Hremmingar fjallamanna

Langar til að taka undir með King-1 þar sem hann minnist á að þegar menn eru komnir á vissa stærð af jeppum, ég reikna með að hann eigi þá t.d. við einhverja tiltekna dekkjastærð og upp úr, þurfi menn að hafa einhverskonar hæfnispróf "undir belti" eins og hann orðar það svo skemmtilega. Hann minnist einnig á þá grunnþekkingu í siglingafræði, sem menn læra t.d. í pungaprófinu og ég ar alveg sammála honum að nýtist manni vel í fjallaferðum jafnt sem sjóferðum. Flestir björgunarsveitarmeðlimir hafa einmitt fengið samskonar kennslu (auk margs annars) og í þeim er nú reyndar fortakslaust notuð sú aðferð að menn fara fyrst með vönu fólki og læra "trixin". Ekki hefði ég viljað missa af þeirri kennslu, sem maður fékk með þeim hætti, reyndar fyrir svo mörgum árum að ég þori ekki að nefna það fyrir mitt litla líf! En ég hef áður látið í ljósi þá skoðun hér á þessum vettvangi, að akstur á jeppum (þá er ég ekki að meina slyddara) er það mikið frábrugðinn akstri fólksbifreiða, að það ætti fortakslaust að láta menn taka sérstakt hæfnispróf áður en þeir fara að aka þeim. Við vitum það öll, sem erum vön bifreiðum sem falla undir skilgreininguna "jeppi" að þeir bregðast svo allt öðru vísi bæði við stjórntökum og ýmsum afbrigðum í færi og vegyfirborði en fólksbifreiðar, að til þess er að leita orsaka margra vondra slysa. Fólk hefur einfaldlega ekki ráðið við aðstæður og hefur skort þjálfun og reynslu til að bregðast við þeim.

Sælir

Ég ætla að taka undir með King-1 og Guðbrandi. Það væri stórsniðugt að hanna námskeið fyrir jeppamenn sem ætla á fjöll. Eitthvað svipað og pungapróf á báta.

Þar sem að ég bý úti á landi og vinn mikið þá er langt þangað til ég legg leið mína til Rvk á námskeið. En fjarnám er eitthvað sem tíðkast mikið hér.
Mín hugmynd er sú að safna saman ýmsu námsefni og búa til nýtt efni ef á þarf að halda.

T.d. taka nokkrar myndir af því þegar verið er að setja dekk á felgu og texti við. Hvernig tappar eru settir í dekk, hvernig aka skuli yfir ár og vöð, loftþrýstingur í dekkjum, hvernig er best að losa bíla úr festum og svo framvegis….

Myndir af gps tækjum, áttavitum og kortum og hvernig það virkar allt, ásamt verkefnum sem þarf að leysa.

Svo koll af kolli að fara yfir allan helsta búnað og öryggisatriði.

Vissulega eru menn sjaldan sammála um hvernig best sé að gera hlutina. En aðalatriðið er að koma grunnatriðunum til skila.

Svona námskeið mætti auglýsa hér á vefnum ásamt því að setja inn A4 blað með auglýsinguni á, sem að félagsmenn gætu prentað út og hengt upp úti í næstu sjoppu.

Best væri ef þetta væri mjög ódýrt. Svo væri kanski hægt að auglýsa ákveðinn tíma og stað til próftöku nokkrum sinnum á ári. Svo í staðinn fengju menn voða fínan límmiða til að klessa einhverstaðar á bílinn.

Þetta með próftökuna þarf sjálfsagt eitthvað að útfæra en aðalatriðið er að koma námsefninu í hendurnar á fólki.

Ég er í miðju pungaprófsnámskeiði núna og það er þannig uppsett að það væri hægt að læra það allt heima hjá sér.

Endilega látið vita hvernig fólki lýst á þessa hugmynd og aðrar útfærslur.

Kveðja
Arnór

Nýliðar í bjsv fara á 2-3 daga námskeið í fyrstuhjálp, skrefinu fyrir ofan skyndihjálp. Mér finnst ekki mikið mál að menn komi saman í skála um helgi og taki á því.

Kannski óþarfi að fella menn ef þeir ná ekki 70% eins og Landsbjörg gerir.

Þetta er að vísu það mikið nám að maður er allann daginn, snemma morguns til 23 á kvöldin, bóklegt og verklegt.

En þarna lærir maður mikið sem er ekki kennt á "hnoða, hringja, sitja á rassgatinu og bíða eftir sjúkrabílnum" námskeiðum.

Svo gæti verið flott fyrir þá sem hefðu áhuga á því að verða mjög góðir að fara í fyrstuhjálp 2 og fyrstuhjálp í óbyggðum. Gott dæmi um það hvað fyrstahjálp í óbyggðum er góð er að þú hefur rétt til að úrskurða manneskju látna ef þú er 2 eða 3 tímum frá næsta sjúkrahúsi. Þar lærir fólk líka að kippa í liði og margt annað nytsamlegt.

Kannski óþarfi að allir fari í svona mikið nám en ef f4x4 fara í samstarf við LB þá yrði þetta ábyggilega í boði.

Haukur

Þetta er nú orðið gamal í það minnsta frá tíð Björns Þorra hvað ég man ef ekki mun eldra kannski frá Tóta eða Frikka hvað man ég allavega hund gamalt. Þetta er til um flestar nefndir. Þú hlýtur að hafa fengið þetta ?

Ferðaklúbburinn 4×4

Vinnublað

9.grein laga.

Hjálparsveit Ferðaklúbbsins 4×4. Hlutverk hennar er að vera félagsmönnum innan handar, lendi þeir í vandræðum með farartæki sín og þurfi aðstoðar við. Kjósa skal fimm menn í hana.

Einnig á hjálparsveitin að vera með _______ námskeið á hverjum vetri um ýmislegt er kemur að vetrarferðum t.d. útbúnað bíls, fatnað, spil og krókar, rödun, dekkjaviðgerðir. Sjá um eina skipulagða ferð fyrir félagsmenn í _______mánuði og skipa einn fastann tengilið við stjórn.

Koma upplýsingum um hverjir sitji í nefndinni á þar til gerðu eyðublaði og eða á tölvupósti til felagatal@f4x4.is og stjórn@f4x4.is
Allar útgjalda og stærri breytingar á að bera upp við stjórn meðann þær eru á hugmynda stigi.

Fjarskiptanefnd sem hefur verið að birta útbreiðslu Nmt kerfis og staðsetningu endurvarpa skilmerkilega í fréttabréfinu okkar Setrinu.

Skálanefnd hefur líka haldið vel utan um sitt.

Enn að mínu mati sést glögglega að Tækninefnd og hjálparsveit eru ekki að sinna sinni skildu, þetta þurfa þeir bara að laga.
eða hvað finnst þér sem stjórnrmanni OFSI?

Lúther

Sælir

Það sem ég er hræddastur við í sambandi við þetta próf er að auðveldlega gæti því verið breytt og mönnum gert ókleift að gangast undir það t.d. vegna verðlags eða annara hluta.

Fyrr en nokkur fær rönd við reist verður þessu smellt inní meiraprófið og verðið hækkað á því.

Námskeið eru af hinu góða, t.d. rötun. Gps tækin verða stöðugt flóknari og fullkomnari viðmótið einfaldara og menn hafa alltaf minni og minni hugmynd um hvað tækið er í rauninni að gera. Sama má segja um Vhf talstöðvar, ég held að afskaplega fáir viti hvað þessar talstöðvar geti gert og sama má segja um farsíma sem eiga greinilega eftir að breytast mikið á næstunni.

Ég fór einu sinni fyrir löngu síðan á námskeið sem hét "Fjallamennska 1" upp á Hellisheiði og lærði þar m.a. að grafa snjóhús sem tók 4 í gistingu. Á leiðinni heim daginn eftir var skollið á frekar dimmt veður og leiðsögumaðurinn okkar rétt orðinn rammvilltur á milli varðanna sem eru rétt við neyðarskýlið. Það fékk hinsvegar svo mikið á hann að hann sagði ekki orð á meðan hann mundaði áttavitann til að rata og kenndi raunverulega akkúrat ekki neitt.

Þarna um helgina útskrifaðist ég sem Fjallamaður 1 grunlaus um hvernig ég ætti að bera mig að við að munda áttavita í vondu veðri.

Reynsla verður ekki fengin með námskeiði.

Ég er sammála nafna mínum í 2 pósti að ofan að klúbburinn ætti að einblína á forvarnarstarf fyrst og fremst, kynningu á klúbbnum og auðvelda félagsmönnum að sækja námskeið í hinu og þessu.

Kv Izan

Sælir félagar, búnir að koma margir þarfir punktar hérna fram sem er vel. Ein viðbót við þær hugmyndir gæti líka verið einn fastur þráður hérna á síðunni eða spjallflokkur sem bæri heitið "Fjallamennska 101" (eða eitthvað annað kaldhæðnara) og að við félagar "leggðum svo á okkur" að kynna þann þráð út á við og að hafa efni þar inni sem væri til uppbyggingar (og án stóryrða).

Annað sem að mér finnst vanta í umræðuna er vandinn sem að við stöndum frammi fyrir varðandi sjálfumgleði og einfaldan hroka. Stundum er um að kenna grandvaraleysi að sjálfsögðu, en allt allt of oft erum við að heyra sögur af mönnum sem að lenda í vanda bara af því að þeir voru svo vissir um að vera með allt á hreinu, "að þeir væru svo klárir" eða eitthvað annað álíka bull.
Ein ástæða þess hvað erfitt er að ná til fólks á stundum og uppfræða er að fólk er svo visst í sinni sök með eigið ágæti eða þekkingu að það telur sig ekkert þurfa að fræðast meira. Ég nefni þetta til sögunnar af því að mér finnst að við ættum að skoða líka hvort sem er sem klúbbur eða bara manneskjur sem viljum stuðla að öruggri ferðamennsku, hvernig við getum náð til þeirra með næginlega kraftmiklum skilaboðum sem að telja sig ekki þurfa að hlusta??

Kveðja,
Baddi Blái

Ég vildi koma því á framfæri í sambandi við neðanbeltispróf í fjallamennsku, að allir géta sótt pungaprófsnámskeið hjá sjómannaskólanum sama hvort þeir hafa pissað í saltan sjó eða ekki. Ég held að námskeiðið kosti einhvern 40 þúsund kall.
Ég sótti sjálfur svona námskeið eingöngu til að nota þekkinguna til fjallaferða. Ég hef aldrei siglt um sjó á neinu öðru en árabát og vantar því siglingartíma til að öðlast sjálft pungaprófið, en ég sé ekkert eftir þeim 30 þúsund kalli sem ég greiddi fyrir 10 árum síðan fyrir þessa vitneskju sem maður fær útúr námskeiðinu. Siglingarfræðin bæði á kompás og gps hefur nýst mér alveg svakalega vel á fjöllum, og einnig er komið þógnokkuð inná rafmagnsfræði og vélfræði sem hefur nýst mér alveg svakalega vel í reddingum við hinar og þessar hremmingar sem maður hefur lent í. Það eina sem ég hef ekki þurft að notast við ennþá eru blessaðir vitarnir okkar sem lýsa svo skært við hvert sker og landshorn en í áðurnefndu námskeiði lærir maður líka á að sigla eftir þeim.
Drífið ykkur á pungapróf og hættið þessu nöldri. Sjálfsbjargarviðleitnin er nú ekki á háu plani hjá þeim sem getur ekki fundið uppá því sjálfur að læra, heldur þarf að láta félagsskap sem þennan mata allt ofanímann. Hvernig gengur þeim svo á fjöllum.
Gaman að heyra frá nýgræðingum eins og king sem afla sér svona mentunar og nýta sér hana á fjöllum.
Litla deildin er líka að vinna að góðu málefni með kynningarstarfi fyrir byrjendur og var ferðin á laugardaginn vel skipulögð og vel haldið utanum hópin. Enda hafa flestir sem voru í sinni fyrstu jeppaferð látið í ljós ánægju sína hérna á vefnum með þessa ferð.
Vandamálið eru hinnsvegar þeir sem fara og kaupa fullbreitta bíla og líta á hálendis og jöklaferðir sem eitthvert jaðarsport. Þessi hópur er að stækka af eðlilegum ástæðum. Það eru að koma upp ákveðin kynnslóð af einstakklingum sem eru aldir upp í spennu. Hafa lært af jackass og fleirra góðu sjónvarpsefni og lifa algjörlega eftir því. Þessum hóp er ekki hægt að ná til nema að litlum hluta, og fæ ég ekki séð annað en við verðum bara að leyfa hinum að fara sér á voða og drepa sig eins og það vill drepa sig. Hinn vegar verðum við að finna skothelda leið til að koma í veg fyrir að hegðun þessara ákveðnu einstakklinga komi ekki til með að skemma fyrir okkur hinum.
kveðja siggias E1841

Þegar ég tók pungaprófið fyrir 10 árum síðan þá fór ég líka í slysavarnarskóla sjómanna samhliða því, á þessu verði. Svakalega hefur þetta hækkað á 10 árum ef þetta kostar 100 þúsund kall í dag. Ég skyl það vel að menn hoppi ekki í þennann skóla fyrir þetta verð, og byðst ég afsökunar á fullirðingu minni hér að ofan.
Mig minnir hinnsvegar að ég hafi minnst á það fyrir nokkrum árum síðan hér á spjallinu, kosti þess að hafa þessa menntun þegar maður ferðast um hálendið, og minnir mig að það hafi verið kommentað sem ónauðsinlegt að sækja slíka menntun. Núna hinnsvegar eru allir sammála um nauðsin þess að kunna siglingarfræði. Hvað hefur breist? Kannski þessi slysaalda og fjöldi björgunarsveitaútkalla hafi kveikt í mönnum.
spekulering.
siggias E1841