Súperjeppar lækna sár!

Sælir félagar og gleðilegt nýtt ferðaár.
Í sumar átti ég oftlega leið inn í Laugar, og sá að á Sigölduleiðinni í hálsinum norðan/vestan við gatnamótin Laugar/Dómadalur/Ljótipollur hafði þá um vorið verið keyrt á þvengmjóum dekkjum yfir mosaþembuna. Var svo seint um haustið á ferð á 44″ Patta og hafði tök á að framkvæma það sem ég hafði verið að mana mig upp í í hvert sinn sem ég ók framhjá. Ég hleypti vel úr og ók utanvega inni í Friðlandinu, og freistaði þess að loka sárunum, að pressa niður barmana. Þetta tókst aðeins að nokkru, þetta hefði þurft að gera miklu fyrr um sumarið meðan ennþá var blautt um.
En þetta sýndi þó og sannaði að vel má loka svona sárum með súperjeppum. Hvet ég Umhverfisnefnd til að bjóða Þjóðgörðum og Náttúruverndarstofnunum upp á þá þjónustu að við félagar í 4×4 tökum að okkur að laga eða minnka skemmdir eftir utanvegaakstur, í samstarfi við viðkomandi.
Það eru jú alltaf einhver okkar á ferðinni einhvern staðar!
Ingi