og nota þær markvisst sem aðdráttarafl til að ná inn nýjum félögum. Hafa t.d. frítt í þessar ferðir fyrir klúbbmeðlimi, en láta aðra greiða fyrir þátttöku (félagsgjald) og hvetja með því þátttakendur til að ganga í klúbbinn.Setja ætti af stað nýja nefnd (Stórunefnd) sem tæki næsta skref á eftir Litlunefnd og stæði fyrir dagsferðum fyrir stærri og breytta bíla. Leggja grunn að öflugu framkvæmdaumhverfi í slíkum ferðum og nota frábæra skipulagsreynslu frá Litlunefndinni síðustu árin.
Skoða möguleika á að setja af stað sérstaka ferðaþjónustunefnd sem sinnti hagsmunagæslu fyrir ferðaþjónustuaðila og bjóða upp á markvisst námskeiðaumhverfi fyrir aðila í þessu umhverfi. Þessir aðilar fengju þá sterkari stöðu til að sinna sínum málum og klúbburinn fengi öfluga samstarfsaðila í sínum stærstu hagsmunamálum, ferðafrelsinu.
Öflugt og vel skipulagt starf skilar samstöðu og velvild félagsmanna
Setja þarf starfsemi nefnda í faglegan farveg og gera þær sjálfstæðari og öflugri. Setja upp heildarmynd um starfsumhverfi þeirra, vinna nákvæma verkefnaskiptingu, skipta hagsmunaumhverfi klúbbsins upp á milli þeirra og skilgreina starfs- og málefnaskiptingu. Allar nefndir ættu að skila starfsáætlunum mánuði eftir aðalfund, allir fundir nefnda ættu að vera boðaðir með fundardagskrá og fundargerðum ætti að skila eftir hvern fund. Allar fundargerðir nefnda og stjórnar ættu að verar aðgengilegar á netinu og öll starfsemi klúbbsins þyrti að vera aðgengileg og sýnileg. Með þessu væri hinn almenni félagsmaður betur upplýstur um starfið í klúbbnum, meira meðvitaður um þau verkefni sem væru í gangi á hverjum tíma og yrði jákvæðari gangnvart klúbbnum.Byggja þarf upp öflugt samstarf við deildir
Taka þarf upp öflugt og markvisst samstarf við og á milli landsbyggðadeilda og setja starfumhverfi þeirra og móðurklúbbsins í skipulagðan farveg um faglegt samskipti. Aðgengi að upplýsingar á hverjum tíma þyrfti að auka og móðurklúbbur og landsbyggðadeildir þyrftu að sameinast um heildarumhverfi á vefnum með aðgengi að upplýsingum á sameiginlegri vefsíðu.Leggja þarf grunn að spennandi og öflugri vefsíðu
Taka þarf vefsíðu klúbbsins og endurvinna útlit og uppbyggingu hennar. Nýta fyrri vinnu við skipulag í uppbyggingu eins og kostur er, en setja á hana nýtt andlit (sjá möguleika). Hafa tengingar inn á sem flesta þætti í starfsemi klúbbsins. Hafa innskráningu félaga á netinu og geta tekið á móti greiðslu með kreditkortum fyrir félagsgjöld og vegna sölu á kynningarvörum félagsins. Kynna á síðunni starfsemina í Setrinu og birta pöntunardagatal um lausan tíma fyrir gistingu. Setja ritnefnd yfir vefin sem vinni eftir vel skilgreindum markmiðum um framsetningu og virkni hans.Möguleg framtíðarmarkmið fyrir Ferðaklúbbinn 4×4
• Hafa 10.000 greiðandi félagsmenn innan næstu fimm ára
• Hafa tvo til þrjá starfsmenn í fullu starfi til að sinna daglegum rekstri og hagsmunamálum
• Bjóði upp á öflugt námskeiðaumhverfi fyrir klúbbmeðlimi og almennt ferðafólk á hálendinu
• Hafa framboð á ferðum fyrir félagsmenn á öllum stærðum hálendisbíla
• Efla verulega hagsmunagæslu klúbbsins í málefnum almannaréttar og ferðafrelsis á Íslandi
• Sameina klúbbinn, almenning og ferðaþjónustu í skynsamlegri hagsmunagæslu um ferðafrelsi
• Byggja upp sameiginlega upplýsingaveitu móðurfélags og landsbyggðadeilda á sameiginlegri vefsíðu
• Setja upp faglegt og markvisst samstarfsumhverfi allra deilda og móðurfélags FerðaklúbbsinsHugsum málin upp á nýtt og sköpum nýja framtíð
Það er kominn tími til að hugsa málin upp á nýtt og taka stóra/litla klíkuklúbbinn okkar og gera hann að alvöru afli í baráttu fyrir betri framtíð í ferðamennsku, skynsamlegu ferðafrelsi og almannarétti til að ferðast um landið.Setja þarf umræðu um starfsemi og rekstur klúbbsins í faglegan og vel skipulagðan farveg til að leggja grunn að þeirri framtíð sem við viljum ná fram fyrir klúbbmeðlimi og almenning í ferðamennsku á Íslandi.
Við getum stuðlað að breytingum á aðalfundinum í maí. Hugsum því vel hvaða aðilar eru best til þess fallnir að leiða nýja tíma og leggja af mörkum það sem þarf til að stýra starfinu í klúbbnum inn á árangursríkari brautir. Gerið kröfu til þess að þeir sem þið ætlið að kjósa, hafi hugsjónir til að byggja klúbbinn upp og gera hann að alvöru afli í íslensku samfélagi. Skoðið ekki bara hverjir gefa kost á sér í stjórn, heldur einnig hverjir gefa kost á sér í nefndir. Ekki kjósa aftur sömu aðila, ef ykkur finnst þeir ekki hafa staðið sig nógu vel.Að lokum langar mig að segja frá ummælum góðs samstarfsaðila innan klúbbsins sem í raun var kveikjan að því að setja saman þennan pistil. Hann sagði að “ef ég hefði ekkert jákvætt um málin að segja, þá ætti ég að gera eitthvað annað” og þetta var hárrétt honum. Mitt svar við þessu var að setjast niður og skilgreina persónulegt mat á stöðunni og síðan að koma með jákvæðar tillögur til breytinga.
Ég hef mikinn metnað fyrir hönd klúbbsins okkar og vona að þessi pistil leggi grunn að árangursríkum breytingum á starfi klúbbsins. Til að það gerist þarf að skapa uppbyggilega og málefnalega umræðu og alls ekki tengja hana persónulega einstaklingum eða hópum innan klúbbsins. Ég hef kynnst og unnið með mörgum frábærum einstaklingum í mínu starfi innan klúbbsins síðustu árin og aldrei fundið annað en að þeir aðilar væru að vinna klúbbnum vel og samkvæmt þeirri sannfæringu að vera gera góða og heiðarlega hluti. Ég vill færa þeim öllum góða kveðju og þakka fyrir ánægjulegt samstarf og einstaka upplifun síðustu þrjú árin.
Guðmundur G. Kristinsson
Félagsmaður nr. R3846 í Ferðaklúbbnum 4×4
Þetta er einstaklega vel gert myndband og nær fullkomlega þeirri tilfynningu og upplifun sem eru í ferðum Litlunefndar. Legg því til að Litlanefnd fá afnot af þessu myndbandi til að setja á vefsíðu nefndarinnar og nota til að kynna ferðir á hennar vegum.
Guðmundur G. Kristinsson
Litlunefnd
Nýjustu fréttir frá Einari Berg aðalfararstjóra eru að allir eru komnir í Hrauneyjar og ferðinni er formlega slitið. Það eru eftir einhverjar dekkjaviðgerðir hjá Óla eftirfara, en hann fékk járnstykki í dekkið. Þá er bara ekkert eftir en að þakka fyrir daginn og benda þátttakendum á að setja inn myndir á vefinn fyrir alla þá sem ekki komust. Einnig bestu þakkir til allra hópstjóra og öryggisbíla í ferðinni.
Guðmundur G. Kristinsson
Litlunefnd
Einar Berg aðalfararstjóri var að hringja, en hann snéri við og er núna með síðasta hópnum á sléttunni. Hann sagði vera um klukkutíma fyrir þá að keyra upp í Hrauneyjar. Einar var mjög ánægður með ferðina og sagði þetta vera með betri ferðum Litlunefndar. Allt hefði gengið vel og næstum allir þátttakendur komist inn í Landmannalaugar. Ferðin hefði reynt á marga af þeim sem eru með minni bíla, en allir hefðu lært mikið og fengið frábæran dag á fjöllum.
Guðmundur G. Kristinsson
Litlunefnd
Nýjustu fréttir eru að allir eru lagðir af stað frá Landmannalaugum, síðasti hópur er við Frostastaðavatn og fyrstu aðilar á leið til baka eru komnir á malbik. Eins og talað var um áður þá gekk betur til baka, en samt var ein affelgun sem þurfti að sinna.
Það hefur verið gaman að fylgjast með deplinum og geta séð allt ferðalagið [url=http://www.depill.is/f4x4:3r4tky40](sjá)[/url:3r4tky40] raðast upp sem heild. Þetta öryggistæki skiptir kannski ekki miklu máli í þessari ferð, en gæti verið mikils virði til sýna ferasögu aðila sem lentu í einhverjum vandræðum og jafnvel væru ekki í sambandi. Þið getið skoðað myndir frá deplinu hér[url=http://www.f4x4.is/index.php?option=com_jfusion&Itemid=235&g2_itemId=299329:3r4tky40](sjá)[/url:3r4tky40]
Guðmundur G. Kristinsson
Litlunefnd
Samkvæmt nýjustu fréttum eru allir komnir í Landmannalaugar sem þangað ákváðu að fara. Einhverjir snéru við á leiðinni og fóru því ekki alla leið inn að Landmannalaugum. Það var verið að spá í að skella sér í laugina og fara síðan að undirbúa heimferð. Á leiðnni til baka verða teknir þeir bílar sem skildir voru eftir, en þeir voru samkvæmt því sem best er vitað tveir.
Það koma síðan í framhaldinu fréttir af bakaleiðinni, en hún ætti að vera fljótfarnari en leiðin inn í laugar.
Guðmundur G. Kristinsson
Litlunefnd
Einar Berg aðalfarastjóri sagði stærsta hluta hópsins vera á sléttunni, en H hópur væri að verða komin niður að Frostastaðavatni. Hann sagði þegar hann leit yfir svæðið að flestir væru í einhverjum erfiðleikum og farið væri hægt yfir. Veðrið er gott og samkvæmt veðurspá á vindur að minnka og kólna með kvöldinu. Þar sem veðurspáin er góð má búast við að haldið verði áfram niður í Landmannalaugar, en gera má ráð fyrir að nokkuð verði liðið á kvöldið þegar hópurinn kemur til baka upp í Hrauneyjar.
Guðmundur G. Kristinsson
Litlunefnd
Hópurinn er að koma upp á Sigölduháls og margir eru fastir þar á svæðinu. Þetta er rétt áður en komið er inn í hraunið. Ólafur sagði veðrið flott, en smá él. Fallegt útsýni er inn á milli fjalla og gaman að ferðast við þessa aðstæður.
Guðmundur G. Kristinsson
Litlunefnd
