This topic contains 19 replies, has 1 voice, and was last updated by 
-
Topic
-
Fátt þykir mér jafn leiðinlegt og það að skrifa kvörtunarbréf nema ef vera skildi það að fá slæma þjónustu.
Slíkt henti mig á dögunum. Ég hringdi í R. Sigmundsson og bað þá um að senda fyrirtæki mínu kapal.
Hingað til hef ég átt góð viðskipti við R.Sigmundsson. Er mér nú ljóst að það er sennilega helst einum starfsmanni að þakka. Umræddur starfsmaður er kallaður Rikki og var því miður í fríi þegar þessi viðskipti fóru fram. Honum þakka ég góð samskipti gegnum tíðina og hvet hann í leiðinni til að setja á laggirnar sitt eigið fyrirtæki.
Eftir töluverða reikistefnu og augljósa vanþekkingu starfsmanns á því hverskonar kapal ég þyrfti fór ég þess að sjálfsögðu á leit að fá besta hugsanlegt verð og minntist í því samhengi á hvort ekki væru góð kjör fyrir félaga í Ferðaklúbbnum 4×4. Það voru nú dræmar undirtektir við því, þrátt fyrir að ég hefði séð á heimasíðu 4×4 að fyrirtækið veitti 8% afslátt til félagsmanna. Jú jú verð fékk ég uppgefið og lofaði viðkomandi að senda mér kapalinn um hæl.
Næsta dag þegar ekkert var farið að bóla á kaplinum vildi svo til að ég átti leið á pósthúsið. Þar lá kapallinn og beið þess að verða leystur út úr póstkröfu. Kapallinn hafði við þennan flutningsmáta hækkað um 25%.
Nú er það svo að fyrirtækið sem ég starfa hjá fær daglega tugi sendinga og aldrei hef ég heyrt um að póstkröfur tíðkist í viðskiptum milli fyrirtækja. Algengast er að sendir séu reikningar til vörukaupa en ef eitt fyrirtæki treystir ekki öðru þá er einfaldlega beðið um kreditkort eða millifærslu enda ekkert að því að fyrirtæki vilji tryggja sér greiðslu fyrir vörur sínar og þjónustu. Það er hinsvegar óásættanlegt að vörur hækki um 25% í flutningum og þar með heildarkostnaður vörukaupa.
Því kom þetta mér á óvart. Til að bæta gráu ofan á svart þá hafði ekki aðeins póstkröfugjaldið bæst við heldur var kapallinn einnig nokkru dýrari en upp hafði verið gefið.
En gott og vel, ég vildi hafa þetta snúrudót með í páskaferðina og var því alveg tilbúinn til að greiða það sem þyrfti.
Áður en ég leysti út kapalinn hringdi ég samt vongóður í RS svona til að kanna hvort einhver mistök hefðu átt sér stað nú og ef ekki þá til að kanna hvort hægt væri að koma eitthvað til móts við mig þegar ég kæmi til þeirra í GPS hugleiðingum, enda á döfinni að skipta gamla Garmin GPS-inu út fyrir nýtt Garmin.
Því hefði ég nú betur sleppt. Var mér nánast sagt að hoppa þangað sem sólin skín ekki –
„ég er nú félagi í ýmsum félögum en ætlast ekkert til þess að fá neinn afslátt fyrir það eitt
að vera í einhverju félagi“. . . var meðal annars það sem ég fékk að heyra frá starfsmanni RS sem skildi ekkert í því að ég væri vonsvikinn yfir því að þurfa greiða meira en um var samið, að ég tali nú ekki um þá ósvífni mína að forvitnast um 4×4 afsláttinn.
Seinna meir komst ég svo að því að kapallinn sem ég þegar átti nægði fullkomlega til að tengja GPS-inn við tölvuna og sennilega hefði heiðarlegur starfsmaður með lágmarksvitneskju um vörurnar sem hann selur gert viðskiptavini sínum grein fyrir því að ég þyrfti ekki að kaupa nýjan kapal.
Hugsanlega er þetta full langt tuð út af einni snúru . . . veit ekki með aðra en ég sætti mig ekki við svona þjónustu.
Mun hér eftir versla Garmin búnað á e-bay og hvet menn eindregið til að skoða það sem er í boði þar. A.m.k. fá menn nasaþefinn að því hversu svakaleg álagningin er á þessum búnaði hjá RS.
Jóhann K. Kristjánsson
Skagabraut 27
300 Akranesi.
-
Replies
-
Anonymous- Umræður: 0
- Svör: 16404
Ég get nú vart orða bundist yfir þessum skrifum hér á undan. Ég hef í gegnum tíðina átt mikil viðskipti við R.Sigmundsson og get ekki gefið þeim aðra einkunn tíu af tíu mögulegum. Þá eiga þeir einnig hrós skilið fyrir hversu vel þeir hafa sinnt okkur jeppamönnum í gegnum tíðina bæði í gegnum verslunina og einnig í gegnum kynningar og sýningar sem þeir hafa verið duglegir að mæta á.
Varðandi þessi kaup þín á kaplinum þá verður nú að segjast að R.Sigmundsson er í fullum rétti til að senda þetta í póstkröfu, enda er það algengasti sölumátinn þegar selt er útá land nema farið sé fram á annað. Það er ekki hægt að fara fram á reikningsviðskipti þó svo að þú sért að láta senda á eitthvað fyrirtæki á skaganum, hvað þá að halda að þú getir sjálfvirkt skrifað í reikning fyrst þú verslar í nafni fyrirtækis.
Hafir þú fengið vöruna á öðru verði en þér var lofað þá er hægt að deila á fyrirtækið fyrir það. Einnig ef að starfsmaður fyrirtækisins hefur sýnt þér dónaskap. Ég þekki starfsmenn R.Sigmundssonar þó ekki af slíku.
Ég kíkti á ebay að gamni mínu þar sem þú sakar R.Sigmundsson um ofurálagningu. Ég fann tæki eins og ég keypti ekki fyrir löngu hjá þeim og hugðist reikna út hversu miklu ég hefði tapað af því að versla þetta hér heima. Garmin 182C kostar tæpa 900 dollara. Með flutningskostnaði, vörugjöldum og virðisaukaskatti reiknast mér að tækið lendi hér rétt yfir 100.000 kr, en kostar úr okurbúllunni 98.000 m.vsk. Ég skil ekki hvernig þeim dettur í hug að hafa tækið ódýrara hér en í bandaríkjunum þar sem við búum við 24,5% vsk, en hann er yfirleitt um 8% í USA.
Mér finnst ansi langt gengið að hvetja alla jeppamenn til að sniðganga fyrirtæki vegna einstakra kaupa á aumri snúru. Það ber að líta á hvernig fyrirtækið stendur sig í heildina gagnvart okkur jeppamönnum. Að mínu viti er R.Sigmundsson í hópi þeirra bestu.Þórarinn Ólafsson
Varmalandi
Sælir smá forvitni, um hvaða verð er verið að tala á þessari snúru og hvað er 25% hækkun margar kr?
Eru það ekki bara örfáar kr?
Kv Jóhann.
eg gett ekki verið meira samála Tóta
Þú þarft bara að tala við þá hjá r,s og ræða málin ekki skrifa að óhugsuðu máli
PS.hef bara góða reinslu af r.sigmundssini
kveðja Ægir Sævarsson
x 595
Sælir.
Það er nú ekki hægt annað en að svara þess, þó ég sé ekki tengdur R Sigmundsson á neinn hátt.
Líklega hefur þú verið svo óheppinn að lenda á starfsmanni sem var ekki fullnuma í Garmin fræðum. Hefur kanski verið nýr, eða að leysa af. Ég tek undir það að þaðan á maður ekki að venjast öðru en topp þónustu. Þó er gagnrýni þín á verðið trúlega réttlætanleg. Ef samið er um verð, skal það standa. Ég tel einnig líklegt að þín vankunnátta hafi orsakað það að þú sást ekki strax að þín snúra var tölvutengjanleg. það er nefnilega skýr tengimynd í öllum Garmin handbókum, allavega þeim sem ég hef séð.Þetta að fjargviðrast yfir því að fá vöruna senda í póstkröfu ber vott um algeran þekkingarskort. Dettur þér virkilega í hug að fyrirtækið stofni hvern sem er í reikningsviðskipti bara af því hann býr úti á landi? það mundi ekki gerast í því fyrirtæki sem ég vinn hjá. Venjan er að viðskiptavinur þurfi að sýna einhver viðskipti áður en hann fær lánað. Ef þú vilt hafa annan hátt á greiðslunni ber þér að taka það fram. Megnið af öllum smáhlutum er sent í póstkröfu þó auðvitað hafi það aukinn kostnað í för með sér.
Ég mæli líka með því að næst þegar þú þarft að kvarta yfir þjónustu fyrirtækis leitir þú til þess beint, og athugir hvort ekki liggi eðlilegar ástæður að baki, en notir ekki þessa leið. Þetta er ekki sanngjarnt.
Emil Borg
Reykjavík
Ég er einn þeirra sem átt hafa góð samskipti við R. Sigmundsson. Þeir sem ég hef átt samskipti við þar hafa reynst mér vel, fróðir um vöruna (Garmin) og kurteisir. Í þínum sporum hefði ég hringt í Ríkarð (Rikka) og sagt honum frá þessum ókurteisa starfsmanni (kvartað) og látið vera að skrifa um þetta hér á vefnum.
Með Garmin kveðju
Þórhallur
R-2992
mITT ÁLIT Á GREININNI SÉST Í FYRIRSÖGN MINNI!!!
bENNI R-3370
Hef ekkert nema gott að segja um þetta fyrirtæki og beini mínum viðskiptum þangað. Hef alltaf fengið 100% þjónustu. Topp fyrirtæki og topp starfsmenn. Þetta hefur bara verið undantekningin sem sannar regluna, en samt finnst mér þetta vera óþarft nöldur…
Hef ekkert nema gott að segja um þetta fyrirtæki og beini mínum viðskiptum þangað. Hef alltaf fengið 100% þjónustu. Topp fyrirtæki og topp starfsmenn. Þetta hefur bara verið undantekningin sem sannar regluna, en samt finnst mér þetta vera óþarft nöldur…
Undarlegt hvað menn eru viðkvæmir fyrir svona "asnalegu nöldri".
Það er töff að vera á móti. Það er rosalega kúl að setja út á allan fjandan og langflottast að gera það án þess að hafa fyrir því að vera nokkuð að lesa það sem sett er út á.
Ágætu félagar, það var ekki verið að hrauna yfir einn né neinn, heldur var ósáttur viðskiptavinur að benda á hvað hefði mátt fara betur í viðskiptum sínum við ákveðið fyrirtæki. EFTIR að hafa leitað til fyrirtækisins eftir "eðlilegum" ástæðum fyrir því sem kom viðskiptavini á óvart.
Rosaleg sprengja held ég að það verði þegar á vefinn kemur umfjöllun, sem hefur um nokkurt skeið verið í vinnslu. Þessi umfjöllun er um fyrirtæki sem nokkur hópur manna hefur átt í vandræðum og útistöðum með. (EKKI RS) Ég held að ég geti lofað því að sú umfjöllun er ekki unnin með rassgatinu sem er ekki það sama og hægt er að segja um starfsemi viðkomandi fyrirtækis. (ef þetta er ekki gott dæmi um upphaf á skítkasti þá veit ég ekki hvað)
En aftur að "asnalega nöldrinu":
Kæru "viðskiptavinir", hvað haldið þið að hefði gerst ef viðkomandi starfsmaður hefði t.d. sagt:
"nú já, þú segir það, ég get vel skilið að þú sért ekki sáttur við að greiða meira en um var samið og mér þykir það leitt en það er stefna fyrirtækisins að bla bla bla. Kíktu endilega í kaffi til okkar næst þegar þú ert á ferðinni og við getum sýnt þér nýja flotta Garmin tækið sem þú hefur áhuga á að kaupa hjá okkur. Við munum án efa komast að samkomulagi . . "
Ég hefði sennileg hætt að gráta, keypt nýja tækið og málið verið dautt.
————————————————————————————–
Ég hvet menn til að lesa aftur yfir pistil minn og reyna nú að sjá ljósið, því ekki veit ég betur en að ég gefi starfsmanni RS bara ágætiseinkunn þrátt fyrir allt.
En snúum okkur þá að tjáningarfrelsinu og tilraunum mínum til að frelsa andmælendur mína.
Skemmtilegt hvað það er nú hægt að flækja málin. Menn voga sér að benda á hluti sem þeir telja að betur megi fara = skotleyfi á pistlahöfund. Spurning hvort það er vegna þess sem enginn þorir að samsinna þessum pistli mínum hér á vefnum. Spurning hvers vegna menn kjósa að tjá sig um skrif mín í tölvupósti frekar en að koma fram undir nafni hér á vefnum.
Nema náttúrulega "mjá-kórinn" eins og einn viðmælanda minna orðaði það.Sem betur fer þá tíðkast ennþá málfrelsi í minni sveit, virðist vera á undanhaldi annarsstaðar. Sést sennilega best á því hvað það er orðið fátítt hér á vefspjallinu að menn skrifi undir með nafni. Eru menn hræddir við að hafa skoðanir? Nema þær séu "réttar" mjá mjá . . . .
Öllu má nú nafn gefa enda er ekki hægt að túlka þetta öðruvísi en að sumum þyki það asnalegt að hafa skoðanir, að ekki sé nú talað um hversu "ósanngjarnt" það er að benda á það sem er ósanngjarnt.
– Sérstaklega ef fyrirtækið hefur "alltaf" áður veitt jeppamönnum góða þjónustu.
– Sérstaklega ef aðeins er verið að kaupa eina litla ódýra snúru.
– Sérstaklega eftir að hafa hringt AFTUR í umrætt fyrirtæki til að óska skýringa.
– Sérstaklega eftir að hafa mætt fyrirlitningu og ókurteisi frá starfsmanni fyrirtækisins.Emil, ef þú mætir skilningsleysi þegar þú leitar eftir skýringu hjá fyrirtæki sem þú átt viðskipti við, telur þú þá að það sé ósanngjarnt að hafa orð á óánægju þinni opinberlega, t.d. á vefspjalli f4x4 ? Kannski ég hefði átt að hringja í ömmu og láta´nna hugga mig , snökt.
Emil ! og ég sem hélt að við værum vinir. Fór nú bara næstum því að gráta, aftur og nýbúinn, þegar ég sá hvernig þú hraunar yfir mig.
Emil, er ekki fullþunnt að kalla þetta ósanngirni er þetta ekki frekar ósvífni af minni hálfu ?
Emil ! Ertu andsetinn drengur, hvur fjandinn er hlaupinn í þig maður.
Einhver fann Garmin 182C á $900 ebay, persónulega myndi ég frekar versla þetta tæki á $700.
http://cgi6.ebay.com/ebaymotors/ws/eBay … =3&rows=50
Heldur þykir mér einnig sumir fara frjálslega með túlkun sína á mínum texta
"Okurbúlla" og að "sniðganga fyrirtæki" – ekki mín orð. Hmmmmmm . . . eru menn að saka aðra um að skrifa að óhugsuðu máli ?
Póstkrafan er ykkur hugleikin herramenn. Það er enginn að halda því fram að fyrirtæki séu ekki í fullum rétti til að tryggja sér greiðslur fyrir vörur sínar. Þetta er ekki spurning um vanþekkingu eða misskilning eins og þeir væntanlega ráku augun í sem LÁSU fyrri pistil minn, heldur einfaldlega spurning um það að orð skulu standa.
Ekki eru það einungis góðar viðskiptavenjur heldur vill svo skemmtilega til að um lausafjárkaup gilda ákveðin lög, "Lög um lausafjárkaup" sem menn geta kynnt sér nánar hér: http://www.althingi.is/lagas/nuna/2000050.html
Og . . . . . . til að grafa þetta í eitt skipti fyrir öll:
"Þú átt að greiða samkvæmt þeim samningi sem þú gerðir við seljandann það verð, sem að þið sömduð um, en ekki umsamið verð plús eitthvað til viðbótar hvort sem það heitir virðisaukaskattur eða eitthvað annað."
http://www.ns.is/handbok_neytenda_upphaf.htm (sjá 7 kafla)Vel getur verið að ég hafi ekki komist nógu vel að orði í fyrri pistli mínum.. Vel getur verið að ég hafi verið ofurlítið argur. Ekki get ég þó fallist á að ég hafi verið ósanngjarn.
Þegar öllu er á botnin hvolft þá hlýtur hverjum manni að vera það ljóst að ekki skiptir öllu máli hvort þjónustan kostar þúsundkallinum meira eða minna. Við sem viðskiptavinir hljótum að vera sammála um að það sem skiptir máli er að þú sem viðskiptavinur mætir skilningi, hæfilegri kurteisi og a.m.k. smá þjónustulund hjá þeim sem þú átt viðskipti við. Gildir þar einu hvort viðskiptin eru stór eða smá.
Fólk hlýtur að geta sagt sér það sjálft að nokkrar krónur verða ekki til þess að valda svona óánægju og þar með svona "óhugsuðum" skrifum.
Lifið heil,
aðrir sem ætla að setja út á skrif mín, (þið hafið sennilega ekki frekar enn fyrri daginn haft þolinmæði til að lesa alla rulluna). . . . . . ég sendi Emil á ykkur ef þið vogið ykkur að láta eitt styggðarorð falla um ritstílinn og stafsetningavillurrrrrrnar.
Einn jeppi
Ein leið
Ein skoðun
Eitt BruxellesJói spói.
Sæll Jói Spói Skagamaður.
Aldeilis pistill hjá þér.
Ég hef verið að spá í að kaupa mér Garmin tæki á ebay en miðað við þær forsendur sem Shopusa.is gefur mér hef ég ekki séð mér hag í því. Getur ekki verið að ríkið eigi stóran hlut í þessari svakalegu álagningu?Kv. Smári, sem er nú hálfgerður Skagamaður líka.
Sælir
Það er skrítið að maður sem fær lélega þjónustu og kvartar við starfsmann um það og síðan hér á netinu,skuli fá skammir fyrir að segja bara ekki takk ég skal kaupa meira næst.
Það er alveg sama hvert fyrirtækið er léleg þjónusta er ekki réttlætanleg,og það að það skuli vera einn maður sem heldur uppi þjónustunni er ekki nógu gott,en verra er að þegar kúnninn er að kvarta og segja frá viðskiptum sínum er kvörtunin slitin í sundur og einstök atriði dregin fram og býsnast yfir þeim,samanb pistlarnir hér á undan mér er sléttsama hvort Emil og aðrir hafa fengið góða þjónustu það réttlætir ekki lélega þjónustu til annara,né heldur að skjóta boðberann.
Fyrirtæki sem byggir afkomu sína á sölu til einstaklinga verður að hafa góða þjónustu og það er þess hagur að láta vita af því ef eitthver starfsmaður þess bregst þá er hægt að taka á slíkum hlutum,ég fer ekki og kaupi þjónustu ef ég fæ lélega þjónustu og bendi þeim sem ég þekki á að þeir fái betri annarstaðar það er svokallað lögmál viðskipta sem ræður og fyrirtækjanna að vera vakandi og viðhalda háu þjónuststigi en með því að vera að afsaka framkomu og benda mönnum á að þú átt ekki að tala við nema þennann mann hann er sá eini sem veit bendir til þess að það sé pottur brotinn hjá viðkomandi fyrirtæki
Og að lokum vil ég taka undir með Jóa að Þeir sem eru að agnúast út af skrifum hans lesið fyrst allann pistilinn og reynið að vera málefnalegir
Kveðja Laugi
Anonymous- Umræður: 0
- Svör: 16404
Þessi þráður er svolítið athyglisverður því í upphafi er félagsmaður að agnúast út í þjónustu sem hann fékk, þá agnúast nokkrir út í að hann agnúist út í fyrirtækið og svo agnúast menn yfir því að aðrir agnúast út í hann fyrir að agnúast ?. Spurning hvað er hægt að halda langt áfram.
Í sjálfu sér er ágætt að menn skiptist hér á reynslusögum, en það er sjálfsagt að hafa ALLTAF í huga að við erum yfirleitt að heyra bara aðra hlið mála og við erum að tala um einstök tilvik en ekki einhverja almenna reglu. Það er hægt að skaða orðspor fyrirtækis verulega illa með svona umfjöllun og kannski meira en ástæða er til. Ástæðan fyrir viðbrögðum við þessu núna er að flestir þekkja RS aðeins af góðri þjónustu og gott að það komi fram líka og ekkert athugavert við það (skora á Jóa að leiða hjá sér athugasemdir eins og ?asnalegt nöldur?, ómálefnaleg komment er bara eitthvað sem virðist gjarnan fylgja opnum spjallrásum). Jói hefur auðvitað fullan rétt á að segja sýna sögu hér, en ber ábyrgð á því sem hann skrifar og sama gildir um "andsvarendur" hans.
Kv – Skúli H.
Allt er þetta rétt og satt sem Skúli segir og í rauninni er allt sem Skúli skrifar þessa dagana satt og fallegt.
Mér finnst svolítil framboðs og kosningalykt af skrifum hans
þessa dagana:-)Kv.Lúther
Sælir
Það er athyglisvert að fylgjast með þessu spjalli fyrst kemur einn og lýsir lélegri þjónustu hjá fyrirtæki sem hann hefur allajafnan haft góð samskipti við og gerir það á mjög greinagóðan og skilmerkilegan hátt svo koma nokkrir í röð sem virðast ekki hafa lesið það sem hann skrifaði en "agnúast" út í hann samt fyrir að segja frá viðskiptum sínum svo þegar hanskinn er tekinn upp fyrir hann þá kemur einn og segir öll dýrinn í skóginum eiga að vera góð við hvert annað og þá kemur aftur einn af "agnúunum" og dillar skottinu í takt við það sem góði gaurinn sagði.
Allir bera ábyrgð á því sem þeir skrifa hvort það sé hér eða annarstaðar og að lýsa lélegri þjónustu hjá fyrirtæki er bara gott mál ef maður er að segja satt það varar aðra við,það er fyrirtækisins að standa vörð um þjónuststigið og hafa það sem hæðst og getur bara sakast við sig sjálft ef það er með starfsmenn sem ekki eru starfi sínu vaxnir.
það er jafn mikill ábyrgð að segja ekki frá lélegri þjónustu því þá ert viðkomandi jafnvel að koma öðrum í leiðindi sem ekki hefðu orðið hefði sá vitað af lélegri þjónustu og fyrirtækið veit kanske ekkrt um þennann starfsmann sinn og fær kanske meira í hnakkann af hans völdum.
Jón Þór í Byko sagði þetta á fundi með starfsmönnum fyrir mörgum árum og sagði það hag eigenda að geta leiðrétt mistök starfsmanna vegna kvartana kaupenda
Kveðja Laugi
Ódýrasta ráðgjöf hvers þjónustufyrirtækis er umsögn viðskiptavina, hvort sem hún er slæm eða góð.
kv. vals.
R-3117
Anonymous- Umræður: 0
- Svör: 16404
Hvað meinarðu Lúddi, allir þessir 684 pistlar sem ég hef sett á vefinn eru auðvitað sannir og réttir úr í gegn, kannski umdeilanlegt hvort þeir séu fallegir. Og þetta á auðvitað jafnt um þetta sem og röraáróður og breytingakostnað á Defender, en það er kannski annað mál.
En þetta með ábyrgðina, þá hafa fyrirtæki, verðskuldað eða óverðskuldað, lent í svona umfjöllun hérna og stundum öllu rosalegri en þetta. Þetta er eiginlega ekkert frábrugðið því þegar jeppa- eða mótorhjólamenn lenda í fjölmiðlaumfjöllun, það hefur áhrif á almenningsálitið og getur verið erfitt að rétta það við.
Kv – Skúli
Sælir
Það er þetta með umfjöllunina þessi kvörtun er sett fram á skýran og greinagóðan hátt og það sem er svolítið merkilegt eru viðbrögðin við henni sem mér hafa fundist skrítin og órökstudd,má vera að fyrirtæki hafi fengið óverskuldaða gagnrýni hér en ef menn lesa pistilin sem Jói skrifar í upphafi þá er þetta mest um einn mann sem ekki virðist valda starfi sínu,en að spjallþráður hér á 4×4 sé svo mikill örlagavaldur sem af er látið er ég ekki kominn með að samþykkja.
Óvandaðar kvartanir illa fram settar og í hefndarhug eru meiðandi og eiga engan rétt á sér en svo er ekki í þessu tilviki allavega veit ég að ef ég ættla að versla við þetta fyrirtæki spyr ég eftir Rikka sem virðist vera sá sem kann sitt fag.
Kveðja Laugi
Anonymous- Umræður: 0
- Svör: 16404
Eins og hvað það getur nú verið gaman að lenda á VÉLSLEÐAMANNINUM Rikka í annars ágætu fyrirtæki R Sigmundsson þá verð ég nú að segja eins og er að ég fór þangað um daginn og var ég ekkert allt og sáttur við þjónustuna sem ég fékk. Spurning hvort það sé ekki bara betra að fara þangað þegar Rikki er búinn í skólanum!
Það fer alveg svakalega í taugarnar á mér þegar ég skynja að starfsmaður NENNIR ekki að aðstoða mig.
Ég var að spyrjast fyrir um ýmislegt sem viðkom því að tengja lítið göngutæki við tölvu og láta það virka saman þannig að ég gæti notað það í jeppanum.
Allan búnað var ég búin að kaupa hjá R Sigmundsson (hjá Rikka) en mig vantaði festingu fyrir tækið og tölvuna, snúru sem gæti bæði verið straumsnúra og tenging við tölvuna. Starfsmaðurinn ætti að þjónusta mig en ég þurfti stöðugt að draga hann frá skrifborðinu sínu og að vörunum sem ég var að spyrja um.
Þetta er að mínu áliti afturför frá þeirri þjónustu sem ég hef átt að venjast og það er eitthvað sem forráðamenn fyrirætkisinns þurfa að vara sig á.
Fyrirtæki eru ekki yfir gangríni hafin þrátt fyrir það að í gegnum tíðina hafi þau viðhaft góða þjónustu.
Sælir,
Ótrúlegt hvað menn hafa lítið við tímann að gera ef þeir geta skrifað fjórar A4 síður í 10 punkta letri frá reynslu sinni við að kaupa einn lítinn sætan kapal, frábær árangur. Ég lendi vikulega í því að fá svona þjónustu hér úti í bæ, lífið er ekki fullkomið
Kveðja
Georg
You must be logged in to reply to this topic.