Kvennaferð

Ég verð að játa að ég er svolítið þreytt í dag. Allir vöðvar aumir og stífir. Höfuðverkur vegna svefnleysis er eitthvað að banka á bakvið augun. En ég hef samt sjaldan verið eins ánægð eftir jeppaferð eins og nú. Þetta var frábær túr!!! Bara gaman eins og sumir segja, þrátt fyrir krapann og pollana og pyttina og stöðuvötnin og sundin. Og hliðarhallann…úff. Halli sem áður hefði þeytt mér hálfskrækjandi í fang bóndans mun héðan af varla ýfa við einni taug. Og fj.. hraunið. Að það skyldi ekki hafa komið lófastór göt á dekkin..hraunnybburnar voru alls staðar – oní hverjum pyttinum á fætur öðrum. Hjartað var meira og minna oní buxunum, sérstaklega á leið inn í Laugar.
Og stelpurnar – þær stóðu sig allar svo vel – ég á varla orð til að lýsa því. Jújú – við höfum stundum fengið að keyra en bara í góðu færi. Þarna voru sumar að taka í jeppa í fyrsta sinn inn á hálendi í snjó (krapa). Og við gátum þetta!! Og gerðum vel! Það er stór áfangi að losna við hræsðluna og fá aukið sjálftraust. Svo ekki sé minnst á að læra inn á bílinn! Þetta var í fyrsta sinn sem minn ástkæri Trooper lenti í krapa fyrir alvöru. Stóð sig bara vel – og betur á leiðinni heim því þá kunni ég betur á hann. (mig langar nú samt í læsingar að aftan og breytt hlutföll…)
Þegar ég kom heim rúmlega níu þá beið mín steik og nudd. Það var ánægð jeppakona sem lagðist á koddann, Stína og Ester stóðu sig alveg frábærlega – af öllum stórum ferðum sem ég hef farið í – með svona marga bíla – þá gekk þessi ferð langbest. Þær stöllur kunnu svo sannarlega að sjá um hópinn og eiga margar og miklar þakkir skildar fyrir. Ég sé það fyrir mér í framtíðinni þyki það ekkert tiltökumál þótt konurnar skelli sér á fjöll og skilji bara eiginmennina heima með börn og bú. Áfram stelpur!!

Kveðja, Soffía.

Sæl Soffía og þið hinar líka.

Bestu hamingjuóskir með frábæran árangur um helgina. Ég (og fleiri) áttum alls ekki von á því að þið mynduð klára þetta verkefni eins og færðin var.

Sjáumst á fundinum í kvöld.

Ferðakveðja,

BÞV

Sæl SÞ.

Bílarnir voru 22. Það höfðu 24 áhafnir skráð sig í ferðina er tvær þurftu að hætta við vegna veikinda. Annars hefði mér fundist að þú hefðir sjálf átt að vera með í för… ",

Til gamans vil ég benda þér á tilkynningarnar sem settar voru á vefinn frá hádegi á laugardegi til miðnættis á sunnudegi (alls 10 pistlar), en þar var sagt frá því hvernig gekk í túrnum. Þú smellir á "meira" á einhverri tilkynningu á aðalsíðunni og svo "sýna allar tilkynningar" á síðunni sem þá opnast.

Með ferðakveðju,

BÞV