Lægri slysatíðni breyttra jeppa

Vísir, Mán. 27. jan. 09:58
Slysatíðni breyttra jeppa lægri
Slysatíðni breyttra jeppa er marktækt lægri en fyrir óbreytta jeppa af sömu gerðum en ekki fannst marktækur munur á áætlaðri árlegri akstursvegalengd milli hópanna. Þetta er helsta niðurstaða könnunar sem gerð var af Orion ráðgjöf.

ORION ráðgjöf fékk á árinu 2002 styrk frá Rannsóknarráði umferðaröryggismála til þess að vinna að greinargerð um slysatíðni breyttra jeppa. Skýrslan lýsir framkvæmd og niðurstöðum fyrsta áfanga í rannsókn á slysatíðni breyttra jeppa. Markmið verkefnisins er að kanna hvort munur er á slysatíðni breyttra og óbreyttra jeppa, hvort munur er á notkun jeppa í þessum tveimur hópum og hvort munur er á bakgrunni umráðamanna þessara bifreiða. Þá var einnig kannað hvort munur er á tilhneigingu ökumanna breyttra og óbreyttra jeppa til áhættuhegðunar í umferðinni.

Úrtak 3385 óbreyttra og breyttra jeppa af þremur algengum gerðum (Toyota Land Cruiser, Nissan Patrol og Isuzu Trooper), sem nýskráðir voru á árunum 1991-2000 var fengið úr ökutækjaskrá. Þá voru fengnar upplýsingar um skráð slys og óhöpp sem bifreiðar í úrtakinu lentu í á sama árabili. Könnun var gerð meðal úrtaks um 1400 umráðamanna breyttra og óbreyttra jeppa. Með henni fengust upplýsingar um áætlaða árlega akstursvegalengd jeppanna, notkunarmynstur þeirra og áhættutilhneigingu ökumanna.

Helsta niðurstaðan sem fengist hefur í þessum áfanga er sú að slysatíðni breyttra jeppa er marktækt lægri en fyrir óbreytta jeppa af sömu gerðum en ekki fannst marktækur munur á áætlaðri árlegri akstursvegalengd milli hópanna. Breyttir jeppar eru 21% af úrtakinu en hlutfall þeirra í slysum og óhöppum samkvæmt lögregluskýrslum er 9%. Þetta jafngildir því að slysatíðni breyttra jeppa í úrtakinu er 7% en slysatíðni óbreyttra jeppa er 19%. Slys með breyttum jeppum urðu innan þéttbýlis í 82% tilfella en 72% slysa með óbreyttum jeppum urðu innan þéttbýlis.

Enn liggja óunnin gögn um skiptingu eftir tegundum slysa og gögn um fylgni milli einstakra atriða í bakgrunni ökumanna og slysatíðni og er gert ráð fyrir að vinna úr þeim gögnum á næstu mánuðum.