Forum Replies Created
-
Replies
-
Það er líka rétt að hafa í huga að það að versla í gegnum Benna er raunar sambærilegt við að panta sjálfur beint að utan, nema það er milliliður sem tekur að sér umstangið við að panta. Það getur verið ágætur kostur og sjálfsagt oftast ódýrara en þegar verslað er í verslun hér heima, en munurinn að verslanir hér þurfa að hlýta ákveðnum lögum um neytendavernd. Þegar keypt er framhjá þeim, hvort heldur er með því að panta sjálfur að utan eða með millilið, þá gilda ekki sömu reglur um þau viðskipti. Betra verði getur því fylgt áhætta. Með þessu er ég þó ekkert að leggja dóm á þessi mál sem hér hafa verið dregin fram, en ágætt að gera sér samt grein fyrir þessu.
Kv – Skúli
Þessi birting á ferlum hefur fengið þokkalega umfjöllun sem er í sjálfu sér ágætt þó sjónarmið séu mismunandi og eflaust megi gagnrýna ýmislegt. Það er t.d. alveg hægt með réttu að setja spurningamerki við birtingu vetrarferlana, enda var það í sjálfu sér "aukaafurð" í þessu. Hefðu þeir verið birtir fyrir t.d. 3 árum hefði það sjálfsagt ekki þótt tiltökumál, en auðvitað hefði verið rétt að vinna birtingu á þeim í samræmi við sprungukortaverkefnið sem er í gangi. En eins og margir hafa bent á er birting á vetrarferlum aldrei annað en sagnfræðileg heimild.
Það hins vegar vakti athygli mína það sem stóð í fréttinni frá Umhverfisstofnun (birtist í blöðum og er líka á ust.is). Þar segir:
"Á vegum ráðuneytisins er starfrækt nefnd sem vinnur að því að gera miðlæga skrá yfir allar löglegar akstursleiðir á Íslandi og [b:21b3g09r]telur stofnunin að upplýsingum og ábendingum eigi að koma á framfæri á þeim vettvangi[/b:21b3g09r] en ekki með birtingu GPS kortagrunns sem hætt er við að margir muni nota sem ferðakort. "
Það sem mér leikur forvitni á að vita og mætti kannski spyrjast fyrir um hjá stofnuninni er með hvaða hætti ráðuneytið hafi boðið upp á að athugasemdum sé komið á framfæri og út frá hvaða gögnum maður geti gert athugasemdir. Það hefur allavega farið framhjá mér og ég get ekki gert athugasemdir við þessa vinnu nema vita hvað er verið að ræða og hvaða mynd slóðakort ráðuneytisins er að taka á sig. Ég held að því miður hafi hreinlega verið mikil tregða hjá ráðuneytinu að upplýsa það. Einmitt þess vegna fagnaði ég birtingu ferlanna hér á f4x4, en ef ráðuneytið býður upp á upplýsingar um þessa vinnu væri það auðvitað lang best og birting ferlanna hérna með öllu óþörf. Mér hefur hins vegar ekki dottið í hug að þessi grunnur sé að segja mér eitthvað um hvar ég megi aka og hvar ekki og held að fæstir séu að taka þessu þannig.
Hvað merkir græni liturinn? Sé eitthvað af grænum leiðum á svæði F, m.a. veginn út á Kjálka í Skagafirði, austan við Jökulsá Austari, en það er allavega að hluta þjóðvegur og liggur að bænum Keldulandi sem er í byggð og svo áfram fram hjá honum inn að Merkigili.
Kv – Skúli
Þetta er alveg gilt sjónarmið sem Leifur setur hér fram, þ.e. hvort hefði verið betra að merkja strax fleiri leiðir sem lokaðar að sumarlagi. Hitt er líka gilt sjónarmið sem Jón hefur sett fram einmitt sem svar við þessum punkti, þ.e. að það sé ekki hans hlutverk eða fámenns hóps sem vann þetta mikla verk að ritskoða ferlana fyrirfram heldur eigi það að gerast með opinni umræðu. Hér er allavega komin fram ein ábending sem ég get tekið undir og örugglega margir fleiri og það er að leiðin inn í Arnarfell sé merkt lokuð.
Það þarf allavega að liggja ljóst fyrir hverjar séu forsendur þessa gagnagrunns, þ.e. að þetta eru gögn til skoðunar og til að skapa umræðu (eins og þessa), en ekki að menn geti hlaðið þessu niður og ekið hugsunarlaust eftir öllum þeim leiðum sem þarna koma fram.
Hugsanlega er það rétt að þetta sé vatn á myllu "jeppahatara" og einhverjir muni nota þetta gegn okkur. Þá skiptir máli að svara því með þeim hætti að stýra umræðunni inn á plan skynseminnar.
Kv – Skúli
Þetta fyrirbæri gæti kannski virkað sem arftaki Freelander, í besta falli Discovery eins og hann er í dag, en að þetta sé arftaki Defenders er náttúrulega álíka og ætla að láta einhvern tvistpoka-kjölturakka koma í stað smalahundsins. Þegar fyrsti Landroverinn var þróaður var prinsippið að hafa notagildi framar þægindum og við prófanir sködduðust fleiri ökumenn en ökutæki, en nú er semsagt gerð krafa um að bíllinn fari vel með fólk, það eru náttúrulega helgispjöll. Ekki það að þegar ég keypti Defenderinn fannst mér ökumannssætið bara býsna gott, en það skýrist kannski af því að áður átti ég 4Runner.
Það sem er verst af því sem sést á þessum myndum eru náttúrulega þessi low profile dekk, halda þessir andskotar að Defnender sé einhver hraðbrautadrossía?
Kv – Skúli
Ekki rétt Samúel, utanvegaakstur er bannaður óháð eignarhaldi á landinu. Í sumum tilfellum getur þetta virkað einkennilega, en svo er líka rétt að hafa í huga að margar viðkvæmar náttúruperlur eru í einkaeign. Landeigendur mega ekki gera hvað sem þeim sýnist í óræktuðu landi.
Kv – Skúli
Ég var að hlusta aðeins betur á þennan málflutning Páls. Það eru nokkur atriði hjá honum sem allavega orka verulega tvímælis eða er beinlínis rangt. Hann fullyrðir t.d. að allur akstur sé bannaður innan friðlandsins í Þjórsárverum nema á beltatækjum. Í auglýsingunni frá 1987 er ekkert minnst á beltatæki heldur snjóbíla og það má leggja mismunandi túlkun í það eins og ég nefndi hérna að framan, má vel vera að minni túlkun væri hafnað fyrir dómi, en það breytir því ekki að það er ekki talað um beltatæki eins Páll fullyrðir. En þar fyrir utan má aka á merktum slóðum og það kemur skýrt fram. Hvað eru merktir slóðar er ekki skýrt frekar sem er auðvitað vandamál, hugsanlega þeim sem finnast á einhverjum kortum, en allavega er skýrt að það er gert ráð fyrir akstri á slóðum.
Annað sem Páll er líklega að lepja upp eftir sýslumanni sem tapaði nokkrum umdeildum málum fyrir nokkrum árum og það er að öll mál vegna utanvegaaksturs strandi á deilunum um hvar er vegur. Umrædd mál sýslumannsins strönduðu vissulega á því en sem betur fer eru allnokkur dæmi um dóma sem gengu í gegn þar sem sannanlega var ekið utan vega. Það er því út í hött og eiginlega hættulegt að segja eins og Páll að eftirlit sé tilgangslaust. Þarna komum við aftur að því að það þarf að gera greinamun á hvort verið er að kæra fyrir hreinan og kláran utanvegaakstur utan við alla slóða eða hvort kært er fyrir akstur á slóðum sem hugsanlega eru ekki að skapi einhverra aðila. Eitt er að aka einhvers staðar úti í móa, það er hægt og hefur verið kært í slíkum málum með góðum árangri. Annað er að aka á slóð sem á sínum tíma var rudd með jarðýtu þó hún sé ekki með veganúmer hjá Vegagerðinni eða hefur verið ekin áratugum saman, en fyrir þetta hvortveggja hefur verið kært og sem betur fer vil ég segja án árangurs.
Kv – Skúli
Agnar ég túlka reglugerðina á sama hátt og kemur fram hjá Ofsa, þ.e. að jeppi á stórum dekkjum með úrhleypt sé snjóbíll, s.s. bíll sérstaklega útbúinn til aksturs á snjó. Eins og Ofsi segir er reglugerðin barn síns tíma og skilgreinir ekki frekar hvað sé átt við með snjóbíl. Sjálfsagt er 50/50 hvort dómstólar myndu samþykkja þessa túlkun, en ef menn kjósa að túlka þetta þannig að snjóbíll þurfi að vera bíll sem búinn er á beltum eru menn á villigötum því ég held að ef eitthvað er sé meiri hætta á að slíkt tæki valdi spjöllum heldur en mun léttari bíll á mjúkum gúmmídekkjum.
Kv – Skúli
Páll hefur örugglega komið gangandi inn í Nautöldu og vissulega töluvert um það að þarna sé gengið að sumarlagi.
En hárrétt hjá Ofsa að sumt kann að vera rétt í þessu hjá Páli, allavega það að margumræddur slóðagrunnur er það sem þarf til að fá einhverjar skýrar línur í þessu. En ég spurði mig einmitt þegar ég hlustaði á þetta á hvaða tíma Skagafjarðardeildin var þarna og hvað hefur Páll fyrir sér í því að þetta hafi verið utanvegaakstur en ekki snjóakstur. Tímasetning kom ekki fram.
Eins finnst mér alltaf villandi framsetning þegar blandað er saman umræðu um utanvegaakstur og umræðu um hvaða slóða eigi að leyfa akstur á. Akstur á slóða, þó umdeildur kunni að vera, er ekki utanvegaakstur. Jafnvel má segja að akstur á slóða sem búið er að banna akstur á er ekki utanvegaakstur þó það sé vissulega brot af öðru tagi. Með því að blanda þessu saman eins og Páll og fleiri hafa gert er verið að þvæla umræðuna og flækja og það verður ekki til að auðvelda baráttu gegn landspjöllum af völdum utanvegaaksturs.
Raunverulegur utanvegaakstur sem skilur eftir sig ummerki í landinu er hins vegar til staðar, því miður. Hvort hann fari minnkandi eða vaxandi veit sjálfsagt enginn, þó ýmsir hafi eitt og annað á tilfinningunni í þeim efnum. Það skiptir raunar litlu hvort er. Ég gekk um daginn hringinn í kringum Hrafntinnuhraun og verð að segja að það olli mér vonbrigðum hvað ég sá víða bílför, langt frá öllum slóðum. Töluvert af förum sunnan eða vestan við slóðina sem dæmi. Þetta var tæplega eftir útlendinga á bílaleigubílum, heldur greinilega breyttir jeppar að finna sér leið framhjá krapa. Ég hef alltaf sagt að við sem ferðumst á jeppum eigum að viðurkenna tilvist vandans og reyna að hafa áhrif innan okkar hóps til að útrýma vandamálinu, en það verður að segjast að órökrétt sleggjudómaumræðan sem á alltaf svo greiðan aðgang í fjölmiðla er svosem ekkert að hjálpa til í þeim efnum.
Kv – Skúli
[quote="Atli":1cymfi1q]Það væri einmitt stuðið í þessu – s.s. að reyna eitthvað sem er ekki hægt.[/quote:1cymfi1q]
Mundu bara Atli að það sem ekki er hægt tekur bara aðeins lengri tíma. Eða er það kannski þveröfugt, það sem ekki er hægt hlýtur þá að vera hratt.
Annars skildi ég það þannig að vandræðin í síðasta túr hafi komið löngu áður en komið var að vandamálakaflanum.
Kv – Skúli
Nákvæmlega, ekkert nýtt við það og þar er góður grunnur að byggja á.
Kv – Skúli
Úr því að umræðan er farin að róast hérna og Ofsi búinn að fá sitt út úr þessu þá er kannski í lagi að blanda sér í umræðuna. Það er rétt hjá Ólsaranum að þetta er ekki ný hugmynd. Hér fyrir allnokkrum árum þegar ég sat í stjórn 4×4 heyrði ég fyrst þessa hugmynd, þá var einn stjórnarmeðlimur með yfirvaraskegg og rottuhúfu sem viðraði það að eitthvað í þessa veru gæti verið sniðugt. Jón einhver … já þekktur fyrir að flækjast allar slóðir hálendisins. Mér fannst hugmyndin býsna róttæk en hann færði nú ýmis rök fyrir henni. Held að hann hafi reyndar heyrt hana einhvers staðar frá þannig að sjálfsagt er ekki rétt að eigna honum höfundarréttinn.
Hins vegar þessi hugmynd sem Ofsi er að vísa í núna gengur að ekki eins langt og það sem þessi mottumeistari var að velta fyrir sér þarna á sínum tíma. Þ.e. hún gengur út á að 4×4 og fleiri félög standi fyrir námskeiðum til að kenna nýliðum grundvallaratriðin í ferðamennsku, m.a. varðandi öryggismál og umhverfismál og Ferðamálastofa er tilbúin til að styrkja slíkt námskeiðahald en að öðru leiti verði þau í höndum félaga. Það er hins vegar ekki í pípunum að bannað verði að fara á hálendið ef menn hafi ekki farið á slíkt námskeið. Þetta námskeiðahald hefur verið í umræðu milli formanns 4×4, undirritaðs, framkv. stj. FÍ og starfsmanns Ferðamálastofu. Í þeim hópi er allavega á hreinu að þetta er til þess að auka þekkingu þeirra sem ferðast um hálendið en ekki einhver óraunhæf hugmynd um bönn og reglur. Held að svona námskeiðahald sé nú kannski bara ágætis hugmynd.
Kv – Skúli
Brotinn brettakantur stendur fyrir sínu … allavega á Landrover. Annars vill Ofsi meina að kantarnir mínir séu þeir ljótustu norðan Alpafjalla. Sem er nokkuð gott, ég er þá mestur í einhverju.
Óbrotinn brettakantur stendur annað hvort fyrir sófariddara eða í besta falli fararmann. Bíll sem aldrei fær að smakka á góðum krapapytt.Kv – Skúli
Rétt það sem hér kemur fram um búnað, hér er smá útlistun á líffæraígræðslunni:
[url:jlb1e4pe]http://www.islandrover.is/spjall/viewtopic.php?t=4155[/url:jlb1e4pe]Kv – Skúli
Það fór 35 tommu patti inneftir á sunnudaginn án vandræða. Hjálpar til að vatn hefur minnkað talsvert síðan á miðvikudag.
Kv – Skúli
Var að heyra að nokkrir 38 tommu bílar hafi snúið við á Þórsmerkurvegi og í gær átti 44 tommu Liner í erfiðleikum með að komast. Ofan á skorninga og brölt er komin sandbleyta og svoleiðis skemmtilegheit. Í augnablikinu er því færðin hábölvuð.
Kv – Skúli
Svo held ég fari rétt með að 4×4 sé með einhvern afslátt í Fossberg.
Eitt sem vert er að hafa í huga við svona verðsamanburð og það er að þessar Fini dælur endast býsna vel. Skal ekki fullyrða um hversu oft þú getur þurft að endurnýja ódýrari dælur meðan ein Fini lifir, en ég held ég fari rétt með að Fini dælan mín sé orðin 9 ára, mikið notuð en er jafn spræk og ný.
Kv – Skúli
Verð að segja að ég hef gaman að skrifum Ragnars og þá sérstaklega fyrir það að draga fram aðrar hliðar á málunum. Það er auðvitað rétt að verndun náttúrunnar á að vera nr. 1 og það er aðal markmið þjóðgarðsins. Reyndar annað af tveimur aðal markmiðunum, hitt er að gera sem flestum mögulegt að njóta náttúrunnar. Þessi markmið fara kannski ekki alltaf saman og þá á það fyrra að ráða för, þ.e. verndunin. Af því leiðir að við viljum reglur sem ná því markmiði að lágmarka skaða á náttúrunni (lágmarka segi ég en ekki koma alfarið í veg fyrir þau því öll umferð getur valdið einhverjum skaða og þar er gangandi umferð ekki undanskilin), en setja ekki óþarfa hömlur á ferðalög. Þess vegna þarf þetta tjöldunarákvæði, verði því breytt, að innihalda heimild til að banna alfarið tjöldun á viðkvæmum stöðum sem þola ekki tjöldun. Þegar reglugerðin var í mótun lögðu útivistarfélög einmitt til slíkt ákvæði, s.s. að tjöldun sé heimil fjarri skipulögðum tjaldsvæðum en heimlit sé að banna alfarið að tjalda á sérstaklega viðkvæmum stöðum. Ég er t.d. á því að tjöldun á bökkum hverasvæðisins í Snapadal eigi að vera bönnuð og víðar. Hins vegar eru margir staðir innan þjóðgarðsins og staðir sem líklegt er að verði innan þjóðgarðsins í fyrirsjánlegri framtíð þess eðlis að þeir þola vel að sett séu upp tjöld af öllum gerðum.
Hins vegar er ég sammála þér með þetta almenna sjónarmið að það telst ekki til ófrávíkjanlegra mannréttinda að allir fái að fara alls staðar. Einhvern tíman vildi einhver þingmaður setja malbikaðan veg upp á Heklu þannig að allir geti farið þangað, það er náttúrulega út í hött (að vísu myndi sú gamla líklega fyrir rest eyða þeim vegi með hrauni, en það er önnur saga). Það er sjálfsagt að skapa aðstöðu fyrir fatlaða að því marki sem það er skynsamlegt og hægt án þess að spilla náttúrunni með einhverri allsherjar láglendisvæðingu. Ég vill heldur ekki vegi eða slóða út um allt og alls staðar, en ef verið er að loka leiðum sem byggja á nokkuð traustri hefð finnst mér það eigi að byggi á rökum sem halda. Slík rök eru til í sumum tilfellum, en ég sé þau ekki í Vonarskarðsdæminu.
Kv – Skúli
Nei Jón ég er ekkert að gleyma því en það var bara ekki það sem var verið að ræða um. Við skulum allavega reikna með því að það fari fljótlega í gang endurskoðun á reglugerðinni og þá er að sjálfsögðu hægt að taka þennan slag aftur.
Ragnar er með beittan pistil og í sjálfu sér punktar í honum sem eiga rétt á sér. Ég held hins vegar að á þeim stöðum þar sem þetta ákvæði kemur til með að vera hindrun séu aðstæður yfirleitt þannig að það valdi ekki skaða þó menn tjaldi og jafnvel dragi fram tjaldborð og stóla og gasgrill. Gæsavatnaleið er ágætt dæmi, ef þú ætlar hana og t.d. ganga á Kistufell í leiðinni er tíminn mjög tæpur að ná á náttstað í Dreka, En þú skemmir enga náttúru með því að koma þér upp næturstað á melunum neðan við fellið. Nú er þetta svæði að vísu ekki ennþá orðið hluti garðsins en þess verður örugglega ekki langt að bíða. Sama má segja um Bárðargötu frá Hágöngulónu og suður úr. Ef þú ætlar að gera eitthvað fleira á þeirri leið en bara keyra (t.d. njóta náttúrunnar sem er jú tilgangur þjóðgarðs), þá ertu í slæmum málum.
Við viljum kannski ekki endilega fá skipulögð tjaldsvæði út um allt, heldur fá að búa okkur næturstað í sátt við náttúrna. Það er að vísu rétt að þá þurfa menn að kunna að ferðast eða fá leiðbeiningar um það, t.d. hvernig þú gengur frá hægðum þínum en of margir virðast halda að þá sé nóg að lyfta einum stein og losa undir hann, en það er bara spurning um fræðslu og leiðbeiningar.
Kv – Skúli
Eins og Dagur bendir á er þetta tjaldbann ekki að koma núna með verndaráætluninni heldur kom í reglugerðinni sem var sett fyrir tæpum 3 árum og verndaráætlunin þarf að vera í samræmi við reglugerðina. Þessari baráttu var því tapað fyrir 3 árum. Ef menn vilja vita um sökudólginn þá er það náttúrulega sama stjórn þjóðgarðsins og gekk frá verndaráætluninni. Af því Dagur er að velta fyrir sér hver hafi beðið um þetta þá er tilfinning mín að svona ákvæði komi inn af því menn eru að horfa of mikið á skipulögðu svæðin, s.s. gömlu þjóðgarðana í Skaftafelli og Ásbyrgi. Þar getur svona ákvæði átt við, það er nefnilega ekki óalgengt að menn tjaldi rétt hjá skipulögðum tjaldsvæðum, nýti þjónustuna en telji sig ekki þurfa að borga. Eða einfaldlega skíta undir hvern stein þannig að stórvarasamt er að reka tánna í steinvölu. Vissir hópar sérlega slæmir með þetta þó ég fari ekki nánar út í það.
En í hinum víðfemu svæðum Vatnajökulsþjóðgarðs á þetta engan vegin við, en það voru menn ekki að skilja. Þetta þýðir að þeir sem ferðast akandi er betra að vera ekki að drolla mikið við náttúruskoðun og eins gott að láta sér ekki detta í hug að taka eins og einn tind á leiðinni því þá ná menn ekki á náttstað. Eins útilokar þetta gönguferðir með trúss þar sem skilyrði fyrir rýmri tjaldheimild er að ganga með allan farangur á bakinu.
Kv – Skúli
