Forum Replies Created
-
Replies
-
Svo maður haldi nú enn áfram að vera með leiðindi, enda óforbetranlegur besservisser: Hvar er Hafrárgljúfur við Lakaveg? Ég finn það ekki á mínu korti. Hinsvegar er Fjaðrárgljúfur á þessum slóðum feiknamyndarlegt og alltof lítið skoðað.
Einhvern veginn hef ég ekki trú á því að Pallikristó hafi farið á ekonolæn yfir brúna á Merkigili, amk væri það saga til næsta bæjar, og sloppið lifandi frá því.
Af því að ég er hér á heimavelli gæti ég svosem lagt orð í belg. Þó gæti farið svo að það þætti einhverjum menntahroki, en þá verður bara að hafa það. Menn semsagt berast á banaspjót, þ.e. bera spjót hver (hvor ef bara eru tveir á ferð) á annan rétt eins og tveir menn slást ef þeir slá hvor annan. (Áflog eru semsé ekki slagsmál). Ef menn berjast á spjótum á sennilega að fara að grilla þá því þá sprikla þeir á spjótinu. Og þannig var nú það.
Hitt er svo annað að mörg málglorían finnst hér á spjallinu eins og annarsstaðar þar sem menn tala eða skrifa. Sú sem mér finnst hvimleiðust er svokallaður "erað-ismi" sem mun verða tungunni svolítið skeinuhættur ef ekki verður að gert. "Erað-ismi" felst í því að nú hættir fólk að beygja sagnir og notar vera+nafnhátt. Mér er að ganga vel. Við vorum að spila illa. Hverju er x-mótorinn að skila? Hvað ertu að fá í kaup? Auðvitað eru tilvik þar sem vera+nafnháttur á rétt á sér en það er eingöngu í þeim tilvikum þar sem átt er við stutt, yfirstandandi ástand eður verknað og endalokin eru í sjónmáli. "Ég er alveg að drepast." "Mér leiðist" hljómar hinsvegar miklu betur en "mér er að leiðast." Og svo getur þetta haft mismunandi merkingu. "Ég er að borða hákarl" þýðir ekki það sama og "ég borða hákarl." Geri menn sér ekki grein fyrir þessum mun munu það verða barnabörnin okkar sem ekki geta beygt nokkra sögn, nema vera. Og þar með munum við ekki ná nokkru sambandi við þau, þau munu ekki geta skilið hið gullfagra rit Setrið og þaðan af síður Njálu, ekki einu sinni Litlu gulu hænuna.
Og hvaða erindi á svona pistill inn á síðu jeppamanna? Staðreyndin er sú að við erum Íslendingar. Það sem skilur okkur frá öðrum þjóðum er ekki það að við séum klárari, sterkari, fallegri, betur innrættir en þær. Það sem skilur okkur frá hinum er tungan og menningin. Þann dag sem við missum tunguna missum við líka menninguna því að henni er tungan lykillinn. Kannski væri veröldin ekkert verri þó svo færi, en óneitanlega fátækari því margbreytileikinn gerir lífið þess vert að lifa því. Hvernig væri t.d. umhorfs á þessu spjallborði ef hér skrifuðu eingöngu eigendur rauðra toyota bíla? Halda menn að það yrði fjölbreytt og þar með skemmtilegt? Sem sagt; notum málið að viðurkenndum og viðeigandi hætti því annars missum við tengslin við fortíðina og fábreytnin eykst. Værum við annars ekki fátækari ef við gætum ekki lesið sögur af Páli Arasyni, Guðmundi Jónassyni og bækur Jóns Snælands?
Og nú er mál að linni.
Af því að ég kann á flugvél get ég upplýst af hverju rík blanda er "holl" fyrir bensínvélar. Í flugtaki er gríðarlegur kraftur tekinn út úr bensínmótor. Það eru alþekkt sannindi að mótor undir miklu álagi hitnar talsvert. Nú eru flugvélarmótorar loftkældir og treysta á hraðann til að fá blástur yfir strokkana. Í klifrinu er hraðinn lítill og kælingin því sömuleiðis lítil. Til að bæta þetta upp er blandan höfð svo feit að hún getur ekki öll brunnið. Sá hluti bensínsins sem ekki brennur gufar upp á strokkveggjunum og kælir þá þar með og er síðan blásið út með pústinu. Þegar komið er í hæð þynnir flugmaðurinn síðan blönduna þar til komið er í sk. "best power" hlutfall sem mig minnir að sé 1:14,7. Til að fá minni eyðslu er svo þynnt ögn meira, til að fá "best economy", en ekki of mikið því þá brennur blandan svo hægt að eldurinn er ekki kulnaður þegar stimpillinn leggur af stað upp aftur og getur það valdið leiðindum, ofhitnun og íkveikju. Til að blandan verði rétt er í flestum flugvélum bæði strokkhaushitamælir og afgashitamælir og gjarnan einn af hvoru fyrir hvern strokk. Alfullkomnustu bensínmótorar sem notaðir voru undir lok bensínaldar í DC-7 eða Constellation sprautuðu svo vatni inn í strokkana til kælingar til að hægt væri að hafa blönduna sem allra þynnsta. Mælafjöldinn í þeim fyllti allan framhluta vélarinnar, en samtals voru strokkarnir 28×4=112 og þessir mælar því jafnvel 224 samtals, auk allra annarra s.s. olíuhitamælis og olíuþrýstings o.s.frv. Það var því fullt starf að vera vélstjóri á svoleiðis græju, og langt nám. Sumum vélstjóranna rann svo til rifja að kapteinninn sem hafði miklu styttra nám að baki fékk svo alla gloríuna. Á þotuöld og tölva er nú búið að leggja vélstjórastarfið niður.
Þetta með dísilmótorana kunna sjálfsagt aðrir betur.
Gleðileg jól;
Þ
Þessir naglar eru notaðir í dráttarvélar sem eru talsvert þyngri en þyngstu jeppar, og reynast vel. Fengust þegar ég vissi síðast hjá Bújöfri á Sefossi og kostuðu dáltið, en þó ekki verulega mikið. Kannski er þó spurningin hvort þeir þola hraðakstur en margur bóndinn spólar þónokkuð á afar þungum græjum án skemmda þannig að sennilega myndi þetta gera sig á stórum jeppadekkkjum.
Kv Þ
Alltaf er maður að fimbulfamba! Kannski ég læri bara að telja upp á tíu. Hitt hef ég mér þó kannski til afbötunar að mér datt ekki í hug að menn færu svona nálægt rafgeymi með eld eða möguleika á neistaflugi; ég hef séð of háskasamlegar afleiðingar þess.
Þ
Af hverju kalla allir pitmanarminn hrútshorn? Ég hélt að hrútshorn væri kallað þegar pitmanarmurinn er hliðboginn í hálfhring auk niðurbeygju en ekki þegar hann er beinn eins og á þessum myndum hér á undan (þó að á honum sé að sönnu niðurbeygja). Það má vera öllum þeim ljóst sem eitthvað hafa umgengist sauðfé að þessi pitmanarmur líkist hrútshorni ekki hið minnsta; en hugsanlega kannski, með afar góðum vilja, horni á vaninhyrndum sauð. En förum ekki nánar út í þá sálma.
Kv. Þ
Gjábakkavegur væri heldur ekki nægilega nákvæmt því ef minnið bregst mér ekki var vegurinn sem lagður var yfir Þingvallalægðina fyrir þjóðhátíðina 1974 kallaður Gjábakkavegur, og fór sú vegarlagning ekki hljóðalaust fram. Margnefndur vegur liggur um Gjábakkahraun og Laugarvatnsvelli og gæti því kallast Gjábakkahraunsvegur á meðan ekið er um það, t.d. upp að Bragabót og svo Laugardalsvallavegur, eða þá bara Vallavegur, austar. Hefð á því aðeins rétt á sér að menn viti ekki, eða megi ekki vita, betur á meðan hún er að myndast. Um það hafa fallið fjölmargir hæstaréttardómar í áranna rás. Þetta hefur hinsvegar alltaf legið ljóst fyrir og ástæðulaust að fleipra þar um, jafnvel þótt Vegagerðinni hafi skotist einhvern tímann.
Kv Þ
Menn hafa nú verið kærðir fyrir utanvegaakstur í umdæmi Rolling stones fyrir minna en svona yfirlýsingar. Hitt er alveg stórmerkilegt að menn skuli ennþá kalla Gjábakkahraun og Laugarvatnsvelli Lyngdalsheiði. En kannski sannast hið fornkveðna að ef nógu margir éta upp ruglið hver úr öðrum endar með því að það verður sannleikur. Og þeir sem vilja hlúa að fornum sannindum eru álitnir furðufuglar og afturhaldslarfar. En nú bjarmar fyrir betri tíð; nýr vegur frá Þingvöllum til Laugarvatns mun væntanlega sneiða hjá Gjábakkahrauni og skera Lyngdalsheiði að hluta. Þar með munu fávísir um landafræði öðlast sannleikann eftir áratugabaráttu, en alfaraleiðin mun hafa færst af Lyngdalsheiðinni og í Gjábakkahraunið þegar konungsvegurinn var lagður vagnfær fyrir réttum 100 árum. Um Lyngdalsheiði hefur hinsvegar aldrei legið bílvegur þó nú hilli undir hann.
Kv
Þ
Gleymið því aldrei að 150 bílar þyngjast verulega, eins og svosem allir bílar, við verulegar breytingar. Og þá fer að verða stutt í hámarks leyfilega þyngd. Og fari menn yfir hana verður ekkert tryggingafélag sérlega æst í að greiða út tjón, hvernig sem þau eru til orðin. Margur bíllinn er nefnilega þannig að þegar kominn er einn farþegi um borð verður að sleppa nestinu og biðja einhvern annan að flytja eldsneytið. Kannski er það allt í lagi, en ég held samt að 250 eða 350 bíll sé hentugri.
Þ
"Sendið fyrirspurn til boi@skeljungur.is og hann hefur síðan samband við klúbbin og fær upplýsingar um það hvort viðkomandi félagsmaður sé greiddur."
En þeir sem alltaf eru um hausinn eins og hænurass í vindi; fá þeir engan afslátt? Og fá þá túperaðir meiri afslátt 😉
Minnumst þess að í þessu efni, sem öðrum sem almúganum tengjast, hefur hinum vísu stjórnarvöldum þóknazt allramildilegast að setja reglugerð. Fari einhver af illmennsku eður einbeittum brotavilja fram úr ákvæðum hennar er ljóst að ötulum lögregluþjónum þessa lands, sem starfa ótrauðir nótt sem nýtan dag að því að vernda oss frá delinkventum þeim sem hér fara um með fretum nótt sem nýtan dag, gæti fundizt efni til að draga brotamenn fyrir dómara hvar við þeim blasti gapastokkur, stegla eður gálgi eftir atvikum. En í reglugerðinni segir semsagt:
16.02 Hjólbarðar með nöglum eða keðjum.(1) Þegar snjór eða ísing er á vegi skal hafa snjókeðjur á hjólum eða eftir akstursaðstæðum annan búnað, t.d. grófmynstraða hjólbarða (vetrarmynstur), með eða án nagla, sem veitt getur viðnám. Óheimilt er að nota keðjur þegar hætta er á að það valdi skemmdum á vegi.
(2) Naglar í hjólbörðum á sama ási skulu vera sem næst jafn margir.
(3) Hjólbarðar fyrir ökutæki sem er 3.500 kg eða minna að leyfðri heildarþyngd skulu vera negldir sem hér segir:
a. Lengd nagla út úr nýnegldum hjólbarða má að meðaltali ekki vera meiri en 1,2 mm.
b. Lengd nagla út úr hjólbarða má ekki vera minni en 0,9 mm.
c. Hámarksfjöldi nagla má vera sem hér segir:
90 fyrir felgustærð til og með 13"
110 fyrir felgustærð yfir 13" til og með 15"
150 fyrir felgustærð yfir 15".
d. Hámarksþyngd hvers nagla má vera 1,1 g. Í hjólbarða sem ætlaður er undir torfærubifreið (t.d. jeppa) eða sendibifreið (C eða LT hjólbarði) má þyngd hvers nagla þó mest vera 2,3 g.
e. Hámarksstöðukraftur nagla (sá kraftur sem þarf til að þrýsta inn nagla, sem stendur 1,2 mm út úr sóla hjólbarða með eðlilegum loftþrýstingi, þannig að hann sé sléttur við sólann) má við 20°C (± 4°C) mestur vera:
– 12 daN fyrir hjólbarða sem ætlaður er undir fólksbifreið.
– 34 daN fyrir hjólbarða sem ætlaður er undir torfærubifreið (t.d. jeppa) eða sendibifreið (C eða LT hjólbarða).
f. Í hjólbarða sem er yfir 760 mm (30 þumlungar) í þvermál og ætlaður er undir torfærubifreið (jeppa) er heimilt að nota nagla sem hver um sig er allt að 3 g og mesta stöðukraft við 20°C (± 4°C) 38 daN.(4) Hjólbarðar fyrir ökutæki sem er meira en 3.500 kg að leyfðri heildarþyngd skulu vera negldir sem hér segir:
a. Lengd nagla út úr nýnegldum hjólbarða má ekki vera meiri en 1,7 mm.
b. Lengd nagla út úr hjólbarða má ekki vera minni en 0,9 mm og ekki meiri en 2 mm.
c. Hámarksfjöldi nagla má vera sem hér segir:
110 fyrir felgustærð til og með 15"
150 fyrir felgustærð yfir 15". Naglarnir mega þó vera allt að 200 ef útfærsla og ísetning þeirra er í samræmi við ákvæði sem gilda um hjólbarða sem ætlaðir eru undir torfærubifreið (jeppa) eða sendibifreið.
d. Hámarksþyngd hvers nagla má vera 3 g.
e. Hámarksstöðukraftur nagla má við 20°C (± 4°C) mestur vera 40 daN.(5) Óheimilt er að nota pípunagla, oddhvassa nagla eða annan áþekkan búnað.
Svo mörg voru þau orð og héreftir getum vér sofið rólegir.
Þ
Irpa þýðir, skv. Ásgeiri Bl. Magnússyni, jörp meri eða tröllskessa eða norn, eða eiginlega hin dökkleita. Samkvæmt þessu er líklegast að í Irpuveri hafi meri borið beinin í fyrndinni, nú eða þá skessa, og hafa örnefni spunnist af minna tilefni.
Kv Þ
Það er ekki alveg víst að almennt borgi sig fyrir menn að skrá kerruna sína þyngri en 750 kg til að mega aka á 80 með hana; það er nefnilega ekki alveg víst að þá megi þeir aka með hana. Fari kerran yfir þessi títtnefndu 750 kg verða menn nefnilega að hafa próf á trailer, gamla bílprófið dugir ekki og þaðan af síður það nýja.
Og það held ég,
Þ
Í þessari umræðu gætir talsverðs misskilnings. Menn tala eins og í gang sé að fara eitthvert allsherjar gervihnattaeftirlit með akstri og verða sér til lítils álitsauka með fúkyrðum í garð valinkunnra Stonesaðdáenda og sumir rugla síðan saman við atvinnubíla með ökurita sem aldrei verður settur í einkabíla. Sannleikurinn er hinsvegar sá að hér er um að ræða neyðarsenda sem vinna á sama plani og sjálfvirkir neyðarsendar í flugvélum; þ.e.s. eir fara í gang við högg og skýra þá frá staðsetningu bifreiðarinnar eftir höggið. Þegar slíkir sendar voru settir í flugvélar fyrir fáeinum áratugum stukku líka til lítthugsandi menn og töldu að um væri að ræða stórfellda árás á persónufrelsið. Þær raddir hljóðnuðu síðan þegar einmitt um það leyti varð sviplegt slys á Mælifellssandi þar sem varla leikur nokkur vafi á að allir hefðu bjargast hefði slík græja verið í þeirri flugvél sem þar fórst. Og nú dettur engum í hug að amast við slíkum sendum í flugvélum. Vonandi berum við gæfu til að slíkt verði sett í bíla og gert að staðalbúnaði; það er enginn vafi á að slíkt bjargar mannslífum.
Lifum heilli með neyðarsendi;
Þ
Heppilegast er að fara á tollur.is, finna þar tollskrá og fletta svo í henni. Þá kemstu að því að á radíóleiðsögutækjum er aðeins 24,5% vaskur og örlítið umbúðaförgunargjald. 7 kr. pr. kg af pappa og 3 kr. á kg af plasti. Svo þarftu að greiða tollskýrslugerð ca. 1200 kr. og búið.
Kv; Þ
Þessar græjur eru stilltar á að flassa við 99 km hraða. Til að meintur lagabrjótur njóti vafans í mæliskekkju eru dregin 3% af mældum hraða hans. Þar af leiðir að hver sá sem afmyndaður er á 99 fær rukkun upp á 96 km pr. klst. Og af því má svo draga þá ályktun að Skari hafi grætt 3 km á klst. Hitt er svo annað mál að þessar myndavélar ættu ekki að koma neinum á óvart, sem á annað borð hefur augun opin, því skiltaskógurinn sem varar við þeim nær marga kílómetra í báðar áttir. Og menn ættu að venja sig af að aka með augun lokuð, það getur reynst óhollt fyrir innyflin og útlimina.
Ökum heilum vagni heim á löglegum hraða…
Þ
Í spurningunni, eins og hún er sett fram í fyrsta lið, og eftir honum verður auðvitað að fara, eru réttir svarmöguleikar jafnmargir banaslysum, en mannskaði þýðir banaslys, við litlar ár á vegakerfinu eins og það leggur sig. Þess vegna er Bergvatnskvísl jafn rétt svar og hvað annað.
"Framkantarnir eru komnir á og nánast tilbúnir, en hann notar bílinn lítið,"
En ef hann notar bílinn eitthvað þá fer þar óskoðaður og þar með ólöglegur bíll. Hvað ef hann lendir í óhappi? Hálf er ég hræddur um að tryggingafélög væru ekki hress með að borga slíkt tjón og væru jafnvel til með að neita því. Og hver ber þá ábyrgðina? Ekki vildi ég sitja uppi með hana svo mikið er víst.
Þ
Epnakvörð? Ýlátt?
Reyndar skil ég orðið ýlátt; það er örugglega áttin sem ýl kemur úr, t.d. ef hundurinn spangólar fyrir norðan bæinn þá er norður ýláttin. En epnakvörð finnast ekki í mínum orðabókum. Ef tveim efnum er hinsvegar blandað saman og hlutir færast til gæti það verið stöng úr járni og áli, svonefndur álkarl, sem potað væri í hlutinn til að koma honum á hreyfingu. Það mætti líka blanda saman súrefni og vetni og kveikja í. Þá verður sprenging og vatn frussast yfir viðstadda. Svo væri hægt að hræra saman kjarnaáburði og smjörlíki og búa til sprengju. Og svo mætti lengi telja…
