Nýliðaferð á Hveravellir

Sæll Jóhannes

Það kostar ekkert að láta sig dreyma 😛

Á hálendi Íslands, á miðjum Kjalvegi, er að finna óspillt og friðað náttúrusvæði sem nefnist Hveravellir. Ferðamenn, jafnt íslenskir sem erlendir, sækja mikið þangað allt árið um kring. Ekið er eftir Kjalvegi sem liggur um miðbik landsins, ein elsta og fjölfarnasta alfaraleið hálendisins. Hann opnar yfirleitt upp úr miðjum júní og er fær eins lengi og veður leyfir.

Hveravellir eru ein af mörgum náttúruperlum landsins, en svæðið liggur á milli Hofsjökuls og Langjökuls. Hverasvæði, heit laug og jöklar í stórkostlegu umhverfi draga alla náttúruunnendur að svæðinu.

Á Hveravöllum er að finna heita hveri, bæði vatns- og gufuhveri. Þeirra á meðal eru m.a. Eyvindahver, Öskurhóll og Bláhver.
Eyvindarhver dregur nafn sitt af Fjalla-Eyvindi, en talið er að hann hafi dvalið á Hveravöllum í um tvö ár, ásamt ástkonu sinni Höllu, útlægur frá samneyti við aðra menn, lög og rétt. Enn er að finna merki um búsetu þeirra, þeirra á meðal eru Eyvindarhellir og
Eyvindarrétt.

Eftir langan dag á hálendinu er notalegt að stinga sér í náttúrulega heita laug sem staðsett er við annan skálann á svæðinu og láta þreytuna líða úr sér.

Heimild:
http://www.hveravellir.is

Kjölur er háslétta sem liggur á milli Langjökuls og Hofsjökuls á 30 km breiðu svæði. Þar blasir við víðáttumikið land. Greinileg vatnaskil eru þar og má sjá vötn renna annars vegar til suðurs en hins vegar til norðurs. Hveravellir liggja í um 650 metra hæð yfir sjávarmáli í kvos milli norðurjaðars Kjalhrauns og Breiðamels. Hveravellir eru eitt af háhitasvæðum landsins og einnig eitt stærsta hverasvæðið. Þar er að finna vatnshveri sem eru þó ólíkir hver öðrum að gerð og lögun til dæmis eru þar gufuhverir og goshverir. Þeir bera nöfn eins og Bláhver, Eyvindarhver, Rauðihver, Grænihver og Öskurhóll sem lætur í sér heyra úr mikilli fjarlægð þegar hljóðbært er á svæðinu. Gufustrókar standa upp úr hverunum og má sjá þá víða að. Við eldri skálann á Hveravöllum er lítil laug þar sem hægt er að baða sig en hitanum er stjórnað með því að veita í hana heitu vatni.

Á góðum degi má sjá yfir stærsta hluta Kjalarsvæðisins frá tveimur stöðum. Annars vegar frá hæð sem liggur norðan við Seyðisá en hins vegar frá norðanverðum Bláfellshálsi við stóra vörðu sem þar er (sjá kort). Á þessum tveimur stöðum er nær ekkert sem skyggir á útsýnið. Þar er að finna margslungið landslag sem á sér langa sögu allt aftur til ísaldar þegar landmótum átti sér stað. Stórir jöklar skarta sínu fegursta bæði sumar og vetur.
Fjöll, klettar, grjót, sandur, hraun og jökulár prýða landslagið. En þar er einnig að finna gróðursæla dali, lindar, vötn stór sem smá, og fjölskrúðugt fuglalíf. Á veturna ráða rjúpur og snjótittlingar ríkjum á Kili, en þegar líða tekur á apríl bætast álftir, heiðagæsir og endur við. Þegar kemur fram á sumar hefst umferð farfugla um hálendið.

Náttúran, kyrrðin og friðsældin er einstök á svæðinu, hennar má njóta á marga vegu, sérstaklega í gönguferðum um þetta einstaka og sögufræga svæði.

Heimild: http://www.hveravellir.is