Hofsjökull

Hofsjökull er afskaplega mikið sprunginn og verður aldrei nógsamlega varað við því að hafa allan vara á ferðum um jökulinn. Eftir að á snjóinn er komið og verra er að sjá sprungurnar, er vissara að halda sig í lægðunum. Hæðirnar eru oftast krosssprungnar. Á þessum tíma árs, sem þú ert að tala um að fara, er orðið talsvert langt upp í snjóinn, og þið félagar þurfið að vera undir það búnir að vaða krapa talsvert langa leið. Víða er s.k. jaðarfönn við jökulbrún fram eftir sumri, en þegar henni sleppir eruð þið að ganga á jökulísnum og getið ekki notað skíðin þar, fyrr en að leysingasvæðinu er komið. Þetta er misjafnlega langt eftir árferði og einnig hvar er verið að fara. Hér á þessum vef getið þið fengið GPS-leiðir til að fara eftir, en leiðir sem er óhætt að aka bílum eftir eru jafnframt í lagi fyrir ykkur. Að norðanverðu er yfirleitt í lagi að taka stefnu beint í áttina að Íngólfsskála, en síðasti spölurinn ofan af jökli er nokkuð brattur ofan í Austari-Krók. Minni bratti er vestan við Krókafellið, en þá eru menn líka komnir í þá stöðu að þurfa að fara yfir kvíslarnar. Það er talsvert löng leið frá jökuljaðri að Ingólfsskála og þarna er bílaslóð langleiðina eftir hrauninu, sem er all sandorpið næst jöklinum. Kunnugastur hér norðanmanna á Hofsjökli hygg ég að sé Böðvar Finnbogason í Varmahlíð, sem hefur í fjölda ára verið í forystu fyrir Flugbjörgunarsveitinni í Skagafirði og þér er ábyggilega óhætt að bjalla í hann, þetta er mikill sómamaður. En á þessum árstíma er líka vissara að hafa samband við Ágúst Guðmundsson á Sauðárkróki upp á gistingu í Ingólfsskála, því hann er ansi mikið ásettur í júlí og ágúst. Góða ferð.