Forum Replies Created
-
Replies
-
Stikuferð umhverfisnefndar verður að þessu sinni helgina 31. ágúst til 2. sept. Stikuð verður leiðin frá Jökulheimum inn að Sylgjufelli sem er hluti af svokallaðri Bárðargötu, en þessi leið hefur verið á áætlun okkar nokkur ár. Þetta er svæði sem verulega er þörf á að stika, víða foksandur og slóðir hverfa við minnsta vind.
.
Skráning er hjá umhverfisnefndarmeðlimum eða með meldingu hér að neðan.Kv – Skúli
umhverfisnefnd
Þetta er gömul tækni, þú kaupir bara spliff, donk og gengur, hellir spliffinu á tankinn og tengir donkið við olíuverkið og svo þarftu bara að passa upp á að tæma eldsneytistankinn á 500 km fresti.
Það er örugglega ýmislegt hægt að gera til að bæta eldsneytisnýtingu og minnka mengun, en maður er allavega orðinn orðinn mjög tortrygginn á svona undralausnir, hvað þá að útblástur verði 100% hreinn. Ef það er bruni á annað borð hlýtur honum að fylgja kolefnismengun. Ég er álíka tortrygginn á þetta eins og að kolefnismengun sé hægt að leysa með einhverri skógræktarjöfnun.
Kv – Skúli
Kom óvart tvisvar inn
Í náttúruverndarlögum segir:
17. gr. Akstur utan vega.Bannað er að aka vélknúnum ökutækjum utan vega. Þó er heimilt að aka slíkum tækjum á jöklum, svo og á snjó utan vega utan þéttbýlis svo fremi sem jörð er snævi þakin og frosin.
Umhverfisráðherra kveður, að fengnum tillögum Náttúruverndar ríkisins, í reglugerð1) á um aðrar undanþágur frá banni skv. 1. málsl. 1. mgr., m.a. vegna starfa manna við landbúnað, landmælingar, línu- og vegalagnir og rannsóknir. Ráðherra getur í reglugerð, að fengnum tillögum Náttúruverndar ríkisins, takmarkað eða bannað akstur á jöklum og á snjó þar sem hætta er á náttúruspjöllum eða óþægindum fyrir aðra sem þar eru á ferð.
Ólögmætur akstur utan vega varðar refsingu, sbr. 76. gr.[b:32keaxq5][url=http://www.reglugerd.is/interpro/dkm/WebGuard.nsf/b7fd33650490f8cf00256a07003476bb/56dbb89b15232dff0025701c005a94a9?OpenDocument:32keaxq5]Hér[/url:32keaxq5][/b:32keaxq5] er svo reglugerðin. Það er ekkert í þessu sem undanskilur akstur í fjörum banninu, þó svo slikur akstur valdi ekki skemmdum og ummerki hverfi innan sólarhrings. Sjálfsagt umdeilanlegt en svona eru lög og reglur í dag. Það má kannski líka segja að akstur á 110 við bestu aðstæður að nóttu þegar engin umferð er valdi ekki skaða, en er jafn ólöglegt engu að síður.
Reglugerðin var áður orðuð þannig að akstur utan vega sem veldur spjöllum á náttúrunni sé óheimill, en það breyttist í reglugerðinni 2005. Sýnist því sýsli vera í fullum rétti þarna.
Kv – Skúli
Ef málavextir eru þeir sem virðast af því sem fram hefur komið er rétt að opinberu fé sé illa varið með því að fara með þetta fyrir dóm og illa varið að þyrla sé kölluð út til að ‘grípa’ menn við akstur á alþekktri og fjölfarinni slóð. Auðvitað samt rétt að fá betur fram málavexti áður en of mikið er fullyrt, alltaf betra að vita nokkuð nákvæmlega um hvað málið snýst. Þetta vekur samt spurningar um hvað þarf til að nokkur hundruð þúsund sé varið í þyrluflug.
Kv – Skúli
Sammála síðasta ræðumanni. Fór sjálfur þessa leið og hef aldrei efast um réttmæti þess. Hlutfallabreytingin er ennþá á biðlistanum. Ekki það að það komi ekki einstaka sinnum fyrir að ég vildi hafa lægri hlutföll en þegar betur er að gáð og dæmið reiknað eru þessi orginal hlutföll mín mjög svipuð og í mörgum öðrum jeppum eftir hlutfallabreytingu. Það kítlar mig því meira að fara í skriðgírinn t.d. [b:1lxw3tad][url=http://www.ashcroft-transmissions.co.uk/part_40.html:1lxw3tad]þennan[/url:1lxw3tad][/b:1lxw3tad]
Kv – Skúli
Það má raunar segja að sumt er rétt sem Ólafur Helgi segir þó annað byggist á stórkostlegum misskilningi sem líklega stafar af vanþekkingu á hálendisvegum og eðli ferðalaga um fáfarnar slóðir.
Í greininni stendur:
‘Ólafur Helgi segir þarna mega greina skýlaust bann en dómstólar hafi túlkað lögin svo að ef einhvers staðar sé slóði þá sé mönnum refsilaust að fara hann’
Þarna náttúrulega kristallast misskilningur sýslumannsins því hann áttar sig ekki á því að vegslóð á hálendinu þarf ekki að vera annað en tvö hjólför þar sem menn hafa farið í gegnum áratugina. Það er ekki einu sinni víst að hjólförin sjáist, sums staðar sjást engin för. Það er kannski eðlilegt að þeir sem hafa aldrei farið út fyrir vegi sem búnir eru til með stórfelldum náttúruspjöllum (þ.e. búnir til með miklu jarðýturaski, uppbyggðir og jafnvel malbikaðir) eigi erfitt með að skilja að vegslóðin á áraurunum við Hagavatn geti talist vegur í skilningi laga, þaðan af síður að þeir skilji þær ótrúlegu afleiðingar sem það hefði fyrir ferðafólk á hálendi Íslands ef allt annað yrði strikað út og aðeins mætti aka á númeruðum vegum eins og þeir eru í dag. Það sem sýslumaðurinn virðist ekki átta sig á er að niðurstöður dómanna er bæði í fullu samræmi við lögin og þann veruleika sem um er að ræða. Vegslóð þarf alls ekki að vera búin til með tækjum og ef sú krafa yrði gerð um samþykkta vegi á hálendinu þýðir það í raun mun meiri náttúruspjöll en utanvegaakstur hefur orsakað í gegnum árin. Og þá er ég ekki að gera lítið úr skaðsemi utanvegaaksturs
Hins vegar segir sýslumaðurinn:
‘Það geri eftirlit mjög erfitt, því það þýðir að til þess að vera viss um að ákæra hafi möguleika á því að enda með sakfellingu þarf að standa þann sem fyrstur fer að verki’
Þetta er í sjálfu sér alveg rétt, það er mjög erfitt að átta sig á hvað er löglegur slóði og hvað ekki og þarf oft talsverða staðþekkingu til. Ég sá sem dæmi ‘slóð’ inn á Sprengisandi í fyrrasumar og reyndar fleiri en eina sem ég er nokkuð viss um að voru ekki nema nokkra vikna gamlar og eru með réttu afleiðing utanvegaaksturs. Ég hefði getað ekið þessar slóðir í góðri trú og verið dæmdur fyrir það. Ég hefði líka hugsanlega getað ekið þær vitandi betur og sloppið með það þó þyrlan kæmi þar sem fulltrúar sýsla vissu ekki betur og erfitt væri að sýna fram á á staðnum að þetta sé ekki réttmæt slóð. Ég er samt ekki viss um að ég hefði í slíku tilviki verið sýknaður fyrir dómi þar sem vitnaleiðslur og nákvæmari gagnavinnsla hefði auðvitað sýnt fram á að þarna hafi ekki verið slóð. Ég hefði ekki haft sömu varnir og voru í þessum frægu málaferlum, enda voru menn þar klárlega ákærðir saklausir. Það er hins vegar varla hægt að ætlast til þess að löggæslumenn hafi þetta í hausnum, þessa 40 þúsund kílómetra sem 4×4 og LMI eru að trakka. Það verður því að segjast eins og er að áhyggjurnar af þessu eru nokkuð réttmætar og villta-vesturs réttarfar í þessu gengur ekki til lengdar þó það hafi virkað vel í fásinninu hér áður fyrr. Það eru bara breyttir tímar.
Lausnin á þessu má samt alls verða sú sem Ólafur Helgi virðist sjá fyrir sér ef ég skil hans orð rétt, þ.e. að þrengja lagaskilgreininguna þannig að aðeins megi aka númeraða vegi sem gerðir hafa verið með vegagerðarframkvæmdum. Afleiðingar af því yrðu skelfilegar:
Í fyrsta lagi myndi það setja verulegar hömlur á möguleikana til að ferðast um hálendið, ekki bara akandi heldur líka gangandi. Það eru ekki bara jeppakarlar sem nota slóðana, þeir eru líka notaðir til að komast á heppilega upphafs- og lokapunkta gönguferða, trússa fyrir gönguhópa, þjónusta skála o.s.frv. Menn skildu því ekki halda að þetta sé eingöngu eitthvað sérhagsmunamál 4×4 karla og kerlinga. Það eru miklu fleiri sem málið varðar, raunar alla sem vilja ferðast um hálendið og njóta þess.
Í öðru lagi er veruleg hætta á að þetta hefði þveröfug áhrif en ætlunin er, þ.e. að þetta myndi stórauka utanvegaakstur. Hvað þýðir kjörorð lögreglunnar: Með lögum skal land byggja og ólögum eyða. Ólög eyða virðingu fólks fyrir réttarkerfinu og ef mönnum yrði bannað í einni svipan að nota 90% af samgönguæðum hálendisins er það nákvæmlega það sem myndi gerast.
Í þriðja lagi er líklegt að til lengri tíma litið ýti þetta undir umtalsverð náttúruspjöll á hálendinu. Þá er ég ekki að tala um utanvegaakstur heldur vegagerð. Ef vegir á hálendinu eiga að vera í samræmi við þann skilning sem mér sýnist Ólafur Helgi hafa á hugtakinu yrðu menn einfaldlega að draga fram jarðýturnar og fara í vegagerð þar sem áður dugðu einfaldir slóðar þar sem ummerki um þá eru í algjöru lágmarki. Náttúruvænustu samgönguæðarnar eru jú einmitt frumstæðustu slóðarnir.
Ég held að þrátt fyrir allt sé almennur skilningur á þessu á þeim stöðum þar sem það skiptir máli. Það þarf þó auðvitað að gæta að því að ákvarðanir um þetta séu teknar í ljósi þekkingar á ferðalögum um hálendið þannig að ranghugmyndir móti ekki endanlega niðurstöðu. Við þurfum hins einnig að gæta þess að loka ekki augunum fyrir vandanum sem vissulega er til staðar. Þó málaferli Ólafs Helga hafi verið illa unnin og óréttmæt, þá sýna þau samt hversu erfitt er að framfylgja lögum um utanvegaakstur. Dæmið hér að ofan af förunum á Sprengisandi held ég sýni það ágætlega. Það er auðvitað ekki rétt hjá sýslumanninum að dómstólarnir hafi túlkað slóð eitthvað óeðlilega rúmt, það er ekki skýringin á því að hann tapaði málaferlunum. Vandamálið liggur hins vegar í því hvernig löggæsluaðilar geti gengið úr skugga um það hvað sé lögmæt slóð og hvað séu nýleg för eftir utanvegaakstur.
Ég sé aðeins eina lausn á þessu og það er sú lausn sem verið er að vinna að með allri þessari ferlun sem Jón Ofsi og fleirri eru að vinna að af ótrúlegri þrautseigju.Kv – Skúli
Mér finnst Hlynur vera svo einmanna þarna á mætir-ekki-listianum. Þar sem mér þykir nú vænt um strákinn þó hann sé óttalegur fýlupoki finnst mér rétt að bæta úr því. Ég er líka sammála því að ég kann betur við viðburði sem eru fyrir ofan 200 m.y.s. á svæðum þar sem vegir eru vondir og mannvirki fá. Semsagt Skúli 2 fullorðnir og 4 börn (hálffullorðin) mæta ekki! Færist til bókar.
Kv – Skúli
Ég lét mér nægja að grunna vel undir og líma og þau hafa ekki hreyfst og þó búinn að fara nokkur skipti í 2 pundin. En svo eru menn að segja mér dæmi um hið gagnstæða, þ.e. að menn hafi beitt öllum sömu brellum og dekkin alltaf verið spólandi í og tóm vandræði. Ef þú setur þau á felgur núna ættu þau að ná að festa sig sæmilega vel fram að næstu vetrarvertíð. Ekki hengja mig samt ef þau affelgast.
Kv – Skúli
Hef það fyrir satt eftir Kára Algrip sem nú er skálavörður í Básum að færðin sé fin og árnar ekki til mikilla vandræða. Spurning með Krossánna en hana þarf ekki að krossa til að komast í Bása.
Kv – Skúli
Það má hrósa þessum pistli fyrir að draga bæði fram jákvæðar og neikvæðar hliðar málsins. Það eru hins vegar nokkur atriði þarna sem standast ekki fullkomlega.
‘. leiðin milli Selfoss og Akureyrar mun styttast um 140 kílómetra. Vegalengd milli stórs hluta Norður- og Norðausturlands og Reykjavíkur mun styttast um tugi kílómetra.’
Skondið að sjá þessa áherslu á vegalengdina milli Selfoss og Akureyri dregna svona sérstaklega fram eins og hún skipti höfuð máli í samgöngum landsins og svo látið nægja að segja ‘tugi kílómetra’ um vegalengdir frá Akureyri.‘Umferðaröryggi mun aukast, slysum og óhöppun fækka….’ Þessa fullyrðingu stórefa ég. Það er þó að vísu möguleiki að þar sem menn aka hægar í hálku, skafbyl og við slæmar veðuraðstæður almennt, þá muni slysum vegna hraðaksturs hugsanlega fækka. Hins vegar spurning hvort annars konar slys komi í staðin.
‘. ferðaþjónusta á Suðurlandi og Norðurlandi og á hálendinu getur styrkst.’ Hugsanlegt að hún styrkist á Suðurlandi og hugsanlega á Norðurlandi en tæplega á hálendinu. Nema menn telji það vera styrkingu á ferðaþjónustu á hálendinu að fleiri fari um svæðið. Samkvæmt því stendur ferðaþjónusta á Holtavörðuheiði á gríðarlega traustum fótum. Hamborgarasala á Hveravöllum gæti líka átt góða framtíð fyrir sér. Það er hins vegar ekki styrking á ferðaþjónustu að grundvellinum fyrir núverandi ferðaþjónustu sé slátrað á einu bretti.
‘Norðurvegur ehf. hefur lýst yfir því að umhverfisvernd verði höfð að leiðarljósi við framkvæmdina.’ Þetta er nú bara hrein og klár mótsögn, annað hvort er umhverfið verndað eða það er lagt undir mannvirki. Það er kannski hægt að ganga snyrtilega frá í kringum mannvirkin en það er ekki umhverfisvernd í sjálfu sér.
Þetta er umræða sem þarf að fara fram.
Kv – Skúli
Mér liggur við að segja að loksins koma efasemdarraddir fram um alla þessa kolefnisjöfnun, sbr. þetta sjónarmið forstjóra Náttúrufræðistofnunar. Hugmyndin á bak við Kolvið er kannski ágæt í sjálfu sér. Núna á hins vegar að kolefnisjafna allan bílaflotann (og keyra þá með góðri samvisku eða hvað), kolefnisjafna flugferðina til útlanda sem væntanlega mun skila þokkalegum summum í skógræktarsjóði miðað við hvað þessar þotur menga og svo jafnvel reisa stóriðjur umfram mengunarkvóta einfaldlega með því að planta milljónum trjáa til að jafna út. Það er kannski eins gott að jöklarnir bráðni svo pláss verði fyrir öll þessi tré.
Skógrækt eins og hún hefur verið stunduð hér á landi er ágæt og mörg skemmtileg svæði afrakstur myndarlegs starfs skógræktarfélaga og Skógræktar ríkisins. Allt gott um það að segja og mörg jákvæð verkefni fyrirhuguð svosem Hekluskógaverkefnið þar sem verið er að binda jarðveg á svæði þar sem jarðvegsfok hefur verið vandamál í áratugi. Aukning á fjármagni í skógrækt er gott mál. Það er hins vegar ekkert sem segir að rétt sé að pota niður trjáplöntum hvar sem er. Eitt af því sem gerir Íslenska náttúru svona flotta er fjölbreytnin, allt frá gróðurþekjum yfir í eyðisanda. Ég veit að það er langt í það að hér verði ekki hægt að sjá skóginn fyrir trjánnum, en ef allir færu að kolefnisjafna allan sinn akstur, flugferðir og stóriðjur taki stór flæmi undir skógrækt til að jafna á móti sinni mengun, þá getur ásýnd landsins breyst hressilega með tímanum. Eins og Jón Gunnar bendir á felur skógrækt í sér stórfellda breytingu á lífríkinu sem er ekkert sjálfsagt mál hvar sem er og er í raun í andstöðu við verndun þess.
Ein pæling. Ef ég kolefnisjafna minn akstur þá tekur það væntanlega minna af mengunarkvóta Íslands. Það minnkar hins vegar ekki endilega mengun því kvótinn sem ég hefði notað fer þá alveg örugglega í annað. Mengunarkvótinn verður nýttur engu að síður. Útkoman af allri þessari kolefnisjöfnun almennings er því bara meira svigrúm fyrir mengandi iðnað og svo kannski betri samviska sem menn fá með kaupum á svona aflátsbréfum.
Það er full ástæða til að hafa áhyggjur af mengun og áhrifum hennar og hvort loftslagsbreytingar séu af manna völdum, sem er kannski ekkert endilega sjálfgefið þrátt fyrir að hátt sé haft um það. Það var athyglisverður þáttur á dögunum í sjónvarpinu sem hélt öðru sjónarmiði á loft. Punkturinn sem ég vildi eiginlega koma fram með hérna er að endalaus plöntun á trjám er ekki nein patentlausn og þessum stóru vandamálum. Ég vil samt árétta að skógrækt sem stunduð er af einhverri skynsemi er besta mál og margt gott verið unnið í því.
Kv. – Skúli
Skv. mínum heimildum opnar syðra Fjallabak á morgun. Það er samt líklegt að á leiðinni inn í sker sé ennþá eitthvað af sköflum.
Kv – Skúli
Þessi frétt um drykkfelldu rotturnar kom mér á óvart! Voru þær ekki búnar að skrá sig í landgræðsluferðina? verða þær komnar frá Indlandi fyrir helgi?
Væri reynandi að athuga hvort samband á plöggum í aksturstölvuna sé í lagi, hreinsa þau upp. Lenti í því á mínum gamla Runner að það var kominn raki og sambandsleysi þarna og þá fóru að koma allskonar gangtruflanir og villuboð.
Kv – Skúli
Sæl Dúkka/Barabara. Mér fannst að vísu deginum ljósara að þessi lausn sem magnum stakk upp á væri alveg kjörin, en líklega of langt gengið að umhverfisnefndin ráðskist með fjölskylduform þitt meira en orðið er. Þess vegna verðum við líklega af umburðalyndi okkar að samþykkja að það sé kona sem komi með þér, enda erum við langtum umburðalyndari og víðsýnni en blessuð þjóðkirkjan. Ég man líka ekki betur en að í einhvern tíman hafi ferð á vegum klúbbsins verið frestað þar sem hún stangaðist á við Gay-pride . eða var það Menningarnótt, man það ekki svo glöggt.
Ég er búinn að láta skálavörðinn vita af metþátttöku og hann ætlar að taka allt pláss í Strákagilinu frá og reyna að fremsta megni að verja það. Strákagilið fór létt með að rúma þennan fjölda fyrir nokkrum árum, en núna þegar stór hluti er í tjaldvögnum gæti það þrengt að. Rétt að menn hafi það í huga þegar þeir fara að raða niður vögnum að nýta plássið sem best og sýna hver öðrum tillitsemi. Gæti líka verið þröngt um bíla, en allt reddast þetta örugglega ef menn eru svolítið skipulagðir.
Kv – Skúli
Mér fannst líka óskaplega skemmtilegt þegar ég keypti hjá BSA sérhannaða feiti í liðhúsin á Breska heimsveldinu. Á pakkningunni stóð að feitin væri gerð fyrir liðhús á Landroverum árg. 1948-1998. Stundum er fundið að því með Landann að hann hafi ekki þróast í 50 ár. Þetta er kannski ekki að öllu leiti rétt en samt nokkur sannleikur í þessu. Enda afhverju að breyta því sem virkar. Framleiðslufyrirtæki eru oft mjög upptekin af vöruþróun og er það talið nauðsynlegt til að halda þeim gangandi, vera alltaf með einhverjar nýjungar. Þetta er samt kannski ekki endilega alltaf neytendum til hagsbóta. Gott dæmi er vöruþróun á rakblöðum. Þar kemur alltaf fram með ákveðnu millibili einhver ný vitleysa, tveggjablaða, þriggjablaða, klístursrönd sem á að ‘mýkja húðina’ og ég veit ekki hvað og hvað. Þetta gerir hins vegar í raun ekki neitt fyrir okkur, það eina sem skiptir máli er að efnið í blöðunum sé gott þannig að þau bíti vel og endist. Það er hins vegar segin saga að skömmu áður en nýjung kemur fram fer endingin á gömlu útgáfunni niður á við, þeir fara að nota lélegra efni. Síðan kemur nýja útgáfan sem virðist þá vera svo miklu betri, endast betur og bíta betur …. þangað til næsta vöruþróun er á næsta leiti. Hafiði pælt í þessu!!!
Er kannski sama upp á teningnum hjá sumum bílaframleiðendum sem reglulega koma fram með nýja og endurbætta útgáfu? Hvaða aðferðum er beitt þar til að fá okkur til að kaupa nýja bílinn?
Kv – Skúli
Fjallabaksleiðirnar eru ennþá lokaðar samkvæmt [url=http://www.vegagerdin.is/view/common/media/ArticleImageZoom?WebCategoryID=1440&ArticleID=241&ListID=0&MediaSizePopup=&MediaTypeID=1:1z1hm03c][b:1z1hm03c]gildandi korti[/b:1z1hm03c][/url:1z1hm03c], en það kemur nýtt kort frá Vegagerðinni á fimmtudag.
Yfirleitt er Syðra Fjallabak ekki að opnast fyrr en eftir miðjan júní þannig að ég myndi ekki veðja á að það opni fyrr en í næstu viku. Þó getur verið þess virði að kíkja á kortið á fimmtudag.
Rétt að skora á alla að virða lokanirnar, þetta er allt að nálgast.
Kv – Skúli
Þorsteinn, nú hefurðu sært Patrol-hjarta illilega. Maður segir ekki við nýbakaðan faðir að unginn sé ljótur og maður segir ekki sanntrúuðum Patrol manni sannleikann.
Kv – Skúli
Grínið hjá Dolla hérna efst er kannski ekki langt frá sannleikanum þegar betur er að gáð, sbr innlegg Dassa neðst á [url=http://islandrover.rangur.net/spjall/viewtopic.php?t=1253:2w55q506][b:2w55q506]þessum spjallþráð[/b:2w55q506][/url:2w55q506] hjá [url=http://www.islandrover.is/:2w55q506][b:2w55q506]Íslandrover[/b:2w55q506][/url:2w55q506]
Reynslan af breytingunum og notkun breyttra bíla skiptir máli.
Kv – Skúli
