Vatnajökulsþjóðgarður

Sælir

Ekki er gott þegar hlutirnir eru bannaðir.

Eitt fór ég að spá í. Nú eru margar af þeim lengri gönguferðum sem farnar eru um hálendið bundnar við trússbíl sem flytur nesti og farangur…ætli að það séu eitthvað heilagari jeppar en aðrir ?

Sennilega kæmi bann vélknúinna ökutækja jafn illa við gangandi ferðamenn og akandi.

Einnig finnst mér grundvallar munur á umhverfisverndarsinnum og umhverfisÖFGAverndarsinnum

Kveðja O.Ö.

Slælir félagar. Datt í hug að leyfa ykkur að sjá bréf mitt til ráð"herrans".

Kv
Palli

Sæl Siv.

Eins og þú hefur væntanlega orðið var við erum við jeppamenn ekki hressir með þær tillögur sem hafa heyrst um lokun umferðar um hluta Vatnajökuls. Ég er einn af þeim fjölmörgu (eða örfáu, eftir því hvernig horft er á hlutina) sem hafa verið að ferðast um Vatnajökul síðustu ár og fer ætíð 2 – 4 sinnum um jökulinn á hverju ári. Tel mig vera mikinn umhverfissinna og tek mikið tillit til annara ferðalanga, þá sjaldan sem maður rekst á þá á þessum stóra skafli okkar, sama hvernig þeir ferðast. Aldrei hef ég rekist á gangandi mann á jökli, en varð var við einn sofandi í skálanum á Grímsfjalli um daginn, en félagar mínir fóru á móti honum kvöldið áður, er hann var að bugast af þreytu upp síðustu brekkurnar upp að skálunum. Hann varð af skiljanlegum ástæðum mjög glaður með þessa aðstoð og má ímynda sér að hann hafi verið sáttur við að það voru fleiri en hann á þessum frábæra en jafnframt óhugnalega stað. Örsjaldan hef ég séð vélsleðamenn á þessum ferðum mínum, einna helst í kringum skálana og á þessum helstu leiðum um jökulinn sjálfan. Bíla sér maður kannski oftast og mest þessa sem eru að ferðast með manni og sjálfsögðu sér maður aðra bíla við skálana á kvöldin.

Get með engu móti skilið það að þessir örfáu sem hafa þrek til að ganga á jökla eigi að hafa þann sérrétt umfram aðra að mega fara á jökla. Ég er td þannig gerður að geta ekki og nenna ekki að ganga alla leið frá sjávarmáli uppá Hvannadalshnjúk. Miklu frekar vill ég fara uppá jökulinn t.d. uppí Hermannaskarð og ganga þaðan á Hnjúkinn. Þetta hef ég td reynt oft síðustu ár en aldrei komist, aðstæður, snjóalög, veður og tími hafa komið í veg fyrir það. Tel ég mig vera svona meðalmann í jeppaferðamennskunni og því varla verið mikið fyrir þeim aðilum sem eru að ganga á Hnjúkinn. Það sama má segja af félögum mínum, við bara sjáum ekki hvers vegna á að hefta umferð um jökulinn. Umferðin er einfaldlega það lítil, að vandamálin eru í raun engin þess vegna.

Allt snýst þetta nefnilega um tillitsemi. Ef það eru skíðamenn á ferðinni er maður nokkuð viss um að þeir vilja ekki mikið af okkur jeppafólkinu að segja, nema að eitthvað sé að og hópurinn þurfi hjálp. Sjálfsögð kurteisi er að senda einn út hópnum og láta vita af sér og skiptast á upplýsingum um ferðaáætlun, gististaði og fl. Síðan bara láta sig hverfa eitthvað út í buskann, því nóg pláss er fyrir alla þarna uppi. Ég get nefnt sem dæmi ef einn bíll verður viðskila við hópinn í góðu veðri og er orðinn 2 – 4 km á eftir hinum, verður maður ekki mikið var við hávaða frá þeim bíl, er maður bíður í góða veðrinu eftir þessum aðila. Ein lítil þúst í fjarska sem þokast nær og heyrir maður fyrst í bílnum er hann á eftir einhverja tugi metra í hópinn. Í vondum verðum skiptir þetta ekki neinu máli, ekkert heyrist, ekkert sést og enginn verður var við neitt veðursins vegna.

Eðlilegasti hluturinn í þessu öllu saman er að góð stjórn komist á umferð um jökulinn og sjálfsögðu á félag eins og Ferðaklúbburinn 4×4 að koma að slíkri undirbúningsvinnu.

Ég skora á þig að kynna þér sjónarmið allra í þessu viðkvæma máli, svo allir megi sáttir við una.

Bestu kveðjur.

Páll Halldór Halldórsson

Flott bréf Palli, nokkuð vel orðað og málefnalegt. Einmitt eins og svona bréf eiga að vera til að tekið sé mark á þeim.

Skrifum sem flest, EN, vöndum okkur og verum málefnaleg.

Sing

Flott hjá þér Palli minn, væri ekki ráð að dreifa svipuðu bréfi á alla þingmenn, ráðuneytisstjóra og aðra sem málið varðar. Svo er að senda sendinefndina á Styrmir, og ég vona svo að Snorri fari ekki í sögubækurnar sem fyrst og seinasti jeppakallinn á Vatnajökli.
Jón Snæland.

Sammála síðasta ræðumanni.

Ég held við höfum fulla ástæðu til að vera bjartsýnir, þessar hugmyndir um mismunun eru afturganga tillagna sem dagaði uppi fyrir nokkrum árum. Þegar ég spurði Einar Sveinbjörnsson þáverandi aðstoðarmann um þessar hugmyndir fyrir tveim árum, þá sagði hann að málið væri dautt, og kannaðist ekki við að þær tengdust stofnun þjóðgarðsins.

-Einar

Menn voru eitthvað uggandi yfir bréfinu sem ég sendi Siv og héldu kannski að það yrði full harðort en það er nú ekki og því birti ég það hér:

Góðan dag Siv,
mig langar sem meðlimi í 4×4 klúbbnum og sem einstaklingi að mótmæla ÖLLUM fyrirhuguðum ráðagerðum um takmörkun og eða bann við akstri vélknúinna ökutækja á jöklum eða nokkrum öðrum þeim stöðum sem við ferðamenn sem kjósum að ferðast um landið á jeppum.

Það er nóg pláss fyrir alla og aldrei hef ég orðið vitni að neinskonar árekstrum á hálendi íslands hvorki bíla,gangandi manna eða neins annars.
Reyndar hef ég aldrei orðið vitni að því að sjá gangandi mann á hálendinu á þeim tíma sem ég ferðast að undaskildu einu skipti og þá fengu erlendir gönguskíðamenn far með mér til byggða orðnir frekar kaldir og matarlitlir.

Það er hégómi einn ef einhverjum finnst það ekki viðunandi sjá td.bílför í snjó einhverstaðar á gönguför sinni eða heyra í bíl í fjarska einhverstaðar.

Við byggjum ekki þetta samfélag upp með boðum og bönnum.

Kveðja, með von um að þú takir þessi mótmæli mín til greina.

Halldór Sveinsson.

þetta bréf sendi ég í gærkvöldi og hvet alla til að gera það sama.

Glanni

A tilkynningunni á forsíðunni er búið að lista upp nokkrar röksemdir gegn þessum fyrirhuguðu lokunum. Menn geta notað punkta úr því í póst til ráðherra eða þess vegna kóperað i heild sinni yfir i póstinn, eftir því sem hentar. Eins er auðvitað fullt af góðum punktum hér í þessum þræði.

En um að gera að sem flestir sendi póst, þarf ekki að vera langt, bara að ráðherra finni fyrir fjöldanum.

Kv – Skúli

Ég ætlaði bara að hvetja menn til að halda áfram að senda bréf á umhverfisráðherra.

Ég var að enda við að senda henni bréf og við verðum að halda áfram að dæla á hana okkar skoðunum á þessu máli.

Öðruvísi breytum við engu…

Kveðja
Benni