Forum Replies Created
-
Replies
-
Ég verð að segja að ég er nokkuð sammála þessu með markaðsetningu B&L á Defendernum. Það er ekki þeirra markaðsstarfi að þakka að ég ek Defnender, þettu ‘cult’ er ekki eitthvað sem maður kynnist þaðan. Einu samskipti mín við umboðið er að einstaka sinnum fer ég þangað eftir varahlutum og þá sér maður nánast ekki neitt þar inni sem minnir mann á að þetta sé varahlutaverslun umboðsaðila Landrovers. Töluvert annað andrúmsloft hjá BSA, enda er það alltaf fyrsta val að fara þangað. Svo ég gæti þó sanngirnis þá hef ég oft fengið það sem mig vantar á ágætu verði hjá B&L, þannig að þeir hafa ekki þann galla sem mörg önnur umboð þjást af að okra á varahlutum.
Ég var aðeins að vona að þetta myndi breytast þegar 2007 bíllinn kæmi, þá yrði allavega eitthvað smávegis sett í gang og þessi tímamót kynnt eitthvað örlítið þó ég hafi kannski ekki átt von á neinum herlúðrum. En ég er hins vegar að heyra það fyrst núna að hann sé kominn til landsins.
Kv – Skúli
Hér má sjá fyrsta eintakið af nýja Defendernum (2007) sem breytt er fyrir 38 tommur. Og það sem er kannski óvanalegt við þennan er að honum er ekki breytt af íslensku breytingaverkstæði eða í íslenskum bílskúr heldur er honum breytt af Landrover sjálfum. Þeim þótti hins vegar tilhlýðilegt að koma með hann hingað til að reyna hann og sjá hvort þetta sé að gera sig.
Kv – Skúli
Félagsfundur 4×4 samþykkti í vetur samhljóða ályktun gegn þessum vegagerðarhugmyndum yfir Kjöl þannig að afstaða klúbbsins er væntanlega alveg skýr í þessu. Á svipuðum tíma komu fram sambærilegar ályktanir frá Ferðafélaginu og Samtökum ferðaþjónustunnar.
Það þarf hins vegar örugglega að gera eitthvað meira í því að sporna við því að hálendið sé tekið undir svona samgöngumannvirki, allavega virðist meirihluti þjóðarinnar ekki gera sér grein fyrir þeim skaða sem þetta getur valdið. Þetta myndi hafa áhrif á gríðarlega stórt svæði sem núna í dag er óspillt, bæði sjónrænt og svo hávaðamengun sem getur verið umtalsverð. Hvítárnes, Jarlhettur, Baldheiði, Þverbrekknamúli, Kerlingafjöll, Svínárnes, Beinhóll, Hveravellir, Guðlaugstungur, svona svo nokkur dæmi séu tekin yrðu ekki sami staður eftir að svona vegur er komiinn þarna í gegn. Allt staðir sem í dag njóta öræfakyrrðar en yrðu eitthvað allt annað.
Vek athygli á grein samgönguráðherra í Mogganum í dag um þetta mál. Þó hann taki ekki afdráttarlausa afstöðu þarna þá má þó lesa úr greininni að hann geri sér grein fyrir að það þurfi að skoða ýmsar hliðar málsins og ýmis sjónarmið áður en svona framkvæmd er heimiluð. Það vinnur gegn svona hugmyndum ef málin eru skoðuð af skynsemi áður en stokkið er af stað.
Kv – Skúli
Rétt að það komi fram hérna að til þess að njóta sérkjara umhverfisnefndar 4×4 á tjaldgjöldum hjá Útivist um Jónsmessuhelgina þarf að framvísa gildu félagsskírteini hjá 4×4. Eitt skírteini gildir fyrir fjölskylduna.
Kv – Skúli
Mér sýnist á þessum myndum að öxlarnir séu frekar ræfilslegir miðað við aðrar stærðargráður í þessu. Auk þess fengi þetta líklega ekki skoðun nema setja á hann bretti. Enda bara við Íslendingar sem hönnum tröll með það í huga að þau standist kröfur götuaksturs.
Kv – Skúli
Fyrir ekki svo mörgum árum voru þetta algengustu bílarnir á fjöllum og jöklum, hvar sem komið var sá maður Hilux í meirihluta. Nú eru breyttir tímar og allra gerða tíkur komnar í stað Luxa. Ég er hreint ekki frá því að í kjölfarið hafi bilanir á fjöllum stóraukist, enda tekur maður eftir því hér á vefnum að það er hending að maður heyri af túrum þar sem ekkert bilar eða enginn brýtur neitt.
Kv – Skúli
Ef ég fer rétt með hefur Vesturlandsdeildin gert þetta í allnokkur ár, án þess að þau hafi mikið verið að berja sér á brjóst vegna þess. Mikið til fyrirmyndar.
Kv – Skúli
Grunaði alltaf að umhverfisráðuneytið væri í góðum höndum hjá henni.
Við þetta má bæta að Vesturlandsdeildin kom löngum gríðarlega sterk hér inn. Skora á þá ágætu félaga sem þar eru að standa undir merkjum og væntingum.
Kv – Skúli (almennur félagsmaður nr. R2407)
Varðandi orðalag spurninga í svona könnun þá eru nokkrar viðurkenndar grunnreglur. Eitt atriðið er að orða báða möguleika í spurningunni, þ.e. ekki spyrja ertu hlynntur veglagningu yfir Kjöl – já eða nei, heldur spyrja ertu hlynntur eða andvígur . Semsagt að valið standi ekki milli þess að svara já eða nei heldur hlynntur eða andvígur. Það er vegna þess að já hefur alltaf eitthvað aðdráttarafl hjá ákveðnum hóp svarenda, það er svona tilhneiging til að vera já-maður. Önnur mikilvæg regla er að setja ekki forsendur inn í spurninguna eins og Jón gerir hér að ofan, hafa hana alveg strippaða af öllu slíku. Svarendur eiga að svara miðað við þær forsendur sem eru fyrir í hausnum á þeim, ekki miðað við forsendur sem spyrjandinn leggur inn hjá þeim. Þetta var einmitt regla sem Davíð Oddson vildi að Gallup bryti fyrir nokkrum árum í könnun varðandi ESB þar sem hann var óánægður með niðurstöðuna, þ.e. skammaðist yfir því að ekki væri sett inn í spurninguna hvort menn séu fylgjandi eða andvígir ef inngangan hefði hinar margvíslegu hörmungar í för með sér fyrir viðkomandi. Það er náttúrulega ekki mjög vísindalegt að spyrja þannig. Nú veit ég ekki hvernig var spurt þarna, en ég held að Capacent hljóti að vera nógu vant að virðingu sinni til þess að gera þetta án þess að hafa innbyggðar stýringar sem þessar í spurningunni, jafnvel þó kaupandinn hugsanlega fari fram á slíkt. Mér finnst líklegra að þetta sýni okkur einfaldlega staðreyndirnar um afstöðu þjóðarinnar til málsins á þessari stundu, semsagt við sem viljum koma í veg fyrir þessa vitleysu þurfum að herða okkur all hressilega í því að koma málstað okkar á framfæri.
Þetta þarf kannski ekki að koma neitt óskaplega mikið á óvart. Við sendum frá okkur ályktun um þetta og sama gerði Ferðafélagið og Samtök ferðaþjónustunnar. Þær fengu ekki mikla athygli þó þær birtust í einhverjum fjölmiðlum. Þar með er nánast upptalið þau tækifæri sem hafa verið til að koma sjónarmiðum okkar á framfæri. Ég fór að vísu í einhvern spjallþátt á rás 2 fyrir líklega einu og hálfu ári eða svo og fékk þar þingmanninn Kjartan Ólafsson á móti mér. Í sjálfu sér var ágætt að ræða við Kjartan, þó við séum á öndveðri skoðun var hann ekkert ósanngjarn í sínum málflutningi þarna. Þáttastjórnandinn hins vegar hafði greinilega lítinn áhuga á mótrökum í málinu, reyndar Akureyringur af lífi og sál.
Það verður því ekki sagt að það hafi verið mikill áróður gegn þessu og það birtist mjög skýrt í þessum niðurstöðum.
Kv – Skúli
Við í umhverfisnefndinni lítum það mjög illu auga ef gögn frá nefndinni eru dregin í efa, þannig að Barbara, þú verður bara að græja þetta með fjölskyldustærðina til í snatri þannig að hún passi við tölurnar frá Degi. Þú hefur rúmar tvær vikur.
Kv – Skúli
Góð áminnig hjá Jóni og það er engin vitleysa að þessi ferlasöfnun skiptir miklu máli fyrir okkur og fyrir alla skipulagsvinnu á hálendinu sem er alls staðar verið að kalla á. Í gegnum áratugina hefur verið svolítið ‘villta vestur’ stemning á hálendinu og óvissa um hver á hvað, hver ræður hverju og hvað má. Þetta birtist ekki bara í þessu með að þyrlur eru að stoppa menn fyrir utanvegaakstur á miðjum slóðum, heldur líka hasar í þjóðlendumálum, skálabyggingum í gegnum áratugina o.fl. Núna er búið að girða fyrir þann möguleika að skella upp skála eftir því sem mönnum dettur í hug og það komið í ferli en samt mjög lítið búið að skipuleggja. T.d. er núna í vinnslu fyrsta deiliskipulagið fyrir Þórsmerkursvæðið og er það eiginlega frekar merkilegt þegar um er að ræða jafn fjölsóttan stað og raun ber vitni. Umsóknir um leyfi til að byggja skála hefur á síðustu árum stundum verið svarað með því að ekki sé hægt að veita leyfi þar sem áður þurfi að skipuleggja svæðið. Semsagt, allt sett í frost.
En aftur að slóðum. Núna vilja sveitarfélög og opinberar stofnanir hver í kapp við aðra fara að skipuleggja hálendið og virðist manni stundum hluti af þeirri hvöt vera að sýna vald sitt yfir þessu svæði. Ég ætla ekkert að halda því fram að það sé algilt en stundum virðist slíkt vera aðeins í loftinu. Að hluta til er þetta líka vegna meintrar réttaróvissu varðandi utanvegaakstur. Löggæslunni er kannski viss vorkun í þessu, t.d. hvernig eiga þeir að greina á milli lögmæti slóðans góða við Hagavatn og svo mánaðargamals slóða á Sprengisandi þar sem kannski 10 bíla hópur ákvað að stytta sér göngu með því að keyra eftir auganu á áfangastað (sá dæmi um slíkt s.l. sumar). Og hvernig eigum við sem ferðamenn að greina á milli, það getur verið erfitt ef menn þekkja svæðið ekki þeim mun betur. Þetta er mikið í umræðunni núna og verður áfram og því mun ekki linna fyrr en þessi skipulagsvinna er búin, hvort sem okkur líkar betur eða verr.
Þó svo að það sé rétt sem Jón lýsir að stundum virðist vera erfitt fyrir okkur að fá aðkomu að þessari vinnu, þá hefur okkur samt tekist að skapa okkur ákveðnar leiðir í því. Lykillinn að því er að við þykjumst eiga og eigum mikið af gögnum um slóða og slík gögn eru nauðsynleg til þess að eitthvað vit komi út úr þessari vinnu. Án þeirra er klárt mál að útkoman verður uppfull af stórum slysum þar sem hinar ýmsu leiðir hverfa, ekki af því að ákvörðun er tekin um það heldur bara menn vissu ekki betur. Okkar vantar ýmislegt, sérstaklega fyrir austan og norðan. Það að láta frá sér ferla í þessa vinnu er ekkert hættulegt, það er ekki sjálfgefið að allir ferlar sem unnið er með fari á kort fyrir túrista eða verði auglýstir sem almenn ferðaleið. Hættan er hins vegar sú að leiðir sem ekki koma neinar upplýsingar um verði sjálfkrafa bannaðar í framtíðinni.
Kv – Skúli
Það er rétt hjá Sigga að ýmislegt er loðið við þetta og hægt að túlka. Það er þó líka rétt sem Dagur segir að eins og Kjalvegshraðbrautin er hugsuð liggur hún víða um óröskuð svæði, þ.á.m. um Guðlaugstungur sem Alþingi er búið að friðlýsa. Ég held að þetta hljóti því að þýða að það þyrfti að breyta hugmyndunum talsvert til þess að mögulega sé hægt að fella þær að stjórnarsáttmálanum. Það verður fróðlegt að fylgjast með þróun þessa máls, mér segir svo hugur að talsmenn vegarins séu ekki búnir að gefa hugmyndina upp á bátinn. Þar fer fremstur í flokki Kjartan Ólafsson þingmaður Sjálfstæðisflokksins og fulltrúi í umhverfisnefnd á síðasta kjörtímabili. Þeir gætu hugsanlega tekið þá stefnu að láta veginn fylgja sem mest núverandi vegstæði, en þá minnkar líklega ávinningurinn úr litlu í ekki neitt. Ég veit ekki afstöðu hins nýja samgönguráðherra í þessu máli né heldur umhverfisráðherra. Ef mig misminnir ekki hefur hins vegar nýskipaður heilbrigðisráðherrunum lýst yfir efasemdum um Kjalveg.
Ég myndi veðja á að það séu nógu margir stjórnarliðar á þingi andsnúnir þessari hugmynd til þess að koma í veg fyrir að hún nái í gegn, en þrýstingurinn á veginn er hins vegar örugglega mikill.
Já þetta er gleðiefni og ég er svo bjartsýnn að segja að eftir að ein ríkisstjórn er búin að setja þetta inn í stjórnarsáttmála geti þær sem síðar koma ekki verið þekktar fyrir að leyfa Landsvirkjun að slátra honum.
Líka ánægjulegt að sjá Þjórsárverin tryggð þarna og svo er Torfajökull nefndur. Vekur að vísu spurningu um hvað menn eiga við með því, þýðir það að ekki verði farið í að virkja háthitasvæðið umhvefis Torfajökul eða eru menn bara að tala um jökulinn sjálfan???
Datt í hug að bera þetta saman við ‘sáttakort’ Framsóknarflokksins (heitins). Þar er Torfajökulssvæðið og Kerlingafjöll með rauðum punktum (röskun óheimil) en ekki tekið af skarið með Þjórsárver og Langasjó. Jökulsá á Fjöllum er vernduð í báðum hugmyndum, en Frammararnir eru með Hrafnabjargarfoss á verndun í sínum hugmyndum. Annað sem nefnt er í báðum hugmyndum er eitthvað sem öllum ætti að vera ljóst að ekki verði hróflað við, s.s. Askja sem þegar er friðlýst og Geysir. Að mínu mati tekur stjórnarsáttmálin nokkur mikilvæg skref frammúr hugmynd Frammarana. Vonandi bætist fleira á listann síðar.Kv – Skúli
Má til með að taka undir þetta með Baldri skáta. Þó það sé verið að raska heilmiklu á þessi svæði réttlætir það ekki að jeppamenn eða aðrir gangi (aki) þarna um eins og einhverjir ribbaldar. Það er ennþá fullt af fólki sem er að reyna að nýta Hellisheiði og Reykjanes til útivistar þrátt fyrir allt. Það er því ekkert sem réttlætir það að spóla þetta norður og niður.
Kv – Skúli
Væri þetta kort að sýna raunveruleg ósnortin víðerni skv. skilgreiningunni í þingsályktunartillögunni frá 1998 væri Kárahnjúkavirkjun ekki til, við værum ekki að fá virkjanir í Jökulsánnum í Skagafirði og Skaftárveita með Langasjó sem uppistöðulón væri út af borðinu. Það er augljóst að þessi svæði verða seint ósnortin víðerni í þessum skilningi og hafa aldrei verið það. Þar fyrir utan sýnist mér kortið sýna ósnortin víðerni í mun víðari merkingu en þessi þingsályktunartillaga leggur í hugtakið. Enda hefur þetta hugtak verið notað á margvíslegan hátt, t.d. hefur Ómar gjarnan talað um allt hálendið sem ósnortin víðerni, utan virkjanasvæða.
Kv – Skúli
Reitur sem er 25 ferkílómetrar er svæði sem er 5 km á kant eða sambærilegt. Þau eru nokkuð mörg og víða á hálendinu og víða talsvert stærri. Svo ég nefni dæmi má benda á Fögrufjöll við Langasjó, áður búinn að nefnda Lónsöræfin en þar er svæði talsvert stærra en þetta sem uppfyllir skilyrðin. Það má hugsa sér að ef maður gengur 2,5 km frá bílnum geti maður verið staddur á miðju slíku svæði. Núverandi slóðar hálendisins eru mjög langt frá því að ógna þessu viðmiði og ég get ekki fallist á að með þessu sé verið að ganga óeðlilega langt í verndun á ósnortnu landslagi.
Kv – Skúli
Ég veit ekki hvort rétt sé að segja að ég sé endilega ósammála Degi ferðafélaga mínum og félaga í umhverfisnefnd, þekki hann frekar af því að skoðanir okkar liggi nokkuð nærri, en ég held ég geti tekið undir flest það sem kemur fram í tilvitnuninni hér að ofan. Hvað sem má um VG segja þá myndi ég vilja sjá álíka viðhorf í stefnuskrá fleiri flokka, því stærsta ógnin liggur í stórframkvæmdum á hálendinu sem eiga rót sína í að menn skilja ekki mikilvægi óspilltrar náttúru. Mér finnst afskaplega mikilvægt að geta í bland við aðra ferðamennsku lagt Breska heimsveldinu, skellt bakpokanum á bakið og horfið inn á svæði sem ég kemst ekki um á jeppanum. T.d. finnst mér frábært að koma inn á Lónsöræfi, leggja bílnum uppi á Illakamb, rölta niður í Múlaskála með tjaldið og flækjast um svæðið út frá því. Sama á við um fleiri staði á landinu og á allmörgum viðkomustöðum á hálendinu er hægt að bæta miklu við ánægjuna af ferðalaginu með því að rölta í lengri eða skemmri tíma út frá bílnum. Það væri mikill skaði af því ef það yrðu lagðir slóðar inn á hvern blett. Á hinn bóginn eru leiðir sem eru gríðarlega skemmtilegar ökuleiðir sem þarf að verja. Bárðargata sem við höfum viljað stika er dæmi um það. Mjög skemmtileg haustleið, en nokkuð vandrötuð. Persónulega met ég hana allavega meira sem slíka heldur en gönguleið, enda hrjóstugt og örugglega erfitt gönguleið, sérstaklega vegna vatnsfalla. Þetta þarf allt að fara saman í hæfilegri blöndu.
Kv – Skúli
Þetta er góð áminning hjá Jakob og verulega slæmt mál að þetta skuli eiga sér stað. Þegar menn skilja svona ummerki eftir sig eins og hér er lýst er það bæði hryðjuverk á náttúrunni og til viðbótar er þetta í raun aðför að ferðafrelsi okkar. Utanvegaakstur og spól á blautum slóðum er árangursríkasta leiðin til að stuðla að auknum boðum og bönnum. Bönnin væru ónauðsynleg ef allir gættu að sér, héldu sig á réttum slóðum og yllu ekki skemmdum.
Kv – Skúli
Það er ekki margt hægt að gera núna, en þó er væntanlega hægt að komast á Vatnajökul hjá Skálafellsjökli og svo var Breiðamerkurjökull fínn fyir rúmum tveimur vikum. Gæti svosem hafa breyst núna.
Látum allavega allt drullusull vera og virðum lokanirnar,
Kv – Skúli
