This topic contains 12 replies, has 1 voice, and was last updated by 
-
Topic
-
Jæja, fór einhverjir á þessar slóðir um helgina ?
Langar að vita um færð og snjóalög, er farið að langa að komast í smá snjó og á sleða
Jonni
-
Replies
-
Ég væri alveg til í að vita um snjóalög frá Bragabót og innúr. Ekki að það skipti öllu máli, enda er veðurspá næstu daga æði fjörug. Síðan er rétt að benda mönnum á að skoða landakort og kynna sér hvar Lyngdalsheiði er, en hún er ekki nálægt Bragabót.
Góðar stundir
Erum að fara yfir lyngdalsheiði yfir á kjöl og upp á jökul um helgina ef þú villt koma með.
fórum um helgina upp á skjaldbreið en fórum þá línuveginn og upp þá "hliðina" síðan var ekið niðrí slunkaríki og þaðan uppá langjökul og niður skálpanes og svo bara heim, tók um 11 klst en það var nóg af snjó og ekker nema gaman
reyndar þurfti að þræða skjaldbreið svolítið en samt ekkert mál.
Hefur Hlynur engin komment um það að maðurinn skuli fara yfir Lyngdalsheiði inn á kjöl…
Menn hafa nú verið kærðir fyrir utanvegaakstur í umdæmi Rolling stones fyrir minna en svona yfirlýsingar. Hitt er alveg stórmerkilegt að menn skuli ennþá kalla Gjábakkahraun og Laugarvatnsvelli Lyngdalsheiði. En kannski sannast hið fornkveðna að ef nógu margir éta upp ruglið hver úr öðrum endar með því að það verður sannleikur. Og þeir sem vilja hlúa að fornum sannindum eru álitnir furðufuglar og afturhaldslarfar. En nú bjarmar fyrir betri tíð; nýr vegur frá Þingvöllum til Laugarvatns mun væntanlega sneiða hjá Gjábakkahrauni og skera Lyngdalsheiði að hluta. Þar með munu fávísir um landafræði öðlast sannleikann eftir áratugabaráttu, en alfaraleiðin mun hafa færst af Lyngdalsheiðinni og í Gjábakkahraunið þegar konungsvegurinn var lagður vagnfær fyrir réttum 100 árum. Um Lyngdalsheiði hefur hinsvegar aldrei legið bílvegur þó nú hilli undir hann.
Kv
Þ
Eg skal vanda mig betur næst.
Eg þarf greinilega að vera mikklu nákvæmari
um leiðarlysingar hér á vefnum.
Greinilega viðkvæmt mál.
Kv.
Frikki pou. 😛
Kannast við þetta Lyngdalsheiðar/Gjábakka/Bragabótavörðu dæmi. Bara gaman af því og stundum fræðandi vona ég. Tölvert til af fólki sem er meinilla við að kalla svæðið við Bragabótavörðu Lyngdalsheiði og einnig við að kenna Lyngdalsheiðarveg á milli Þingvalla og Laugavatns (Gjábakkaveg) við Lyngdalsheiði þrátt fyrir að það sé almenn málvenja og flestir þekkja veginn ekki undir öðru nafni. Átta sig allir á því í fljótu bragði hvað strokklok er eða hvað snertur eru. Vélarhlíf eða eldveggur ! Held að Bragabót sé við Þjófahraun. Allavega er Lyndalsheiði fyirir sunnan "Lyngdalsheiðarveginn". Skemmtilegt örnefni á hæsta hluta heiðarinnar, Þrasaborgir.
Allt orkar þetta tvímælis og jafnvel þrímælis ef út í það er farið. Þorvaldur vitnar í að með konungskomunni hafi vegurinn verið færður af Lyngdalsheiðinni og niður í Gjábakkahraun. Nú er það hins vegar þannig að í undirbúningi fyrir þessa vegagerð er talað um að endurbætur á Gjábakkastíg þannig að hann verði fær vögnum og sömuleiðis ‘allur vegurinn austur á Lyngdalsheiði og alla leið til Geysis’. Þarna var lagður grunnur að þessum vegi og því strax í upphafi er því talað um þennan veg sem veginn austur Lyngdalsheiði. Vegagerðin hefur notað þessa nafngift í gegnum árin. Eitt sjónarmið varðandi örnefndi er að því eldri sem það er, því meiri rétt hefur það, hefðin skipti semsagt máli í þessu. Lyngdalsheiðin sjálf er vissulega nokkuð sunnar og nafngiftin kann því að byggja á fávísi og rugli, en það er þó 100 ára gamalt rugl sem hefur verið viðhaldið í gegnum áratugina af opinberri stofnun sem hefur með veghald að gera. Sjálfsagt má finna mörg dæmi um ‘ónákvæmni’ sem þessa og vegir heiti eftir einhverju í næsta nágrenni. Það er með þetta eins og svo margt, hinn stóri sannleikur verður ekki til nema með því að loka augunum fyrir einni eða fleirri hliðum málsins.
Ekki að ég sé að mæla gegn hinu ágæta nafni Gjábakkavegur. Það er hins vegar líka ekki nákvæmt því aðeins hluti leiðarinnar liggur þar.
Þrasaborgarvegur væri líka vel viðeigandi um vegagerð á þessum slóðum.
Kv – Skúli
Gjábakkavegur væri heldur ekki nægilega nákvæmt því ef minnið bregst mér ekki var vegurinn sem lagður var yfir Þingvallalægðina fyrir þjóðhátíðina 1974 kallaður Gjábakkavegur, og fór sú vegarlagning ekki hljóðalaust fram. Margnefndur vegur liggur um Gjábakkahraun og Laugarvatnsvelli og gæti því kallast Gjábakkahraunsvegur á meðan ekið er um það, t.d. upp að Bragabót og svo Laugardalsvallavegur, eða þá bara Vallavegur, austar. Hefð á því aðeins rétt á sér að menn viti ekki, eða megi ekki vita, betur á meðan hún er að myndast. Um það hafa fallið fjölmargir hæstaréttardómar í áranna rás. Þetta hefur hinsvegar alltaf legið ljóst fyrir og ástæðulaust að fleipra þar um, jafnvel þótt Vegagerðinni hafi skotist einhvern tímann.
Kv Þ
Svona til að toppa heimskuna hjá sér, þá er vegagerðin búin að setja upp skilti við veginn með nafninu "Lyngdalsheiði". Þetta er álíka gáfulegt og að kalla Holtavörðuheiði Tvídægru.
Góðar stundir
Þeir hafa nú bara gert það til að skaprauna þér Hlynur 😉
–
Bjarni G.
Vil byrja á því að taka undir með Þorvaldi sveitunga mínum með það að ástæðulaust er að fara rangt með örnefni. Hjalti Kristgeirsson, sem hefur m.a. ritstýrt Árbók Ferðafélags Íslands í mörg ár hefur skrifað snjalla og þarfa pistla um örnefni og örnefnanotkun og þarflaust að illa ritfærir menn eins og ég fari ofan í það. En það er með blessaða Vegagerðina. Seint mun hún hljóta í huga mínum allavega, sess sem eitthvert "átórítet" varðandi örnefni. Þeir hafa gegn um árin sýnt tilhneigingu víðar en þarna að gefa vegum nafn með tilvísun til örnefna, alveg án tillits til þess hvort það er í takt við viðurkennd örnefni. Núna þessa mánuðina er verið að vinna við nýja vegtengingu vestur á firði úr Geiradal eða öllu heldur Gautsdal í Austur-Barðastrandarsýslu sem var, yfir Þröskuld og niður Arnkötludal. Þennan veg vilja þeir kalla Tröllatunguveg. Kemur hann þó hvergi inná land Tröllatungu, né liggur hann um Tröllatunguheiði, enda tilgangurinn með vegalagningunni per se að komast hjá því að fara um nefnda heiði og færa vegstæðið þangað sem það er lægra yfir sjávarmáli. Nú, það liggur vegur hér milli Blönduóss og Sauðárkróks, sem nýverið hefur verið endurbættur og Vegagerðin kallar Þverárfjallsveg. Kunnugir segja mér að Þverárfjall sé hvergi til sem örnefni. Hluta af leiðinni er farið um Laxárdalsheiði, en það örnefni finnst ekki í bókum Vegagerðarinnar. Mér finnst sjálfum alltaf skrítið að maður sé að aka Djúpveg norður allar Strandir, en svona er það nú samt.
You must be logged in to reply to this topic.