Slysatíðni breyttra jeppa minni en óbreyttra

Eru þetta ekki góð tíðindi fyrir okkur jeppamenn?? Allir sem eru á móti breytum jeppum í umferðinni hafa allaf verið að tala um okkur sem slysagildru….

kv,
heijo

Sælir félagar.

Já vonandi sjá menn sér fært að gera eitthvað úr þessu. Við í afmælisnefndinni munum svo sannarlega koma þessu að, þar sem það á við, ef einhverjir nenna að tala við okkur vegna allra þeirra uppákomna sem við ætlum að standa fyrir á árinu.

Að mínu mati er það ekki spurning að vel breyttur jeppi er örugglega með betri aksturseiginleika en sá óbreytti og að sama skapi að sá illa breytti getur verið hættulegur. Þetta segir manni það að sennilega erum við Íslendingarnir farnir að vanda okkur meira í breytingarmálum en gert var hér í denn. Hins vegar má örugglega gera enn betur.

Einnig er ég nokkuð viss um að við þessir "vitleysingar" sem erum á þessum breyttu jeppum eigum að vera betri ökumenn, en hinir sem eiga óbreytta jeppa, því jú það segir sig sjálft að þeim mun meira sem við ökum, þeim mun betri ökumenn verðum við, því við erum að kaupa jeppana okkar til að nota þá. Svo má örugglega tala um að við erum kannski meira á ferðinni, þar sem minni líkur er á að við lengdum í árekstrum við aðra (jöklar, óbyggðir og fl). Einnig má leiða líkur að því að fleiri sem eiga breytta jeppa eru með meirapróf, ef við horfum til allra þeirra sem aka fyrir ævintýraferðaskrifstofurnar. Þar verða og eiga menn að vera með leigubíla-, eða meiraprófsréttindu ef ég hef skilið það allt saman rétt.

Hins vegar megum við ekki ofmetnast vegna þessa. Höldum áfram að vera til fyrirmyndar í umferðinni, eins og áður. Hugsum um orð Benna í Bílabúð Benna: Það er ekkert grín fyrir fólk að mæta þessum tröllum okkar út á vegum. Sýnum þeim mikla tillitsemi, hægjum á okkur og fáum þakklæti í staðin.

kv
Palli #77

Sælir.
Hefur þetta áhrif á hugsanlegt bann við kastaragrindum sem búið er að fjalla mikið um á vefnum.
Það er talið eðilegt að breyttir jeppar séu keyrðir um 25.000 til 30.000 Km á ári sem segir manni að þeir séu meira á götunum en aðrir fólksbílar var tekið tilit til þess í könnunni.
Ég held að gagnrínin sem jeppamenn fá sé oft frá frá fólki sem ekki skilur að það sé eitthvað að sjá fyrir utan höfuðborgina og óskapast yfir bílunum.
Við verðum að vera líka góðar fyrirmyndir í umferðinni og skilja sem minns ummerki eftir okkur í náttúrunni.
Kveðja Þórður.

Bíðum aðeins við, áður en við sláum okkur of mikið á brjóst.

Útlendingar/ferðamenn á bílaleigu jeppum sem eru óvanir jeppum og malarvegum eiga nú drjúgan hluta af óhöppum óbreyttu jeppanna. Þeir eru að velta þeim upp um öll fjöll og þjóðvegi líka allt sumarið. Kemur fram í könnuninni hversu stór hlutur þeirra er?

En samt sem áður, þetta lítur mjög vel út fyrir okkur, enda yfirleitt um vana bílstjóra með bíladellu að ræða sem þekkja sinn bíl og hvað má bjóða honum.

Ökum varlega og verum "ekki dellukörlum" góð fyrirmynd.

Kveðja
Siggi_F

Ég held að nafni minn Þórðarson sem vann skýrsluna (sá sami og fræddi okkur um snjósöfnun á síðasta fundi) hafi hitt naglan á höfuðið í fréttum Stöðvar 2 í gær en hann sagði orðrétt:

"Ég tel að þetta bendi til þess að það séu engar tæknilegar ástæður sem ættu að rökstyðja það að breyttir bílar ættu að lenda í fleiri eða færri óhöppum en óbreyttir bílar og þá fer maður að hugsa er þarna að leita munar hjá ökumönnum þessara bifreiða."

Þeir sem eiga og nota breytta jeppa eru sér meðvitaðri um þyngd, stærð og aksturseiginleika bílanna sinna og þar með gera sér grein fyrir að árekstur á 2-3 tonna jeppa er ekkert grín fyrir þann sem lendir fyrir því. Það bæði er ólík tilfinning að sitja í breyttum eða óbreyttum jeppa auk þess sem við erum yfirleitt búnir að stúdera allt mögulegt í sambandi við bílana. Lang flest slys skrifast á ökumanninn en ekki búnað bílanna (þó finna megi dæmi um hitt).

Frekar en að berja okkur of mikið á brjóst finnst mér félagið eigi að fylgja þessu eftir með fræðslu og áróðri um umferðamál sem væri þá einkum beint að akstri jeppa, breyttra eða óbreyttra. Benda mönnum á áhrif þyngdarmunar og höfða til ábyrgðar hjá þeim sem keyra um á þungum jeppum. Við viljum halda áfram lágri slysatíðni hjá breyttum jeppum og lækka hana líka hjá hinum.

Kv – Skúli H.

Eins og Skúli og Skúli hafa bent á, þá er þessi skýrsla staðfesting á því að búnaður og hönnun bíls hefur óskup lítið með slysatíðni að gera, svo lengi sem búnaðurinn og hönnunun er inna einhverra eðlilegra marka.

Einhversstaðar heyrði ég að farsímar og útvarpstæki væri einhver hættulegasti búnaðurinn í bílum!

Eigendur flestra breyttra bíla eru bíladellukallar og konur. Og ef maður stundar eitthvað af áhuga og kappi, þá verður maður yfirleitt góður í því. Þess vegna ættum við að flokkast sem "góðir ökumenn". Hefur ekkert með bílana að gera.
Fæstir okkar eru líka hraðafíklar. Fáum okkar "kick" á tiltölulega lágum hraða

Og ekki gleyma því að þó að slysatíðnin sé lá, þá segir það EKKERT um alvarleika slysa sem breyttir jeppar eiga þátt í. Til að svara því þarf allt aðra könnun.

Kveðja
Rúnar

ps. Ofangreint eru að sjálfsögðu bara mínar skoðanir á þessu.