Spurning dagsins

Sælt veri fólkið. Nú er Sveinn á Galtalæk búinn að finna heimildina um vörðurnar sem afar hans og fleiri hlóðu fyrir tæplega öld. þær voru 786 talsins og sumar eru enn óhrundar en aðrar eru farnar að láta á sjá . Nú vantar bara nýja spurningu .Kv. Olgeir

Hallgrímur heitinn Jónasson var mikill heiðursmaður, fróður og skemmtilegur. En ég hef nokkrum sinnum rekist á það að hann hefur stundum notast við heimildir, sem eru ekki nógu áreiðanlegar. Vafalaust hefur það verið fremur fyrir skort á heimildum og minni vitnesku þeirra tíma á heimildum yfirleitt. við megum víst heldur ekki gleyma hvað tækni nútímans hefur gert marga hluti aðgengilegri en áður var. Hvað um það, ég myndi ætla að sá sem Olgeir vitnar til sé með eins góðar heimildir fyrir sinni tölu og hægt er að ná í úr þessu. Svo er auðvitað hreinlega hægt að telja vörðurnar fyrst búið er að rekja þær. En þetta leiðir hugann að vörðun fjallvega yfirleitt. Birkir Fanndal í Mývatnssveit hefur unnið stórgott starf við að endurreisa og finna vörður á leiðunum austur frá Mývatnssveit og víðar á landinu hafa einstaklingar og félög verið að vinna að svipuðum verkefnum. Nú væri gaman ef einhverjir yfirburða fróðleiksmenn eins og t.d. Jón Snæland myndu gera yfirlit yfir varðaðar leiðir, sem gaman gæti verið að rekja og skrá svo áhugasamt fólk gæti svo tekið sig til við að finna vörðurnar og hressa þær við þar sem þess þarf. Mér dettur nú í fljótheitum í hug að nefna sem dæmi skreiðarleiðirnar fornu til verstöðva á Suður og Vesturlandi. Margt fleira má áreiðanlega nefna.