Forum Replies Created
-
Replies
-
Mér finnst margir ágætir punktar í gamla þræðinum um þetta mál. Maður hefur vissulega heyrt af sárum tilfellum þar sem menn koma að einhverjum á þungum bíl pikkföstum í krapa eða öðrum sem heldur vel og það er byrjað að kippa og þarf hroðaleg átök til að ná bílnum sem endar með því að spotti slitnar og stórskemmir dráttarbílinn. En það eru margar hliðar á þessu. Ég hef líka séð ökumann dráttarbílsins draga fram of veigalítinn spotta, taka svo langt tillhlaup og kippa svo langt umfram það sem sem þarf . og slíta spottann. Þannig getur dráttarbíllinn verið valdur af skemmdunum og sá sem er dreginn getur afskaplega lítið áhrif haft á hvort verði tjón eða ekki, allavega þangað til hann er laus. Spurning hvort það sé endilega sanngirni í því að hann beri allan kostnað af tjóni.
Segum sem svo að þú ert fastur og ert svo heppinn að það kemur maður á öflugum bíl sem er til í kippa í þig, eina er að þú þarft að skrifa undir smá skjal um að þetta sé allt á þína ábyrgð. Gott og vel, sjálfsagt mál að gera, þið gangið frá plagginu og kappinn fer í skottið hjá sér og dregur fram gamla tógið sitt, stíft og gamalt, hlýtur að vera í lagi, allavega hafið þig ekkert annað. Svo þegar er farið að kippa í kemur í ljós að viðkomandi hefur kannski ekki mikla reynslu í þessu, tekur ægilegt tillhlaup og stendur tækið, rykkir þér upp með hvelli og slítur spottan um leið, stórskemmir bæði þinn bíl og sinn í öllum látunum, auk þess sem framdrifið hjá honum brotnar þegar rykkurinn kemur (þetta var Toyota!). Og þú ert búinn að undirrita yfirlýsingu um að bera allt þetta tjón. Þetta er auðvitað tilbúið dæmi en sýnir að það er ekkert einhlítt í þessu.
Ég held ég fari seint að aka með svona eyðublað í hanskahólfinu, heldur reyni frekar að koma í veg fyrir tjónið og þegar það gerist þá er það bara þannig, shit happens. Það er svo margt annað hægt að gera. Í fyrsta lagi þá hef ég engar áhyggjur af svona málum þegar ég ferðast með mínum ferðafélögum, veit að þeim er treystandi til að taka á hlutum af sanngirni og segi það af gefinni reynslu. Í öðru lagi vera með almennilegan spotta og endurnýja hann þegar hann er farinn að líta illa út, henda þeim gamla þannig að menn freistist ekki til að nota hann. Í stað þess að eyða tíma í skriffinsku áður en dráttur á sér stað er hægt að skoða festingar og króka og ef þér finnst þær ekki nógu traustar, þá tekurðu bara minna á þeim. Skella galla eða spotta ofan á dráttartógið. Byrja á að taka á mjúkt og rólega. Semsagt nota öll trixin í bókinni til að koma í veg fyrir tjón.
Kv – Skúli
Eins og sjá má hér að ofan er austfirska aðferðin, bara hafa þetta nógu helvíti breitt. Ég kaupi alveg þá kenningu að það gefi meira og betra flot, Austfirðingarnir vita alveg hvað þeir syngja í þeim efnum. Gallinn við þetta er hins vegar að þú færð meira vogarafl og álag á legur og meiri hætta á að skemma eitthvað og aksturseiginleikar geta verið verri á breiðari felgum. Þetta er því að hluta spurning um hvernig þú forgangsraðar og hvaða eiginleikar skipta mestu.
Kv – Skúli
Ég er nokkuð sáttur við þetta hjá þetta hjá honum Mikka (wastingtimewithmikeandari). Þegar maður les þetta í gegn sér maður að endingartími á bíl og vél er í nokkrum metum þarna þannig að því miður Hlynur, Patrol er þá sjálfkrafa kominn úr leik, allavega ákveðnar árgerðir sem hafa komið óorði á hann í þeim efnum. Hilux er auðvitað ólseigur fjandi og þolir ýmislegt, en ég veit samt ekki alveg hvort hann eigi endilega heima í þessum hóp.
Kom reyndar á óvart að sjá Scout þarna í fyrsta sæti, en ég get alveg keypt það að hann eigi það skilið. Þarna er talað um 8 cyl vélina, en þeir sem komu hingað voru allavega margir með vél sem menn kölluðu hálf V8. Hún var semsagt 4 cyl en stimplarnir gengu aðeins til hliðar eins og á V8, vantaði bara hina fjóra á hina hliðina. Svo er náttúrulega Landinn í toppsæti þarna eins og vera ber. Menn vita að vísu ekki endingartíma þeirra ennþá því þeir hafa aðeins verið í framleiðslu í 60 ár.
Kv – Skúli
Er það ekki þetta hús hér:
[img:iytu26kj]http://www.f4x4.is/new/files/photoalbums/3742/48441.jpg[/img:iytu26kj]Hvar er gengið? Hvar fær klúbburinn bílastæði?
Aðeins stærra samhengi á þessari mynd:
[img:iytu26kj]http://www.f4x4.is/new/files/photoalbums/3742/48442.jpg[/img:iytu26kj]
Kv – Skúli
Á nú að fara að bjarga Ofsa úr snörunni með því að túlka orðin eftirá að hætti ónefndra borgarfulltrúa! Ég bendi á að Eik er örugglega ekkert að fara að stökkva til og fá sér Tetra þannig að það er ekki ónýtt fyrir hann að fá Vodafone símann hans Ofsa.
Hitt get ég tekið undir að meira er betra og fyrir hinn venjalega túrhest og almennan ferðamann að sumarlagi er GSM eini raunhæfi kosturinn. Því er mjög gott ef símafélögin fara að keppast við að koma helstu ferðaleiðum á hálendinu í GSM samband, miklir öryggishagsmunir sem felsast í því. Ég trúi því hins vegar seint (ætla samt ekki að leggja neitt undir) að það komi til með að duga okkur eða öðrum hópum sem eru í einhvers konar extreme feramennsku. Því þurfa að koma til kostir sem eru beinlínis byggðir upp með þetta í huga. Þó dekkun VHF sé ekki 100% þá er hún gríðarlega góð.
Kv – Skúli
Ofsi, þú lagðir símann þinn undir, hver á að fá hann? Ég var að hlera á Tetranu að einhver þorrablótsfari hafi labbað út í Setrinu með Vodafone simann sinn og hringt heim. Held ég hafi örugglega náð þessu rétt. Trúi þessu samt varla fyrr en ég reyni það sjálfur.
Kv – Skúli
Svona þræðir eru alltaf sérlega ánægjulegir því hér kemur fram sem oftar hvað menn í klúbbnum eru upp til hópa hamingjusamir! Allir svo yfir sig ánægðir með sinn bíl, litilir bílar, stórir bílar, sama hvað merki er á þeim, allt eru þetta greinilega hinar mestu eðalkerrur og eigendurnir ánægðir eftir því. Þetta er mjög gott fyrir sálarlífið.
En að efninu, vígalegur þessi Dodge og órtúlegt hvað hann samsvarar sér vel á þessum 54 tommum. Þetta er fínt krydd í flórnuna.
Kv – Skúli
Þetta er nú eiginlega meira en æsifréttamennska hjá Sigga, þetta er nær því að vera sálfræðileg fréttaskýring. En eitt sem ég þurfti að lesa yfir aftur til að skilja. Siggi skrifar:
‘… hefur (Slóðríkur) löngum verið á milli tannana á fólki þar sem gert er grín að honum fyrir öll þau mistök sem drifið hafa á daga hanns um ævina.’
Þetta með DRIFIÐ á daga hans, óvanalegt að í setningu þar sem fjallað er um Slóðrík og orðið ‘drifið’ kemur fyrir en hvergi nefnt að það sé brotið. Og ekki er verið að tala um að hann hafi drifið svo mikið í túrnum.
Bara spekúlera!
Hvurt í logandi, var Rottunum hleypt á fjöll. Þetta er athyglisverð ferðasaga því þeir voru þarna í brjáluðum byl og stórviðri en aðrir sem ég hef heyrt í sem fóru á fjöll um helgina voru í þessu líka fína veðri.
Það er líka athyglisvert hvað Ofsinn er orðinn trúaður, nú er það rakið til refsinga Skaparans þegar eitthvað bilar í Slóðrík. Sé það rétt er annað hvort að skaparinn sé alveg sérlega refsiglaður gagnvart Ofsa eða syndaregister hans óhemju langt og margt sem þarf að refsa honum fyrir. Líklega veðrið þá líka verið guðleg refsing.
Kv – Skúli hinn guðlausi
Ef mín reikningsþekking er ekki að bregðast ætti þetta að vera 135 lítra tankur.
Þetta eru fróðlegar pælingar. Ég var aðeins að pæla í þessu með styrkinn og efnisþykktina. Ég var með áltank undir Runner og þurfti tvívegis að rífa hann undan til að láta sjóða í hann. Hann var boltaður í grindina með eyrum og grindin sveigist til í akstri en ekki sami sveiganleiki í tanknum sem gerði það að verkum að spurnga myndaðist í suðu. Tókst loks að komast hjá þessu með því að hafa gúmmífóðringar á milli og herða ekki of mikið. Því er spurning hvort minni efnisþykkt (stálplötur) sé ekki einmitt betri kostur. Kannski er þetta tóm steypa hjá mér, enda ekki sérfróður um þessi efni.
Kv – Skúli
Hárrétt hjá Bazza, það er hrein móðgun við börn þessa lands að líkja því sem hér fer fram við leiki þeirra í sandkössum. Í sandkössum fer oft fram mikil uppbygging og þar er lagður grunnurinn að framtíðinni. Þetta er klárlega ekki góð samlíking.
Kv – Skúli
Það er ekki einfalt mál að framfylgja reglum af sanngirni. Ein leið í því er að fylgja þeim bókstaflega úr í ystu æsar, segja bara svona eru reglurnar orðaðar og ekkert múður. Þannig komast menn hjá því að þurfa að vega og meta og taka ákvörðun í ljósi málsatvika, en fá oft í staðin gagnrýni fyrir að skoða hlutina ekki í samræmi við raunveruleikann. Eitthvað hefur t.d. sýslumaður Árnessýslu verið gagnrýndur fyrir slík vinnubrögð. Hvenær er Kaupfélag Benedikt bisness og hvernær er það ekki bisness? Hvernig á vefnefnd að úrskurða um það án þess að fá á sig gagnrýni fyrir að mismuna mönnum. Ég er ekkert að segja að bókstafsaðferðin sé sú rétta í þessu, en vandi vefnefndar er samt skiljanlegur. Kannski ætti bara að einfalda málið og gera þetta ágæta framtak Benna að viðurkenndum þætti í starfi 4×4 og kjósa Benna kaupfélagsstjóra.
Ég er búinn að vera á MT MTZ í tæpt ár án vandræða, hvorki affelgað né spólað í felgunum.
Sú aðferð sem ég beitti var að grunna sætið á felgunum nokkrar vænar umferðir með epoxy grunn og límdi svo. Þessi aðferð er að duga mér ágætlega. Hugsanlega eru Landrover felgurnar þrengri en þær japönsku, en ég hef svosem ekkert frekar fyrir mér í því. Eins finnst mér líklegt að það reyni meira á þetta ef menn eru með skriðgír eða mjög lág hlutföll, þá sé hættan að spóla inni í felgunum meiri. Ég hef verið óspar á úrhleypingar þannig að það er ekki skýring.
Kv – Skúli
Það heitir að vera með starfandi formann og er hreint ekki óþekkt. Ég er ekki viss um að það sé kannski heppilegasta fyrirkomulagið, en heldur djúpt í árina tekið að það gangi aldrei, allavega eru til dæmi um að það gangi ágætlega. Ég efast líka um að það sé meginþáttur í þessu máli, án þess að vita það.
Kv – Skúli
Þetta eru slæmar fréttir og grafalvarlegt mál að svona sé komið. Hér erum við að missa úr tvo mjög öfluga menn út úr stjórn og mikill missir fyrir klúbbinn ef hann verður af kröftum þeirra. Ég held að ekki sé á neinn hallað þegar ég segi að Jón Snæland hefur verið einn öflugasti liðsmaður 4×4 um langt skeið, hvort sem litið er til afkasta eða áhuga á málefnum klúbbsins og stór verkefni fyrirliggjandi sem ég sé ekki að neinn annar hafi þekkingu eða getu til að stýra. Tryggvi hefur mér sýnt á öllu vera með efnilegustu nýliðum í klúbbstarfinu og vaxið jafnt og þétt í áliti hjá mér með auknum kynnum.
Ég ætla ekki að blanda mér í umræður um bakgrunn þessarar ákvörðunar þeirra, en skora á ALLA hlutaðeigandi (þ.e. fráfarandi stjórnarmeðlimi og þá sem eftir sitja) að velta fyrir sér með hvaða hætti þeir geti stuðlað að því að hægt verði að vinda ofan af þessari stöðu þannig að starfshæf stjórn geti unnið að hagsmunamálum klúbbsins fram að næsta aðalfundi. Ég veit ekki nógu mikið um ágreiningsmálin til að vita hvað þarf til, kannski einhvers konar uppstokkun, breyting á verkferlum eða hvað, en hagsmunir klúbbsins verða að ganga fyrir öllu öðru í þessu. Sem dæmi um það sem hér getur verið í húfi er að við vorum að ná góðum árangri í uppbyggingu á ímynd klúbbsins núna um helgina og allur sá árangur og árangur síðustu þriggja ára á því sviði er í hættu.
Kv – Skúli
Svona að aflokinni þessari ferð og áður en næsta miðjuferð kemst á koppinn er kannski gaman að velta fyrir sér þessari spurningu; hvers vegna er þessi miðja svona merkileg? Er ekki bara nóg að vita hvar hún er og kannski mála X á einhverja steinvölu þarna þannig að við vitum hvar hún er? Þarf endilega að merkja hana með einhverri athöfn?
Svona pælingar kalla eiginlega á að skoða söguna á bak við þetta og þá þurfum við að fara aftur til dagsins 3. desember 2005. Þá eins og svo oft áður sat Jón Ofsi Snæland við tölvuna sína að lesa spjallið á 4×4. Fór í gegnum hvern þráðinn á fætur öðrum, en einhvern vegin fannst honum þetta allt eitthvað svo óskaplega ómerkilegt sem þarna var verið að ræða: Hver er eyðslan á 2,4 Hilux, hvaða dekk virka best í snjó, af hverju surgar í framdrifnu hjá mér, hvort virkar betur Toyota eða Datsún? Nei nú þyrfti hann að finna upp á einhverju til hrista upp í þessu. Jón fór fram í eldhús, fékk sér kaffi í krús, hellti tveimur skeiðum af sykri út í, greip eina Winston úr pakkanum, braut filtið af og kveikti í. Rölti sér svo fram þar sem stórt Íslandskort hangir upp á vegg og horfði um stund hugsi á landið okkar. Hvar skildi nú vera miðjan á þessu spurði Jón sjálfan sig? Fékk að vísu ekkert svar en þarna var allavega komið eitthvað viðfangsefni til að spá í. Þetta getur örugglega verið efni í rökræður í einhvern tíma. Hann settist við tölvuna nokkuð ánægður með sig og skellti þessari spurningu inn á vefspjallið: Hvar er miðjan?Ofsinn reyndist sannspár um það að þessi umræða myndi stytta mönnum stundir allnokkurn tíma, því enn erum við að taka afleiðingunum. Eftir miklar og fjörlegar umræður á vefspjallinu voru Landmælingar fengnar til að reikna þetta út, en í raun staðfestu útreikningar Landmælinga punkt sem félagi okkar Guðmundur nokkur Jónsson hafði þegar fundið. Eitthvað vakti þessi umræða athygli fjölmiðla, Loftmyndir gagnrýndu ónákvæmni í þessu og sögðu að punkturinn væri þremur metrum sunnar og Árni Johnsen sem kom með stæl inn í Kerlingafjöll á laugardagskvöldið fannst ekki nógu gott að Vestmannaeyjar væru ekki reiknaðar með inn í dæmið. Loks var ákveðið að reisa þarna vörðu sem síðar breyttist í stuðlabergsstöpul einn mikinn til að merkja staðinn.
Hugmynd sem varð til hér á spjallinu er semsagt orðin að máli sem vekur áhuga hjá fjölmörgum og á væntanlega eftir að gefa skemmtilegt krydd í fjallaferðir um ókomna tíð. Nokkuð magnað hvernig hlutirnir geta velt upp á sig og gott dæmi um að hvað sem öllu öðru líður getu líflegt spjall hérna leitt af sér skemmtilega hluti. Um að gera að gera sem mest úr þessu og hafa þessa vígslu á steinum svolítið hátíðlega. Það gekk því engan vegin að hún væri að fá einhverja skemmriskírn í kafaldsbyl. Miðjan er auðvitað miðja allrar þjóðarinnar en samt alveg sérstaklega miðja 4×4 félaga.
Kv – Skúli
Það má örugglega gagnrýna eitt og annað varðandi þessa ferð og fyrirkomulagið varðandi þessa fyrirhuguðu athöfn sem átti að vera inn á Miðju (er ekki rétt að fara að skrifa þetta með stórum staf). Úr því missionið var ekki klárað verður hægt að endurtaka leikinn með öðru fyrirkomulagi, það er nú útaf fyrir sig heppilegt! Ég held hins vegar að það sé ekki góð hugmynd að hafa svona ferð sem stóra hópferð og eiginlega held ég þvert á móti að þetta að bjóða öllum að mæta inn á Miðju á tilteknum tíma sé akkúrat málið. Ef eitthvað er þá var þetta of stór hópur því stærð hópa hefur afskaplega mikil áhrif á hvernig gengur að komast áfram. Miklu sniðugra að þeir sem vilja geti hóað sig saman í smærri hópa og mætt á staðinn. Ég er því ekki sammála þessum punkti, en vel má vera að það hefði mátt gera meira í að kynna þetta og skapa stemningu eins og mér skilst að Bazzi sé að benda á.. Held samt að ég fari rétt með að eitthvað hafi verið gert í því, en örugglega ýmislegt fleira sem hefði mátt gera í því
Það flækir svo kannski enn frekar myndina að þarna var raunar tvennu slegið saman, s.s.Miðjuferðinni og svo svokallaðri þingmanaferð. Þetta er þriðja þingmannaferðin sem klúbburinn stendur fyrir og tilgangur þeirra er að bjóða ráðamönnum og embættismönnum á fjöll. Það gerum við til að kynna fyrir þeim hvernig þessi ferðamennska gengur fyrir sig og út á hvað hún gengur, þannig að þau þekki til mála þegar okkar mál koma á þeirra borð. Þarna gefst líka tækifæri til að skapa tengs sem nýtast síðar þegar vinna þarf í einhverjum málum. Þessar ferðir eru skipulagðar með öðrum hætti en almennar opnar ferði og þeir sem eru fengnir til þátttöku er valdir með ákveðin verkefni í huga sem þjóna þá markmiði ferðarinnar, stundum vegna þekkingar sinnar á einhverju málefni, þeir séu að vinna í tilteknum málaflokkum fyrir klúbbinn eða einfaldlega af því það vantar öflugan bíl í flutning á vistum o.s.frv. Við í umhverfisnefndinni njótum þess t.d. að vera gjanan tilkallaðir í þessar ferðir þar sem það málefni sem við erum að vinna með er einmit mál sem gjarnan kemur á borð þessara gesta okkar. Það er semsagt ekki spurningin hverjum langar með heldur hvað viðkomandi geti lagt til sem eykur árangur ferðarinnar Kannski má spá í hvort það hafi verið sniðugt að slá þessu tvennu saman með þessum hætti, en svona fyrirfram hljómaði það ágætlega. Ef þetta er að valda óánægju má sjálfsagt segja að það hafi verið röng ákvörðun, en alltaf auðvelt að vera vitur eftir á. Það er samt engin spurning í mínum huga að árangurinn af ferðinni var heilmikill hvað þetta varðar þó svo ekki hafi gengið að vígja Miðjuna. Gestir okkar eru örugglega allnokkuð fróðari um hálendisferðir en þeir voru fyrir ferðina og búa að því í störfum sínum.
En bottom-line, ég held að í næstu tilraun eigi einmitt að skipuleggja þetta þannig að það sé tiltekinn tími sem stefnt sé á og hver og einn komi sér þangað af eigin rammleik frekar en að fara út í einhverja risastóra skipulagða ferð. Svo gæti verið betra að hafa þetta meira að áliðnum vetri þegar daginn er farið að lengja og kominn meiri grunnur í snjóinn. Ef þessi snjór helst eitthvað sem núna er á hálendinu gæti hann alveg myndað fínan grunn. En þetta er bara mín skoðun á þessu.
Kv – Skúli
umhverfisnefnd
Það eiga örugglega eftir að sjást myndir, bæði hér á vefnum, væntanlega á Siv.is ef ég þekki hana rétt og svo sendi Fréttablaðið ljósmyndara sem ég held að hafi fengið heilmikið fóður að vinna úr.
Gestirnir voru semsagt Kolbrún Halldórsdóttir, Siv Friðleifsdóttir, Róbert Marshall aðstoðarmaður samgönguráðherra (sem er nú reyndar líka félagi í 4×4 og kom á eigin bíl), Magnús Gunnarsson forstjóri LMI, Ólafur Helgi sýslumaður á Selfossi og Halldóra (vona að ég fari hér rétt með nafnið) sem er í hreppsnefnd Hrunamannahrepps. Árni Johnsen hafði boðað forföll vegna annríkis um helgina en um miðjan dag á laugardag bárust þær fréttir að hann væri lagður af stað á eftir okkur með Gunna Icecool. Fjallahótelið hans Gunna var ekki í vandræðum með að elta okkur uppi. Árni snæddi svo með okkur og var kvöldvökuna og fór svo með Gunna þegar aðeins var farið að líða á þar sem eitthvað var stíf dagskrá á sunnudag hjá honum. Að sjálfsögðu var tekinn ‘brekkusöngu’ sem þeir Árni og Robert Marshall stýrðu með glans. Það var hins vegar Gunni Antons, sá frábæri söngmaður sem massaði þetta þegar hann dró fram gítarinn eftir að aðrir voru hættir.
Kv – Skúli
Það er nú alltaf gott þegar hægt er að margnýta sama tilefnið til fjallaferða. Benni og co semsagt búnir að festa miðjuna niður þannig að hún fer ekkert og enn hægt að gera sér ferð upp á fjöll til að festa á skjöldinn góða við hátíðlega athöfn.
Þrátt fyrir að verkefninu hafi ekki verið lokið var þetta hinn ágætast jeppatúr og ekki vantaði snjóinn, allavega ekki lausasnjó. Gamlir refir sem þarna voru lýstu því umvörpum yfir að svona mikið nýsnævi á Kjalvegi hafi ekki sést síðan á síðustu öld. Snjór sem var of þungur til puðrua í gegnum hann en of laus til að fljóta á honum. Það var því mikið lólóað og gekk gjarnan hægt yfir. Það dregur svo alltaf heldur úr ferðahraða þegar hópastærð er komin yfir 20 bíla, mörg stopp til að þétta hópinn, margir stoppar dregnir fram og þar frameftir götunum. Eitthvað af bilunum eins og komið hefur fram.
Eins og kemur fram hjá Tryggva var var ekki farið af stað frá Ingólfsskála fyrr en um kl. 18 og því orðið nokkuð ljóst að heimkoma yrði í seinni kantinum. Þegar við vorum komin skamman spöl bárust þær fréttir frá Skagfirðingum sem auðvitað voru mættir á miðjuna að veður væri að versna á stanðnum og orðið blint. Því var blásið til fundar. Einhverjum bílum í hópnum var að ganga erfiðlega af margýmsum ástæðum þannig að það mátti búast við að sá kafli sem eftir var myndi taka drjúgan tíma að óbreyttu. Einn möguleiki í stöðunni var að öflugustu bílarnir héldu áfram og kláruðu þetta en aðrir færu að vinna í því að komast til byggða. Það þótti hins vegar heldur mikil skemmriskírn á miðjunni og lítið hátíðlegt við það ef nokkrir einstaklingur renndu þarna að steininum í hríðarkófi, stykkju út úr bílunum, hnoðuðu skildinum á og væru svo farnir. Þessi merkisstaður sem miðjan er á skilið meiri og virðulegri athöfn og því var það niðurstaðan að allur hópurinn snéri við. Eins og komið hefur fram var ákveðið að fara aftur vestur yfir á Kjöl og þar suðurúr, en þar gátum við að miklu leiti nýtt förin okkar og svo för eftir Kerlingafjallabændur eftir að komið væri suður fyrir Kerligafjallagatnamót. Ég var svo að detta í bæinn um 4.30 í nótt með þingkonu (Kolbrún H) sem átti að mæta skömmu síðar á nefndarfund á Alþingi. Held samt að hún hefði verið til í að fórna mörgum þingfundum fyrir þennan túr og þó hún sæi ekki þessa frægu miðju Ísland sá hún margt annað og upplifði margt sem hún hafð ekki séð áður.
Þakka ferðafélögunum samferðina og vona að allir hafi komist í bæinn fyrir rest.
Kv – Skúli
P.s. ég get alveg vottað þetta Halli Gulli að þínir menn svindluðu ekki á matar- og kaffitímum, sinntu þeim af mikilli nákvæmni.
Allar fréttir benda til þess að þetta verði hin ágætasta ferð, hvort sem hópurinn komist að miðjunni eður ei. Allavega snjór og skemmtilegheit.
En þetta með lokunina á Ellu, þá held ég það hljóti að vera að þeir sem sjá aðeins sakleysilegar spurningar í skrifum hennar hér, séu að lesa heldur hratt yfir innlegg hennar. Ég veit svo sem ekki nákvæmlega hvað réði ákvörðun vefnefndar, en mér finnst farið ansi hressilega út fyrir mörkin með því að leiða að því getum að gestirnir sem eru að koma í ferðina séu ekki nógu merkilegir pappírarar og þess vegna fái hún ekki uppgefinn listann. Það er eitt að gera lítið úr félögum sínum, en mun alvarlegra þegar það beinist að boðsgestum okkar í ferð sem ætluð er til þess að kynna klúbbinn fyrir ráðamönnum og embættismönnum sem hafa með að gera ákvarðanir sem snerta hagsmuni okkar. Slíkar getgátur gera ekkert annað en grafa undan klúbbnum og hagsmunum klúbbfélaga. Ef slík framkoma er ekki út fyrir mörkin þá eru mörkin ekki til. Það hefur verið skemmtilegt eða hitt þó heldur fyrir viðkomandi gesti að lesa þetta, áður en vefnefnd tók þá ábyrgu ákvörðun að færa þetta undir innanfélagsmál.
Kv – Skúli
