Hofsjökulsþjóðgarður

Á síðastliðnum 10 árum hefur sigið á ógæfuhliðina í ferðafrelsismálum, svona án þess að nokkur virðist taka eftir því. Friðlandið í Þjórsárverum er eitt gleggsta dæmið um þetta. Friðlandið er stofnað 1981. Síðan gerist lítið í rúm 20 ár. En í kringum 2004-5 er ákveðið að stækka friðlandið og settur í gang starfshópur, undir forustu Árna Bragasonar frá Umhverfisstofnun, án aðkomu f4x4. Síðan þá virðist hugmyndir um friðlands stækkunina hafa tekið miklum breytingum. Í upphafi ferilsins virtist sem stækkunin væri einungis ætluð til þess að koma í veg fyrir framkvæmdir Landsvirkjunar við Norðlingaölduveitu. Síðan óx friðunarsinnum ásmegin og þá vildu þeir innlima Kerlingarfjallasvæðið og svæði inn á Sprengisandi í friðlandið. Af þessum hugmyndum þeirra varð þó ekkert þá stundina, heldur breyttust hugmyndirnar þannig að Hofsjökull var kominn inn í hugmyndina. Með því að innlima Hofsjökul í friðlandið, þá átti að tengja Þjórsárvers friðlandið við friðlandið í Guðlaugstungum. Í kringum allar þessar hugmyndir, uppgötvaði einhver að jeppamenn voru búnir að aka að vetrarlagi inn í Þjórsárver óáreittir frá 1981-2010. En samkvæmt smáaletrinu í friðlandslýsingunni er bannað að aka inn í friðlandið nema á snjóbílum. (svo er hægt að deila um hvað er snjóbíll). Því sendi Umhverfisstofnum bréf til f4x4 og áréttaði smáaletrið. Síðan gerist það haustið 2011 að nokkrir þingmenn vilja breyta stækkunarferli friðlandsins í þjóðgarðinn Hofsjökul. Þannig stendur semsagt hringlandahátturinn með Þjórsárver í dag. Hvað verður á morgun er erfitt að spá í. En rökin fyrir öllum þessum miklu pælingum virðast vera eitthvað léttvæg, fyrir utan það að setja fótinn fyrir áform Landsvirkjunar við Norðlingaöldu.