Lyklasmíði

Í þessu seinna tilfelli var um að ræða gamlan bíl með væntanlega slitnum skrám og sviss. Þá getur verið að það þurfi ekki svona tilfæringar því það er ótrúlega algengt að lyklarnir passi á milli bíla. Þjófarnir gætu einfaldlega hafa verið með gamlan svipaðan lykil.

Spurning hvort það sé eitthver einföld lausn til á þessu vandamáli.

Kv – Skúli H.

Sælir, það er satt að eitthvað hefur verið stundað að fá bíla á bílasölum og láta smíða lykla í þá, við þessu er ekkert að gera því það er engin leið að athuga eigendur að öllum þeim bílum sem koma á þá staði sem smíða lykla.
Helst væri að bílasalar kæmu sér upp einhverju brennimarki sem þeir brenndu í lyklana sem þeir lána út og væri þá ekki smíðað eftir þeim (eigandi verður þá að passa að eiga annan lykil til að láta smíða eftir næst), einnig er til kerfi í USA þar sem bílasalar setja læsta lyklakippu á lykilinn sem þýðir þá líka að ekki megi smíða eftir honum, þegar bílnum er skilað athugar bílasalinn hvort kippan sé enn á og óskemmd, á kippunni stendur eitthvað á þessa leið á ensku ?bílasölubíll, smíðið ekki eftir?.
Þessar kippur gætum við reynt að útvega ef nægur áhugi er á því hjá bílasölum.
Annað sem minnst er á að umboðin smíði frjálst í bílana, þetta er ekki alveg rétt, í flestum tilfellum fá eigendur ekki einusinni lykilnúmerin í sína bíla heldur er þeim bent á að koma til okkar og verðum við að hringja og gefa upp sérstakt leyninúmer til að fá lykilnúmerið.
Þegar við smíðum eftir svoleiðis númerum skráum við nafn, kennitölu og síma hjá þeim sem lætur smíða og ekki eru afhentir lyklar til annara en eigenda nema skriflegt umboð sé til þess. Athugið að það er alls ekki alltaf hægt að fá þessi númer hjá umboðum og förum við þá á staðinn og tökum sílendra og svissa úr bílunum og handsmíðum eftir þeim.
Ef þessi gamli bíll var t.d. Nissan er mjög líklegt að hægt hefði verið að nota annan Nissan lykil, hann hefði þó þurft að vera líkur. Þetta vandamál getum við líka lagað, bæði er hægt að skipta um alla kóda í sílendranum og gert hann nokkuð góðan, líka er hægt að fá nýjan sílender og breyta honum svo gamli lykillinn passi áfram, svo ef grunur leikur á að fleiri lyklar séu í umferð getum við breytt öllum skránum í bílnum og eigandinn fengið nýja lykla, þetta er ódýrari leið en að skipta um alla sílendrana svo munar oft tugum þúsunda.
Þetta með örflögulyklana (transponder) þá er ekki óalgengt að jeppamenn taki þessa örflögu úr lyklinum og lími hana á svissinn, bæði til þess að geta notað fjarræsingu og einnig til þess að geta fest venjulegan lykil undir bílnum ef lykill týnist á fjöllum.
Það eru líka sumir sem taka þetta kerfi alveg úr sambandi til að minnka áhættuna af bilunum á fjöllum.
Nýjasti pósturinn fjallar um hreinsun á sílendrum, í flestum tilfellum, og þá sérstaklega í skottsílendra og sílendra í farþegahurðir, sem eru lítið sem ekkert notaðir og nú einnig á bílum sem hafa verið með fjarlæsingar í nokkur ár, er tilfellið það að ekki er hægt með nokkru móti að ?smúla út læsinguna? því inni í henni verður allt að einni steypu sem einungis er hægt að fjarlægja með því að rífa sílenderinn í sundur, setja hann í sýrubað og slípa hann upp (oft skiptum við um kóda í þessum tilfellum), í öðrum tilfellum eru sílendrarnir svo vel steyptir að það er ekki einusinni hægt að ná honum í sundur og verður þá að kaupa nýjan og breyta honum eftir lyklinum að bílnum, svo eru auðvitað þessir bílar sem eru á byrjunarstigi í þessu ferli og þá myndi duga sú aðferð sem á er minnst í fyrri pósti, EN athugið að þá er öll feiti farin úr sílendranum og WD40 eða aðrar olíur koma EKKI í staðinn, svo hann slitnar fyrr og ver og þá kemur að þessu vandamáli að aðrir lyklar gætu passað. Þið getið dælt feiti inn í hann en þá kemur lykillinn alltaf út ataður í feiti, besta leiðin er að láta rífa hann í sundur og yfirfara, WD40 og aðrar olíur eru ágætar til að halda sílendranum hreinum eftir það.

Vonandi hjálpar þetta eitthvað.
f.h. Neyðarþjónustunnar ehf
Lykla og lásasmiður
Laugavegi 168
562-5213
Óðinn Sigurðsson.

Sælir strákar

Í mínu tilfelli um daginn höfðu þjófarnir ekkert skemmt
til að komast inn í bílinn hvorki hurð né sviss.

En við nánari athugun komst ég að því að gamall lykill úr Toyotu Tercel dugði á svissin með smá lagni þó.

Ég tók þá alla cilendera úr hurðum og svissin og keypti
annað sett í umboðinu og skipti um, í mínum gamla Hilux
hefur aldrei verið fjarstýring svo á tólf árum hlýtur
hurða cilender að slitna mikið.

Ég leytaði til Neyðarþjónustunar og sögðu menn mér þar
að þeir gætu breytt hurðarcilendernum og svissinum án þess að skipta um þá en sú þjónusta kostaði ýfið meira en nýtt
lásasett í allt draslið í umboðinu.

kv.Lúther

Þetta er ágæt hugmynd, þ.e. að hafa falinn rofa einhver staðar. Finnst það allavega mun betra en þessar þjófavarnir sem gera bílinn óvirkan, myndi ekki vilja lenda í því á erfiðum stað upp á fjöllum.

Þetta kemur samt ekki í veg fyrir að tækjum og búnaði sé stolið af og innan úr bílnum. Þetta er orðið slæmt þegar menn þurfa að taka talstöðvar og annað úr bílunum strax eftir ferð.
Kv – Skúli

Ég er búinn að finna mjög góða lausn á þessu þjófavandamáli.
Í minni Toyotu er þjófavörn sem sprengir bílinn í loft upp ef reynt er að stela honum! Þjófurinn reynir alla vega ekki aftur… Bíllinn er svo tryggður upp í topp… Sprengi-tryggingin er að vísu svolítið dýr, en þetta borgar sig!

STÖNDUM SAMAN GEGN ÞJÓFNUÐUM.

Kveðja,
Ólafur.
R-2170.

Ég ættlaði rétt aðeins að benda á það að þessi leit einskorðaðist ekki bara við félagsmenn ferðaklúbbsins. Við vorum nokkrir sem erum ekki félagsbundnir sem fórum á stúfana þegar bílnum hanns Lúthers var stolið og leituðum í nokkra klukkutíma í grend við Reykjavík.

Þannig að……….

Stöndum saman JEPPAEIGENDUR geng þjófnaði á bílunum okkar.

er nú sniðugt að vera að tala um að það sé hægt að opna með hinum og þessum lykkli þegar spjallið er opið fyrir alla ?

það geta þjófar og þess háttar lesið þetta og fengið hugmyndir.

var bara að velta þessu fyrir mér

Kveðja Siggi

ps. 4×4 félagar geta nú sennilega alveg verið þjófar líka maður veit aldrei.

Látið ekki ónýta sílendra spilla ánæguna af því að eiga flottan jeppa, þetta má líkja við það að skilja íbúðina eftir opna, þið eruð margir með tölvur, GPS, talstöðvar og flottar græjur í þessum bílum, það er miklu ódýrara að láta laga þetta vandamál en bæta skaðann sem annars gæti orðið.
Það er að sjálfsögðu staðreynd að suma bíla er auðvelt að opna án lykils en það er óþarfi að bjóða upp á það.
f.h. Neyðarþjónustunnar, Óðinn.

Menn verða ekki sjálkrafa englar og góðmenni á því að ganga í Ferðaklúbbinn 4×4 ólsari. Hér eru mörg rotin epli innan um annars góða ávexti og það er ekkert óeðlileg miðað við stærð félagsins.