Forum Replies Created
-
Replies
-
Sælir/ar!
Þegar ég sá síðasta póst fylltist ég gleði og skoðaði ábentan þráð samstundis. Þar fann ég ekkert sem benti til þess að um væri að ræða læsingu í framdrif og fór þessvegna á heimasíðu Arb (sem er: arb.com.au) og skoðaði hvað þeir bjóða. Og þar var sama staða og síðast: N(ot)A(vailable). Þó voru vonir gefnar; í neðanmálsgrein stendur: late 2003, hvað sem það nú þýðir. En hugsanlega í ekki svo fjarlægri framtíð verður hægt að fá loft í framdrif. Bara ekki strax. Og snjórinn kominn…
Bless Þ
Sæll!
Í þessum bílum var einfaldur gírkassi með tveim gírum sem voru kallaðir hæ og ló. Innvolsið í kassanum var með plánetuhjólum, ekki ósvipað og er í nútíma sjálfskiptingum. Til að skipta um gír þurfti að bremsa einhverju af þessum hjólum og þessvegna voru þarna bremsubönd. Til að halda bílnum í lóinu þurfti bremsuband sem vildi fara ef álagið var mikið og var kallað lov(w)band. Nú hef ég aldrei snert bíl með svona skiptingu, hvað þá skoðað inn í kassann, en ég ímynda mér að þar með hafi lægri gírinn horfið og það hefur ekki verið hollt fyrir framhald ferðarinnar. Þótt það komi svo ekki þessu máli við þá sögðu mér einhverntímann gamlir menn í Bárðardal að það sem helst plagaði frumherjana í ferðinni var skóleysi. Þeir þurftu að ganga svo mikið til að finna færar leiðir að skótauið var allt að gangast upp.
Vona að þetta varpi nokkru ljósi á málið;
kveðja Þ
Jæja þá: Breiður í Skjaldbreiður þýðir auðvitað það sama og í snjóbreiður sem sé; víðáttumikil. Snjóbreiða er náttúrlega enginn smáskafl heldur feikna flæmi. Skjaldbreiður er breiður skjöldur. En málfræðilegt kyn fyrirbæra þarf ekki að vera rökrétt eða vísindalega tengt orðunum sem það er sett saman úr. Þannig er fjörður venjulegast í karlkyni jafnvel þótt Eyfirðingar fari út í Fjörður sem eru í kvenkyni og Fjörðurnar eru þó settar saman af Þorgeirsfirði og Hvalvatnsfirði sem eru karlkynsorð. Það sem ég er að segja er að við getum aldrei fundið rök fyrir því hvers vegna hluti þjóðarinnar kýs að tala um Skjaldbreiði en annar hluti um Skjaldbreið, hvorttveggja þýðir nákvæmlega það sama, frekar en sumir segja sykurinn en aðrir sykrið, sumir jógúrtið en aðrir jógúrtin, sumir fæturnir en aðrir fæturnar. Þetta er bara svona og er búið að vera svona afar lengi.
Bless
Valdi
Jú jú, ef það væri hefð fyrir því að kalla karla kvenmannsnöfnum. En svo er nú ekki, og reyndar bannað í mannanafnalögunum. En þótt það standi Skjaldbreiður á kortum segir það ekkert um hvort orðið er karlkyns eða kvenkyns, nefnifallið er nefnilega eins í kk. og kvk. Svo jafnvel þótt Jónas sálugi hafi talað um breiðan skjöld og segi meira að segja á einum stað í kvæðinu: ?Ríð ég breiðan Skjaldbreið…? þá var hann Norðlendingur og alls óvíst að hann hafi verið kunnugur málvenjum nágranna fjallsins.
En kannski við ættum að láta spjallið niður falla því það er að verða dálítið líkt deilum um keisarans skegg sem aldrei hafa þótt frjósöm skoðanaskipti.
Jamm
Þorvaldur
Nema hvorttveggja sé!
Þ
Sælir/ar (það má væntanlega gera ráð fyrir að kvenfólk lesi spjallið)
Að sönnu er ýmislegt til í því að Skjaldbreiður sé karlkynsorð. Hinir munu þó ekki færri sem hafa það í kvenkyni og þá beygist það eins og t.d. gríður:
Skjaldbreiður
Skjaldbreiði
Skjaldbreiði
Skjaldbreiðar.
Við megum nefnilega ekki gleyma því í löngun okkar til að tala og skrifa laukrétt mál að málhefðin er mörg á landinu og ber því að fara varlega í að fullyrða að eitthvað sé rétt og þessvegna sé annað rangt. Það væri sambærilegt við að fullyrða að úr því að viðurkennt er að réttmætt sé aðmenn aki patrol um götur og slóða þá sé með öllu ólíðandi að einhverjum detti í hug að gangsetja og færa toyotur úr stað. Eigi málhefð sér sögu einhvers staðar er málfar samkvæmt henni rétt. Það gerir ekki annað rangt. Hins vegar er skynsamlegt að sporna gegn örum breytingum á málhefð því það verður til þess að menn missa tengslin við fortíðina og hætta að skilja þá sem eldri eru. Og nógur er misskilningurinn í henni veröld.
(Og nú megið þið geta við hvað ég starfa)
Lifið heil;
Þorvaldur
Sælir!
Kostuðu herlegheitin eitthvað?
Og sé svo; þá hversu mikið?
Með kveðju Þ
Sæll!
Ég á 36" L200 sem er á 35" á sumrin. Á 35" fer ég allra minna ferða, nema yfir bláasta veturinn, og hefi komist á honum upp á Skjaldbreið. Ég segi svosem ekki að ég fylgi 38" bílum eftir alls staðar, en með hæfilegum spotta og í fylgd með þolinmóðum fullorðnum kems maður á leiðarenda. Á láglendi hef ég aldrei komist í þrot. Drifskaftsupphengju hef ég skipt um einu sinni á þessum 130000 kílómetrum sem ég hef keyrt bílinn en það var svosem engin sérstök þörf fyrir það þá, flaut svona með þegar gert var við gírkassa og skipt um kúplingu. Ég hélt reyndar um tíma að hún væri ónýt, var með leiðindatitring í bílnum á ákveðnum hraða en það lagaðist þegar ég keypti BF Goodrich dekk.
Lifðu svo heill: Þ
Sælir/ar!
Af því ég er ekkert unglamb lengur þá langar mig til að minna á hið fornkveðna, sem ég hefi svo sem rekið mig á sjálfur, að ef eitthvað er of gott til að vera satt, þá er það sennilega ekki satt. Og svo rakst ég á þessa vefsíðu: skepdic.com/refuge/insetfuel.html
En kannski er jólasveinninn til.
Í ?Íslenskri orðabók handa skólum og almenningi? stendur: Hringlóttur: *kringlóttur
Kringlóttur: hringlaga. Þetta þýðir á mannamáli að algengasta orðið og það sem orðabókarritstjórinn telur mælt mál er ?Kringlóttur?. Það ber því að fara varlega í það að lýsa því að þeir sem nota orð sem hefur verið í málinu amk. sjöhundruð ár fari ekki með rétt mál. Þetta tiltekna orð er alltént ekki til vitnis um hrakandi málvitund þjóðarinnar og væri betra að aldrei sæjust skrautlegri málblómstur hér í þessum þráðum.
Með stafsetningar og málfræðikveðju
Er ekki dálítill krókur út af hálendinu að fara að Brú um Bárðardal?
Sælir!
Orðið ?vísa? hjá Ólsaranum hefði þurft að vera innan gæsalappa.
Kveðja; Valdur
Sælir!
Í þessum pælingum eru lykilorðin radíus og hringur. Ferill dekks er alltaf hringur og ummál hrings er, eins og hér hefur komið fram, 2x radíus x pí (3,14) Það skiptir engu máli þótt dekkið bögglist og bælist, beyglurnar koma utan við hringferilinn. Nú er það augljóst að ef hleypt er úr þá styttist radíus dekksins. Það þarf þá ekki verulega stærðfræðihausa til að sjá að við þetta styttist líka ummál hringferilsins. Amk. eru það viðtekin sannindi að ef menn stækka hjá sér dekkin, setja td. 38" í stað 31" og hafa þar með auðvitað aukið radíusinn, þá verður hraðamælir vitlaus og sýnir alltof lítið, semsé bíllinn fer lengra á einum hring. Og minn bíll sígur þegar hleypt er úr og þar með styttist radíusinn. Ef menn vilja halda sig við að dekkið verði egglaga við úrhleypingu, og þess vegna styttist ummálið ekki, verða þá að keyra upp á egglögunina og þá er ég hræddur um að sumir bílar færu að hoppa og myndu ökuþórarnir jafnvel verða veikir.
Með hlákukveðjum
Þorvaldur
