Jeppaslóði í friðlandi Þjórsárvera

Þakka þér Ofsi, þann tíma og fyrirhöfn sem þú notar í okkar allra þágu.
Það sem einu sinni voru kallaðar leiðir brautryðjenda eru nú hálendisvegir, mis mikið notaðir. Flestir hafa þeir upphaf og endi og tilgang. Enn í dag þyrfti að gera nokkra nýja há- og láglendisvegi, þá helst sem tengivegi og þá ekki síst fyrir túristaaksturinn!
Besta leiðin til að koma í veg fyrir landspjallandi utanvegaakstur er að merkja leiðir og koma þeim inn á kort, þar með þurfa menn ekki að leita nýrra leiða. Hringsól bílaleigubíla og alls konar bullakstur utan vega er helst hægt að koma í veg fyrir með betri upplýsingum og sektaráróðri.
Jeppaferðamennska er að engu leyti ómerkilegri en gangandi, ríðandi eða hjólandi, oft trufla hófför og fótspor og hjólför mig þar sem mér finnst óvarlega hafa verið farið, og tel ég mig nokkuð dómbær á þetta. Tel mig einnig nokkuð vita hvenær óhætt er að fara um land og hvenær ekki. En grátlegt þykir mér oft að sjá svæði þar sem maður hefur gætt sín að skilja ekki markað land eftir sig; þar er síðan rutt upp vegi eða hverju öðru mannvirki sem aldrei fellur eins vel inn í landið og falleg jeppaslóð eða gönguslóð eða kindagata.
Ég tel að friður og sátt megi vera um leið undir Hofsjökli ef sveit manna fer þar um (ríðandi þá ef ekki betur vill, -eða þá á jeppum á frosinni jörðu) og velji bestu jeppaleiðina, -í gegnum Múlana eða þá undir þeim, grófstiki hana og fastsetji í GPS. Gerð sé krafa um að ferðast sé eftir GPSi um slóðir sem þessar að þannig að villuslóðar og villur almennt verði þar með úr sögunni.
Baráttukveðjur,
Ingi

Ég held að Tómas hitti nokkuð vel með að það hjálpar ekki neinum að þessi leið sé þarna inni á Mapsource. Ég hef heyrt af þessari leið í gegnum tíðina og held reyndar að þarna í kringum 1950 hafi ekki einn heldur tveir leiðangrar farið þarna um. Annar á léttum bílum Willisar held ég það hafi verið allt saman og tók nokkuð skemmri tíma en hinn. Kann þó ekki nógu vel að segja frá þeim eða hvernig hinn leiðangurinn var skipaður. Á seinustu árum hafa menn eitthvað verið að fara þetta síðla hausts á pikkfrosnu en líklega augljóst öllum sem þekkja til svæðisins að þetta er ekki fær slóð að sumri, allavega miklar líkur á vandræðum og náttúruskemmdum ef mönnum dettur það í hug. Ef Mapsource væri eitthvað sem aðeins væri notað af þröngum hópi og þá vönum og reyndum fjallamönnum sem vita hvernig á að ferðast og hvar og hvernig eigi að forðast skemmdir á náttúru og vegslóðum, þá væri þetta ekkert vandamál. En Mapsource er selt á almennum markaði og notað af jafnt reyndum sem óreyndum ferðamönnum, íslenskum sem erlendum, og inn í slíkt gagnasafn á þessi slóð ekkert erindi. Skapar bæði hættu á skemmdum á náttúru og málstað frjálsrar ferðamennsku eins og dæmin sanna.
Kveðja – Skúli

Þetta er útúrsnúningur Stefanía. Þessar leiðir sem þú nefnir eru vel færar yfir sumartíman þegar mesta umferðin er í gangi og margir á ferð sem ekki hafa mikla þekkingu. Arnarfellsleiðin liggur hins vegar í gegnum eitt blautasta en jafnframt gróðursælasta svæði hálendisins og svæði sem talið er einstakt á heimsvísu sem gróðurvin í mikilli hæð og eitt stærsta varpsvæði gæsa. Það er þess vegna sem þetta var gert að friðlandi og þess vegna fékk Landsvirkjun ekki að setja lón þarna. Það er stór munur á Þjórsárverum og svo Sprengisandi og Kili sitt hvoru megin við.
Kveðja – Skúli

Sælir félagar. Ég vil benda mönnum á að lesa ferðasögu í Árbók Ferðafélagsins 1951. Greinin er á blaðsíðu 172 og heitir Bílferð um suðuröræfin og er eftir Einar Magnússon sem ég held að hafi verið kennari í MR og mikill frumkvöðull í hálendisferðum. Lýst er ferð á 3 bílum sunnan Hofsjökuls til Kerlingafjalla. Bílarnir voru þungir og eflaust hefur eitthvað tekið breytingum síðan 1950 en sagan er fróðleg. Kv. olgeir

Góða kvöldið.
Ég verð að viðurkenna að ég átta mig ekki fyllilega á umræðunni um þennan tiltekna slóða. Þetta er leið sem allt í einu er orðin afar umdeild enda þótt hún hafi verið farin að hluta á sumrin og í heild yfir vetrartímann um margra áratuga skeið. Yfir sumartímann er hún einkum notuð af hestamönnum, en á haustin af upprekstraraðilum (bændum) og meðlimum Jöklarannsóknarfélagsins vegna sporðamælinga við Nauthagajökul og Múlajökul sem mældir eru árlega. Leiðin í heild milli Blautukvíslar undir Arnarfellsmúlum og Kvíslaveituvegar er ekki farin á vélknúnum ökutækjum á sumrin, heldur aðeins yfir vetrartímann þegar frost er í jörðu og snjór. Á sumrin er einungis ekið í mesta lagi að Múlajökli frá Blautukvísl. Sú leið liggur öll á flæðum Blautukvíslar og Miklukvíslar og á melum undir jöklinum að undanskyldum u.þ.b. 100 metra kafla sem kallast gæti gróinn við Nautöldu, þar sem gamli leitarmannaskálinn er.

Leiðinni var lokað nýlega við aura Blautukvíslar undir Arnarfellsmúlum. Algerlega að óþörfu. Leiðin þaðan liggur sem áður segir á áraurunum til Nautöldu. Þaðan liggur hún áfram um aura Miklukvíslar og síðan um mela og grjót. Lengra er ekki farið akandi á sumrin. En slóð eftir hundruð hrossa, sem marka mun dýpri för í jörð heldur en breyttir fjallabílar, njóta eftir vill meiri skilnings meðal vandlætingarmanna. Ef ekki, erum við þá heldur ekki líka komin út á þrælhálan ís í umhverfismálum megi heldur ekki orðið fara ríðandi á hestum um landið? Mér finnst of margir fara úr límingunum þegar orðið Þjórsárver er nefnt, þeir sem aldrei hafa komið á svæðið virðast halda að þar sé um að litast eins og í Vaglaskógi. Þegar Jöklarannsóknafélagið fer til mælinga fljótlega, eins og þeir hafa gert um áratugaskeið, eiga þeir þá að fara gangandi? Mega ekki lengur sjást för í árfarvegum?

Alveg er það nú rosalegt hvað göngufólk þarf mikið pláss á hálendinu, vandlætingarsvipurinn á þeim oft þegar maður mætir þeim á sumrin er ekkert venjulegur, nema að það sé öfundarsvipur yfir að vera labbandi en ekki akandi, ég hefði nú haldið að það væri nóg pláss á hálendi Íslands fyrir báða hópana, og varðandi nýja slóða þá held ég nú að flestir þeirra séu nú tilkomnir vegna erlendra ferðamanna á eigin farartækjum, ég hef séð það sjálfur en þeir virðast því miður halda að þeim sé heimilt að keyra hvar sem er.
En það virðist líka vera einhver tískubóla hérlendis að það þurfi að banna og takmarka allan andsk….. hérna,
og mikið er ég sammála þessu með hestana þeir tæta upp viðkvæman mosann og annan gróður inn á fjallabaki en allir virðast fyrirgefa það, já þaðer ekki sama séra Jón eða bara Jón, það er bannað, það er bannað og það er bannað.
kveðja Helgi sem vill fá að ferðast um hálendisslóða í friði fyrir einhverjum möppudýrum