Forum Replies Created
-
Replies
-
Gunnlaugur hittir akkúrat naglan á höfuðið, svona bull grefur undan virðingu fyrir umræðunni um raunverulegan utanvegaakstur sem skaðar náttúruna. Jón það er rétt að auðvitað ætti maður að senda myndir af förunum á Skógaheiðinni á Ust en maður hefur hreinlega ekki geð í sér til þess þegar bullið nær svona hæðum. Auk þess veit ég ekki betur en að lögregla og björgunarsveitir í umboði lögreglu séu margbúin að keyra framhjá þessum förum þannig að ef það er raunverulegur vilji til að taka á brotum hlýtur málið að vera komið í ferli.
Ég hef nú yfirleitt ekki verið talsmaður þess að utanvegaakstur sé réttlættur en þarna er vitleysan komin yfir mörkin. Þessi uppákoma er svipuð og ef einhver virðir ekki stöðvunarskyldu á gatnamótum um miðja nótt þegar enginn er á ferli, það er vissulega lögbrot í sjálfu sér, maður á að stöðva greinilega á stöðvunarskyldu hvort sem einhver umferð sé eða ekki (hvort sem brot valdi skaða eða ekki), en fjandakornið að dómsmálaráðherra færi að gefa yfirlýsingar um athæfið í fjölmiðlum.
Kv – Skúli
Það er þyngra en tárum taki að verið sé að gera stórmál úr því að breskir sjónvarpsmenn í samstarfi við AT skuli hafa farið með tvö hjól upp á hraunröndina (sem útilokað er að skilji eftir ummerki), meðan skammt frá ofarlega á Skógaheiði er að finna verulega ljót för eftir utanvegaakstur. Það ætti ekki að vera flókið að finna út hverjir voru þar á ferðinni þar sem þetta hefur gerst á fyrstu dögum gosins áður en frysti og meðan aðeins fréttamenn og jarðvísindamenn máttu fara um svæðið, en þarna eru klárlega ummerki sem koma til með að sjást lengi. Eltingaleikurinn er alltaf um eitthvað sem engu máli skiptir fyrir náttúruna en ekki um hin raunverulegu náttúruspjöll. Ekki að ég ætli að gera fólki upp einhverjar skrýtnar hvatir en maður kemst ekki hjá því að velta fyrir sér hvort aðal hvatinn sé örugglega umhyggja fyrir náttúrunni eða hvort þetta snúist bara um einhvern fjölmiðlaleik.
Kveðja – Skúli
Atli fær 9 prik af 10 mögulegum fyrir að koma af stað líflegum umræðum hér á vefnum, þetta move hér er jafnvel enn öflugra en það síðasta. En ég held að þetta séu öfugmæli, þessir gömlu rata alltaf heim, þarf engar áhyggjur að hafa af þeim. Ekkert sem bilar í þeim sem ekki er hægt að fixa til með slaghamri og góðri rörtöng. En það eru þessir nýju sem stoppa vegna heilabilunar og þá er ekkert annað að gera en skilja þá eftir og sækja seinna með bílaflutningakerru. Og afhverju eru svona margir Patrolar hvítir, jú það er til þess að hægt sé að fela þá í snjónum.
Kv – Skúli
Þetta sem Gunni er að nefna hérna er örugglega rétt, björgunarsveitir eru sjálfboðaliðasveitir og auðvitað eru meðlimir þeirra mis lagnir við mannleg samskipti. Reyndar gildir sama um lögreglu þó það sé ekki sjálfboðaliðastarf og hluti af starfsþjálfun að reyna að kenna mönnum eitthvað í þeirri list. En hvað varðar megin þema þráðarins þá held ég að það sé ljóst að það er ekki rétt að beina spjótum að björgunarsveitunum heldur svæðisstjórn Almannavarna. Þar eru allar ákvarðanir teknar um hvað megi og hvað megi ekki, hverju eigi að loka og hverju ekki og hvaða fyrirskipunum björgunarsveitirnar eigi að framfylgja. Ef menn vilja gagnrýna forræðishyggju varðandi aðgang að þessu gosi þá er það þangað sem gagnrýnin ætti að beinast en ekki að peðunum sem hafa það hlutverk að framfylgja þessu.
Almannavarnir hefðu getað valið sér einfaldari leið. Það væri náttúrulega valkostur að sleppa því að reyna að hafa vit fyrir fólki, segja bara hver og einn fer þarna upp á eigin ábyrgð og ef einhverjir drepa sig eða lenda í vanda þá er það bara þeirra mál. Eins og Atli segir hefur gosið áður á Íslandi, en aldrei verið svona viðbúnaður. Einhverjir sjálfsagt myndu brenna sig á rassgatinu eða fá hraunflyksu í hausinn eða festast á litla jepplingnum (eftirlitið dugði að vísu ekki til að koma í veg fyrir slíkt) og þá er það bara öðrum til viðvörunar, en við á stóru jeppunum gætu þá farið þarna um að vild og skoðað það sem við vildum.
Gallinn er bara sá að það er lögboðið hlutverk almannavarna að koma í veg fyrir manntjón og slys af völdum náttúruhamfara og nú var strax nokkuð ljóst að ásókn í að skoða gosið yrði mikil og ýmsir óljósir þættir sem orsaka extra hættu. Í upphafi hættan á að önnur sprunga myndi opnast undir jökli og svo þessar gufusprengingar þegar hraunið rennur yfir snjóinn. Örugglega ekki einfalt að taka þær ákvarðanir sem almannavarnir standa fyrir, hafandi það á bakinu að bera lögbundna ábyrgð á öryggi fólks á svæðinu og stundum hefur örugglega verið sjónarmiðið að betra sé að setja meiri takmarkanir en minni og örugglega oft teknar ákvarðanir sem við nánari skoðun reynast óþarfar eða rangar. Þess vegna er klárlega ýmislegt sem má gagnrýna þarna, ekki spurning um það. Ég hallast samt að því að þessir aðilar hafi sinnt sínu hlutverki hvorki verr né betur en búast mætti við.
Kv – Skúli
Hef eftir áræðanlegum heimildum að góðar líkur séu á að Þórsmerkurvegur verði opnaður fljótlega. Það sem beðið er eftir í því sambandi er áræðanleg merki þess að þennslan í Eyjafjallajökli hjaðni, en eins og komið hefur fram hefur hann haldið áfram að þenjast eftir að gos hófst, öfugt við það sem menn þekkja t.d. úr Heklugosum. Það þótti gefa tilefni til að óttast að ný gosrás opnist, t.d. í toppgígnum sem hefði þýtt skyndiflóð upp á 30 þús rúmmetra á sek. Líkur á því fara minnkandi og þá verður opnað inn í Mörk. Þar er kjörið að nálgast gosstöðvarnar uppi á Morinsheiði og eins að ganga móts við hrauntunguna inn í Hrunagili.
Kv – Skúli
Fyrir hönd okkar sem komu ekki að fullu heilir niður á Egilsstaði vill ég þakka sérstaklega lipurð og góða aðstoð á verkstæðum í bænum. Öll verkstæði voru opnuð og þessir strákar tóku frábærlega á móti okkur. Þarna fékk ég nýjan ytri öxul í Breska heimsveldið sem á heimleið gekk undir nafninu Öxulveldið. Eins veit ég að skipt var um kúplingu hjá Rabbanum sem kom til byggða í spotta og fékk hann kúplinguna og pressuna frítt, raunar í gegnum Fossberg sem var þarna í líkama kóara míns. Eitthvað fleira smálegt var fixað þarna eins og komið hefur fram hér og fyrir bragðið óku allir heim á leið með bros á vör. Frábær þjónusta hjá strákunum á sunnudegi.
Kv – Skúli
Það er vissulega svolítið skrýtið að það megi ganga þarna upp en ekki keyra, þó væri ekki nema upp að vaði. En eins og alltaf ýmsar hliðar á málunum, ég myndi allavega ekki öfunda Sigurð bónda á Skógum að fá traffíkina í gegnum hlaðið hjá sér og í gegnum beitarhólfið.
Kv – Skúli
Þetta er svolítið athyglisverð umræða og eiginlega held ég að allir hafi nú nokkuð til síns máls. Það er í sjálfu sér alveg rétt sem Benni segir hér síðast að það lítur ekkert sérstaklega vel út þegar sumir mega og aðrir ekki. En þessir aðilar eru skráðir inn á svæðið og út af svæðinu þannig að meðan þetta fyrirkomulag er í gangi er fullkomin yfirsýn yfir það hverjir eru hvar ef eitthvað gerist. Og ég held að það sé akkúrat það sem menn hafa verið að velta fyrir sér, meðan þrýstingur í fjallinu er ekki farinn að falla að ráði sé meiri hætta en á venjulegum degi að nýjir atburðir eigi sér stað, mögulega gos í Kötlu. Við þær aðstæður vilja þeir væntanlega hafa frekar meiri ráðstafanir í gangi en minni. Menn eru líklega minnugir katastrófunni í Þrengslunum í síðasta Heklugosi. Ef þetta eru orðnir þúsundir misvel búinna bíla á ferli á misgreiðfærum slóðum þá bætist töluvert stórt verkefni ofan á aðra rýmingu á svæðinu. Ekki hægt að bera það ástand saman við það þegar einhverjir nokkrir jarðfræðingar og fréttamenn eru á ferðinni og til skrá yfir hvern og einn og símanúmer hjá þeim. Þannig að ef menn telja að tímabundið sé aukin hætta á t.d. Kötlugosi er kannski skiljanlegt sjónarmið að hafa umferðatakmarkanir meiri en minni. Þetta snýst um meira en bara hvort leyfa eigi jeppakörlum að fara um, þetta snýst um að stór hluti þjóðarinnar reynir að komast eins nærri og þeir geta, alveg áháð getu og kunnáttu. Reynslan sýnir það, klárlega.
Nú veit ég ekki hvort það sé mat jarðfræðinga að áhættan sé meiri núna en ella, en það er ekki alveg sjálfgefið að lokanirnar séu endilega að öllu leiti út í hött. Hins vegar finnst mér þessu svolítið ofgert og ég held að það sé orðið nauðsynlegt að opna á einhverja möguleika almennings til að skoða gosið. Eins og staðan er núna þegar fólk er góðfúlega leyft að horfa úr mikilli fjarlægð, þá verður það bara til þess að menn eru að reyna að laumast aðrar leiðir sem stundum eru mun varasamari, sérstaklega ef eitthvað fer af stað. Það er mikilvægt að létta takmörkunum eins fljótt og hægt er og ef ekki að koma fram með góðar útskýringar á takmörkunum og skýra alla myndina.
Kv – Skúli
Af því Óskar er að velta fyrir sér hvað þetta hérna er:
[img:a8gbfrci]http://www.f4x4.is/g2/main.php?g2_view=core.DownloadItem&g2_itemId=58651&g2_serialNumber=1[/img:a8gbfrci]Þetta er svelgur sem hefur myndast þarna á síðustu árum. Ísinn þarna sunnan við Útivistarskálann hefur þynnst mikið en vestari Skógaáin rennur þarna undir og nú er svo komið að vatn rennur ofan í hana um þennan svelg. Núna lítur þetta enn verr út þar sem jökulísinn á þessu svæði myndar raunar risastóra trekt sem endar ofan í þessu gati. Það er því betra að steypa sér ekki niður þessa brekku frá skálanum eins og gert var áður, því ekki er víst að maður komist þá undan gatinu. Raunar er gamla leiðin á milli skálana orðin hálf ómöguleg, vænlegra að fara annað hvort frá Fúkka vestur yfir Skógaá vestari og upp eftir endilöngum hryggnum eða koma frá Mýrdalsjökli og fara norður fyrir … en sú leið liggur kannski of nærri gosstöðvunum í dag.
Kv – Skúli
Smá viðbót til áréttingar. Þátttakendum er boðið í hádegissnarl hjá Bílabúð Benna milli kl. 11 og 13. Formleg ræsing er svo frá Select við Vesturlandsveg 13.30, þá sendir formaðurinn fyrsta bílinn af stað. Skeljungur er með 10 kr. afslátt á eldsneyti til skráðra þátttakenda og gildir hann frá og með deginum í dag gegn notkun Skeljungskortsins.
Kv – Skúli
Aðeins um hefðbundnari fjarskipti, þe. VHF
Hvet menn í ferðinni til að nota kallmerki, t.d. nafn og félagsnúmer eða nafn og nafn á hóp ef þeir eru að nota endurvarpana til að koma upplýsingum á framfæri. Í gögnum um ferðina er talað um ákveðna tíma sem notaðir verða til að koma upplýsingum áfram á endurvörpunum, en það er ekkert vitlaust að einhverjir í hverjum hóp séu með skönnun á endurvarpsrásunum. T.d. upplýsingar um færð og aðstæður frá þeim hópum sem eru fremstir gagnast hugsanlega ekki einhverjum klukkustundum síðar.
Kv – Skúli
Á sunnudagsmorgun milli kl. og 10 verður öllum þátttökubílum stillt upp á planinu við Bónus á einskonar jeppasýningu, þ.e. þeim sem ekki þurfa að heimsækja verkstæðin sem Óskar vísar á hérna. Þess vegna er hægt að leggja bílunum þar kvöldið áður, þó ekki fyrr en eftir kl. 18 þegar verslunin hefur lokað. Bónus ætlar svo að opna fyrir okkur á sunnudagsmorgun þannig að menn geta nestað sig upp fyrir heimferðina.
Kv – Skúli
Ekki spurning Gústi. Ég er eiginlega að verða svo hart leikinn af eintómri bjartsýni og tilhlökkun að það stefnir í vandræði, spurning hvort það séu einhverjar töflur til við því.
Ef menn eru orðnir skelfingu lostnir við að horfa á þetta vitlausa veður sem hér hefur ríkt dögum saman á höfuðborgarsvæðinu (þ.e. vitlaust miðað við árstíma) þá vill ég hvetja menn til að skoða hitaspánna næstu viku:
[url:27bda69d]http://www.vedur.is/vedur/spar/thattaspar#teg=hiti[/url:27bda69d]
Strax um helgina fer að frysta þarna og verður meira eða minna frost alla dagana fram að ferð. Borist hafa fregnir af því að enn sé snjór þarna norðan Nýjadals allavega, kannski eitthvað minna á Kvíslaveituveginum.
Kv – Skúli
Góður pistill Dagur. Það væri þarft verk að fá fram í dagsljósið umfang þessa undanþágu-utanvegaaksturs og hvar hann er. Má vel vera að hann sé allur nauðsynlegur og allavega veit ég að sumt af honum er það og menn reyna þá að haga honum þannig að það sjáist sem allra minnst, en dæmin sýna nokkuð skýrt hverjum er kennt um þegar för sjást utan vega.
Kv – Skúli
Verð að segja að ég er nokkuð sammála Óla Hallgríms í þessu. Það verður ekki litið framhjá því að það er víða hægt að finna skemmdir af völdum utanvegaaksturs, en það er ekkert víst að þegar utanvegaaksturinn fór fram hafi það verið svo skýrt að hann muni valda skemmdum. Hjólför eftir jeppa á mjóum dekkjum (eða torfæruhjól sem eru kannski stóra vandamálið núna) sem sjást kannski lítið í upphafi geta myndað vatnsrás sem með tímanum grefur sig og verður bara ljótara og ljótara með hverju ári. Eru allir jeppaeigendur sem aka um landið í stakk búnir til að meta hugsanleg áhrif af akstri sínum? Ég held ekki þó ég sé nokkuð viss um að bæði Hlynur og Snorri hafi þokkalega góða innsýn í þetta og viti hvað mögulega geti valdið skemmdum og hvað ekki. Þess vegna þurfa lögin að vera skýr. Hins vegar er alveg rétt sem Hlynur segir að ef þessum lögum er framfylgt með orðhengilshætti lokast ýmsir möguleikar og akstur yfir Markarfljót er ágætt dæmi um það. Akstur á áraurum eins og þar er veldur klárlega ekki skemmdum, ég veit ekki hvort hægt sé að leysa þetta með einhverju undanþáguákvæði eða hvernig sé hægt að taka á því. Með orðhengilshætti væri raunar hægt að leggja þetta þannig út að bannað sé að fara yfir ár þar sem fært er hverju sinni heldur verði að fylgja ákveðinni línu jafnvel þó hættuminni leið sé rétt hjá. Ég hreinlega lít svo á að það að leita sér að vaði sé ekki utanvegaakstur og væri til í að koma fyrir dóm og verja það, en raunverulegan utanvegaakstur er ekki hægt að samþykkja.
Snorri, reglugerðin um takmarkanir á umferð í náttúrunni inniheldur ýmislegt fleira en reglur um akstur, meðal annars grasmótoraumferð. Ég hef séð stóð grasmótora breyta grasi vöxnum dal inni á hálendinu í svað þannig að það er full ástæða til að hafa líka skýrar reglur um slíka umferð og reyndar hefur mér sýnst að hestamenn hafi tekið talsvert til í sínum hóp, LH er ágætlega meðvitað um þetta. Hættan á skemmdum af völdum þeirra er talsvert annars eðlis en jeppanna. Hófar með járnskeifu stíga ekki beint létt til jarðar og tæta upp grassvörðinn ef hann er veikur fyrir. Á hinn bóginn er ekki þessi hætta á myndun vatnsrása af þeirra hálfu.
Kv – Skúli
Já ég er búinn að vera að horfa á skjálftamælingarnar þarna, greinilega einhver hreyfing á kviku undir jöklinum. Þó svo þetta geti fjarað út í rólegheitum án þess að kvikan brjóti sér leið upp, þá myndi ég ekkert sérstaklega vilja vera beinlínis upp á jöklinum meðan svona hreyfing er í gangi undir honum.
Kv – Skúli
Eins og Atli segir réttilega getur verið erfitt að meta hvaða áhrif aksturinn hefur og hvað náttúran jafnar út yfir veturinn með frostlyftingu og veðrun og þess vegna er farin sú leið að banna frekar meira en minna, láta náttúruna njóta vafans. Þess vegna er orðalagið í lögunum að akstur er leyfður á „snævi þakinni OG frosinni jörð“, ekki „… EÐA frosinni jörð“ eins og Bazza minnti. Það þarf semsagt bæði að vera til staðar. Á sama hátt eigum við auðvitað að láta náttúruna njóta vafans í ferðum okkar, ef við erum í vafa er málið að snúa við eða þræla sér áfram akkúrat í slóðanum þó svo þar sé þungur snjór en létt og auðvelt fyrir utan. Sá slóði sem þarna er ekinn er almennt ekki lengur ekinn að sumri (ef ég er að staðsetja þetta rétt) en ekkert að því að fara hann á þessum árstíma við svona aðstæður þegar allt er beingaddað. Ég er nú almennt frekar gagnrýninn á að menn séu að leika sér mikið á gráa svæðinu í þessum efnum en eftir myndunum að dæma sýnist mér að þessi hópur hafi ekki farið yfir strikið og séu ekki að skilja eftir sig ummerki. Helst að ég setti spurningu við þetta með árbakkann þarna en maður þyrfti að sjá aðstæður betur til að meta það, þreifa aðeins nánar á þeim og svona bakki getur pikkfrosið og verið eins og gler. Getur því verið mun skaðlausara að keyra yfir svona að vetri en á sumri og ef ég er að lesa staðsetninguna rétt er þetta vað sem líka er farið yfir að sumri.
Ég er nú samt í sjálfu sér ánægður með Lárus fyrir umhyggju hans fyrir landinu og við eigum auðvitað að vera gagnrýnin á utanvegaakstur og spá og spekúlera í þetta hvenær við séum örugg um að valda ekki ummerkjum og hvernig sé best að haga ferðinni. Eins og fram hefur komið liggur það ekkert alltaf í augum úti. En það er líka rétt að þessum pælingum þarf svolítið að halda „innan hringsins“, ekki vegna þess að það sé neinn glæpur að velta þessu fyrir sér (nema síður sé) heldur vegna þess að mannsheilinn er snjall í að túlka hluti til verri vegar ef honum sýnist svo og ýmsum sýnist það góður siður að túlka hluti sem snúa að jeppaferðalögum til verri vegar. Í sjálfu sér slæmt að ekki sé hægt að liggja yfir svona pælingum á hreinskiptan hátt á opnum vettvangi, en því miður er það svo.
Kv – Skúli
[url:zgykjohm]http://www.f4x4.is/index.php?option=com_seminar&Itemid=246[/url:zgykjohm]
Þú færð listann upp með því að smella á tölureitinn hægra megin. Þeir sem eru með grænan punkt eru öryggir inni (þe ef þeir staðfesta þátttöku með því að greiða þátttökugjald) og þeir sem eru með gulan punkt eru á bið.
Kv – Skúli
Lauslegt tékk á greiðslum sem komnar eru inn bendir til þess að einhver slatti eigi eftir að borga, en greiðslufrestur rennur raunar út eftir miðnætti. Það er því spurning hvort þetta sé vísbending um að þeir sem eru á biðlista geti farið að hugsa sér gott til glóðarinnar.
Kv – Skúli
