Tölvustýringar og vatn!

Það eru alltaf einhver víti til varnaðar og þegar maður lærir á þau þá deilir maður þeirri reynslu auðvita með félögunum.

Glóðakertin og snúningshraðamælirinn duttu út hjá mér í sullumallsferð um daginn. Í ljós kom að tölvustýring sem er tengd þessu eyðilagðist, en hún er staðsett lítið eitt fyrir ofan gólfið farþegamegin fyrir framan hurðina. Þetta er smá spjald með nokkrum kubbum … ekki merkilegt að sjá, en kostar ca. kr. 134.000 í umboðinu ef hún væri til. Mér til mikils happs þá áttu þeir hjá Rafstillingu svona stýringu uppgerða á kr. 35.000,-. Það hefði líka ýmislegt fleira geta skemmst í leiðinni t.d. hefðu glóðakertin og relay geta brunnið. Eins eru útfellingar ótrúlega fljótar að myndast í tenglum og á svona tölvuborðum þegar vatn og straum er á þeim sem getur leitt til enn meiri skemmda jafn vel á nokkrum mínútum. Því er mikilvægt að átta sig strax ef óhapp verður og aftengja geimana… var mér sagt af þeim í Rafstillingu. Ég var heppinn í óheppninni að tjónið hjá mér var ekki meir en ca. kr. 45.000 …nóg samt.

Ef ég hefði vitað af þessu þá hefði verið lítið mál að kippa stýringunni úr og koma í veg fyrir þetta tjón. Það er víst nokkuð algengt að svona stýringar séu illa staðsettar í bílum t.d. á gólfinu undir bílstjórasætinu eða í gólfinu aftur í. Það er því ráð að kynna sér hvar svona hlutir eru staðsettir og hvernig þeir virka svo að menn geti gert viðeigandi ráðstafanir ef hætta er á að vaðið sé aðeins uppfyrir 😉