Upptaka olíugjalds

Það má vel vera að það sé hægt að benda á ýmis sanngirnisrök fyrir þessu og þetta kerfi sé réttlátara. En fyrir þá sem nota dieselbíl á fjöllum í þungu færi kemur þetta verr út, hvort sem menn eru á föstu gjaldi eða kílómetragjaldi. Eldsneytiseyðsla á km. í þungum snjó er eðlilega mikil og svo er náttúrulega alveg draumur að vera á fasta gjaldinu sem nánast hvetur mann til að ferðast sem mest.

Við þurfum að finna góð rök á móti þessu og halda þeim vel á lofti 😉

Sælir

Þetta er náttúrlega bara reikningsdæmi einsog allt annað. Þungaskattur af meðalstórumum jeppa 1500-2000 kg er 139.409 kr km gjald af sama bíl er 6,4 kr, 139.409/6,4= 21.782 km þarf að aka til að borgi sig að borga fast gjald. Ef bíll eyðir 12 l/pr 100 km þá kostar km í dag (0,12*44kr)+6,4=11,68 kr, sami bíll með olíugjaldi kostar 0,12*90=10,8 kr mism á ári (11,68-10,8)* 21782 km = 19.168 kr, hægt að kaupa Hiclone fyrir það og spara ennþá meira hehe. Ef menn hafa verið á fastagjaldi og ekið minna en 21.782 km þá gefur olíugjaldið meiri mismun. T.d. 17000 km 45569 kr. Til þess að olígjaldið verði dýrara en fastagjaldið þarf að aka meira en 25300 á ári mv 12 l/100km. Til að flækja málið enn frekar þá er þetta líka spurning um eyðslu bílsinns. Þannig að þeir sem eru með bíl sem eyðir meira en 13,91 l/100 km og aka 21782 km á ári koma út á núlli. En eyðslu frekari bílar verða þá dýrari í nýju kerfi.
Fyrir þá sem hafa verið á km gjaldi kemur þetta þannig út að ef bíllinn eyðir meira en 13,91 l/100 km þá verður nýja kerfið dýrara.
Ég styð upptöku olíugjalds þar sem það yrði hagstæðara fyrir mig, allavega á sumardekkjunum, og þá borgar maður notkunina jafnóðum en ekki eftír á (km gjald), eða fyrirfram (fastagjald).
Ég held líka að akstur í þungu snjófæri sé það lítill hluti af notkuninni, að sá viðbótarkostnaður sem olíugjald hefði á þá notkun, skipti litlu máli.
Ef menn hafa áhuga þá get ég sent mönnum Excel forrit sem reiknar þetta út fyrir hvern og einn, sendið mér póst á tlclj73@hotmail.com

Olíugjalds kveðjur Óttar A

Ég er nú búinn að aka svo lengi í þungaskattskerfinu að maður kann ekkert annað. Hvorumegin hryggjar sem réttlætið liggur, þá minnist ég hinsvegar útvarpsviðtals við einhvern náunga úr tekjudeild fjármálaráðuneytisins um það leyti sem fyrra frumvarpið var lagt fram (þetta sem dagaði uppi), og sá vildi meina, að þegar þungaskattur yrði felldur inn í olíulítrann, þá yrði (svo vitnað sé beint í hans orð) "..að hafa gjaldið það hátt, að verðið á olíulítranum yrði alltaf jafnhátt og bensínlítrinn, því það er auðvitað engin sanngirni í því gagnvart þeim, sem vilja fremur aka á bílum með bensínvél að hafa þarna mismun á. Eigendur dieselvélanna eiga ekki rétt á að njóta hagræðis í formi ódýrara eldsneytis til viðbotar því hagræði sem felst í sparneytni dieselvélanna" og fréttamaðurinn samþykkti náttúrulega þetta um leið, alveg andaktugur enda báðir opinberir starfsmenn!

Nei, enda er ekki verið að taka upp olíugjald til þess að gera rekstur jeppakalla á diesel bílum ódýrari, heldur til þess að gera smádieselbíla og fólksdieselbíla rekstur raunhæfann og ódýrari kost, en sambærilegra bensínbíla. Enda eru höfuð óvinir þessara breytinga einmitt þeir sem myndu missa smá spæni úr sínum öskum, þ.e. þríhöfða- samráðsolíusöluþursinn.

Kv ÓA

Sæll Arnar

FíB talaði um að þetta kæmi verst niður á Landsbyggðinni og þeim sem á henni byggju í formi aukins kostnaður við landflutninga.

Þrátt fyrir að vera bensín brennari er þetta líka spruning um skattgreiðslu/niðurgreiðslu form. Tel ég að eðlilegra sé að allir ríkisborgarar séu skattlagðir jafnt og síðan séu gerðar íviljanir fyrir þá sem búa við erfiðari aðstæður ef ástæða þykir.

Hvort sé verið að nýðast á landsbyggðinni eða hylla borgarbúum ætla ég ekki að fara út í. Ekki má gleyma að við höfum sett okkur kvóta á losun CO2 í loftið. Með því að fjölga dísel smábílum má ná fram lækkun á CO2 sem þeir blása frá sér og nýta þann mun í iðnað sjáfarútveg eða einhvað slíkt.

Flestir vegir sem við "borgarbúar" ökum um á koma úr sjóðum borgarinnar en ekki ríkissins. Ég vill leggja áherslu á orðið FLESTIR í setningunnni hérna að ofan. Þannnig að ekki er mismunað fólki milli landshluta og staða um framlag í þjóðvegakerfið.

Enda væri í beinu framhaldi af þessu væri eðlilegt að allir vetnis/hybrid bílar væru tollfrjálsir til að ýta undir að fólk nýti sér þá.

Kveðja Fastur
ps. Þetta eru mínar skoðanir og ég get alveg haft rangt fyrir mér.

Góðan dag!

Er að mestu sammála "Föstum". Held að þetta tal um dreifbýlisskatt sé á villigötum. Tek fram að ég er sjálfur dreifbýlismaður. Eins og Fastur bendir réttilega á þá hirðir ríkið jafnmikið af olíunni sem notuð er við að keyra innanborgar-markanna og utan en þarf ekki að sjá um viðhald á götum innan borgarmarka, nema líklega á því sem kallast þjóðvegur 1, t.d. Miklubraut o.s.frv.. Þannig má alveg eins segja að einungis með því þá eru borgarbúar í raun að borga meira fyrir vegi annars staðar og líka í borginni bara þegar þeir keyra til vinnu sinnar innan borgarmarka. Er ekki bara eðlilegt að þeir sem nota vegina mest borga fyrir það.

Má alveg eins benda á það að dekkin hjá þér Arnar slitna væntanlega líka meira og er það þá ekki dreifbýlisskattur líka að þau séu ekki ódýrari sem því nemur…málið er að það er endalaust hægt að tína til eitthvað sem menn geta kallað dreifbýlisskatt. Má þá ekki líka kalla það þéttbýlisskatt af því fólk þarf venjulega að aka lengra til vinnu í höfuðborginni…nú eða að fasteignaverð er kannski 20% hærra heldur en í dreifbýli. Menn verða að fara varlega í að fullyrða um þetta og ekki gleyma því að val á búsetu er frjáls í lýðræðisríkjum.

Held að aðalmálið sé að láta "markaðinn" ráða verðum og ríkið að leggja sem jöfnust gjöld á alla og færa það svo til eftir þörfum til að hjálpa undir þar sem þarf ef að halda á úti byggð…eins og er reyndar gert með t.d.jöfnunarsjóðum o.s.frv.

góða helgi,

Maskin

Vill bara benda á að í Ameríku er low-sulfur dísel ekki almennt komið á markað ennþá eins og í evrópu en á að koma 2006 og verður væntanlega sprenging á díselmarkaðnum í USA á næstu árum.
Málið er að Kanar eiga slæmar minningar díselbílum frá í gamla daga þegar þeir spúuðu svörtum reyk eins og kolabrennsluvélar en eru að vakna af svefninum og átta sig á, eins og evrópuríki hafa gert fyrir nokkru, að nútíma díselbílar eru mun sniðugri kostur…bæði hvað eyðslu og mengun varðar. Enda selst VW Jetta Turbodísel eins og heitar lummur í USA enda nánast eini dísel fólksbíllin í boði þar en von er á fleirum…s.s Jeep Liberty(Cherokee) o.fl.
En eins og menn vita er búið að hreinsa útblástur frá díselvélum þannig að mengun er minni frá þeim heldur en bensín.

Kveðja,
Maskin

Heyrðu hérna Vals, nota Reykvíkingar ekki vegina nokkurn veginn í réttu hlutfalli við mannfjölda líka? Hvernig fara menn t.d. í sumarbústaðina sína uppi í Borgarfirði og austur í Grímsnesi, hvaða leiðir fara menn í gæs og rjúpu (þegar veiði á henni var leyfð) nú eða í laxinn, í sumarfrí og lifa ekki nokkuð margir á höfuðborgarsvæðinu á því að selja okkur dreifurunum sitt lítið af hvoru og nota vegina til að flytja það og svo má lengi telja. Annars eigum við ekki að festa okkur í þessari vitleysu. Við höfum satt að segja ekki efni á því að egna saman þéttbýli og dreifbýli. Þetta er nú ekki svo stórt land að maður tali nú ekki um mannfjöldann; mér dettur í hug ameríkani, sem ég hitti í fyrra, en hann orðaði það svo að "one can´t call you a nation, you are more like að tribe" og það er nú líklega tilfellið. Reyndar átti hvorugur okkar upptökin að þessu, enda á ég öll mín börn og barnabörn í Reykjavík og vil veg hennar því sem mestan.
kv.

Þakka þér ágætan pistil, Vals. Ég sé að við erum að tala sama málið, ef svo má segja. Tek undir þetta sem þú segir um afgasið, var reyndar sjálfur að reyna að koma þessu sama á framfæri einhversstaðar í þessu samhengi. Varðandi þetta svokallaða Hi-Clone eða hvað það nú heitir, þá var búið á þessum vettvangi að tengja við ágæta umfjöllun ættaða frá USA um þessi efni, þar sem þetta var allt saman hrakið út í hafsauga á vísindalegan hátt, ásamt nokkrum fleiri svona gullgerðarlistum. Mér sýnist þetta komið á trúarbragðastigið og nenni ekki að taka þátt í umræðu um það.
Bara vegna þess að þú getur um að þú vitir ekki hver ég er, þá hefur það aldrei verið neitt leyndarmál að ég heiti Guðbr. Þorkell Guðbrandsson, er fæddur og uppalinn þorpari frá Ólafsvík og kenni mig alltaf við þann stað, þótt ég hafi ekki átt þar heima nema til tvítugs, en ég er núna kominn á sjötugsaldurinn og líklega með þeim eldri sem eru að skrifa á þennan skemmtilega vettvang. En jeppadellan hefur fylgt mér frá því ég var unglingur og batnar sem betur fer ekki. Varð félagi í 4×4 Rvík á sínum tíma, fékk þar númerið 650, og held því enn, en átti þátt í stofnun deildar hér á Sauðárkróki, þar sem ég bý nú. En fjalla- og jeppadellan gengur í ættir, það kannast margir við dætur mínar, sem heita Jóna Bryndís, gift Árna Páli Árnasyni, bifv.virkja, einum af fv. form. 4×4 og hin heitir Harpa Lind og er gift Grími Sigurjónssyni, rekstrarfræðingi, en þau voru í tvö ár veðurathuganamenn á Hveravöllum og hafa verið í afleysingum þar flest sumur síðan. Það er sumsé talað um fjallaferðir og jeppa í fjölskylduboðum og lítið annað!

Var líka að hlusta á RÚV (óvart) í hádeginu og heyrði þessa frétt eins og Einar Kj. Við vorum svo sem búnir að þvæla fram og aftur um réttlæti og ranglæti í þessu sambandi og auðvitað verða menn seint sammála. En þetta er fyrst og fremst hvati í þá átt að litlir diesel bílar verði hagkvæmari. Nú fer t.d. að verða vit í því fyrir almenning að kaupa sér Skoda Octavia eða viðlíka bíla með dieselrokk. Hinsvegar er margt ágreiningsmálið í þessu. T.d. finnst mottuliðinu skrítið að þurfa að borga þungaskatt af eldsneyti á sleðana sína, sem koma aldrei og mega aldrei koma á vegi með vélina í gangi. Eina notkun þeirra á vegunum er þegar þeir eru dregnir á kerrum einhverja spotta. Ég er svo sem ekki búinn að leggjast í flókna útreikninga í sambandi við þetta, en mér sýnist fljótt á litið að þetta breyti litlu fyrir mig miðað við akstur minn nú orðið.