Vökuportið

Síðan ég eignaðist minn fyrsta bíl hef ég margsinnis heimsótt Vökuportið til að leita að varahlutum þegar eitthvað hefur bilað hjá mér. Úrvalið þar var gott og verðlagningin sanngjörn, einkum ef maður sá sjálfur um að sækja hlutinn úr bílflaki úti í porti. Svo veitti þetta manni oft óborganlegar upplýsingar um það hvernig best væri að fjarlægja bilaða hlutinn úr eigin bíl án þess að valda óþarfa skemmdum.

Nú eru breyttir tímar. Vaka hefur flutt sig á nýjan stað og breytt rekstrinum þannig að búið er að loka bílaportinu fyrir almenningi. Ef mann vanhagar um einhvern hlut, sem ekki er til inni í hillu hjá þeim þarf að senda starfsmann með verkfæri út í port og bíða meðan hann rífur hlutinn úr einhverri druslunni þar. Ég fæ ekki betur séð en að þetta fyrirkomulag sé dauðadæmt því að bæði hleypir þetta kostnaði upp til muna og svo munu örugglega koma upp mýmörg tilfelli þar sem starfsmaðurinn fer út og rífur og rífur, en kemur svo pungsveittur inn með einhvern allt annan hlut en kaupandinn vildi fá. Hver á þá að borga starfsmanninum kaup fyrir vinnu sína? Varla gerir kúnninn það.

Ég fæ ekki betur séð en að Vaka sé með þessu búin að loka sinni varahlutaverslun, en væntanlega opnast þá um leið viðskiptatækifæri fyrir aðra, sem vilja gera út á þennan markað.
Ég auglýsi því eftir reynslu 4X4 manna af öðrum partasölum á SV-horninu, hvort nokkur þeirra sé sambærileg við gamla Vökuportið.
Blessuð sé minning þess.

Kveðjur

Ágúst