Forum Replies Created
-
Replies
-
Persónulega er ég sammála eik um það að það sé nokkurs virði að náttúran fái áfram að stjórna útliti Langasjós, enda hefur hún unnið þar frábært verk. Hagsmunir klúbbsins eru þar ekki eins augljósir eins og varðandi Norðlingaölduveitu, en þó má segja að þarna séu í veði hagsmunir allra sem ferðast um náttúruna til þess að njóta hennar.
Það er mikið til í því hjá Vals að stefnumörkun í þessum málum innan klúbbsins væri gagnlegt og ljóst að forysta klúbbsins gerir enga stóra hluti í þessum málum öðru vísi en fyrir liggi einhverjar slíkar samþykktir. Það má nefna að innan Landverndar er núna verið að vinna stefnu varðandi hálendisvegi og útkoman úr því verður lögð fyrir aðalfund. Þar er þetta unnið þannig að fulltrúar ýmissa samtaka og aðila sem málið kemur við eru fengnir í einskonar vinnuhóp til að sem flest sjónarmið komi fram, þ.á.m fulltrúi 4×4. Við gætum vissulega farið þá leið að setja saman hóp sem mótaði einhverja tillögu fyrir næsta aðalfund, það gæti auðveldað næstu stjórn að vera aðeins meira áberandi í þessari umræðu.
Kv – Skúli
Þú snýrð dekkinu einn hring og fylgist með hvað drifskaftið snýst marga hringi og hvað stóran hluta af síðasta hringnum. Þetta er ekkert mjög nákvæm aðferð og gefur ekki nákvæma tölu, en gefur vísbendingu. Eitt trikk sem hægt er að nota er að festa bandspotta á skaftið, það auðveldar þér aðeins að telja Eina nákvæma aðferðin er að opna drifið og telja tennur í kamb og pinjon en það er nokkuð mikið fyrirtæki.
Kv – Skúli
Þetta er í sjálfu sér hárrétt. Kannski ekki beinlínis rétt að segja mótmæli en engu að síður pólitísk aðgerð. Það var líka pólitísk aðgerð að sækja um fjármagn til Alþingis til uppbyggingar á VHF kerfinu því ekkert er meiri pólitík en að hafa áhrif á það hvernig sameiginlegum sjóð landsmanna er útdeilt. Það má nefna margt fleira sem er a.m.k. jafn pólitískt eins og að reyna að sporna við mannvirkjagerð við og á jeppaleiðum. Það viriðist líka komið á daginn að stikuferðir séu pólitík allavega að mati einhverra þó við höfum litið á það sem sakleysislega aðgerð í umhverfismálum. Mótmælin gegn olíugjaldinu sem klúbburinn stóð fyrir voru náttúrulega hápólitsk. Það er nefnilega aldrei neitt að flækjast sérstaklega fyrir okkur að skipta okkur að pólitík nema þegar kemur að mannvirkjagerð á hálendinu, þá sérstaklega virkjanaframkvæmdum og jafnvel hálendisvegum, þó þarna séu í sumum tilfellum mál sem hreyfa rækilega við augljósum hagsmunum okkar, ekki síður en önnur mál sem hér eru nefnd.
Kv – Skúli
Þetta finnst mér vera mjög skýrt hjá þér Þorkell og er einmitt það sem málið snýst um að mínu mati. Ég get líka tekið undir að Benni er málefnalegur í þessu og einmitt þess vegna er skemmtilegt að skiptast á skoðunum við hann.
Benni segir:
“.það eru samt alls ekki allir sem eru tilbúnir að sitja í félagsskap sem rís upp á afturlappirnar og mótmælir framkvæmdum við virkjanir og setur sig þar með í flokk með félagsskap eins og nátturverndarsamtökum íslands og fleiri slíkum sem sletta skyri og stunda skemmdarverk á eigum landsmanna.“
Þetta finnst mér mjög vafasöm rök. Það er þessi uppstilling sem á vissum stöðum er haldið á lofti m.a. og kannski einkum af stjórnmálamönnum að ef fólk hefur eitthvað að athuga við einstaka framkvæmd við virkjanir séu menn í hópi skemmdarverkamanna eða lopapeysuhippa. Ég er ekki viss um að þessi hugsun nái mikið út fyrir ramma stjórnmálanna, sérstaklega síðustu ár. Almenningur er farinn að meta einstaka virkjanakosti út frá hvort glóra sé í þeim eða ekki en ekki út frá flokkslínum og er það mjög jákvæð breyting. Nú þarf þessi hugsun að ná inn í stjórnmálaflokkana líka, þá myndi nú margt breytast.
Það er eitt að sletta skyri á ráðstefnum og annað gera athugasemd við að vinsæl jeppaleið inn að skála okkar sé eyðilögð eða gildi eigna klúbbsins skert. Þessi hugsun að “annað hvort ertu með okkur eða móti“ er bara til þess að drepa niður alla skynsamlega umræðu og virkjanaumræða á Íslandi má ábyggilega ekki við því (enda er henni stýrt af stjórnmálamönnum).
Ég held að þið detti engum í hug að klúbburinn skipti sér af umræðum um allar virkjanaframkvæmdir. Mér finnst Benni nefnilega aðeins snúa röksemdinni á hvolf. Spurningin er raunar, er hægt að standa á því að klúbburinn taki ekki þátt í umræðu um virkjanir JAFNVEL þó umrædd framkvæmd hafi umtalsverð áhrif á hagsmuni klúbbsins og ferðamennsku félaga hans. Ef svarið við því er nei er klúbburinn í raun að taka afstöðu. Ef nágranni minn grefur skurð í gegnum garðinn minn er ég í raun að samþykkja gerðir hans ef ég horfi á án þess að gera neina athugasemd. Það kann að vera að það felist í því pólitík að gera athugasemdir við að algengar ferðaleiðir okkar séu eyðilagðar með virkjanaframkvæmdir, en það er ekki síður pólitík að þegja þunnu hljóði í málum þar sem við höfum augljósa hagsmuni. Þá eru menn að láta hagsmuni sína sem jeppamenn víkja fyrir einhverjum öðrum hagsmunum, því fæstir erum við bara jeppamenn heldur jafnframt eitthvað annað, s.s. verktakar, eðilsfræðingar, smiðir eða framsóknarmenn. Á hinn bóginn hafa t.d. virkjanir neðar í Þjórsá augljóslega engin áhrif á okkar ferðamennsku eða hagsmuni klúbbsins og við höfum einfaldlega ekkert að leggja fram í þeirri umræðu.
Kv – Skúli
Þorkell, þér er alveg óhætt að treysta því að gagnrýni Verkfræðingsins á stjórnina heldur ekki fyrir mér vöku. Helst að ég hafði áhyggjur af því að innlegg hans yrði til að fleiri myndu ekki tjá sig um þetta mál, en gott að það varð ekki raunin.
Mér finnst alltaf athyglisvert sjónarmið Rúnars Inga og þær rökræður sem við höfum átt um þessi mál og ég hafði mjög gaman að því að ræða þessi mál við hann þegar við áttum þessi orðaskipti sem hann nefnir. Enda er þarna gallharður Landrover maður á ferð og hefur því glögga sýn á alla hluti. Þó Rúnari þyki ég hafa verið heldur varkár í að leggja fram afstöðu fyrir hönd klúbbsins, þá held ég að við séum í stórum dráttum sammála. Ég held ég geti sagt að ég hafi lýst nokkuð skoðun minni í þessum málum í febrúarblaði Setursins 2003 og stend enn á þeirri skoðun sem ég setti fram þar (fyrir þá sem nenna að flétta því upp).
Af þeim sem hafa kosið í skoðanakönnuninni sem nú er í gangi telja 54% að klúbburinn eigi ekki að taka afstöðu í virkjanamálum, 46% á andstæðri skoðun. Þessi spurning er auðvitað nokkuð opin en um leið má segja að hún er laus við að vera leiðandi og því nokkuð góð. Þetta dæmi með Snæfell og það hugsanlega dæmi sem ég dró upp um áhrif Norðlingaölduveitu sýnir raunar mjög skýrt fram á að virkjanamál geta haft mikil áhrif á þá jeppamennsku sem klúbbfélagar eru að ástunda. Það getur gerst með ýmsum hætti og einn þáttur í því er að skálarnir missa gildi sitt og verða einskis virði nema til að sækja bætur í sjóði orkufyrirtækja. Þannig getur t.d. farið fyrir Réttartorfu og sömuleiðis Þeystarreykjum sem að vísu er ekki í eigu klúbbsins en Húsavíkurdeild hefur lagt mikla vinnu og fjármuni í hann. Þó svo megi setja spurningamerki við hvaða umboð stjórn klúbbsins hafi til að taka afstöðu í einstökum málum, þá held ég hljóti að vera óumdeilanlegt að þegar framkvæmdir snúa beint og með óyggjandi hætti að hagsmunum klúbbsins geta hendur stjórnar tæplega verið bundnar.
Kv – Skúli
Núna í kvöldfréttum var rætt við formann Ferðafélags Fljótsdalshéraðs um rekstrarörðugleika skála þeirra við Snæfell, en gistinóttum í skálanum hefur fækkað verulega upp á síðkastið. Sama á við um skálana við Egilssel og Geldingafell. Þetta er rakið beint til þeirra framkvæmda sem eru á svæðinu, bæði er orðinn skotvegur inn að Snæfelli þannig að í stað þess að gista í skálanum fer fólk í dagsferðir þarna inn eftir og svo hafa framkvæmdirnar sem nú eru raunar allt í kringum Snæfell dregið úr aðdráttarafli svæðisins til útivistar.
Svosem ekkert sem þarf að koma á óvart, en leiðir hugann að því hvaða áhrif Norðlingaölduveita gæti haft á rekstrargrunn Setursins, svo ekki sé talað um ef líka væri farið út í virkjanaframkvæmdir í nágrenni Kerlingafjalla með tilheyrandi vegagerð. Við þetta væri kominn mjög greiðfær og fljótfarinn vegur í næsta nágrenni skálans beggja vegna og allur spenningur við að fara yfir Sóleyjarhöfða horfinn. Það væri upplagður sunnudagsrúntur á slyddara að renna inn á Kjöl fá smá spotta af röff vegi frá Kerlingafjöllum og að stíflu við Norðlingaölduveitu eða annars konar brú á Þjórsá, fá sér kaffisopa í Hrauneyjum og brenna svo í bæinn fyrir kvöldmat. Þetta með röff veg þarna á milli er að vísu háð því að ekki verði talin þörf á vegtengingu á milli þessara svæða.
Var bara að velta þessu fyrir mér með hliðsjón af könnuninni sem nú er í gangi á vefnum.
Kv – Skúli
Það var náttúrulega ákveðið vandamál að niðurstaða komst aldrei í þetta atriði, þrátt fyrir mjög miklar og málefnalegar umræður. Þó vissulega blasi niðurstaða umræðunnar við hverjum sem skilja vill að Guinness er góður og berbrjósta bardömur sjást helst á fjöllum.
Kv – Skúli
Benni, hvernig var það, hvað varð svo um þetta áhrifamikla skaft?
Kv – Skúli
Það er reyndar ekki frá miklu að segja sem stendur. Í nóvember fundaði umhverfisnefndin og stjórn til að ráða ráðum okkar og var ákveðið að óska eftir fundi bæði með ráðherra og umhverfisnefnd Alþingis. Þetta komst hins vegar ekki á koppinn fyrir jól og því er þetta enn fyrirliggjandi verkefni. Ætlunin er að fundurinn með nefndinni sé aðallega til að kynna fyrir henni starf okkar. Svo er spurning hvort fundurinn með ráðherra leiði af sér massívt samstarf, við hljótum allavega að túlka þetta svo að það sé vilji til þess.
Svona til að allrar sanngirni sé gætt í þessari umræðu hér að ofan, þá er rétt að nefna eitt sem er að fyrir líklega u.þ.b. tveimur árum veitti ráðuneytið klúbbnum styrk upp á 200.000 til útgáfu á bæklingi um utanvegaakstur fyrir erlenda ferðamenn.
Kv – Skúli
Gaman að eiga þennan punkt. En annað af þessum slóðum, á einhver punkt af gosstöðvunum í Gjálp frá 1997?
Kv – Skúli
Ég held að það gildi í raun sama um óbreytta og breytta jeppa, þegar bílaleigur leigja út þessa bíla þarf að gera leigutaka grein fyrir ýmsum atriðum, s.s. reglum um utanvegaakstur, hættum sem fylgja akstri á malarvegum og ef bílarnir eru breyttir þá hvaða áhrif það hefur á akstureiginleika. Utanvegaakstur er alltaf slæmur og ekkert verri á breyttum bíl en óbreyttum (nema síður sé, skurðarskífur valda meiri skaða en úrhleypt 38“). Ég myndi hins vegar ekki leiga neinum minn bíl og á yfir höfuð erfitt með að hleypa nokkrum manni undir stýri á honum, en það er bara tilfinningalegs eðlis. Ég held að það sé ágætt að breyttir bílar séu fáanlegir á bílaleigum, en eins og ég segi þá þarf bílaleigan að uppfræða leigutakann áður en honum er hleypt af stað. Um hávetur myndi ég líka segja að túristar og raunar allir óvanir þurfi að hafa leiðsögn.
Kv – Skúli
Skelltu þér til Rikka í R. Sigmundsson. Hann á allt í þetta og veit allt.
Kv – Skúli
Þakka öllum sem mættu upp við Rauðavatn til að taka á móti Gunna. Þetta tókst vel og var hinn skemmtilegasti jeppatúr þó ekki væri hann langur. Heyrði þá tölu að 69 bílar hafi mætt á svæðið en það er sami fjöldi og fjöldi klukkutímanna á pólinn. Góður hópur miðað við að þetta ber upp á jólin og eiginlega um nótt. Við jeppamenn sem höfum fylgst með þessu afreki Gunna þykir mörgum að fjölmiðlar mættu sýna þessu meiri áhuga, en við erum allavega búnir að sýna að okkur þykir mikið til þessa koma.
Það er vonandi að okkur gefist færi á að heyra meira af ferðasögunni hjá honum síðar, en hann gaf sér tíma þarna í snjókomunni til að segja okkur aðeins frá ævintýrinu.
Kv – Skúli
Fánar fáanlegir í rauðum Defender YB554. Meðan birgðir endast.
Kv – Skúli
Örn, ég er með CB í bílnum ég skal tala í báðar þegar hann kemur. Segjum rás 13 am, gengur það?
Kv – Skúli
Eigum við ekki að segja 500 kall þannig að klúbburinn fái eitthvað upp í framleiðslukostnað.
Kv – Skúli
Ég mæti með fínasta kampavín handa kappanum frá klúbbnum, ekki spurning.
Kv. – Skúli
Sælir
Ef ekkert fer úrskeiðis lendir kappinn kl. 23.30 í kvöld með flugi frá London. Hugmyndin er að stilla upp jepparöð ofan við Rauðavatn um kl. 1 í nótt en það má búast við að það taki hann allavega einn og hálfan til tvo tíma að komast í gegnum flugstöðina og keyra að Rauðavatni. Við skulum samt gera ráð fyrir að hann verði snöggur í gegn og þau keyra örugglega ekki á neinum hægagangi heim þannig að ég held að við ættum ekki að vera seinni en kl. 1, það er ekkert mál að bíða þar í rólegheitum einhvern tíma. Þegar þau nálgast hringtorgið við Rauðavatn ætlar Sæunn eiginkona Gunna að hringja og láta vita.
Væri fínt ef þeir sem ætla að mæta sendi mér tölvupóst á skulihs@islandia með bílnúmeri þannig að ég viti eitthvað um það hvað margir koma. Verðum svo með VHF í gangi á rás 51.
Kv – Skúli
Smá viðbót, þeir sem eiga fána klúbbsins endilega takið þá. Ég verð með nokkra auka með mér sem er hægt að fá á "sérstöku jólatilboði" ;o)
Sælir félagar og gleðileg jól. Ég hef ekki fengið neinar nýjar fregnir af heimkomu Gunna, en eins og Eik bendir á segir Morgunblaðið hálf tólf í kvöld og svo sé ég á Sudurland.net segja þeir snemma á annan í jólum. Miðað við þetta gæti verið að þeir sem vilja taka þátt í heiðursverði þurfi að vera klárir í bátana einhvern tíman í nótt, en ég læt vita hérna ef ég heyri eitthvað nýtt.
Kv – Skúli
P.s. Strákar verið ekkert að hafa áhyggjur af þessum efasemdum Hjartar. Hafi hann efasemdir má hann það og hefur rétt á að tjá sig þar um, en við vitum og það liggur nokkuð ljóst að hann er einangraður í þessum málflutningi og hann endurspeglar hvorki sjónarmið klúbbsins, vefsins né félagsmanna 4×4.
