Þorrablót austurlandsdeildar

Sælir austan menn…

Mér þykir þið vera góðir með ykkur… Æða svona á fjöll yfir hásumarið, þegar við hér fyrir sunnan erum að setja niður híasínturnar og túlípanana. En hvað um það…þið skuluð ekki reyna að slá met Suðurlandsdeildar á dögunum í hægakstri..leyfum því að standa í nokkra daga enn. Bara að biðja ykkur að láta ekki Rúnar vin minn Gunnarsson uppgjafatrukkakall vera fyrstan. Hann myndi bara villast og enda hér fyrir sunnan á Mímisbar, því þar þekkir hann allt og alla.

Kv
Palli

Sælir.
Rétt að setjast niður og hvílast aðeins, það er erfitt að taka til það helsta í svona ferð.

Ef ´ann rignir, VÖÐLUR sterkan og langan spotta ásamt mörgu fleiru sem tilheyrir slíku veðurlagi.
Ef ´ann snjóar, góða skjólfatnað.
En það verður ÖRUGGLEGA SÓL svo ég tek bara sólgleraugu, stuttbuxur og sandala.

Heyrðu já var að skrúfa 44"una undir á 18" breiðum felgum svínvirkar í krapið!!!

þorrablótskveðja á góu.

Óli og Pattinn.

Föstudagur kl. 12:40
Fyrsti hópurinn er að aka ofanaf jöklinum og nálgast Hveragil,
Hundslappadrífa og lítið skyggni en greinilegt er að
það er rennifæri. Nákvæm staðsetning 64.43.700N 16.23.550V

Föstudagur kl.15:40
Fyrsti hópurinn er kominn uppúr Hveragili, allir nýþvegnir
og þar á meðal Moby Dick sem fékk kalt krapabað upp á sílsa.
Eigandinn sagði reyndar að það hefði verið klaufaskapur en tommuþykk mjöll ofaná gerði að verkum að pollurinn sást illa. Þórhallur hafði reyndar náð krapanum upp á miðjar felgur við Snæfell en það þótti ekkert alvarlegt.
Tveir spilvírar dugðu til að losa hvalinn og það er gott hljóðið í mönnum, enda er blíðuveður og sólin glottir við þeim af og til. Ennþá er færið harðfenni en
smá mjöll ofaná.

Villi formaður fór frá höfuðstaðnum um hálf tvö og kominn í
Hrauneyjar og sér mikinn krapa í kringum sig, en hefur engar áhyggjur, enda á breiðum felgum. Þeir ætla að fara beint yfir jökulinn.

Föstudagur kl.20:30
Villi formaður á eftir 3 km. í Nýjadal og áætlar að komast í Gæsavatnaskála fyrir kvöldið.
Morgundagurinn fer svo í að aka yfir jökulinn yfir í Kverkfjöll.
Veður í Nýjadal er eindæma blíða með hita um frostmark og sólin hefur sést af og til í dag.
Færið er gott með nokkrum krapa en menn fljóta á breiðu felgunum. Nóg er af snjó á þessum slóðum
og ekkert grjót uppúr til að hrekkja.

Næsti fréttapistill
er áætlaður í fyrramálið

Laugardagur kl. 11:45
Stærsti hópurinn lagði af stað í morgun frá Egilsstöðum með 44" Subaru í broddi fylkingar.
kl. 12:00 voru þeir innanvið Snæfell í fínu færi, 10 bílar saman.
Óli Hall og félagar óku inn í Snæfell i gærkvöld í ágætis færi, en krapahríðin yfir nóttina gaf smá
sull í hjólförin í morgun. Nú rétt fyrir hádegið voru þeir á Brúarajökli og áttu eftir 2km að jökulröndinni
ferðin sækist vel, enda með punkta hópsins frá í gær til að aka eftir. Veðrið á þessum slóðum er norðan
gola og snjómugga.
Ég var beðin um nafnaleiðréttingu, Rúnar Ingi Árdal er ekki á Landrover heldur Land Cruiser, (Moby Dick)
en það er Rúnar Ingi Hjartarson sem er á Landrovernum í hóp með Óla Hall.
Villi og félagar gistu í Gæsavötnum í nótt og voru núna rétt fyrir hádegið austanvið Kistufell. Hópurinn ákvað
að hætta við að fara upp á jökul vegna lélegs skyggnis. Nú aka þeir um á harðvenni í norðan skafrenningi og nægum snjó.
Stuttur kafli á hálsunum var þó með einstaka hraunnibbum uppúr, en það komust þeir þó vandræðalaust yfir.

Sunnudagur kl.9:00
55 manns sátu til borðs í 3ja tíma borðhaldi í Sigurðarskála í gærkvöld.
Snjór er með minna móti í Kverkfjöllum og veðrið lék við menn, vægt frost, stjörnubjart og norðurljósin dansandi á himninum.
Ferðin inn í Kverkfjöll gekk ótrúlega vel hjá öllum hópum, aðeins ein affelgun og örfáar festur,
en engin þeirra var það slæm að dygði ekki að kippa í.

kl.17:30
Stóri hópurinn er kominn í Egilsstaði eftir viðburðalausa ferð í snjóhraglanda.
Villi og félagar eiga eftir 10 km. í Versali og búast við að vera komnir til Reykjavíkur um sjöleytið…

Ég vil taka undur það sem Björn Þorri segir. Gerði góðan túr á sunnudaginn fyrir austan Heklu. Fórum upp frá Keldum og
fylgdum Hekluveginum sem umhversinefndin stikaði haustið 2001.

Fyrir ofan 650m hæð var allt á kafi í snjó, þar sást ekki í eina einustu stiku. Fórum norður á Dómadalsleið austan Hestöldu, þar var þröngt á stöku stað. Urðum varir við krapa í c.a. 600 hæð sunnan Vatnafjalla og norðan við Mundafell.

-Einar

Nokkrar myndir úr þorrablótsferðinni er að finna hér

http://kjolur.f4x4.is/photoalbum/view.p … tionid=692

og líka hér,

http://kjolur.f4x4.is/photoalbum/view.p … tionid=696