This topic contains 44 replies, has 1 voice, and was last updated by 
-
Topic
-
AnonymousNú hefur Ferðaklúbburinn 4×4 fengið þjóðsöguna staðfesta þó reikningurinn hafi ekki borist. Þá höfum við undir höndum útfærsluna á reikningnum.
Reikningur ferðaklúbbsins 4×4 hljóðar upp á 488.250 kr.
Þarna er verið að rukka klúbbinn fyrir notkun félagsmanna á vhf kerfinu. Það sem hefur gerst er einfaldlega það að Póst og fjarskiptastofnun nennir ekki lengur að rukka einstaklinga og ákvað að varpa ábyrðinni yfir á félagið og aðra sem eru með einkarásir t,d eins og Einar eik félagi okkar og okkur í Rottugenginu. Til þess að réttlæta þetta leggur Póst og fjarskiptastofnun dæmið þannig upp að fjarskiptakostnaður einstaklinga lækki. Sem er alveg rétt. Sá kostnaður hreinlega hverfur en dúkkar í stað þess upp á borði gjaldkera 4×4. Ferðaklúbburinn 4×4 getur á engan hátt varpað þessum reikning yfir á aðra, heldur er bara að borga eða setja málið í lögfræðing, sem sennileg væri best. Póst og fjarskiptastofnun þykir það hinsvegar leiðinlegt að þessa upplýsingar hafi ekki borist klúbbnum fyrr, svo við hefðum fengið tækifæri að hækka félagsgjöldin sem þessu nemur.Nú gengur Póst og fjarskiptastofnun út frá því í afsökun sinn á þessum einhliða gjörning að notendur af rásum 4×4 séu 1063 ( það er reyndar ekki rétt tala heldur 960 einstaklingar eða fyrirtæki ) og því sparist heilmiklir peningar. Það er kannski rétt að það sparast peningar hjá einstaklingum. Mér finnst það óeðlileg vinnubrögð að varpa þessum kostnaði einhliða yfir á klúbbinn. Póst og fjarskiptastofnun gæti allt eins sent klúbbnum alla reikninga félagsmanna vegna NMT símanotkunar eða seinna gætum við alveg eins fengið alla Tetar reikningana.
Af þessum 960 einstaklingum og fyrirtækjum eru mjög margir sem eru löngu hættir í klúbbnum eða hafa aldrei verið félagar. Nú er Póst og fjarskiptastofnun eftirlitsaðili, með því að rétt og löglega sé staðið að fjarskiptamálum almennt, en hefur greinilega ekki verið að fylgjast með því sem hefur verið að gerast á vhf markaðnum. Við höfum kvartað við þá símleiðis yfir vissum fyrirtækjum sem hafa verið að dæla rásum 4×4 í stöðvar óviðkomandi og sem dæmi um það eru húsbílar og einkabílar björgunarsveitarmanna ofl. ofl ofl. Þarna er verið að brjóta á réttindum klúbbsins sem leyfishafa þessara rása.
Hvað gerum við þá í málinu. Eigum við að sætta okkur við þá leið, að einfaldlega leifa öllum sem hafa vhf stöðvar að fá aðgang. Kannski öllum þessum 15000. Þá væri að vísu tryggt og nokkuð öruggt að einhver heyrði þegar kallað væri. Ef endurvarpar 4×4 væru ekki allir ónýtir einsog sagt var einhverstaðar í pistli. Formaður fjarskiptanefndar telur þennan kost alveg út úr kortinu og óraunhæfan. Kjartan Gunnsteinsson eða fjarskiptanefndin útskýrir kannski fyrir félagsmönnum af hverju þetta er óraunhæfur kostur.
Ég færði þennan þráð yfir í opið spjall, þar sem stærri hluti þerra sem málið varðar eru ekki greiðandi félagar í klúbbnum saman ber fjöldi fyrirtækja, einstaklinga og meira að segja opinbera stofnun sem okkur kemur ekkert við.
Ritari Ferðaklúbbsins 4×4. Jón G Snæland
-
Replies
-
Mikið satt og rétt sem hér er sagt að það er með ólíkindum að fyrirkomulagi tekjustofns P&F skuli breytt með þessum hætti án þess að svo mikið sem kynning á málinu komi til handhafa rásanna og auðvitað hefði verið sjálfsagt og eðlilegt að klúbburinn fengi þessa lagabreytingatillögu til umsagnar. En þegar við erum að tala um þetta gjald held ég að rétt sé að líta á þetta sem skattheimtu en ekki greiðslu fyrir þjónustu. Ég veit allavega ekki til þess að á móti gjaldinu komi nein sérstök þjónusta né hafi gert það áður, þetta er bara aðferð til að skattleggja svo hægt sé að halda þessari stofnun gangandi. Svo virðist sem heildarskattur á 4×4 félaga sé að lækka með þessu en kannski er það ekki raunin ef tekið er inn í þá hópa sem eiga sína einkarás, þó ég efi að þeir séu það margir að það breyti miklu. Sjálfsagt að skoða þetta atriði.
Margt óeðlilegt við að varpa þessu svona á klúbbinn. Ég kaupi þó ekki þau rök að þetta sé ósanngjarnt gagnvart þeim klúbbfélögum sem ekki eru með vhf-stöð. Flest útgjöld sem klúbburinn stendur í eru þess eðlis að koma aðeins hluta félagsmanna til góða, t.d. uppbygging vhf-kerfisins og þess vegna má nefna Soffíubúð, örugglega fjöldi félagsmanna sem aldrei koma til með að skíta þar.
Með þessu er ég ekki endilega að réttlæta þetta nýja fyrirkomulag, heldur bara að segja að þessi rök finnst mér ekki vinna gegn því. Það eru ýmsar hliðar á þessu og ekki allar slæmar, en örugglega óforsvaranlegt að þessu sé skellt á án þess að málið sé kynnt fyrir klúbbnum með löngum fyrirvara.
Kv – Skúli
Nú eru 26 aðilar búnir að tjá sig á vhf þræðinum, bæði þessum sem var lokaður og svo þessi opni. Menn eru búnir að koma með hinar ýmsu tillögur ( fyrir aðra að framkvæma ) og hafa verið með álit á málinu. Því langar mig að varpa einu hérna fram. Hverjir af þessum 26 aðilum eru með:
1 VHF stöðvar
2 Skráðar rásir 4×4 í stöðinni.Ég er með rásir 4×4 skráða og einnig Útivistar
Fljót svarað.
1. Á ekki vhf stöð.
2. Ergo á ekki ólöglegar rásir né frá ferðafélögunum.
kv. Stef. (hin einfalda).
Ekki veit ég hvað Ofsain er að fara með að þora að kannast við að eiga og nota vhf,en það er ekkert leyndarmál.
1 Vhf
2 4×4 rásirnar
og allt skráð.
Klakinn.En hvernig er með hina sem eru búnnir að skrifa hér,td Eik og aðra amatöra eða aðra félagsmenn.
Óöld eða ekki. Nú man ég ekki hvert gjaldið til PoF er en einhver nefndi 3000.- og klúbburinn á að greiða eitthvað innan við 500þús fyrir alla. Er ekki komin tekjuleið fyrir klúbbinn. Nú er ég ekki að mæla þessu bót, síður en svo. En einhvernvegin hef ég það á tilfinninguni að mótmæli okkar muni ekki verða tekin til greina og reikningurinn standi. Það mætti því hækka gjaldið til félagsmanna um svo sem 1-2þús, allir fá kallmerki og límmiða sem er límdur á bílinn. Viðkomandi félagsmaður er því sýnilega orðinn "löglegur". Þeir sem ekki hafa límmiða og geta ekki gefið upp kallmerki á okkar rásum eru því alls ekki löglegir. Smátt og smátt safnast upp vitneskja um þessa aðila sem síðan yrðu upplýstir til PoF sem "yrði" að sinna sínu hlutverki og elta þá uppi. Kallmerki eru vel þekkt hjá Radíóamatörum.
Sjálfur er ég með allar löglegar rásir 4×4 og búinn að greiða félagsgjaldið með seðilgjaldi og alles!!!
Kveðja:
Erlingur Harðar
A-833 skipti…
Já fyrst þú spyrð Ofsi þá er gott að það komi fram að ég er með löglegan búnað og hef leyfi fyrir aðgang að þeim rásum sem í stöðinni eru. Hef alltaf fengið rukkun frá PFS. Minni á að Eyjafjarðardeild er með spjallrásina 52. Við lendum allt of oft í því að hún er notuð af öðrum nálægt okkur og menn neyta jafnvel að skipta yfir á aðra rás.
kv,
HG
A-111
Nú er það svo að geta manna til að nota ljósvakamiðla er eiginlega ekki bundin við tækjabúnað, heldur miklu frekar þekkingu á tækninni. Ef mig langaði gæti ég til dæmis sent Ofsa jólakveðju á fm 93,5 Rás 1 en ég yrði sjálfsagt settur í steinninn fyrir það. Ástæðan fyrir því að ég kynnti mér þessa tækni er sú að ég tel að þetta sé besta leiðin til að vera í örugg fjarskiptasambandi á íslandi . Ég lít á það sem hluta af mínum borgarlega rétti að geta kallað eftir hjálp í neyð eftir öllum tiltækum leiðum. enda snúið að taka af mér þekkinguna. Og ef stjórn 4×4 finnst ekki nóg að ég borgi félagsgjaldið til að nota tíðnir klúbbsins þá þarf ég ekki gera það enda nóg pláss á cb og pmr bandinu til að bulla á milli bíla. Þá er kannski orðið spurning hvort maður hætti bara ekki að borga félagsgjaldið ?
Ég borgaði í félagsgjaldið í gær en það var öruglega ekkert seðilgjald bara 4200 kr
gummi glæpur
sælir
Er það ekki bara fullkomlega eðlilegt að F4x4 klúbburinn greiði leigu af þeim tíðnum sem hann hefur til umráða og leyfi síðan félagsmönnum sínum að nota. Munurinn er sá að nú greiðir leigutakinn leiguna en ekki þeir félagsmenn sem notuðu tíðnirnar sem er auðvitað rétta leiðin. Hvernig staðið var að þessu hjá P&F er hins vegra náttúrulega bara til háborinnar skammar en kannski lítið við því að gera, þetta er nú einu sinni lagalegur réttur þeirra eða hvað ?Ég sé heldur engan mun á því að inni í félagsgjaldinu sé kostnaður vegna þessa leigugjalds þrátt fyrir að allir noti ekki þessa þjónustu. Það sama á við um Setrið, reksturinn í Mörkinni, uppbyggingu endurvarpakerfisins, mánudagsfundi o.s.frv. Ef félagsgjaldið hækkar af þessu völdum then so be it. Spurningin er bara hvort klúbburinn ætli að rukka leigu af þeim sem nota rásirnar alveg eins og rukkað er fyrir gistinætur í Setrinu ! Það er því miður ekkert öðurvísi með tíðnirnar og t.d. gistingu í Setrinu, það eru alltaf einhverjir fuglar í klúbbnum sem svíkast undan að borga og það mun líklega aldrei breytast.
Er ekki bara málið að senda öllum þeim sem eru skráðir fyrir stöð í klúbbnum bréf og biðja þá um að greiða 1000 kr inn á reikning klúbbsins, ég er viss um að 500 manns muni bregðast vel við og aðstoða klúbbinn þetta árið en á næsta ári yrði þetta innifalið í félagsgjaldinu !
kv
Agnar R 3104
p.s. já ég er með löglega stöð og með F4x4 rásirnar inni
Undirritaður hefur skráða stöð með þeim rásum sem honum er heimilt að hafa þar. Þar sem þessi stöð var keypt var gengið eftir því að ég sýndi fram á hvað mér væri heimilt að hafa í henni og þannig eiga auðvita söluaðilar að vinna. Rásir 4×4 eru þar að sjálfsögðu.
Menn velta því upp hér hvort þetta gæti verið tekjulind fyrir félagið? Mér er nokk sama hvert ég borga þetta tíðnigjald, get allveg eins látið það fara til klúbbsinns eins og í ríkishítina. Menn hafa líka velt því upp að merkja bíla þeirra félagsmanna sérstaklega, sem hafa leyfi klúbbsinns til að nota rásirnar. Eitthvað svipað og skoðunar miðar, en það er náttúrulega fyrirhöfn í þessu, og einhver kostnaður. Stefanía (hin einfalda) sem ekki á stöð og sjálfsagt fleiri þurfa ekki svona miða, og borgar þá ekki fjarskiptagjald til félagsinns.
Spurningin er hvernig klúbburinn útfærir þetta, svo þetta kerfi kosti nú ekki meira en nauðsyn er.SBA
A-832… yfir.
Kallmerki er nokkuð sem mín kynslóð þekkti vel meðan "Gufuness" stöðvarnar voru málið. Einnig verðum við sjóhundar að nota kallmerki bátsins ef og þegar við notum okkar stöðvar. Nú hef ég ekki enn orðið svo frægur að eignast VHF-stöð í bíl og geri það vafalaust ekki úr þessu. Hættur að jeppast eftir nær hálfrar aldar skak á hinum ýmsu tegundum um vegi og vegleysur. En mér líst vel á þessa hugmynd um kallmerki og límmiða, sem stungið hefur verið upp á og mæli með því að fjarskiptanefnd skoði hana í fullri alvöru. En með þessar blessaðar opinberu stofnanir, já, það er hægt að halda langar ræður um hugarfarið sem þar ríður húsum. Sleppi því hinsvegar hér, enda varðar það við lög að lýsa skoðunum sínum á opinberum stofnunum og starfsmönnum þeirra.
Ég er einn þeirra sem hafa verið að skrifa í þennan þráð. Ef það skyldi skipta máli, þá á ég stöð af gerðinni Kenwood TM261 og flutti hana inn sem amatörstöð, enda hef ég fullgilt amatörleyfi.
Auk þess að virka á 2 metra amatörsviðinu (144-146 MHz) get ég m.a. notað hana til fjarskipta á öllum VHF rásum f4x4. Ég hef til þessa ekki notað hana til fjarskipta á öðrum tíðnum en amatörtíðnunum, en það kann að breytast ef einhver hluti úr ársgjaldi mínu í f4x4 fer að renna beint til P&F. Fæ ég þá ekki sjálfkrafa heimild til þess meðan ég borga árgjald ?Ágúst Ú Sigurðsson
TF3AU
Eins og ég skil fjarskiptalöginn þá er það ekki í höndum Stjórnar 4×4 að heimila þér Ágúst eða öðrum amatörum að nota amatörstövar á tíðnum f4x4. Það er annað mál hvort f 4×4 ætlar að reyna að fylgja því eftir að aðeins löglega skráðar stöðvar séu notaðar á tíðnunum. Það er örugglega það sem verið er að spá í hér að ofan (Hvejir þora) svo eru líka ýmis önnur verkefni í löggæslu sem liggja fyrir hjá klúbbnum eins og notkun félagsmanna á ólöglega negldum dekkjum og uppskrúfuðum olíuverkum.
Guðmundur
Er það rétt skilið hjá mér að í raun má hver sem er hlusta á hvaða rás/tiðni sem er? Svo framarlega sem viðkomandi sendir ekki út á!
Kveðja:
Erlingur Harðar
Nei það er bannað að liggja á hleri. jafvel þó maður geti það.
guðmundur
Til þess að reyna að svar þessu í stuttu máli hérna að ofan, sem er nú nánast útilokað. En ég ætla að reyna. Það er ekki verið að elta ólarnar við örfá amatöra, það er ekki það sem skiptir máli.
Það sem skiptir máli er sú staðreynd að u.þ.b 75% félagsmann eru ekki með tíðnir 4×4 á skrá. Það er ekki þeim að kenna, heldur þeim aðilum sem eiga að sjá um eftirlit í þessum málum. Því er það alveg út úr kortinu að ætlast til þess að fáir borgi fyrir heildina. Og það er alveg út úr kortin að varpa fjarskiptamálunum í rjúkandi rústum yfir á Ferðaklúbbinn 4×4. Bróðurpartur félagsmanna stendur vafalaust í þeirri trú að allt sé samkvæmt bókinni hjá þeim, en svo er ekki, og enn einu sinni þá er það söluaðilum fjarskiptatækja að kenna.
Það er eiginlega merkilegt að þurfa að standa í einhverjum ritdeilum um þetta, það hljóta allir með opinn augun að sjá það, að það er gjörsamlega útiloka að gera þetta að einhverri tekjulind fyrir klúbbinn á meðan enginn hefur hugmynd um það hverjir eru með rásir klúbbsins ekki satt. Þessi tala 1063 er hreint kjaftæði. Þegar búið er að draga frá þá 103 aðila sem eru með fleiri en eina stöð þá eru eftir 960 eftir, sú tala er einnig hreint kjaftæði, því þar er fjöldi mann löngu hætti í klúbbnum eða hafa aldrei verið þar. Þeir sem svo eftir standa, hverjir svo sem það eru, eigu við þá að láta þá borga brúsann. Nei það væri mikið óréttlæti og ég myndir aldrei greiða því atkvæði mitt, ég myndir heldur aldrei greiða því atkvæði mitt að fela þetta gjald í félagsgjaldinu.
Ég held að þú sért ekki í neinum ritdeilum Ofsi . Hér hafa hinsvegar margir ágætir menn verið að reyna að benda þér á að þær hugmyndir sem þú ert með um að reyna að takmarka aðgang að tíðnum eða rásum klúbbsins í gegn um tækin, séu bara ekki raunverulegur kostur í stöðunni. Það viðist bara ganga illa.
Nei Ofsi minn engar ritdeilur, ekki hvað mig varðar allavega, erum við ekki komnir í hátíðarskap og allt stefnir í smá skvap líka.
Ég held samt að það yrði hvetjandi fyrir menn að fá kallnúmer á bílinn hjá sér og það yrðu miklu betri heimtur þannig. Ég sá þetta ekki fyrir mér sem tekjulind fyrir 4×4. Bara var að benda á að ef meira kæmi inn en PFS rukkar þá væri hægt að setja þann pening í sjóð til að fjármagna reksturinn á kerfinu. Mér sýnist að þetta verði mun lægra gjald heldur en var. Ég sé heldur ekki hvaða vandamál það væri að rukka þetta með félagsgjöldum, getur verið sér liður á seðli.
Fram að þessu hafa löglegir notendur verið að borga brúsan en ég hef þá trú að þeim muni fjölga ef úthlutað væru kallnúmerum. Svo er þetta ekki bara söluaðilum að kenna að þetta er í ólestri, það eru líka þeir sem selja stöðvarnar með bílunum án þess að láta taka út 4×4 rásirnar.Jólakveðja að Norðan
HG
A-111
Já ég er sammála Halla, engar deilur héðan. Aðeins hugmyndir að lausn vandamála. Ég geri ekki ráð fyrir að málið verði leyst hér fyrir jól en eflaust má reyfa þær hugmyndir sem hér hafa komið fram. Svo er það eflaust verkefni stjórnar og etv. félagsfunda að ráða fram úr þessu.
Gleðileg jól:
Erlingur Harðar
Ég þakka öllum fyrir fróðlega umræðu, svo leysum við málin á nýju ári.
Þótt upphafið að þessum þræði megi rekja til umdeilanlegra ákvarðana Alþingis þá hef ég á tilfinningunni að málið í heild endurspegli ákveðna þróun í fjarskiptamálum landsmanna.
Ekki er svo ýkja langt síðan ríkisvaldið einokaði alla fjarskiptastarfsemi á landinu með þrem stofnunum sínum, sem voru Landssími Íslands, Viðtækjaverslun Ríkisins og loks sjálft Ríkisútvarpið.
Hugsanlega má það verða til að varpa smá ljósi á forsöguna ef ég reyni að rifja upp ástand mála fyrir u.þ.b. 50 árum, þegar fyrrnefndar stofnanir réðu öllu í fjarskiptamálum og reyna að bera saman við aðstæður nú. Á þessum tíma var ég unglingur, nýlega byrjaður að fást við rafeindagrúsk og fjarskiptatækni. Þá stjórnuðu Viðtækjaverslunin og Landssíminn öllum innflutningi á rafeindaefni, lömpum, þéttum, mótstöðum, transistorum og öllu því efni. Sama gilti um fullsmíðuð fjarskiptatæki – útvarpsviðtæki meðtalin. Aðrir aðilar sem vildu eða þurftu að flytja slíkt efni inn í landið gátu ekki fengið vöruna afhenta úr tolli nema þeir hefðu fengið til þess uppáskrift frá Viðtækjaversluninni og Landssímanum. Að sjálfsögðu var þess vendilega gætt að afhenda engum óviðkomandi rafeindaefni sem myndi gagnast við smíði senditækja. Þeir einu sem fengu að eiga og starfrækja sendistöðvar voru opinberir aðilar s.s. lögregla og slökkvilið og aðilar í atvinnurekstri s.s. leigubílastöðvar. Að auki var nokkuð byrjað að setja talstöðvar á 2790 kHz í rútubíla og aðra bíla sem voru í atvinnurekstri. Þær stöðvar voru flestar framleiddar af Landssímanum og notuðu styrkleikamótun, AM, sem hefur minni drægni en SSB mótunin. Svo var talstöðvavæðing flugvéla og báta einnig á hröðu skriði og starfsemi radíóamatöra leyfð, en háð talsvert strangara eftirliti og meiri kröfur gerðar þá en nú.
Eina útvarpsstöðin sem var starfrækt fyrir íslendinga var RÚV, gamla gufan og var tónlistarefni fyrir yngra fólk mjög af skornum skammti í dagskránni. Þeir sem vildu hlusta á léttari tónlist gátu þó náð sendingum frá bandarísku herstöðinni í Keflavík, kanaútvarpinu, ef þeir bjuggu á Reykjanesi eða Reykjavíkursvæðinu. Aðrir landsmenn urðu að reiða sig á erlendar stöðvar ef þeim hugnaðist ekki symfóníur og jarðarfarir í beinni útsendingu.
Eitt sinn tóku nokkrir framtakssamir ungir menn sig til, smíðuðu sendistöð og hófu útsendingar á dægurtónlist, sem náðist á drjúgu svæði í miðborg Reykjavíkur. Það leið ekki á löngu áður en fjarskiptaeftirlitsmenn frá Landssímanum höfðu miðað stöðina út og gert hana upptæka. Ef ég man rétt fylgdi þessu dómsmál og refsing.Í dag eru breyttir tímar og frjálsræði hefur aukist. Fjarskipta- og útvarpslögum hefur margsinnis verið breytt og er enn verið að. Efni til rafeindagrúsks fæst í miklu úrvali í a.m.k. tveim verslunum í Reykjavík og fjöldaframleiddar talstöðvar fást á skaplegu verði. Sumar þeirra má starfrækja án þess að þær séu skrásettar eða sótt um leyfi. Fyrir flestar aðrar stöðvar er leyfisöflun lítið annað en formsatriði svo fremi sem starfræksla þeirra stangast ekki á við alþjóðasamþykktir eða sé líkleg til að valda öðrum notendum óeðlilegum truflunum.
Af ríkisstofnunum er það að frétta að Viðtækjaverslun ríkisins er fyrir löngu niður lögð og Síminn hefur verið seldur. Það eina af þessu sem enn lifir auk RÚV er eftirlits- og úthlutunarhlutverkið sem nú er á höndum Póst- og Fjarskiptaeftirlitsins, P&F. Eitt af hlutverkum þeirrar stofnunar er að skipuleggja notkun fjarskiptarása þannig að sérhver rás nýtist sem best þeim sem þurfa eða vilja nota hana. Líkja má fjarskiptarásinni við auðlind, sem þó ekki eyðist þótt hún sé notuð. Til þess að hún nýtist vel þarf einhver aðili að sjá um úthlutun og skipulagningu á notkun hennar þannig að rásin komi notendunum að gagni og ekki verði truflanir milli notendahópa. Þar kemur til kasta P&F. Þetta starf hlýtur að verða stundum eins konar lögreglustarf því að óprúttnir aðilar kunna að ásælast rásir sem aðrir hafa fengið úthlutað. Ég er þeirrar skoðunar að P&F beri að annast eftirlit með slíku athæfi og stöðva það á einhvern hátt. Um sjálfa framkvæmdina vil ég ekki tjá mig og ekkert að marka þótt ég sjái ekki lausnina, það hafa vafalaust margir mér færari menn spáð í þetta og fundið ljósið. Að sjálfsögðu þarf P&F á rekstrarfé að halda og aflar þess m.a. með leyfisgjöldum fyrir fjarskiptarásir.Sem félagsmaður í f4x4 er ég alls ekki sáttur við það að P&F fái beinan aðgang að sameiginlegum sjóðum félagsins á þann hátt sem nú er reynt. En ef gjaldkeri okkar finnur enga haldgóða leið til að komast undan greiðslu reikningsins þá legg ég til að formaður panti fund með forstöðumanni P&F og inni hann eftir því hvaða þjónustu P&F muni veita f4x4 ef reikningurinn verður greiddur og ennfremur hvaða viðurlög okkar bíði verði reikningurinn ekki greiddur. Ennfremur þarf sjálfsagt að ræða forsendur fyrir þeirri fjárhæð sem rukkað er fyrir, fjölda notenda o.fl. o.fl. Ekki myndi saka að hafa lögfræðing félagsins með á fundinum og aðra stjórnarmenn. Að því loknu ætti stjórn f4x4 að skoða málið og leggja fyrir almennan félagsfund ef hún telur ástæðu til.
Kveðjur til þeirra sem nenntu að lesa þennan langhund.
Ágúst Ú Sigurðsson
You must be logged in to reply to this topic.