Forum Replies Created
-
Replies
-
Ja, ef þetta er ekki gamall hæsnakofi, þá dettur mér nú í hug safaríkari skýring. Það er náttúrulega alþekkt að rómantíkin blómstrar oft í góðum fjallaskálum. Sú rómantík getur stundum leitt til jafnvel ótímabærra afleiðinga sem rekja má til eggja og frjógunar þeirra. Kannski langsótt, en hljómar vel og ‘hafa skal það sem betur hljómar’.
Hvar er þessi ágæti skáli, bara svo maður geti forðast hann?
Kv – Skúli
Eins og Freyr bendir á sagði Ari fróði ‘hafa skal það sem sannara reynist’ en einhver snéri útúr fyrir karlinum og sagði ‘hafa skal það sem betur hljómar’. Þannig er nú sjálfsagt tilkomið nafnið Jöklasystur á Kerlingunum. En að því slepptu, ‘austara sæluhús’ hljómar eiginlega ekki sem nafn heldur lýsing á staðsetningu, er nokkuð fjarri að álykta sem svo að þessi hús séu nafnlaus og úr því þurfi að bæta? Þetta verður að heita einhverju almennilegu nafni. Rétt eins og ‘nafnlausi fossinn’ í Markarfljóti á bak við Laufafell sem gjarnan er kallaður ‘Rúdolf’ og má það gjarnan festast við hann, enda með fallegri fossum.
Kv – Skúli
Stefán, úr því þú getur svarað þráðum er líklegast að ástæðan fyrir því að þér tekst ekki að stofna nýja þræði eða setja inn auglýsingar sú að þú sért að klikka á einu smáatriði. Það er að áður en sá möguleiki kemur fram þarftu að velja efnisflokk eða auglýsingaflokk. Eftir að þú ert búinn að því kemur upp þar fyrir neðan linkurinn "Setja inn nýja auglýsingu" eða "Setja inn nýjan þráð" (eða eitthvað í þá veru).
Kv – Skúli
Þó ég sé ekki alltaf sammála þeim sem skráður er fyrir þessu kommenti, er ég sammála þessu. Eina leiðin sem ég sé til að koma alveg í veg fyrir þetta er að menn þurfi að sækja um aðgang, en það er svolítið þungt í vöfum og myndi þyngja talsvert á vefnefndinni. Önnur leið er að loka fyrir bullukollana á falsnöfnunum og það er þegar komið í gang. Nú mega frussarar því fara að vara sig.
Kv – Skúli
Benni minn, ég get nú illa tekið við hamingjuóskum þínum, það eru jú sporin sem hræða. Það er augljóst að þessi framtíðarútgáfa kemur til með að skorta allt það sem prýðir Defenderinn í dag og hæfileika hans til að krafla sig áfram í þungu færi í stað þess að setjast á belginn. Þannig er nú það!
Það er nefnilega þannig að þó flestir bílaframleiðendur séu að snúa frá framleiðslu á hásingabílum þá er það ekki vegna þekkingar þeirra á því hvað virkar best í íslenskri vetrarfærð á hálendinu. Mesta furða hvað má smíða úr þessum klafabílum, en að það sé vandræðalaust Benni er nú kannski of mikið sagt.
Kv – SkúliP.s. og svo vil ég fara að sjá æðstaprest klafasafnaðarins svara fyrir þetta, eða er Benni kannski tekinn við embætti af Birni Þorra!
Aðeins félagar geta sett inn myndir.
Kv – Skúli
Sælir félagar
Er einhver hér sem á leið inn í Þórsmörk á næstu dögum? Þarf að koma einhverju dóti inn í Bása.
Ef einhverj getur gripið þetta væri gott að heyra um það í síma 8942920.
Kv – Skúli
Það skýrist af því að eigandi albúmsins getur séð það þó það sé falið fyrir öðrum. Líklega er þá líka hægt að endurvekja það eins og gamlan draug ef áhugi er á því.
Kv – Skúli
Hér eru komin drög að Defender árgerð 2008:
Sýnist að eitt af síðustu vígunum sé að falla. Það er ekki einu sinni hægt að leggja frá sér Guinnessdós á brettin á honum. Örugglega líka búið að troða undir hann klafadrasli.
Kv – Skúli fúli
Þetta er örugglega besti farvegurinn fyrir þetta. Í þetta sinn er um að ræða útlendinga sem vita líklega ekki betur. Það er víst ekki alltaf málið.
Kv – Skúli
Útivistarhópurinn sem Ofsi nefndi er líka kominn til byggða eftir frábæra ferð í dúndur flottu veðri. Það er rétt að Breiðbakur var svolítið bras, snjóskaflar víða en snjór sem engu heldur og þurfti því að ryðja slóð með hjakki. Yfirleitt gekk þó ágætlega þegar slóðin var komin þó stór hluti flotans væru 35“ og undir. Komum í Hólaskjól líklega undir kl. 23, en lungað úr deginum fór í Breiðbak, aðrir kaflar voru fljótfarnir nema hvað veðurblíðan útheimti mörg stopp sem vildu dragast á langinn. Fórum svo Syðra Fjallabak í dag um Álftavatnakróka, Mælifellssand, Álftavatn og hjá Laufafelli og var það pís-of-cake, að vísu víða snjór í niðurgrafinni slóðinni en ekkert sem ekki var hægt að ryðja án vandræða. Semsagt hörkugóð ferð og þó spottakvikindið hafi valdið skaða þegar hann slitnaði, þá meiddist enginn.
Kv – Skúli
P.s. Rétt að koma líka með statistik
13 bílar fóru
13 bílar komu til baka
Engin töppuð dekk
Engin affelgun
2 bílar skemmdir eftir spotta
Allir fengu drátt a.m.k. einu sinni
Olíugjaldshópurinn með Lellu, Glanna og fleiri góða félaga í fararbroddi kom á flottri uppákomu í vor og fékk þetta loforð fram. En nú er komið haust og spurning hvort það sé ekki komið að þessari endurskoðun. Að vísu myndum við fá það framan í okkur núna að dísilolían sé 2,5-3 krónum ódýrari en bensín, en það breytir því samt ekki að hvortveggja er of dýrt.
Bara spurning hvernig sé best að fá því breytt.
Kv – Skúli
Sé að marka [url=http://www.vedur.is/athuganir/sjalfvirkar/setur/:3gwkox5y]snjódýptarmælinn í Setrinu[/url:3gwkox5y] er nú ekki kominn mikill snjór þarna innfrá, en reynslan er að vísu sú að rétt sé að taka honum með fyrirvara. Ég átti allavega von á að það væri meira þarna innfrá af hvítagulli. Mér sýnist hins vegar á veðurspá að það eigi eftir að bætast eitthvað við. Ég myndi því ætla að rétt sé að huga vel að leiðarvali með hliðsjón af því og kannski hvað menn ætla að fóðra vefinn mikið af sögum. Er ekki örugglega einhver sem er fastur í bænum sem ætlar að vera fréttaritari? Eins rétt að hafa góð trökk með í för sem fylgja vegi, því það er auðvitað ekkert undirlag undir fölinni þannig að líklega þarf að fylgja vegi.
En þetta verður örugglega bara gaman, góða ferð.
Skúli
Já það varð einmitt talsverð umræða um þetta hérna á vefnum. Það má því kannski segja að þetta sé ekki tilefnislaus fullyrðing þannig séð, en þarna gildir örugglega um alla þessa þrjá hópa að allir eru dæmdir eftir örfáum vitleysingum. Það er því miður býsna kunnuglegt hjá okkur jeppamönnum og næsta víst að hestamenn þekkja það líka.
Það kítlar auðvitað að gera athugasemd við svona umfjöllun, en því miður er það til lítils. Ef athugasemdin fær umfjöllun gerir það bara illt verra, þ.e. það yrði bara til þess að vekja athygli á einhverju sem líklega tóku eftir og opnar á að þeir sem er í nöp við jeppamenn hamri á þessu enn frekar. Maður heyrir fyrir sér fullyrðingar um að það hafi sannast á jeppamenn að gera svona lagað og svo þræti þeir fyrir það!!!
Kv – Skúli
Lella, það er engin von til þess að rotturnar taki upp hjá sér að svara fyrir þetta, því í þeirra eyrum hljómar níð og árásir sem hrós og hvatning. Þó hef ég heyrt að krafan um baðið sé nokkuð að vefjast fyrir þeim, það þýðir að nú verða þeir að fletta upp í laugaskránni hjá Ofsa og sjá hvaða drullupollur er næstur Rottuveri.
Ella, skráðu mig endilega fyrir tveimur miðum. Ég hef grun um að þetta verði nokkuð massív árshátíð í ár og alveg hætt að treysta annálnum hjá Ellu. Einar Sól er víst líka búinn að vera ótrúlegur við að snapa vinninga fyrir happdrættið, held maður hafi hreinlega ekki efni á að sleppa því að mæta. Verðið er líka bara brandari.
Kv – Skúli
Sú vefnefnd sem kæmist að þeirri niðurstöðu að hún væri búin að ‘klára’ vefinn, ætti að setja af sem fyrst. Svona verkefni má aldrei líta á sem að fullu klárað og góð vefnefnd finnur alltaf eitthvað sem betur má fara.
Kv – Skúli
Davíð nefnir einmitt mál sem fyrir mér var tilefni til þess að taka þessa stefnu upp, sem er umfjöllun hér um árið um Fjallasport. Bílanaust fékk líka einhvern tíman nokkra útreið hér og tók stjórnendur þar nokkur tíma að jafna sig á því, enda hafði umfjöllunin veruleg áhrif á viðskiptin. Þegar verið var að undirbúa gerð nýju vefsíðunnar og leggja upp með hverju við vildum breyta var þetta einmitt á borðinu að reyna að koma í veg fyrir að vefurinn væri vettvangur fyrir persónulegar árásir á menn og fyrirtæki og það má því segja að þar hafi þessi stefna orðið til þó þessu hafi ekki verið framfylgt fyrr með þessum hætti. En sennilega væri óvitlaust að setja þetta nákvæmlega niður á blað og birta á vefnum þannig að þeir sem skrifa viti nákvæmlega á hverju þeir geti átt von.
Varðandi ábyrgðina þá er útgefandi fjölmiðils alltaf ábyrgur, þó staðan sé auðvitað betri þegar skrifin eru undir fullu nafni. Þess vegna setur Mogginn t.d. það skilyrði fyrir birtingu innsendra greina að ekki séu persónulegar árásir þar að finna. Hvar mörkin eru á milli þess að gagnrýna málefni annars vegar og hins vegar að ráðast á einstaklinga getur sjálfsagt stundum verið loðið. En í grunninn liggur munurinn einhvers staðar í muninum á því að segja "þetta er vitleysa sem þú heldur fram" eða því að segja "þú ert vitleysingur" svo einfaldað dæmi sé tekið. En þegar jeppamenn eru annars vegar held ég að það sé útilokað að láta þetta ná yfir tegundaskítkastið þó Patrol/Toyota húmorinn sé að mínu mati löngu orðinn þurrausinn með öllu.
Að lokum vil ég hafna því að þarna hafi haft einhver áhrif hvort viðkomandi hafi sterk ítök innan klúbbsins, slíkt hafði engin áhrif hér.
Ég skal taka á mig ‘sök’ í þessu þar sem vefnefnd hafði samráð við mig um að eyða þessum pósti út. Vefurinn er fjölmiðlill og klúbburinn (og væntanlega þá ég sem formaður hans) ber ábyrgð á því efni sem þar birtist og þetta voru einfaldlega skrif sem ég er ekki tilbúinn til að bera ábyrgð á. Þetta gildir jafnt þó viðkomandi skrifi undir nafni, sem viðkomandi sá þó sóma sinn í.
Það er mín skoðun að það eigi að fylgja því nokkuð fast eftir að vefurinn sé ekki vettvangur til persónulegra árása á einstaklinga eða fyrirtæki, eða fyrir annað efni sem getur hugsanlega leitt til lögsóknar (meiðyrðamál t.d.). Það má vel vera að viðkomandi hafi réttinn sín megin í þessu máli, en við höfum nákvæmlega enga möguleika til að meta það, hvorki stjórn, vefnefnd né almennir lesendur.
Kv – Skúli
Ég get nú ekki tekið undir það að að útvarpsmaðurinn og 4×4 félaginn Páll Ásgeir hafi verið grimmur við mig um daginn frekar en endra nær. Hann var vissulega ekki heldur neitt grimmur við Árna, enda ekki hans hlutverk sem spyrjanda.
Í stuttu máli fannst mér Árni tala svolítið út frá þeim veruleika sem hann vill koma á frekar en þeim sem er. Í dag má keyra eftir vegum og vegir eru skilgreindir í vegalögum og ef það sem þú keyrir á fellur ekki undir þá skilgreiningu ertu í utanvegaakstri. Skilgreiningin er hins vegar nógu víð til að rúma fjallaslóða, hvort sem þeir eru inn á skipulagi sveitarfélaganna eða ekki (enda fæstir þar og hálendið væri nánast lokað með öllu ef það væri krafan). Og hingað til alla vega hefur verið heimilt að stika vegi sem má keyra, enda gríðarlega mikilvægt verkefni út frá umhverfisverndarsjónarmiðum. Það virðist vera landlægur misskilningur að stikun á vegslóðum feli í sér að taka sér eitthvað ákvörðunarvald um hvað megi keyra og hvar ekki, við höfum aldrei verið í neinu slíku, enda er það ákveðið í lögum. Það má vel vera að lög komi til með að breytast um það á komandi árum, en það er bara allt annað mál og kemur þessu stikuverkefni okkar núna í raun ekki nokkurn hlut við. Í sjálfu sér fátt nýtt í málinu með þessu viðtali, nema það varpar betur ljósi á hvaða meinloka virðist orsaka allt þetta upplaup út af engu.
Kv – Skúli
Einar, ertu að segja að oddvitinn hafi beinlínis dregið til baka það erindi sem þeir sendu okkur og staðfest að hreppurinn telji stikun ekki leyfisskylda? Við fengjum jú formlegt erindi undirritað af byggingafulltrúa hreppsins sem hófst á þessum orðum: ‘Að beiðni Jónasar Jónssonar oddivita Ásahrepps er vakin athygli á því að Ásahreppur lítur svo á að stikun vegslóða utan alfaraleiða á Holtamannaafrétti sé framkvæmdaleyfisskyld framkvæmd’. Fáum við skeyti frá þeim þar sem fyrra erindi er dregin til baka?
Kv – Skúli
