Litladeildin í Morgunblaðinu

Ég las þessa grein í gær, hún var mjög vel gerð og það vill líka svo skemmtilega til að ég var líka á þessum bíl sem var 32" dekkjunum og það undir musso sem er um 2 tonn óbreittur. það kom mer verulega á óvart hvað var hægt að komast á honum og mesta furða hvað mér gekk vel í þessari ferð miðað við að þetta er fyrsta skiptið sem að ég fer á jökul.
En hvað um það þá er þessi grein mjög góð og alveg þess virði að lesa hana

Kveðja Addi Ö-1435

Á gleðinni einni saman

Litladeild Ferðaklúbbsins 4×4 blés til ferðar laugardaginn fyrir páska og lögðu 19 jeppar af stað frá Select við Vesturlandsveg klukkan níu um morguninn. Með í för var Jóhann A. Kristjánsson .

Litladeildin gegnir margþættu hlutverki í skipulagi Ferðaklúbbsins 4×4 en einn mikilvægasti þátturinn er að skapa inngönguleið fyrir nýja félaga í klúbbinn og kenna og kynna ferðamennsku, jafnt að sumri sem vetri. Þeir eru margir sem eiga jeppa, mismikið breytta, sem hafa áhuga á að ferðast að vetrarlagi en skortir ferðafélaga til að ferðast með. Ekki er ráðlegt að ferðast einbíla í óbyggðum, sérstaklega að vetrarlagi og er það m.a. hlutverk Litludeildarinnar að skapa tækifæri fyrir nýliða til ferðalaga. Í ferðum Litludeildarinnar gefst mönnum kostur á að kynnast öðrum með svipuð áhugamál og læra af sér reyndari mönnum sem ávallt eru með í ferðum deildarinnar. Best er fyrir þá sem áhuga hafa á að slást í för með Litludeildinni að fylgjast reglulega með spjallþráðum á vef Ferðaklúbbsins, http//old.f4x4.is, en þar er sagt frá ef einhverjar ferðir eru fyrirhugaðar og jafnframt geta menn látið vita af sér ef þeir hafa hug á að slást með í för.

Stefnt á Langjökul
Hópurinn safnaðist saman við þjónustumiðstöðina á Þingvöllum. Ólafur Gunnarsson og Hrafnhildur Stefánsdóttir, stjórnarmaður í Litludeildinni, voru farastjórar í þessari ferð og skráðu þau þátttakendur og tóku niður hverjir voru með einhvern fjarskiptabúnað svo að hægt væri að hafa yfirsýn yfir hópinn og fylgjast með hvernig mönnum gengi. Var síðan lagt af stað og ekið meðfram Ármannsfelli yfir Tröllháls í átt til Kaldadals en við vegamót Uxahryggjar var stoppað. Þar bættust tveir jeppar til viðbótar í hópinn. Kom annar þeirra frá Búðardal en hinn úr Húnavatnssýslu. Aftur var lagt af stað og fljótlega var beygt inn á línuveginn sem liggur fyrir norðan Skjaldbreið inn á Haukadalsheiði. Stefnan var tekin á Langjökul en ekki gerðu ferðalangarnir sér miklar vonir um að ná svo langt því frést hafði af jeppakörlum sem höfðu farið á jökulinn deginum áður á 38 tommu breyttum jeppum og lent í erfiðri færð. Í ferð Litludeildarinnar voru jepparnir mismikið breyttir. Þar voru óbreyttir jeppar á 32" dekkjum, sumir voru á 33", nokkrir á 35" eða 36" og örfáir á 38". Það var ljóst að minnst breyttu jepparnir myndu nokkuð stjórna því hversu langt yrði komist en fararstjórarnir sáu um að halda hópnum saman. Við Tjaldafell var áð og þar fengu menn sér hressingu en krakkarnir í hópnum gripu tækifærið, drógu fram sleðana og renndu sér í fellinu.

Jökullinn sigraður
Frá Tjaldafelli var stefnan tekin meðfram Langafelli á Slúnkaríki og fór færðin að þyngjast jafnt og þétt eftir því sem nær dró jöklinum. Fljótlega var svo komið að allir minnst breyttu jepparnir voru komnir með loftþrýstinginn í dekkjunum niður í þrjú til fimm pund. Áfram var brotist að jöklinum og síðan upp hann milli Geitlandsjökuls og Klakks. Þegar komið var í 1.200 metra hæð á Langjökli var ákveðið að snúa við enda varð færið sífellt þyngra. Þótti þeim reyndari í ferðinni ótrúlegt hversu langt hópnum hafði tekist að komast og hafði einn að orði eftir ferðina að það hefði verið gleðin ein sem dró ferðalangana svona langt.

Reynslunni ríkari
Var þá snúið við og haldið sömu leið til baka. Ferðin niður jökulinn gekk mun betur en ferðin upp en þó tókst sumum að festa sig á bakaleiðinni.
Flestir höfðu reynt það að festa jeppa sína í ferðinni og þurft að moka þá upp eða fá drátt hjá betur búnu jeppunum. Tveir ökumenn affelguðu dekk og fékk hópurinn þá sýnikennslu í því hvernig brugðist er við slíku. Hópurinn kom svo til byggða um kvöldmatarleytið og voru allir glaðir og ánægðir eftir vel heppnaða og skemmtilega ferð. En mikilvægast var þó að allir voru reynslunni ríkari.

af Mbl..is

var ekki mynd af mér þar sem ég er ´svo fínum bíl?????

en hvernig er með kamarinn er hann fundinn???

Kv dabbi og grái runnerinn

Laumaðist til að taka mynd af henni og setja á síðuna góðu í fullri upplausn.

Sjá á litludeildarsíðunni http://litladeildin.a47.net

[url=http://litladeildin.a47.net/mediagallery/media.php?aid=12&f=1&s=0:3kart0pt]Linkur á frétt[/url:3kart0pt]

Siggi