Hefur einhver betra minni en ég?????

Það er fróðlegt að lesa það sem hér að ofan er skrifað um ábyrgð jeppamanna og þá á ég við þær aðstæður, sem oft koma upp, að við erum beðnir að "kippa í" þá sem asnast út í einhverja vitleysu og festa sig. Tek fram að ég er ekki að tala um þau tilvik þegar við erum að ferðast saman og erum að hjálpast að við að komast frá A til B. Sumt fólk telur sig eiginlega hafa "veiðileyfi" í okkur ef við erum svo óheppin að vera á ferðinni þegar þetta fólk hefur fest sig, ekið út af eða hvað nú vill þeim til. Okkur á nánast að vera skylt að koma þeim til aðstoðar og oftast gerum við það. Oftar en ég hef tölu á hef ég verið beðinn að kippa í bíl undir slíkum kringumstæðum og þegar maður spyr viðkomandi hvort hann sé þá með spotta þá er svarið oftar en ekki: "Nei, þú átt að vera með spotta, þú ert á jeppa!" Nú, fari svo að eitthvað skemmist, þá er manni kennt um. Mér líst satt að segja ekki nógu vel á að láta þann sem er dreginn sjá um að hnýta í, því fæst af þessu fólki kann að gera það skammlaust og þess utan er maður að setja sig í hættu með sitt eigið tæki. Ég hef allavega látið karlmenn, sem ég hef neyðst til að draga bílana fyrir, hnýta sjálfa í sinn bíl en hnýti í minn bíl sjálfur. Hinsvegar eru fæstar konur tilbúnar til að gera þetta enda oft ekki búnar til athafna í slæmu veðri og færi. Auðvitað þekki ég konur sem kunna þetta og geta jafn vel og ég, en þær eru yfirleitt á jeppum sjálfar! En ég hef brotið drif hjá mér við að draga aðra bíla, slitið og skemmt spotta, sem kosta jú peninga, og skemmt mína bíla á ýmsan hátt við þetta og alltaf þurft að sitja uppi með tjónið sjálfur. Þess vegna er ég eiginlega hættur þessu, hvað sem á gengur og verður að hafa það hvaða skammir sem maður fær fyrir.

Ef þú kippir í bíl sem er fastur út í vegakanti, í skafli eða bara bensínlaus og þú lendir í því að skekkja bílinn þá þarft þú að borga.

Segjum sem svo að Jón Jónsson sé að keyra á sínum Daihatsu á þjóðveginum. Skyndilega skellur á blindbylur og Jón festir Daihatsuinn í skafli. Þú kemur á þínum ofurjeppa og Jón kemur kaldur og örmagna og biður þig að kippa í drusluna. Þú ferð út og þið Jón bindið spottann í dráttaraugað undir Daihatsuinum og í dráttakúluna á jeppanum þínum. Þú ert allur hinn almennilegasti og bíður Jóni inn í jeppann því þar er hlýtt (nema þú sért á Land Rover) og síðan kippir þú í Daihatsu beygluna og rífur framendann af druslunni (haha, já alveg eins og kemur alltaf fyrir Patrolman þegar hann þarf að draga einhvern sem er ekki á Patrol). Þú þarft að gjöra svo vel að kaupa nýjan Daihatsu handa Jóni af því að þú reifst hinn í tvennt.
Sick heimur en svona er það bara.

Haukur

Hafið þið einhverja skoðun eða vitnesuju um hvort hægt er að fá tryggingu fyrir tjónum sem verða í skipulögðum ferðum á vegum 4×4. T.d. gæti ég greitt gjaldið í ferðina með kreditkortinu mínu og fengið tryggingu á þann hátt. Á svipaðan hátt og þegar ég fer til útlanda og greiði ferðina með kortinu og fæ í kaupbæti ferðatryggingu í gegnum kortafyrirtækið.

Elvar

Mér finnst mjög ólíklegt að kreditkortatryggingin gildi þarna á sama hátt og þegar þú kaupir ferð af ferðaþjónustu með kreditkortinu. 4×4 er ekki ferðaskriftstofa, ekki einu sinni félag sem gefur sig út fyrir að bjóða upp á skipulagðar ferðir. Gjaldið í ferðirnar er bara fyrir beinum útlögðum kostnaði og er allt annað en þegar þú kaupir þig inn í skipulagða ferð hjá ferðaþjónustuaðila.

Hins vegar geturðu keypt utanvegakaskó hjá tryggingafélögum sem gildir þá óháð því hvort þú ferðast einn, með vinum og kunningum eða félögum í 4×4.

Kv – Skúli

Það hefur verið skrifuð kandidatsritgerð í lögfræði um ábyrgð leiðsögumanna/ferðaskrifstofa á farþegum í ferðum af slíku tagi. Hún heitir "Skaðabótaábyrgð leiðsögumanna og ferðaskrifstofa á líkamstjóni farþega osfrv." Höf. Halldór Björnsson, brautskráður í júní 2000. Hægt að nálgast á þjóðarbókhlöðunni. vonandi hjálpar þetta.

Best að kanna þessa ritgerð og sjá hvort þar sé að finna eitthvað sem hjálpar.

kveðja
Soffía

þetta er allt lærdómsríkt fyrir mann og í raun ágætt að þessi umræða fór af stað. Soffía er viss með að láta okkur vita hvort hún hefur séð eitthvað markvert, þegar hún er búin að fara yfir þessa kandidatsritgerð. Gott að vanur lögfræðingur skuli vera kominn í málið. En þarna eru sem sagt tvö ábyrgðarsvið, sem að okkur snúa. Í fyrsta lagi er það ábyrgð félagsins eða leiðsögumanna/fararstjóra á þess vegum gagnvart þátttakendum í ferðum og í öðru lagi er það sem snýr á ábyrgð þess sem veitir aðstoð þegar eitthvað ber út af hjá öðrum. Það er með þessa hluti eins og annað í okkar þjóðfélagi að eitt rekur sig á annars horn. Það eru nefnilega til lagaákvæði sem skuldbinda mann sem vegfaranda til að veita aðstoð og viðurlög við því ef maður lætur hjá líða, og svo er maður bótaskyldur ef aðstoð manns veldur einhverjum skaða, þótt óhjákvæmilegur sé og/eða sé í raun orsakaður af slysni eða óvitaskap þess, sem verið er að hjálpa, fyrir svo utan það að maður verður að sitja sjálfur uppi með það tjón sem kann að verða hjá manni sjálfum vegna veittrar aðstoðar, hvort sem hún skilar árangri eða ekki.

Það væri áhugavert að vita hvort reglur sjóréttar um björgunarlaun gætu átt við í slíkum tilvikum.

Soffía getur sjálfsagt sagt okkur þetta. en mér þykir það ólíklegt, þær reglur og lög eru svo sérhæft fyrirbrigði