VHF EÐA CB EÐA BÆÐI ???

Já, CB er enn lágmarskbúnaður og NMT í raun einnig. VHF er enn heldur dýr talstöð þótt þær hafi lækkað mjög á undanförnum árum. Sennilega mun VHF þó taka yfir á endanum og þeim fer mjög fjölgandi í bílum. Verðið er um þessar mundir um 40 þús. með ísetningu (a.m.k. var Siggi Harðar að bjóða þær á þessu verði á tímabili – veit ekki hvort það tilboð stendur enn).

Gallinn við CB-ið er afar stutt drægni og mjög þreytandi hljóðskilyrði. Hún er nothæf meðan menn aka í halarófu, en hljóðskilyrði VHF eru mjög góð, nánast eins og að tala í heimilissíma.

Þó má hljóðskilyrði CB í mörgum tilvikum laga með stillingu og mælingu á rafeindaverkstæðum. Það eru allt of margir með þær illa stilltar og með ýmis atriði í ólagi sem unnt er að laga með mælingum.

Sértu hvorki með CB né NMT í bílnum myndi ég ráðleggja þér að vera tvort tveggja til að byrja með.

Hins vegar dregur VHF alveg ótrúlega langt við flest skilyrði. Þú getur auðveldlega lent í aðstæðum þar sem NMT er ekki ,,inni", hvað þá CB, en með skannanum, sem er innbyggt í VHF er nánast öruggt að þú nærð sambandi við einhvern, einhvers staðar.

Á ferðalögum er aðalatriðið að einvher í hópnum sé með VHF. Það þurfa ekki allir að vera með slíka stöð, en það er algjör lágmarkskrfa að slík stöð sé með í för. Af þessum ástæðum hef ég sjálfur ekki lagt mikla áherslu á að fá mér VHF vegna þess að ferðafélagar mínir eru með hana, sumir hverjir. En á endanum verður hún sett í bílinn, hvað svo sem frúin segir!
bv

Ég er búinn að fara í nokkrar ferðir bæði stuttar og langar og mér finnst alveg nauðsynlegt að menn séu með CB þá er hægt að fylgjast vel með hópnum og tala við hvaða bíl sem er.Það er ekki svo dýrt heldur, hitt getur svo komið með tímanum,nema lámark 1STK nmt sími í hvort sem stutta eða langar ferðir.

YAESU VX-2000

40 rása – 25w sendistyrkur
Tíðnisvið : 146-174 MHz
Hröð sjálfleitun [scan]
Tengi fyrir handfrjálsan búnað
Tengi fyrir gagnasendingu
MIL-STD 810 Hernaðarstaðall
mjög lítil og nett

stærð: [BxHxD] 160 x 40 x 105mm

verð 44.900 m/vsk
áður kr 52.246

4×4 verð er 40.424
með 10% afslætti

þetta er tilboð frá rsh sem er auglýst hér a´þessari síðu og þeir eru einnig með cb stöð á 9,980,- en þá er auðvitað eftir að kaupa loftnet of setja dótið í. 40,500,- er ekkert svo mikið þó að ég sé nú ekki ríkur

kveðja Siggi
R-3133

Sælir

Nú eru 2 ár síðan ég henti CB stöðinni úr bílnum, og var ég þeirri stundu fegnastur, það er hægt að halda uppi samræðum við kóarann eftir það.

Nú er svo komið að hér í Vesturlandsdeild eru fæstir af þeim sem eru að ferðast með CB. Um leið og menn kynnast VHF þá sjá þeir hvað þetta tæki hefur mikið fram yfir CB.

Verðmunurinn er ekki eitthvað sem fólk sem er í þessari útgerð ætti ekki að ráða við. Þetta kostar nú svipað og eitt 38" dekk, en um leið og þetta er besta fjarskiptatækið sem við eigum völ á á milli bíla, þá er þetta einnig orðið öryggistæki með tilkomu endurvarpanna.

kv.
Eiríkur

Hæ ég skoða þettað spjall næstum því daglega og hef mikið gagn og gaman af þó ég sé ekki félagi,er bara á 31" búinn að eiga 2 alvöru jeppa áður.
þar sem menn eru að tala um VHF þá langar mér í slíka stöð (er með CB og NMT) finnst þær samt dýrar og mér skilst á mönnum hér á vefnum að ég eigi ekki að fá að kaupa VHF þar sem ég er ekki félagi OK þarf ég kannski að vera í 4X4 til að fara á fjöll ég kemmst ekkert í snjó á 31" enda er ég aðalega að þvælast þettað á sumrin þegar veðrið er gott (þeir ætlast kannski til að ég gangi bara heim í góða veðrinu)

Mér finnst þetta snúast um það hvort ferðalög um hálendi Íslands eigi að vera aðgengileg sem flestum, eða fyrst og fremst fyrir þá sem hafa aðstöðu til að kaupa (eða láta fyrirtæki kaupa), tæki undir sig sem kosta frá 5 miljónum og uppúr. Fyrir þá síðarnefndu er verð VHF stöðva hégómi, og ekkert mál að henda gamla draslinu sem er ekki lengur í tísku.

VHF kerfið er lokað öðrum en félögum í 4×4, á maður kannske ekkert að vera taka slíka með sér í ferðir?

Það væri líka gaman að fá uppgefið hver heildarkostnaður klúbbsins af VHF endurvörpum sé orðinn, og hver áætlaður rekstarkostnaður kerfisins sé. Ennfremur hvaða áætlanir hafi legið til grundvallar þegar farið var af stað í ævintírið og hvenær og hvernig félagsmenn voru spurðir álits á fjárútlátunum.

Svo er það dæmigert fyrir Björn Þorra að lesa ekki pistlana sem hann snýr útúr. Ábending mín að hægt væri að hringja í 112 án áskriftar átti við gervitunglasímana, notkunar gjöld eru mjög há þar. Notkun NMT síma er hinsvegar mjög ódýr.

-Einar

Blessaður eik.

Auðvitað eiga ferðalög um hálendi Íslands að vera aðgengileg sem flestum, hvort sem þeir hafa aðstöðu til að kaupa sér bíl eða láta aðra kaupa fyrir sig bíl (skildi nú ekki alveg þessa pælingu hjá þér, en hvað um það). Það hefur enginn talað um tísku í þessum fjarskiptamálum nema þú, enda leit ég svo á að verið væri að reyna að svara á málefnanlegan hátt fyrirspurn frá manni sem er að velta fyrir sér að kaupa sé talstöð eða talstöðvar í bílinn sinn.

Auðvitað er VHF kerfi félagsins fyrir félagsmenn. Er það nú allt í einu einhver frétt? Er ekki bíllinn þinn eingöngu fyrir þig? Geta aðrir kannski gengið að því sem vísu að þeir geti notað hann? Hver hefur haldið því fram að það eigi ekki að taka aðra en félagsmenn með sér í ferðir? Og svo talar þú um að ég snúi út úr!

Auðvitað sníður sér hver stakk eftir vexti, það er ekkert nýtt. Ég hef bæði nú og áður bent mönnum á ótvíræða kosti VHF kerfisins umfram CBið, sem ég tel á engan hátt sambærilegt þar sem gæði, möguleikar og öryggi VHF er bara á allt öðrum standard en CB.

Hver heildarkostnaður klúbbsins af VHF kerfinu er þekki ég ekki nákvæmlega, en ég get upplýst þig um að aðalfundir og félagsfundir í klúbbnum á sl. árum hafa ákveðið uppbyggingu og fjármögnun þessa kerfis. Þær ákvarðanir hafa verið teknar á lýðræðislegan og málefnanlegan hátt eftir því sem ég best veit og almennt ríkt samstaða um þau mál. Ég tek undir það með þér, að uppbygging kerfisins hefur verið ævintýri líkust og ótrúlegt hve mikil dekkun er í endurvarpakerfinu nú þegar.

Hvað heldurðu að það hefði mátt kaupa margar VHF stöðvar, setja upp marga VHF endurvarpa og borga mörg árgjöld af VHF fyrir þann kostnað sem hlaust af leitinni á Langjökli í gær, nótt og í dag, þar sem hundruð manna á tugum björgunartækja leituðu að mönnum sem ekki gátu látið vita af sér? Heldurðu að það hefði ekki verið gáfulegra að vera með netta VHF stöð í vasanum og geta kallað í félagana um leið og menn urðu viðskila?

Ég þekki engann sem hefur verið jafn ötull niðurrifs talsmaður VHF kerfisins, sbr. þennan pistil þinn nú og einnig þegar við skiptumst á skoðunum um þetta í fyrra. Ég virði að sjálfsögðu skoðanir þínar þótt rangar séu. Ég spyr þig samt aftur: "Hefurðu aflað þér reynslu af notkun VHF í jeppaferðum nú?"

Með jákvæðum ferðakveðjum öllum til handa,

BÞV

Es. Þú kannski setur inn svona "link" í svarið þitt, þannig að menn geti skoðað það sem okkur fór á milli í fyrra, ég kann það því miður ekki.

Auk þess finnst mér Björn Þorri í meira lagi afskaplega óstilltur maður! Umræða sem þessi svarar akkúrat engum tilgangi!! Tómt bull og kjaftæði!!!
Langbestu kveðjur,
Bolli

Í hreinskilni sagt, félagar, verum nú sanngjarnir hver í annars garð. Þótt menn öfundi fasteignasalann af nýja bílnum, þá þarf nú ekki að mótmæla öllu sem hann segir á þeim forsendum! – Ég sé nú enga ástæðu til að verða spældur út af því sem BÞV hefur látið frá sér fara hér ofar á þræðinum í sambandi við félagsmál og fjarskiptamál. Bottom line is: 1. Hver sem er getur fengið sér VHF stöð. Hinsvegar eru sérrásir 4×4 bara fyrir þá sem hafa greitt félagsgjöld í klúbbnum og þar með tekið þátt í kostnaði við uppsetningu kerfisins. 2. ALLIR geta t.d. notað neyðarrásina (rás 16) ef þeir lenda í ógöngum, menn verða bara að hafa í huga að þetta er alþjóðleg NEYÐARRÁS og og má BARA nota sem slíka. 3. VHF er nánast eina nothæfa kerfið nú um stundir, sem hægt er að segja að sé til reiðu fyrir allan almenning. Inmarsat og annað í þeim dúr er nánast "uden rækkevidde" fyrir venjulegt fólk vegna kostnaðar. Gömlu, þungu og fyrirferðarmiklu millibylgjustöðvarnar, sem ég og fleiri af "gömlu mönnunum" vorum með í bílunum okkar, eru ekki þjónustaðar lengur af Gufunes-radío og koma því ekki lengur að gagni, auk þess sem þær gátu tæplega talist kostur á vélsleðum vegna fyrirferðar og straumnotkunar. —
Ég tek undir það sem hér hefur verið sagt varðandi mennina, sem lentu í óveðrinu á Langjökli í gær, þeir hefðu verið til muna betur settir með VHF-stöðvar. Hinsvegar verður að undirstrika í því sambandi, bæði hvað varðar sleða- og jeppafólk, að það getur ekkert tæki komið í staðinn fyrir heilbrigða skynsemi. Lágmarkið í þeim efnum er að hlusta á veðurfregnir og læra að leggja mat á veðurútlit út frá fáanlegum upplýsingum sem eru nú orðið býsna margar og góðar.

Þetta er einkennilega heit umræða og hasar útaf litlu. Hvað hafa menn verið að segja hérna:

Ef ég er að skilja athugasemdir Eik rétt er hann að tala um að:
– VHF stöðvarnar séu dýrar hér á landi miðað við erlendis og svo bætist við gjald til Fjarskiptaeftirlitsins. Þetta sé eitthvað sem þeir sem vilja takmarka peningana í sportið horfa í (þannig skil ég punktinn með 5. millj. króna bílana, sá sem keyrir á 5. millj króna jeppa þarf að bæta við 1% af kaupverði í VHF stöð en sá sem er á 500 þús króna bíl þarf að bæta við 10% sem vegur þyngra, ekkert flókið við það).
– Margir ferðast með fólki úr mismunandi áttum, sem ekki eru endilega félagar í 4×4. Þá gagnast ekki að vera með VHF til samskipta milli bíla þar sem utanfélagsmenn mega ekki vera með okkar rásir stilltar inn. Í CB hafa allir sömu rásir óháð því í hvaða áhugafélögum menn eru.

Þetta eru neikvæðir punktar við VHF og þessi síðari gerir það að verkum að ég lít svo á að CB stöðin sé áfram nauðsynleg þó ég hafi fjárfest í VHF. Það dregur úr notagildi VHF kerfis 4×4 fyrir mig að það sé lokað öðrum en félagsmönnum þó ég skilji vel röksemdina, þeir njóta sem borga.

Svo eru jákvæðu punktarnir við VHF sem ég hef ekki séð neinn efast um:
– Ólíkt betri hljómgæði, skýrari og lausar við surg og truflanir sem geta oft er í CB
– Margfalt meiri langdrægni, fremsti bíll er ekki að missa samband við þann aftasta eins og stundum er þegar bílaraðirnar eru orðnar langar.
– Endurvarparnir gera þetta að góðu öryggistæki (fyrir okkur félagsmenn) sem CB getur aldrei orðið.

Fyrri atriðin tvö er þó hægt að laga töluvert með því að hafa gott loftnet, vanda ísetningu og láta fagmenn fara yfir hlutina.

Þetta sýnist mér vera kjarninn í því sem menn eru að segja hérna (þegar búið er að slípa burtu merkingalaus stóryrði) og get ég ekki annað en verið sammála öllum megin atriðunum. Allt hefur kosti og galla og bara gott mál að mönnum sé bent á vankantana líka. Ekki þar með sagt að menn eigi ekki að kaupa sér VHF stöð.

Kv – Skúli