Forum Replies Created
-
Replies
-
Vísan er góð, en þetta með miðju landsins er kannski óljósara. Lengi leit ég svo á að það væri á Fjórðungsöldu á Sprengisandi, en nú er ég ekki viss. Hallgrímsvarða er örugglega nærri lagi, en er það kannski þar sem vörðurnar Beinakerling og átján systur eru? Ef svo er þá þarf maður fyrst að finna þessar vörður til að finna miðjuna.
Kv – Skúli
Þessi umræða held ég hafi komið upp hér áður. Það sem Hlynur er sjálfsagt að ýja að hér er að vegurinn liggur ekki yfir Lyngdalsheiðina sjálfa heldur rétt norðan við hana. Ég held það megi samt segja með nokkrum sanni að það er komin löng hefð á að kalla þessa leið Lyngdalsheiði, þó hún liggi ekki um háheiðina. Hafa menn eitthvað betra nafn á leiðinni?
Kv – Skúli
Eik setti einhvern tímann fram ágæta reikniformúlu fyrir þessu sem var svona: eigin þyngd bíls / hæð dekkja (tommur) / breidd dekkja (tommur) og út úr því kemur einhver viðmiðunartala sem segir til um flotið. Því lægra sem sú tala er, því betra flot. Súkka sem er 1280 kg á 33 tommu dekkjum og 12,5 tommu breiðum er þá: 1280 / 33 / 12,5 = 3,10. Patrol (gamli) 2150 kg / 38 / 15,5 = 3,65 sem þýðir þá að það ætti að vera meira flot í Súkkunni á 33 tommum.
(heimild: https://old.f4x4.is/new/forum/?file=bila … tingar/121)Svo hefur þessi tafla verið notuð:
Þyngd jeppa Lágmarks dekkjastærð
Undir 1500 kg 35"
1500-2200 kg 36"
2200-2600 kg 38"
2600 kg 44"
Fyrri aðferðin er hagstæðari léttari bílum og gerir meiri kröfur á þá stóru. Hvað flot í snjó varðar held ég að það geti vel staðist að 33 tommu súkka sé að fljóta betur en 38 tommu patti. Svo er hins vegar ýmsar aðrar aðstæður sem geta orðið á vegi manns á fjöllum þar sem pattinn kæmi betur út, s.s. krapi, skarir og ýmiskonar svoleiðis skemmtilegheit.Kv – Skúli
Mér sýnist allt benda til þess að það verði harðari samkeppni í næstu myndbandasamkeppni, því ef ég skil rétt er þetta glæsilega klipp bara “trailer“ fyrir stórmyndina Gemlingar fara á fjöll. Núna í ár komu bara tvær myndir inn, en þó skilst mér að verðlaunamyndin sem sýnd verður næsta mánudag verðskuldi heiðurinn vel.
Svo hljóta einhverjir að geta veitt Otta samkeppni, því eitthvað eiga menn eftir að fara meira á fjöll. Hvernig er það var ekki einhver að skjóta eitthvað í Trúðaferðinni?
Kv – Skúli
Jú ég er örugglega af gamla skólanum en samt var síðasti jeppi sem ég átti með bensínvél og tölvustýrðri beinni innspýtingu. Gangtruflanirnar voru kannski af öðrum toga en í blöndungsbílum og þær verstu mátti rekja til tölvunnar. Díselrokkurinn er kannski engar 7 sek í 100 enda ef það væri markmið hjá mér að ná þeim tíma sem mest niður dytti mér ekki í hug að fá mér díselbíl og raunar bara ekki jeppa yfir höfuð.
Kv – Skúli
Þetta er eiginlega svo stórmerkileg pæling að hún hefði verðskuldað sér þráð. Þetta var það sem við vöruðum við þegar í ljós kom að fjármálaráðuneytið ætlaði að passa vel upp á á ná sem mestum aur inn á olíugjaldinu í stað þess að kunna sér hóf og hafa díselinn ódýrari. Í framhaldi af aðgerðum okkar átti ég í löngum tölvupóstsamskiptum við framkv.stjóra FÍB um þessi mál. Hann gat svosem alveg sýnt fram á að rekstur díseljeppa væri almennt séð ódýrari þrátt fyrir þetta, en hann gat ekki skilið áhrif gleðistiganna. Svo bætist við að díselvélar og díselbílar eru almennt dýrari og það eru engin áþreifanleg merki um að það breytist. Þegar munurinn á rekstrarkostnaði er þetta lítill hættir hann að hafa áhrif á valið, þá fara menn að velja eftir öðrum þáttum. Fyrir þá sem eru bensíndraugar að eðlisfari er því ekkert annað að gera en að gerast uppvakningur og fá sér sprækan bensínbíl eða skipta um vél. Sjálfur er ég það mikill kolakyndari í mér að ég hugsa að ég haldi mig við olíubílinn. Ég sakna ekki benínvélarinnar með þeim gangtruflunum og veseni sem vill fylgja þeim og finnst einfaldlega olíurokkar skemmtilegri. En það er auðvitað smekksatriði.
Það væri mjög fróðlegt að sjá tölur um þetta, t.d. þegar ár verður liðið frá breytingunni og svo til samanburðar árið á undan. Ekki nóg að taka þá tölur frá umboðunum heldur þarf að vera úr bifreiðaskrá, því margir eru að flytja þessa bensínbíla inn sjálfir.
Kv – Skúli
Já ég myndi segja að það sé óeðlilegt eða óæskilegt að felgur spóli í dekkjunum þó það sé í átökum. Þetta er held ég geti fullyrt óþekkt vandamál á Mudder og GH en kom fyrir á 44“ DC en mér skilst að það eigi að vera úr sögunni núna. Prufueintökin af AT áttu við þetta vandamál að stríða en þar á bæ sættu menn sig ekki við það og þrengdu hringinn þannig að þau verða varla mikið þrengri. Svo er auðvitað hægt að beita brögðum til að komast fyrir þetta vandamál eins og Elli virðist hafa gert. Menn hafa líka talað um að límkítti virki í þessu.
Kv – Skúli
Ási, þessar umkvartanir um að þau séu laus á felgunni er eitthvað sem þú hlýtur að hafa heyrt. Ég veit dæmi þess að þau hafi verið að snúast í felgunni í átökum og mikil vandræði að koma þeim á felguna við affelgun, jafnvel að menn hafi gefist upp á að nota þau og einn veit ég um sem er á þessum dekkjum sem fer ekki undir 10 pund vegna affelgunarhættu. Þetta eru auðvitað ekki einu dekkin sem hafa verið að snúast í felgunni, en það þarf að viðurkenna vandamálið til að taka á því.
Kv – Skúli
Bankinn er búinn að græja þetta til og dráttavextirnir horfnir af kröfunum.
Kv – Skúli
Skemmtileg frásögn Vals af kaffiboðinu með herra og frú Dittó og gott að vandræði þín leystust með hjálp. Við verðum að þróa þessa límmiða einhvern vegin þannig að þeir verði við hæfi jeppakarla og hægt sé að ná bakhliðinni af með almennilegum verkfærum eins og slaghamri og meitli. Þessir límmiðar eru örugglega liður kvennanna að yfirtaka klúbbinn algjörlega úr höndum okkar.
Kv – Skúli
Það er greinilega hið snúnasta mál að keyra þessa tölvuskápa á fjöllum, þegar aðstæður eru orðnar aðrar en á hraðbrautunum botna tölvurnar greinilega ekkert í því hvað er að gerast og reyna að taka völdin af ökumönnum. Þá er eins gott að hafa manualinn á hreinu, drepa á, bíða í 10 mín. taka þrisvar í handbremsuna, fara með faðirvorið, standa á haus á húddinu og starta svo aftur í þeirri von að það virki.
Gott að samband mitt við Breska heimsveldið er hreint og ómengað af svona búnaði, enda skiljum við vel hvorn annan.
Kv – Skúli
Svo ég svari Elíasi þá minnist ég þess ekki að það hafi verið tekin einhver ákvörðun um plássið af stjórn og veit ekki hvað lá að baki þeim mörkum sett voru. Hugsanlega voru þau bara stillt á það sama og á gamla vefnum, en annars veit ég ekkert um það. Vefnefndin er hins vegar búin að breyta þessu þannig að plássleysið ætti ekki að vera að angra menn.
Hins vegar skil ég vel að menn vilji hafa sinn eigin vef og draga gesti að þeim með góðum myndum.
Kv – Skúli
Sæll Ásgeir. Þú sagðir ‘sendi fyrirspurn gegnum síðuna’. Hvernig nákvæmleg? Væntanlega farið í liðinn Hafa samband og valdir þar hvað? Það er væntanlega eitthvað þarna sem er ekki að virka sem þarf þá annað hvort að laga eða bara fjarlægja.
Annars er alltaf öruggast að senda einfaldlega á f4x4@f4x4.is. Það berst þá skrifstofunni sem sér um að afgreiða svona mál.
Kv – Skúli
Hvort stjórnin hefur heimild til að leggja dráttavexti á félagsgjöld veit ég svosem ekki en er alveg sammála því að það er út í hött, segi bara eins og einhver maður sagði einhvern tíman: Svona gerir maður ekki!
Enda stóð þetta aldrei til og er vegna einhverra mistaka í bankanum. Svipuð mistök og urðu til þess að allir á viðskiptamannaskrá, þ.m.t. fyrirtæki sem hafa keypt auglýsingu í Setrinu, fengu rukkun fyrir félagsgjaldi.
Semsagt, við höfðum ekki tekið eftir þessu og höfum samband við bankann á morgun til að láta leiðrétta þetta. Þið megið auðvitað stykja klúbbinn aukalega með því að borga dráttavextina en þið sleppið örugglega með að breyta upphæðinni í 4.200 eða að öðrum kosti bíðið aðeins með að borga þar til búið er að leiðrétta þetta.
Kv – Skúli
Það er út af þessu sem við erum ennþá einstaka kjúklingar á litlum, nettum 38" kleinuhringjum, þ.e. stækkun er keðjuverkandi. Stærri dekk kalla á meira afl, meira afl á sterkari drifbúnað, þessu öllu fylgir svo meiri þyngd og þá þarf aftur stærri dekk …
Kv – Skúli
Eitt sem ég hef heyrt staðfest hjá þeim sem þegar eru komnir á AT dekkin og það er að þau eru hljóðlát og gott að keyra á þeim. Þetta reyndar kemur fram skv. mælingum í greininni hans Þránds sem Freysi vísar til, þ.e. veghljóðið mæist þar 83.5 dB á móti 87.1 dB á Mudder (og GH örugglega ekki hljóðlátari nema síður sé). Það er sjálfsagt skynsemi í því sem margir segja núna að rétt sé að bíða aðeins með að kaupa AT og leyfa a.m.k. ársreynslu að koma á þau á almennum markaði, en ef ég væri að fara að kaupa 38 tommu núna myndi ég þagga niður í svoleiðis skynsemisóráði og slá til. Það er bara frábært framtak að sérhanna dekk eftir íslenskri forskrift og miðað við Íslenskar aðstæður og svo er Freyr náttúrulega búinn að keyra á þessu í þrjú ár.
Kv – Skúli
Það verður að segjast að það er svolítið skemmtilegt að sjá hvernig mýflugurnar breytast oft í úlfalda eða þaðan af magnaðri ófreskjur. Ábending eða athugasemd eins vefnotanda til annars er hér orðin að 20 pistla þræði með ýmsum skemmtilegum setningum eða fullyrðingum eins og t.d. ‘Það væri gaman ef sá eða sú sem ekki stóðst ritskoðunar áráttuna, gefi sig fram’. Reyndar ekki í fyrsta sinn sem svona heyrist.
Persónulega finnst mér reyndar Ólafur hafa allnokkuð til síns máls, átta mig allavega ekki alveg á hvað þessi ágæti brandari hefur að gera á spjallþræði sem fjallar um ferðir á jeppum. Kannski að þeir sem fara hægast yfir og eru síðastir í skála detti út fyrstir og þannig verði jeppaflotinn sífellt betri. En að öllu gamni slepptu þá er allt í lagi að hafa í huga þegar maður setur inn efni á þennan vef að þetta er sérhæfður vefur um tiltekið áhugamál og notendur hans og lesendur skipta þúsundum og koma úr ýmsum áttum. Það gilda því önnur viðmið heldur en ef þetta væri bara einn lítill kunningjahópur sem hér væri að skiptast á skoðunum. Rétt eins og menn haga sér misjafnlega og láta mismunandi hluti fjúka eftir því í hvaða félagsskap þeir eru (flestir allavega). En auðvitað er það hvers og eins að ákveða hvernig hann kemur fram og hvernig hann kynnir sig, svo fremur sem menn séu ekki með meiðyrði eða níð um náungann. Þar verður auðvitað að draga ákveðnar línur.
Kv – Skúli
Sjálfsagt mætti aflið vera meira að ósekju, en Benni það er allavega hughreystandi að sjá að einhvers staðar sé ennþá verið að framleiða jeppa.
Og takið eftir því að þetta er ekki nema 1620 kg, var ekki einhvern tíman verið að tala um að léttleikinn skipti máli. En auðvitað hentar svona jálkur ekki öllum það er engin rassahitari í sætum.
Kv – Skúli
Af því einhver spurði hér um ísetningu á þessum miðstöðvum, þá rakst ég hérna á nokkuð ítarlegar leiðbeiningar fyrir Hydronic.
http://www.espar.com/pdfs/hydronic4_5.pdfEr mikill verðmunur á Webasto og Hydronic, einhver sem veit um það? Klárt mál að svona græja myndi gera gagn í Defender.
Kv – Skúli
Ég held þú gerir nú kannski heldur lítið úr marktækni kannana Guðmundur, það sem fræðingarnir eru að læra í langskólanáminu er hvernig sé hægt að gera kannanir þannig að það sé eitthvað að marka þær. Við sjáum t.d. oft að kosningakannanir sem eru almennilega unnar verða oft býsna nærri úrslitum. Þessar vefkannanir hérna brjóta hins vegar örugglega flestar reglur og eru því engin vísindi, en það gerir ósköp lítið til. Stærsta atriðið þar er að það er mjög lítil áhrif hægt að hafa á það hverjir svara og það er bara lítill hluti félagsmanna sem liggur á netinu. Sá hópur er örugglega ekki neitt þversnið af félagsmönnum.
Með þetta sem Siggi og Ofsi eru að velta fyrir sér held ég að það sé svolítið til í því hjá Ofsa að það er ágætt að ‘neyða’ fram eina ástæðu, þannig að menn verði að velja það sem réði mestu.
Kv – Skúli
