This topic contains 11 replies, has 1 voice, and was last updated by 
-
Topic
-
það voru 47 bílar sem lögðu af stað í morgun í ferð Litludeildar upp í Veiðivötn. Ólafur aðalfararstjóri var kominn af stað þegar spjallað var við hann og allt gekk vel. Kristján sem var eftirfari sagði mætingu hafa verið góða og ferðin væri að leggjast vel í fólk. Samkvæmt fréttum má búast við snjó á leiðinni og allt stefnir því í skemmtilega ferð. Fréttir af ferðinni verða settar hér inn öðru hvoru í dag.
Guðmundur G. Kristinsson
Litlunefnd
-
Replies
-
Var að tala við Ólaf fararstjóra og síðasti hópurinn var að koma í Hrauneyjar og fyrsti hópur að leggja af stað frá Hrauneyjum. Allt hefur gengið vel, en mikil hálka var á leiðinni. Það er ekki mikill snjór og það heyrðist í talstöðinni að menn væru að spá í að breyta þessu í tveggja daga ferð og fara norður. Ólíklegt er að að það verði gert og sá litli 10 cm snjór sem er fyrir hendi, verður bara að duga. Jón Snæland sem er undanfari í ferðinni var að keyra upp Vatnsfellið og sagði um klukkutíma vera eftir upp í Veiðivötn. Hann var bjartsýnn á á þetta allt og taldi nokkra skafla eiga eftir að verða á veginum. Einar Berg sem er hópstjóri með næst síðasta hópinn á leiðinni, sagði líka að mikil hálka væri á leiðinni og keyrt væri rólega þess vegna.
Guðmundur G. Kristinsson
Hópurinn var að lenda í Veiðivötnum og allt hefur gengið mjög vel. Tvær ár voru á leiðinni og var sú fyrri sem heiti líklega Vatnahvísl, ekki mikill farartálmi, en nokkuð stór ísskör var á þeirri seinni sem heitir líklega Fossavatnahvísl. Óli aðalfararstjóri sagði að ekki væri á hreinu hvort farið yrði áfram þá leið sem upphaflega var á áætlun og fararstjórar væru að ræða hugmyndir um aðra leið. Við setjum hér inn upplýsingar um þeirra ákvörðun, þegar hún liggur fyrir.
Guðmundur G. Kristinsson
Litlunefnd
Óli aðalfararstjóri var að hringja og ákveðið hefur verið að fara upp með Hraunvötnum og sjá síðan til með framhaldið. Ferðin gengur vel og búið að stoppa aðeins í Veiðivötnum og njóta útiverunnar. Nánari fréttir af leiðinni eftir Hraunvötnin koma síðan jafnóðum.
Guðmundur G. Kristinsson
Litlunefnd
Nokkrir bílar eru komnir inn á Jökulheimasvæðið og tekið er að birta til norðurs. Ferðalangar eru því í fallegu veðri á fjöllum. Það var að brotna framöxull í einum af fararstjórabílunum og verið er að skoða stöðuna á því máli. Verið er að hallast aftur að upphaflegu áætluninni um leið til baka, en nánari fréttir af því koma síðar.
Guðmundur G. Kristinsson
Ákveðið var að fara ekki norður fyrir Þórisvatn og hefðbundna Veiðivatnaleið heim. Hópurinn var að koma að Fellsendavatni og átti eftir um 30 mínútur í Hrauneyjar. Allt fór vel og fararstjórabíllinn með brotinn franöxul á leið í bæinn með hópnum. Það er ekki eins mikil hálka og var í dag og eitthvað hafði kólnað. Hópurinn fann á leiðinni góða brekku sem hægt var að leika sér í og fá pínulitla útrás fyrir jeppaveikina. Ferðinni verður slitið við Hrauneyjar og eftir það er allir á sínum eigin vegum á leið til Reykjavíkur.
Guðmundur G. Kristinsson
Litlunefnd
Hópurinn er allur kominn í Hrauneyjar, en nokkrar tafir urðu þegar einn þátttakandinn missti framdekk undan bílnum. Bíllinn fór út fyrir veg og nokkurn tíma tók að spila hann upp á veginn aftur. Dekkið var síðan sett undir aftur og bíllinn aftur gerður ferðafær.
Einar Berg úr Litlunefndinni var í Hrauneyjum að fá sér að borða og beið eftir síðustu bílunum til að skila talstöðvum. Hann sagði þetta hafa verið góða ferð og allt gengið vel. Hann braut framöxul hjá sér og sagði þetta ekki mikið mál þar sem hann væri á alvöru jeppa með lokum beggja megin að framan. Hann opnaði bara lokurnar og keyrði á afturdrifinu.
Ferðinni er lokið hjá fréttaritara og hann þakkar fyrir sig. Enn einni frábærri ferð hjá Litlu nefndinni er formlega lokið hér á spjallinu. Óli aðalfararstjóri mun síðan koma með samantekt á fréttum úr ferðinni hér á spjallinu. Minni þátttakendur á að setja inn myndir hér á síðuna og í fréttina um ferðina (undir Litlunefnd) verða settir tenglar á þessar myndasíður.
Guðmundur G. Kristinsson
Litlunefnd
Gaman að fá að fylgjast með úr sófanum :þ hlakka til að sjá myndir.
Takk fyrir frábæran dag og vill ég þakka fararstjórum sérstaklega fyrir góða skipulagningu á þessari ferð.
KV. Jón Þór
R 4450..
Gott kvöld
Þá var aðalfararstjórinn að detta í bæinn eftir góðan dag á fjöllum. Eins og fram hefur komið var góður hópur jeppa sem stefndi í Veiðivötn. Gekk ferðin að óskum og þrátt fyrir mjög mikla á hálku milli Búrfells og Hrauneyja þá komust allir heilu og höldnu í Hrauneyjar og þaðan áfram inn að skálaþyrpingunni við Veiðivötn. Vöðin voru góð, vaðið á Vatnakvíslinni greiðfært, en svolitlar skarir voru á Fossvatnakvísl. Spennandi að fara þar um en lítill farartálmi. Einn bíll þurfti að snúa frá við Vatnakvísl en hann var með bilaðar driflokur, náði ekki að komast i fjórhjóladrifið og snéri því til byggða.
Gott nestisstopp var við Varðberg, einn skálann áður en haldið var áfram upp á öldurnar austan Fossvatna. Þaðan var haldið að Litlasjó og norður með honum, hefðbundna sumarleið. Á þeirri leið var ein til tvær svolitlar fyrirstöður en vel gekk að komast upp að Jökulheimaleið. Á þeirri leið var þó einn sem braut framöxul. Bíllinn var vel ökuhæfur og því ekkert að því að halda áfram. Við héldum svo áfram suður eftir Jökulheimaleiðinni. Tókum eystri leiðina og komum því inn á Veiðivatnaleið á milli kvíslanna og héldum svo sem leið lá í átt til byggða. Á leiðinni var stoppað á góðum stað, þar sem hægt var að spretta svolítið úr spori og fá útrás fyrir spól og brekkuklifur.
Eftir góða útrás fyrir jeppaþörfina var haldið til Hrauneyja. En þar á leiðinni gerðist það óhapp að einn bíllinn missti undan sér framhjól og stakkst útaf slóðinni. Flestir bílarnir héldu í Hrauneyjar en nokkrir björgunarmenn urðu eftir og hjálpuðu til að rétta af bílinn, koma hjólinu undir og koma honum í Hrauneyjar.
Þegar upp er staðið var þetta hin besta ferð og flestir eða allir sáttir. Ég þakka skemtilegum ferðalöngum fyrir daginn, en sérstakar þakkir til hópstjóranna, eins og venjulega stóðu þeir sig frábærlega. Fréttaritarinn stóð sig vel og að lokum langar mig að þakka Helga Péturssyni fyrir góðar upplýsingar um aðstæður á svæðinu, en Helgi sér einmitt um vefsíðuna helgi.dk þar hann hefur m.a. verið að setja eina mynd daglega frá Veiðivötnum.
Ég minni á að á opnu húsi á fimmtudagskvöldið kemur verður myndakvöld úr þessari ferð og vona ég að sem flestir mæti með sínar myndir.
Næsta Litlunefndarferð verður laugardaginn 19. febrúar n.k.
Kv. Óli, formaður Litlunefndar
Myndir úr ferðinni:
[url:3jumfjjl]http://www.f4x4.is/index.php?option=com_jfusion&Itemid=235&g2_view=dynamicalbum.UpdatesAlbum[/url:3jumfjjl]
Litlanefndin minnir á að á opnu húsi á fimmtudagskvöldið kemur, verður myndasýning úr veiðivatnaferð Litlunefndar. Þessi myndasýning byggir að sjálfsögðu á að ferðalangar í ferðinni mæti með sínar myndir.
Kv. Óli, Litlunefnd
You must be logged in to reply to this topic.