Setrið

Sæll ofsi.

Þið skálanefndarmenn eigið heiður skilið fyrir góða frammistöðu í viðhaldi og endurbótum á skálanum. Varðandi skoðanakönnunina um brunavarnir í Setrinu, þá verð ég að játa að ég efast mjög um að þessi spurning á þessum vetvangi eigi rétt á sér, enda sýnir það sig að þátttakan er með því lélegra sem sést hefur. Ég leyfi mér einnig að efast um að vitræn niðurstaða fáist á þessum vetvangi, þar sem svo fáir hafa kynnt sér þessi mál í þaula.

Annað mál. Skálagjöldin innheimtast illa. Alveg finnst mér með ólíkindum að félagsmenn skuli ekki fást til að greiða þennan 500 kall pr. haus fyrir að fá næturgistingu í flottasta fjallaskála landsins. Klúbburinn er að greiða 700 þúsund í rekstur skálans á síðasta ári, þrátt fyrir að borga ekki krónu fyrir vinnu félagsmanna sem leggja til alla vinnu í sjálfboðastarfi. Næturgestir fá rennandi vatn, rafmagn, fjarskiptabúnað, viðgerðaraðstöðu, rafsuðu, salernishús o.fl. o.fl. en eru ekki tilbúnir til að borga neitt!!! Hvað er til ráða??? Er rétt að skipta um skrár og læsa skálanum alfarið??? Eigum við að koma upp skálavörslu yfir mesta ferðatímann??? Eigum við að koma upp myndavélakerfi??? Ef það er rétt að enginn sé að gista þarna innfrá sbr. gestabækurnar, þá er sennilega réttast að skipta um skrár og læsa bara alfarið og taka bara lykil með í skipulögðu ferðirnar…

Gaman væri að heyra í mönnum ef einhver lúrir á ráði sem dugar til koma þessum málum í lag.

Með ferðakveðju,

BÞV

E.s. Ég á gamla YATSY blokk ef þú vilt (;-)

Spurningar á heimasíðu F4x4.is eru hugsaðar bæði til gamans og eins til umhugsunar. Þessari spurningu var varpað fram í framhaldi af erindi sem flutt var á félagsfundi í janúar sl. um átak Ferðafélags Íslands í brunavörnum í þeirra skálum. Erindið varð mér til mikillar umhugsunar og þar sem engin umræða átti sér stað um þetta mál á vefnum okkar þá köstuðum við þessari spurningu fram til að skapa umræður.

Hvort spurningin eigi rétt á sér eða ekki, þá held ég að heimasíðan sé einmitt rétti vettvangurinn. En svo má endalaust deila um hvort niðurstaða skoðanakönnunarinnar sé vitræn eða ekki. Þó finnst mér athugavert að þátttakan er ekki mikil og gæti það bent til þess að lesendur síðunnar vilji ekki taka þátt í könnuninni nema að þekkja til málsins.

Mín skoðun er sú að skálanefnd hafi í gegnum árin unnið frábært og lofsamlegt átak í uppbyggingu og viðhaldi skálans. Hins vegar held ég að betur mætti gera í brunavörnum.

Við megum ekki gleyma því að brunavarnir þurfa að miðast við að skálinn geti verið þéttsetinn þegar eldur kemur upp. Á síðasta Þorrablóti í Setrinu var skálinn meir en yfirfullur og ég get ekki hugsað þá hugsun til enda ef eldur hefði komið upp um miðja nótt við þær aðstæður. Útgönguleiðir á svefnloftinu eru tveir þröngir gluggar og tveir kaðalstigar! Ég nefni ekki aðstæður á svefnloftinu yfir olíuvélinni!

Ég held að öll umræða um brunavarnir hljóti að vera af hinu góða og leiði að lokum til brunavarna í Setrinu sem standist allar ströngustu kröfur Brunaeftirlitsins.

Kveðja,
Vefstjóri

Sæll Vefstjóri.

Ég er algerlega sammála því að stöðugt þarf að huga að brunavörnum og því hvað betur geti farið í þeim efnum.

Það sem ég átti við með að þetta væri varla rétti vetvangurinn er einfaldlega það að ég tel að það sé þröngur hópur sem hefur kynnt sér þessi mál í þaula. Auðvitað gæti orðið stórslys ef upp kæmi stórbruni um miðja nótt þegar skálinn væri yfirfullur af fólki. Slíkar aðstæður hljóta alltaf að verða hættulegar og auðvitað þarf að leggja mikla vinnu í það að skipuleggja flóttaleiðir sem best.

Mér finnst hugmynd Jóns um að taka sérfróðan mann með inneftir og fá álit á því hvað mætti bæta, mjög góð.

Með ferðakveðju,

BÞV