This topic contains 19 replies, has 1 voice, and was last updated by 
-
Topic
-
Ég vona að Morgunblaðsmenn fyrirgefi mér þó ég lími hér inn, leiðara blaðsins í gær, laugardag.
Norðmenn á fjöllum
Í bílablaði Morgunblaðsins í gær er sagt frá hópi 22 Norðmanna, sem komu hingað um liðna helgi til þess að aka á fjöll. Í umfjölluninni kemur fram að jeppamenning sé með allt öðru sniði í Noregi en hér á landi. Í Noregi er bannað að aka til fjalla eða upp á jökla til að láta reyna á jeppana, þótt fyrir hendi sé áhugi fyrir jeppamennsku við erfiðar aðstæður.
„Það er bannað að aka í skógum eða á fjöllum þótt það sé leyfilegt á Íslandi,“ segir Trygve Haug, sem var í för með Norðmönnunum. Hann byrjaði á að taka félaga sína með sér og aka í skíðabrekku fyrir utan Ósló. Fyrir þremur árum stofnaði hann jeppaklúbb og eru nú 170 félagar í honum. „Við leikum okkur ekki lengur í skíðabrekkunni heldur hefur verið útbúið torfærusvæði fyrir okkur í Svastad þar sem við fáum að leika okkur í skóginum og fjöllunum,“ segir Haug í greininni.Það hlýtur að vera alvarlegt umhugsunarefni þegar Norðmenn eru farnir að leita til Íslands til að gera það, sem þeim er bannað að gera heima hjá sér. Það er ekki að ástæðulausu, sem Norðmenn banna akstur í skógum og á fjöllum. Það er gert til þess að vernda umhverfið og náttúruna. Hér komast menn hins vegar í feitt á jeppunum sínum.
Íslensk náttúra er ekki síður viðkvæm en norsk og hún hlýtur því að eiga skilið sömu vernd og sú norska. Og náttúran er ef til vill ekki síst viðkvæm þegar vetur eru mildir eins og nú og jörð er víða auð þar sem í venjulegu árferði mætti búast við snjó. Þá má búast við því að jarðvegurinn sé sérstaklega viðkvæmur vegna þess að það er frost í jörðu þannig að vatnið kemst ekki niður í jörðina og yfirborðið breytist í drullusvað, sem þungir jeppar spæna upp.
Það er athyglisvert að Trygve Haug og félagar geta þó fengið útrás fyrir áhuga sinn á því að aka jeppum í sínu heimalandi. Eins og kom fram hér fyrir ofan hefur verið útbúið handa þeim torfærusvæði þar sem þeir fá að leika sér, svo notað sé orðalag Haugs. Ef til vill er þetta leið til þess að eigendur jeppa geti fengið útrás, en umhverfið notið verndar. Hægt væri að útbúa sérstök svæði þar sem hentaði að aka um á jeppum hvernig sem árar. Markmiðið væri fyrst og fremst að vernda umhverfið fyrir ágangi, en einnig mætti líta á það sem öryggisatriði að á slíku svæði mætti gera ráð fyrir því að allar hættur væru kunnar og því öruggara að fara þar um, en utan þess.
© mbl.is/Árvakur hf, 2006
-
Replies
-
Einar. Hættu þessu helvítis rugli og farðu að sofa. Ekki fyrir mína parta takk.
Haffi H-1811
Nú skeistu uppá bak Haffi, en samt skiljanlegt að tengja svona tuð við nafnið Einar.
Ég held það sé óþarfi að hnýta í Eirík þótt hann hafi vakið athygli okkar á þessum leiðara Moggans. Þótt lesendum Moggans fari hratt fækkandi, þá eru það ansi margir enn sem taka mark á skrifum Ztyrmis. Án efa er stærri hópur en okkur grunar sem hugsar eftir þeim farvegum, sem þarna koma í ljós. Það er því fyllsta ástæða fyrir okkur að taka eftir þessu og ef einhverjir fara að spinna þennan vef áfram, þurfum við að bregðast við. Jón "Ofsi" Snæland vinur okkar er t.d. vel ritfær og ég fyrir mína parta treysti honum vel til að svara fyrir okkur á máli sem fólk skilur. (Þegar hann kemur heim af stóra skaflinum!)
Vafalaust eru þeir fleiri, sem við höfum innan okkar raða sem gætu lagt þarna hönd á plóg. En svona leiðari sýnir okkur, að við verðum að halda vöku okkar ef við eigum að halda því frelsi til ferðalaga, sem þó er enn eftir.
Það er rétt Þorkell að það er ástæða til að taka þennan leiðara alvarlega, leiðari Moggans hefur meira vægi en mörg önnur skrif. Vanþekking höfundar sýnist mér vera talsverð, t.d. virðist hann ekki skilja hvaða reglur raunverulega gilda um akstur utan vega. Það mætti ætla af þessum skrifum að akstur utan vega á auðri jörð sé leyfilegur á Íslandi. Ég vona að leiðarahöfundur sé ekki jeppaeigandi og nokkuð viss um að félagar í 4×4 vaði ekki í sömu villu. Þessu þarf að svara og má segja að þetta sé bara kærkomið tækifæri til að koma sjónarmiðum okkar á framfæri.
Kv – Skúli
Anonymous- Umræður: 0
- Svör: 16404
það á að gefa veiðileyfi á þessa vitleysinga.
veiðileyfi á hvaða Vitleysinga ertu að tala um???
Það er vissulega rétt að skrif sem þessi verður að taka alvarlega – ekki það að ég hafi svo miklar áhyggjur af því að margir lesi leiðara moggans – heldur hitt að þetta er viðhorf sem maður hefur allt of oft orðið var við hjá "andstæðingum" jeppamanna – Það eru nefnilega fjölmargir sem vildu gjarnan setja okkur mun meiri skorður en við búum við í dag og jafnvel setja okkur inn á afmörkuð svæði.
Það eru til tillögur sem meðal annars miða að því að svæðisskipta hálendinu og takmarka umferð jeppa og annara vélknúina ökutækja um viss svæði – eða banna þau alveg…..
Hitt er svo líka annað mál að það er rétt að í árferði sem því sem núna er geta víða verið auðir blettir sem eru viðkvæmir þegar hiti hefur verið yfir frostmarki í stuttan tíma. Það er því mjög mikilvægt að menn gæti sín og freistist ekki til að keyra yfir slíka bletti þegar þeir koma að þeim – maður hefur rekist á leiðinda för eftir slíkt – bæði eftir jeppa og ekki síður eftir vélsleða.
Það er því aldrei of varlega farið í þessum efnum…
Benni
Rétt sem Benni bendir á. Þetta snýst einfaldlega um að menn fylgi þeim reglum sem eru í gildi og aki ekki utan vega á auðri jörð. Það þarf ekki reglugerðabreytingu til, það er og hefur verið bannað. En ég er þegar búinn að senda svargrein í Moggann.
Kv – Skúli
Sælir félagar! Já það er auðvitað bráðnauðsynlegt fyrir okkur að vera stöðugt á tánum yfir svona umræðu, svo við getum svarað henni. En í þessari grein er minnst á torfærusvæði.
–
Ég hef lengi verið þeirrar skoðunnar að koma ætti upp þjálfunarsvæðum þar sem ökukennsla og aðrar bílaíþróttir fengju að njóta sín eins og margar þjóðir hafa gert. Frábær staðsetning svoleiðis svæðis væri t.d. í hrauninu hjá kvartmílu- og rallýkrossbrautunum fyrir sunnan Hafnarfjörð og svo mætti nota einhverja malarnámuna fyrir okkar svæði. Það yrði að vísu að búa til snjó og aðrar íslenskar aðstæður vegna snjóleysis hér á suðurvesturhorninu.
–
Þetta eru áhugaverðar vangaveltur en ég efast um að sveitarfélögin tími landi undir þetta og svo vantar líka fjármagn, sem reyndar er til í dulbúnum sköttum.Bkv.
Magnús G.
Pínu utan efnis þó ég fagni að Skúli hafi sett saman svargrein! Slíkt er auðvitað hið besta mál og vonandi verður hún birt hér á vefnum fyrir okkur örfáu hræðurnar sem kaupum ekki "málgagnið".
Annars finnst mér skrítið að leiðari Morgunblaðsins sé að mæla gegn erlendum ferðamönnum. Það hefði mátt setja hin gleraugun upp og sjá þarna tækifæri fyrir ferðaiðnaðinn. Ég vona annars að þessi nafni minn frá Noregi hafi farið að lögum og reglum hér heima, annað væri náttúrulega skandall.
Að öðru. Ég fékk í hendurnar [url=http://www.petitiononline.com/okubraut/petition.html:10wosznc]þessa undirskriftasöfnun[/url:10wosznc] þar sem skorað er á yfirvöld að beita sér í að koma upp akstursbraut til æfinga.
Það var góð greinin sem birtist í (Flugleiða-)mogganum í dag. Greinargóð lýsing á þeim reglum og siðareglum sem við förum eftir og eftir hverju við erum að leita sem ferðafólk um óbyggðir Íslands. Takk fyrir mig Skúli.
kv. Ólafur M.
Skúli,
ertu ekki til í að henda greininni hingað inn á spjallið, er ekki áskrifandi að Mogganum og langar að lesa ….. eða er hægt að nálgast þetta einhvers staðar á rafrænu formi ?
Takk
kv
Agnar
Hálendisferðir
Skúli H. Skúlason gerir athugasemd við leiðara Morgunblaðsins: "…ferðalög á jeppum geta verið fyrirtaks fjölskyldusport…"
Skúli H. Skúlason
Í LEIÐARA Morgunblaðsins laugardaginn 25. mars sl. er gerð að umtalsefni heimsókn norskra jeppamanna til Íslands. Í leiðaranum segir að akstur um skóga og fjöll sé bannaður í Noregi og virðist höfundur telja æskilegt að svipaðar reglur gildi hér, þ.e. akstur á fjöllum við hvaða aðstæður sem er verði bannaður með öllu.
Í samanburði við reglur um akstur í óbyggðum í Noregi eru hinar íslensku reglur nokkuð víðar og aðstæður um margt ólíkar. Þó er rétt að hafa í huga að þar eru aðstæður aðrar og bakgrunnur ferðalaga ólíkur því sem hér gerist.Reglugerð frá árinu 2005 fjallar um takmarkanir á umferð í náttúru Íslands. Reglugerðin miðar að því að vernda náttúruna en jafnframt að gefa almenningi færi á að ferðast um hana. Það er grundvallarþáttur í reglunum að akstur utan vega er bannaður. Á Íslandi höfum við mikið úrval fjölbreytilegra vegslóða um hálendið sem gerir öllum almenningi mögulegt að upplifa hina sérstöku náttúru Íslands yfir sumartímann, komast í návígi við eyðisanda og jökla, gróðurvinjar, heitar uppsprettur, dularfulla hveradali, litskrúðugt líparít, beljandi jökulár og hin ósnortnu víðerni. Þú þarft ekki að vera þrautþjálfaður göngugarpur til að nálgast þessi undur því jeppafærar slóðir færa þig í návígi við undrin og ferðalagið sjálft hefur allt á sér ævintýrablæ.
Á veturna eru aðstæður aðrar en þá komum við að undanþáguákvæði í reglugerðinni sem heimilar akstur á snævi þakinni og frosinni jörð. Ferðalög um hálendið í vetrarskrúða hafa ekki síður aðdráttarafl en sumarferðir. Snjóbreiður í ósnortnu víðerni á sólríkum vetrardegi vekja sérstaka tilfinningu og fegurð fjalllendis nær nýjum víddum á slíkum degi. Það spillir ekki fyrir að ferðalög á jeppum geta verið fyrirtaks fjölskyldusport og margar ferðir þess eðlis að lítið vandamál er að taka stálpuð börn með. Þá gefst færi á að kynna þeim landið og náttúruna og án nokkurs vafa búa þau að því veganesti alla ævi.
Það er sérstaða hér á landi að heimur sem þessi sé aðgengilegur almennum ferðamönnum og ekki að undra að erlendir ferðamenn komi hingað til að upplifa þetta. Það að telja þessi ferðalög snúast aðeins um útrás fyrir áhuga á torfæruakstri er stórkostleg einföldun og byggist á vanþekkingu. Góð snjóbrekka sem reynir á aksturshæfni freistar sjálfsagt margra, en er fjarri því að vera meginhvati vetrarferða á jeppum.
Leiðarahöfundur leggur til að settar verði upp sérstakar torfærubrautir þar sem "…eigendur jeppa geti fengið útrás…". Það eru honum kannski nýjar fréttir að slíkar brautir hafa verið til í áratugi og á þeim stunduð keppni í torfæruakstri. Það er hins vegar allt annað en fólk er almennt að sækjast eftir. Sjálfsagt væri jákvætt að fjölga slíkum brautum og sníða þær að hinum almenna jeppaeiganda. Það er hins vegar klárt mál að ég rek ekki jeppa til að aka eftir slíkum brautum og allt annars konar "útrás" sem ég sækist eftir. Það hygg ég að eigi við um flesta jeppaeigendur.
Við eigum að vernda það frelsi sem við höfum til að upplifa íslenska náttúru innan þess ramma sem núgildandi reglur leyfa. Öll umferð um náttúruna getur orsakað álag á hana þó mismikið sé. Akstur á snjó og frosinni jörð skilur þó aðeins eftir sig ummerki í skamman tíma. Næst þegar vind hreyfir hverfa ummerkin. Það væri því einkennilegt að þrengja að þar sem síst er hætta á skemmdum.
Það er svo annað mál að akstur utan vega á auðri jörð á ekki að líða, hvorki að vetri né sumri. Ætla mætti af umræddum leiðara að slíkt sé leyfilegt hér á landi en svo er alls ekki. Því miður eru dæmi þess að einstaka ferðamenn á jeppum virða ekki lög og reglur um þessi efni og eflaust eru dæmi þess einnig til í Noregi. Til þeirra þarf að ná með fræðslu og áróðri og jafnframt mætti hugsa sér mun meira eftirlit með lögbrotum af þessu tagi. Ferðaklúbburinn 4×4 hefur á 22 ára starfstíma sínum staðið fyrir ýmiskonar aðgerðum og áróðri gegn ólöglegum utanvegaakstri og talað fyrir ábyrgri ferðamennsku í náttúrunni. Á snjóléttum vetrum verða jeppaeigendur að sætta sig við að aðstæður til ferðalaga eru ekki alltaf fyrir hendi og á vorin í leysingum lokast hálendið af náttúrulegum aðstæðum fyrir allri umferð. Vanir ferðamenn þekkja þetta og flestir gera sér grein fyrir að frelsi fylgir ábyrgð og fylgja þess vegna þeim lögum og reglum sem í gildi eru. Það er vafamál hvort bann við skaðlausum akstri á snjó og frosinni jörð myndi auka ábyrgð og löghlýðni ferðamanna á hálendinu eða hvort áhrifin yrðu í aðra átt. Í dag ríkir almenn sátt um þær reglur sem í gildi eru og brot á þeim eru almennt litin hornauga. Ein besta leiðin til að berjast gegn utanvegaakstri er að rækta það andrúmsloft.
Ef akstur á snjó og frosinni jörð væri bannaður hefði það umtalsverð áhrif á ferðamöguleika þeirra sem sækja í hverskonar ferðalög um hálendi Íslands og margir yrðu af upplifunum á náttúrunni sem á sér enga hliðstæðu. Þetta á ekki aðeins við um það sem almennt kallast jeppaferðir heldur einnig um hverskonar ferðalög á hálendinu þar sem notast er við jeppa til flutninga á fólki og vistum.
Höfundur er formaður Ferðaklúbbsins 4×4 og framkvæmdastjóri Ferðafélagsins Útivistar.
Yfirvegað og fínt, takk fyrir að koma þessu til okkar sem eru ekki áskrifendur að mogganum.
Hún kemur öllu til skila sem skiftir máli
kv ,,,mhn
Flott grein hjá þér Skúli.
Og ekki verra að fá hana birta í dag þegar Mogganum er dreift ókeyps inn á öll heimili í landinu.
Benni
Þetta er stórfín grein Skúli og kemur tveimur mjög mikilvægum punktum til skila sem eiga það til að gleymast í rifrildi um reglugerðir og rétt á aðgengi að þjóðlendunum; hefð fyrir ferðalög á jeppum að vetri til er til staðar og að sú upplifun að ferðast um ósnortin víðerni á veturna er ekki síður ævintýralegri en að labba í óbyggðum á sumrin.
p.s. ég tók ekki einu sinni eftir því að Mogginn kom frítt í morgun……
Þetta er ekki hægt að orða betur,hafðu þökk fyrir
Kv Klakinn
í þessarri grein hjá þér Skúli. Í einum af pistli Tryggva er undirskriftasöfnun varðandi svona æfingasvæði. Endilega skrifið ykkur á hann.
Einnig vil ég þakka Lellu það framtak, hvort sem hún er orðinn verktaki hjá klúbbnum eða hefur gert þetta að eigin frumkvæði, að líma greinina inn í þennann þráð.Bkv. Magnús G.
You must be logged in to reply to this topic.