Utanvegaakstur

Ég er mjög ánægður með sameiginlega yfirlýsingu Útivistar, Skotvís og F4x4 vegna þessa ljóta og óþarfa utanvegaaksturs, eins og sjá má hér á forsíðunni og t.d. [url=http://mbl.is/frettir/innlent/2011/11/22/fordaema_hardlega_umhverfisspjoll/:3ul2cb0k]á vef mbl.is[/url:3ul2cb0k].

Það er orðin undantekning að sjá svona og sorglegt að einn eða tveir aðilar skuli valda svona miklum skemmdum á landinu þarna og á þeim málstað sem við höfum verið að berjast fyrir árum saman. Rætt hefur verið um að senda mannskap á svæðið til að reyna að lagfæra það sem þarna hefur verið skemmt og tek ég heilshugar undir þá tillögu, þó varla verði hægt að gera neitt í þessu fyrr en næsta sumar.

Í októberferð Litlunefndar fórum við um þessar slóðir, þá var örlítil snjóföl yfir, hvergi nein fyrirstaða eða skaflar sem þurfti að sneiða hjá og í alla staði mjög auðvelt að fylgja veginum. Þá var engin svona för að sjá.

kv. Óli

Við þurfum að ná í þetta lið og koma fyrir það vitinu.

Ég hef aðeins velt því fyrir mér hverjir gera svona lagað og hvar við getum fundið þá.

F4x4 og önnur samtök útivistarfólks hafa barist áratugum saman fyrir því að spjöll af völdum umferðar utanvega verði í lágmarki. Mikið hefur unnist og ekki hefur verið sýnt fram á að upphrópanir um aukin landspjöll af völdum vélknúinnar umferðar eigi við rök að styðjast. Þvert á móti fullyrða margir að ástandið sé betra en áður. Öll getum við þó væntanlega verið sammála um að spjöll af þessu tagi fram kom í dag á ekki að líða. Gildir þá einu hvort ástandið er að versna eða lagast.

Tíðarandinn er sem betur fer þannig að hugsandi útivistarfólk gerir ekki svona og spyrjist slíkt út um ferðamenn í útisvistarsamtökum þykir það viðkomandi til mikillar minnkunar.

Ég vil meina að eftir að við komumst upp á lag með að ferðast á snjó og jöklum hafi ástandið byrjað að lagast. Þá fengu allir þeir sem haldnir eru ólæknanadi landkönnunarþrá útrás fyrir hana með ferðum á snjó án landspjalla. Þessu var haldið á lofti sem rökum fyrir því að akstur yrði áfram leyfður utanvega á snjó og að leyft yrði að aka löglega í umferð á stórum hjólum. Það var um 1980. Síðan hefur ríkt einhverskonar sáttmáli um að hlífa landinu eins og mögulegt er við spjöllum af völdum umferðar utanvega og F4x4 hefur átt stóran þátt í að viðhalda honum.

Við verðum þó að halda vöku okkar, það þarf ekki nema nokkra innan okkar raða til að rjúfa þennan sáttmála. Við getum örugglega gert enn betur í fyrirbyggjandi starfi meðal okkar félagsmanna.

Við þurfum kannski að leggja meira í að ná til nýrra ferðamanna. Ferðir Litlu nefndarinanr og nýliðaferðir eru mikilævægur liður í því og vafalaust hefur það starf komið mörgum nýliðanum á rétt spor.

Erfiðara er að ná til þeirra sem ekki hafa áhuga á þáttöku í slíku starfi og standa utan allra félagasamtaka. Það er jafnvel villtasta liðið (eða heilalausasta liðið), þeir sem þyrfti helst að skóla til. Hvernig eigum við að ná til þeirra ?

Dagur bendir réttilega á að orka okkar hefur farið of mikið í að berjast við öfl sem vilja loka sem flestu óháð því hvort landspjöll eru í húfi. Ef F4x4 er mikilvægur aðili í því að halda uppi fræðslu og áróðri, má færa rök fyrir því að það ofríki í ofverndun sem við teljum okkur vera beitt og mæðandi barátta okkar gegn því stuðli að minni árangri í baráttu gegn landskemmdum af völdum umferðar utanvega. Ofríki sem stríðir gegn réttlætiskennd ferðamanna stuðli þannig óbeint að verri umgengni með fjölgun skussa sem við höfum ekki tíma til að siða til.

Snorri
R16

Snorri nefnir það að það þurfi að ná til sem flestra, til þess að upplýsa þá. Það er ekki gert með lokaðri klíkusíðu einsog f4x4.is er orðin. Það þarf að opna síðuna aftur svo hún verði alvöru fjölmiðill. Það þarf að ná til þeirra yngir og nýliða. Þeir virðast vera annarstaðar.

Ég er sammála því að fara góða ferð og laga til eftir þessa skemda varga
einnig er rétt sem Ofsi bendir réttilega á að það þarf að opna síðuna fyrir allmenning
því fleirri því betri ummfjöllun er hægt að fá ( þette er mín skoðun )
það er kvartað mikið út af þessu.
kkv
Árni

ps: er alltaf tilbúin að fara til fjalla og laga það sem þarf að laga til að gera landið okkar fallegra

Landsjöll af völdum utanvegaaksturs, eru ólíðandi, hvort sem um er að ræða löglegan eða ólöglegan akstur utan vega. Það er nefnilega til löglegur utanvegaakstur.
Verði landspjöll af akstri utan vega er mjög einfalt og þægilegt að kenna almennum borgurum um, hvort sem þeir eiga sök eða ekki.
Í lögum um náttúruverndar þetta ákvæði:

17. gr. Akstur utan vega.
Bannað er að aka vélknúnum ökutækjum utan vega. Þó er heimilt að aka slíkum tækjum á jöklum, svo og á snjó utan vega utan þéttbýlis svo fremi sem jörð er snævi þakin og frosin.
[Ráðherra]1) kveður, að fengnum tillögum [Umhverfisstofnunar],2) í reglugerð3) á um aðrar undanþágur frá banni skv. 1. málsl. 1. mgr., m.a. vegna starfa manna við landbúnað, landmælingar, línu- og vegalagnir og rannsóknir. Ráðherra getur í reglugerð, að fengnum tillögum [Umhverfisstofnunar],2) takmarkað eða bannað akstur á jöklum og á snjó þar sem hætta er á náttúruspjöllum eða óþægindum fyrir aðra sem þar eru á ferð.
Ólögmætur akstur utan vega varðar refsingu, sbr. 76. gr.

Í reglugerð um takmarkanir á umferð í náttúru Íslands er 5. grein svohljóðandi:
Akstur utan vega vegna tiltekinna starfa.
Við akstur vegna starfa við landbúnað er heimilt að aka utan vega á ræktuðu landi. Einnig er heimilt að aka utan vega á landi, utan miðhálendisins, sem sérstaklega er nýtt sem landbúnaðarland ef ekki hljótast af því náttúruspjöll.
Heimilt er ef nauðsyn krefur að aka vélknúnum ökutækjum utan vega vegna starfa við landgræðslu og heftingu landbrots, línulagnir, vegalagnir og lagningu annarra veitukerfa, björgunarstörf, rannsóknir, landmælingar og landbúnað enda sé ekki unnt að framkvæma viðkomandi störf á annan hátt. Sérstök aðgát skal viðhöfð við aksturinn til að draga úr hættu á náttúruspjöllum. Hafa skal fullnægjandi útbúnað til slíks aksturs. Við framangreindar athafnir skal leita leiða til að flytja efni og annað sem til þarf á þann hátt að ekki sé þörf á akstri utan vega.

Í 7. grein sömu reglugerðar er þessi setning:
Bannað er að reka hrossastóð yfir gróið land þannig að náttúruspjöll hljótist af eða hætta skapist á náttúruspjöllum.

Þarna er hestafólki ekki meinuð för um landið en því er bannað að valda landspjöllum.

Mér finnst að baráttan eigi að snúast gegn landspjöllum af völdum umferðar utan vega, eins og Snorri Ingimarsson hefur bent á. Akstur utan vega þarf ekki að valda landspjöllum. Umferð af öðru tagi þarf ekki heldur að valda náttúruspjöllum en hættan er vissulega fyrir hendi. Göngufólk þarf að hafa þetta í huga sem og vélsleðafólk, hestamenn og yfirleitt allir sem eru á ferð um landið. Þessum hópum er ekki meinuð för um landið.
Bönn og ofurbönn sem ganga í berhögg við réttlætiskennd hins heiðvirða ferðamanns eru ekki lausn á náttúruvernd á Íslandi.

Snúum vörn í sókn. Berjumst gegn hvers kyns náttúruspjöllum af völdum umferðar utan vega, án tillits til þess hver eða með hvaða aðferðum þau eru unnin. Höfum að leiðarljósi að réttur almennings til að njóta landsins , innan sem utan þjóðgarða, sé ekki fyrir borð borinn.

Þ. Hjalti Magnússon R-14

Ég vara við að raka gróflega yfir för í mosa því að mosinn er viðkvæmur en djúpu förin í bleytunni þarf að fylla með efni svipuðu og er í kring , sandi eða vikri . Svo er þetta oft það sem gerist ef vegurinn er illfær. Fyrir nokkrum áratugum var Fjallabaksvegurinn með Kirkjufellinu afar slæmur vegna djúpra polla og drullu. Þarna keyrðu margir framhjá hvörfunum og stórskemmdu mýrina. Þá var reyndar varla farið að tala um utanvegaakstur. Vegagerðin gerði þá átak í að lagfæra Fjallabaksveginn í sambandi við hættu af Kötlu og vegrofi sunnan jökla. Þá var borið vel ofan í veginn og pollarnir fylltir og sett voru ræsi í suma lækina. Eftir þetta steinhættu allir að keyra út fyrir veg. Svona er þetta víðar og besta forvörnin er að vegurinn sé sæmilega fær og gæti ég sett inn myndir þessu tengt ef ég kynni það. Í þessu ákveðna tilfelli er ekki að sjá að vegurinn hafi verið ófær. Kv. Olgeir