SOS Hálendið kallar !

Það er pólitísk ákvörðun að virkja við Kárahnjúka og mikill vafi um arðsemi virkjunarinnar virðist ekki valda ráðamönnum miklum áhyggjum, enda á Landsvirkjun greiðan aðgang að íslenskum raforkunotendum til að bæta sér upp hugsanlegt tuga milljarða tap. Bættur hagvöxtur kann að reynast vonarpeningur í vasa en fyrirsjánleg hækkkun vaxta og aukin verðbólga munu auka skuldabyrði og hækka afborganir allra þeirra sem eru með vísitölubundin lán á hýbýlum sínum eða öðrum fjárfestingum. Þau atkvæði sem kjósendur í næstu alþingiskosningum greiða frambjóðendum beinlínis vegna stuðnings þeirra við þetta hervirki gegn hálendinu, kunna að reynast dýrustu atkvæði Íslandssögunnar.

Þau geigvænlegu og óafturkallanlegu umhverfishryðjuverk sem nú eru að hefjast við Kárahnjúka eru þó sýnu hörmulegri en þær vonandi tímabundu fjárhagslegu hremmingar þjóðarinnar sem af kunna að hljótast. Þau lýsa sorglegri skammsýni sem næstu kynslóðir munu e.t.v eiga erfitt með að fyrirgefa, því við eigum að vita hvað við erum að gera.

Eitt af megin markmiðum klúbbsins okkar er ?að stuðla að góðri umgengni um landið og verndun þess með jákvæðu fordæmi og umræðu um náttúruvernd? eins og segir orðrétt á vefsíðu hans. Þess vegna er þessi vefsíða réttur umræðuvettvangur fyrir þá félaga sem vilja ræða þetta mál, sem reyndar varðar alla Íslendinga og ekki síst okkur sem viljum (vonandi flestir) geta ferðast um lítt eða ósnortin víðerni hálendisins.
Því er óskandi að sem flestir okkar þori, geti og vilji taka afstöðu sem samrýmist ?góðri umgengni um landið og verndun þess?. Það getum við m.a. gert með því að láta til okkar sjást og heyrast á Austurvelli í hádeginu á morgun.

Sverrir Kr.

í allri þeirri umræði um kárahnjúkavirkjun sem fram hefur farið hél undirritaður að einungis væri virkjað við kárahnjúka síðan væri eitt rör niður í fljótsdal. en með með morgunblaðinu um síðustu helgi var kort af þessu svæði á því virðist vera talsvert fleiri stíflur td talsvert fyrir neðan eyjabakka og svo virðist vatni vera safnað úr nokkrum ám þar fyrir austan þetta virðist vera geysi mikið svæði sem fer undir þessar framkvæmdir og líklega uppbyggður vegur á milli allar þessra stífla

Það eru margir fletir á þessu virkjanaæði sem hefur hafið göngu sína.

ÞETTA ER ÓAFTURKRÆF STÓRSKEMMD Á LANDINU.

Mér finnst það ÓSKILJANLEGA sláandi við þessar framkvæmdir AÐ FLESTIR VITRÆNIR ÚTREIKNINGAR SÝNA ÞAÐ AÐ ÞETTA ER EKKI HAGKVÆMT OG AÐ VERÐBÓLGA, VÍSITALA OG FLEST ALLT ANNAÐ MUNI RJÚKA UPP OG LÍFTÍMI EKKI LENGRI 50 til 100 ár.
Einnig er það athyglisvert að talsmaður LV sem kom í Kastljósið viðurkennir að ekkert einkafyrirtæki mundi fara í svona óarðbæra framkvæmd án ríkisábyrgðar eins og Kárahnjúkavirkjun verður.

Þessar framkvæmdir eru ákveðnar, því miður, og verður eflaust einhver uppgangur á austfjörðum á næstunni svo það þarf sennilega að flytja inn meira erlent vinnuafl ef að líkum lætur. Vonandi verður það þeim til góðs.

Fyrir mitt leyti finnst mér ég borga alveg nóg þó ekki sé á það bætt eins og stefnir í fyrir alla landsmenn.

Ég er búinn að fara bæði á Kárahnjúkasvæðið og upp í Þjórsárver og kynna mér aðstæður nokkuð vel.

Ég held að það sé stór hluti af ykkur sem viljið virkja og sökkva sem hafið ekki komið þarna þó svo að það hafi legið nánast því þjóðbraut austur á síðustu misserum? Það eru allavega margir fólksbílaeigendurnir sem sjá ofsjónum yfir jeppafólki og það sé hluti af ykkar skoðun?

Fyrst fór svona með Kárahnjúkanna þá ætla ég að vona að rikisstjórnin verði felld áður en til afgreiðslu Norðlingaölduveitu verður komið og LV verði settur stóllinn fyrir dyrnar.

Mætum öll niður við alþingishús á morgun og flautum til bjargar hálendinu.

Magnum
R-2136

Er einn af þeim sem var frekar hlynntur framkvæmdinni en eftir því sem ég skoða dæmið betur hringir sífellt fleiri viðvörunarbjöllum.

Umhverfismálin ein sér duga til að flestum ætti að vera ljóst að framkvæmdin orkar tvímælis. Skipulagsstofnun hafnaði framkvæmdinni þar sem efnahagslegur ávinningur næði ekki að vega upp náttúruspjöllin. Stjórnmálamennirnir tóku ?pólitíska ákvörðun? þvert á niðurstöðu þeirra sem fjalla um málið út frá faglegum forsendum. Hvaða forsendur notuðu pólitíkusarnir til að komast að þessarri niðurstöðu? Hvaða sjónarmið ráða hjá þeim? Voru pólitíkusarnir búnir að leggjast yfir málið og skoða það í þaula eins og Skipulagsstofnun gerði, (sjá skýrslu þeirra á heimasíðu stofnunarinnar, bara úrdrátturinn með rökstuðningi er 85 síður).

Arðsemin virðist ekki liggja fyrir (þó svo að náttúran sé reiknuð inn í dæmið á núlli). Skv. lögum á ekki að láta almenna raforkunotendur borga brúsann. Þessvegna var í upphafi rætt um að stofna sjálfstætt fyrirtæki um dæmið. Þar með hefði verið hægt að halda þessu aðskildu frá öðrum rekstri LV og láta álverið borga raunkostnaðinn við framkvæmdina en ekki bara hluta hans. Þessi umræða hefur ekki verið uppi að undanförnu og virðist ekki vera inni í myndinni þessa dagana. Vegna hvers?? Eiga einhverjir aðrir að bera hluta kostnaðarins??

Fyrir þá sem trúa því að ráðamenn séu alltaf að gera það rétta má minna á að ráðist var í Blönduvirkjun löngu áður en nokkur þörf var fyrir rafmagnið, og hverjir haldiði að hafi staðið undir þeim kostnaði sem hlaust af því að láta fullbúna virkjun standa ónotaða árum saman?

Sænsku verktakarnir eru hættir við þátttöku í framkvæmdinni og segja á sinni heimasíðu að það sé vegna umhverfissjónarmiðanna, þeir vilja ekki koma nálægt þessu.

Ég hef komið á þetta svæði og núna síðast í skoðunarferð á vegum LV. Sá hvernig svæðið er að breytast og heyrði sjónarmið yfirmanna á svæðinu. Eitt lítið dæmi var að einhver spurði af hverju svæðið væri orðið svona útsparkað eftir bílför og svarið var að þetta væri allt í lagi því förin eyddust og væru horfin á nokkrum vikum…..
Er það reynsla jeppamanna og eru það svona viðhorf sem við viljum að gildi á hálendinu?

Fyrir þá sem ekki hafa skoðað þetta svæði bendi ég á að skoða síðuna http://www.inca.is/show/index.html

HH

Loksins rifist um eitthvað verðugra hérna en hvort hrísgrjónadollur séu betri eða verri en amerískir jálkar.

Mér var þó aðeins brugðið yfir þeim skoðunum sem komu fram hérna ofarlega að það væri einhver glæpur að varpa þessu fram. Þetta er spjallþráður um umhverfismál og ef þessi umræða á ekki heima hér eru menn að skilgreina umhverfismál frekar einkennilega! Og það er full ástæða fyrir jeppamenn og ferðafrík að velta fyrir sér framtíðarþróun á hálendinu, ég hef að vísu ekki séð kortið sem Matti talar um en ef maður setti alla virkjanakosti sem rætt hefur verið um inn á eitt kort (þ.m. Eyjabakka, Kárahnjúka, Arnarvatnsdal, Norðlingaölduveitu, Skaftárveitu, etc.) ásamt tengdum mannvirkjum (uppbyggðir vegir, varnargarðar, háspennulínur…), þá yrði ekki mikið eftir af svæðum til að ferðast um óspillta náttúru. Væri sjálfsagt hægt að finna snjóskafla (ef það kemur einhvern tíman aftur snjór á þessu skeri) en lítið eftir fyrir þá sem vilja líka ferðast um óspillta náttúru. Þess vegna kemur þetta okkur við!

Og fyrir alla muni, ekki falla í þessa alhæfingagryfju. Karl Th. Birgisson framkv.stj. Samfylkingarinnar sagði í sjónvarpsþætti um daginn að hann vildi ekki skilgreina sig sem virkjanasinna þó hann væri fylgjandi Kárahjúkavirkjun. Það væri ekki þar með sagt að hann væri fylgjandi öllum virkjanaframkvæmdum á hálendinu. Sjálfsagt til einhverjir sem eru virkjanasinnar í þessum skilningi og einhverjir örfáir sem eru á móti öllum virkjunum, en stærsti hluti þeirra sem eru andsnúnir Kárahnjúkavirkjun eru ekki með einhverja svona svart/hvíta afstöðu heldur meta hvert tilvik fyrir sig. Og HarSv, þetta kemur hvalveiðum ekkert við!

Og úr því ég er farinn að tala um málflutning sem er útúr kortinu, þá er það þetta með að ef við stíflum ekki í Dimmugljúfrum sé eins gott að fara aftur í moldarkofana. Einn ágætur alþingismaður fór ansi nærri þessum rökum um daginn og ef eitthvað er held ég svona málflutningur spilli fyrir málstað þeirra sem vilja virkja. Svipað og hungurverkföll fyrir málstað þeirra sem eru andsnúnnir.

Ég hef sagt það einhvern tíman hérna áður, að þó f4x4 klúbburinn taki ekki opinbera afstöðu þá á hann að vera vettvangur þar sem menn spá í það hver sé fórnarkostnaðurinn af virkjunum í formi glataðrar náttúru og hvað þetta gerir fyrir möguleika til að njóta náttúrunnar. Menn taka svo auðvitað persónulega afstöðu til þess hverju á að fórna og hverju ekki, en klúbburinn á að geta verið vettvangur til þess að skoða hvað liggur undir og hvaða afleiðingar framkvæmdirnar hafa.

Kv – Skúli H.

ég ætla að benda fólki á eitt í þessari umræðu sem er kannski alls ekki við eigandi en samt ætla ég að géra það.

Fyrst þegar byrjað var að tala um að virka kárahnúka/Eyjabakka þá voru ekki margir sem vissu af þessum "náttúru perlum" og sú umferð sem er búin að vera upp á kárahnjúka svæðið nú í ár er líklega um það bil tvisvar sinnum meiri en hefur verið frá uppafi landnáms ísland.

ég gét líklega sagt það að eginlega bara bændur sem ráku rollur af þessu landi og austan henn hafi séð þetta land áður en mönnum datt í hug að virka á þessu svæði.

og mér langar að benda á annað að við náttúru unnendur hérna að austan erum ekki að gapa upp í loftið og rjúka í fjölmiðla þó að það séu að hverfa heilu fjalshlíðarnar þarna fyrir sunnan t.d í malarnámuni fyrir utan selfoss og efnis námið upp á hellisheiði syðri.

þó það sé verið að sökkva nokkrum hunda súrum og fjalla grösum þá fynst mér personulega að alþjóð egi ekkert að vera að gapa útaf því,

ég gét ekki séð það að það sé arðbært að lifa á hunda súrum og fjalla grösum og mér fynst það sjálfsagt að það verði virkjað á kárahnjúkum eins og mun verða.

og ég get líka bent á það að mesta náttúru perlan sem er upp hjá kárahjúkum (hafra hvamma gljúfur) mun standa óskert.

svo langar mér að benda á það að þessir svo kölluðu náttúru verndar sinnar sendu grein í erlent tímarit og í þeiri gein kom mynd af dettifoss og þar var sagt að þessi stæðsta náttúru perla landsins myndi hverfa ef kárahnjúka virkjun yrði framkvæmd.

og ég gét ekki séð nein tilgáng í því að fara að mótmæla einhverju sem skuli verða.

svo sé ég ekki heldur nein tilgáng í því að draga málefni sem þessi inná vef sem þennan!

Góðan daginn félagar,

Eða eru ekki allir félagar sem nota þennan vef?

EM það er engan vegin viðeigandi að vera með þær fullyrðingar að ekki megi mynda sér skoðun á eyðileggingu náttúrunnar nema hafa stigið fæti á hvern fermeter sem um ræðir.
Það er fullt af fólki sem hefur ekki getu eða tækifæri til að skoða þessar náttúruperlur og er þeim þá bannað að hafa skoðanir á þessum málum?
Þó að umferð sé miklu meiri núna en hún var við upphaf landnáms þá er það ekkert óeðlilegt. Landnámsmönnum datt heldur ekki í hug að sökkva öllu þessu landi.
Það er fullt af fólki sem fer þarna og ég þar með talin, bara til að sjá þetta svæði ef til kæmi að það yrði allt eyðilagt.
Hvað eiga þessir bændur að gera við rollurnar sínar sem þeir voru að reka af þessu svæði? Er kannski fullt af gróðri þarna og er það ástæðan að rollurnar voru þarna?
Þegar þú ert að bera saman malarnámur og þessar áætluðu framkvæmdir við Kárahnjúka, þá hefur þú einhverstaðar fengið rangar upplýsingar. Ef það væru bara Hundasúrur og Fjallagrös, eins og einhver mannvitsbrekkan sagði á alþingi og þér finnst greinilega ofsalega fyndið, þá væru hlutirnir ekki svona alvarlegir. Ég veit ekki til þess að Reykvíkingar hafi verið að skipta sér af malarnámum austanlands. Ég er sammála því að það er mjög ómerkilegt að stilla þessu upp sem stríði milli landsbyggðar og höfuðborgarsvæðis. Það er fullt af fólki á landsbyggðinni sem er á móti þessu og sennilega fleiri á en menn gruna á austurlandi. Ég bý sjálfur langt frá höfuðborgarsvæðinu.
Þetta með greinina og Dettifoss voru alvarleg mistök af hálfu blaðsins og hefur verið beðist afsökunar opinberlega, skriflega og munnlega á því.Hvað er þá málið? Mistök hjá blaðamönnum eru ótrúlega algeng og hef ég reynslu af því sjálfur.
Síðan sérðu engan tilgang í að ræða þessa hluti hér á 4×4 vefnum en ert samt að því. Það sannast bara að þetta er tímabært að ræða þetta á vefnum, miðað við þáttöku í þessu spjalli.
Ég vona EM að afkomendur þínir fái að njóta hálendisins í framtíðinni og óska þér og þínum gleðilegra jóla.

Kveðja
Halldór

Pólitík,heyrði frá manni að austan í morgun sem er í góðri stöðu og alfarið á móti þessari virkjun ef hann tjáir sig er djobbið farið og hvað haldiði að það séu margir í sömu stöðu og hann,pólitík hvað?

Halló???? verður kreppu veitt austur, hvaða bull er þetta hvernig væri að skoða málið en ekki henda svona bulli fram?

Hér á þessum þræði hefur orðið mjög góð umræða um þessi virkjanamál og hvernig við nýtum landið okkar. Reyndar hefur lítið heyrst í s.k. virkjunarsinnum annað en órökstuddur skætingur, hreppapólitík og vilji til að þagga niður í þeim sem vilja nýta landið t.d. til ferðalaga og útivistar. Væri fróðlegt að heyra einhver betri rök. Þetta er prýðilegur vettvangur slíkra skoðanaskipta.

Helstu rökin gegn virkjun af þessari stærðargráðu á þessu svæði eru skýr:
– Óbætanlegt tjón á umhverfi landsins og ásýnd
– Fjárhagsleg áhætta og kostnaður sem almenningur þarf að borga

Fyrir þá sem vilja mótmæla virkjunaráformunum bendi ég á að senda skilaboð til ríkisstjórnarinnar með því að fara á síðuna:

http://www.natturuverndarsamtok.is/emailrikisstjorn.asp

Kveðja,
Þrándur R-1610