Hættulegir breyttir jeppar

Hann tekur helvíti stórt uppí sig þegar hann talar um ónafngreinda menn sem skrúfa upp í díselvélum og kallar alla í kringum sig fúskara og vanvita sem ekkert vita og ekkert hafa hugsað út í það sem þeir gera.

Vona bara hans vegna að hann standi undir þessum fullyrðingum sínum því að það fjölgaði ekki í aðdáendahópnum hans við þessa grein.

NISSAN 😀

það er ótrúlegt en sat að maðurinn (Leo) eiðir mestum parti greinarinnar í að reikna og sanna hluti sam allir vita.
eins og að það er erviðara að halda á stótu dekki en litlu og verra að rekast á þunga hluti en létta og að útskíra gíró effekt sem allir lærðu um í gaggó.
kv guðmundur

Ég held að menn hér ættu nú að vara sig á því að fara sömu leið og ágætur Leó, þ.a.e.s. fara ekki út í harða sleggjudóma.

Leó er greinilega manískur í skoðunum sínum á breyttum jeppum, en hann hefur samt nokkuð til síns máls.

Ég velti fyrir mér hættu sem stórir bílar geta skapað og það er ekki hægt annað en að viðurkenna að því stærri sem hluturinn er því líklegra er að hann valdi skaða á því sem hann lendir á. Þarna getum við allt eins verið að tala um stóra vörubíla eða aðrar vinnuvélar.
Ég held að þetta snúist ekki um stærð tækja stór vs lítil, þetta snýst meira um aksturslag þeirra ökutækja sem um er rætt.
Það er ljósara en sólin sjálf að inn á milli eru menn sem keyra stóra breytta jeppa eins og þeir væru að keyra litla öfluga sportbíla. Hvað væri sagt ef að jafn mikið væri um að vörubílstjóra keyrðu sína vörubíla á ystu nöf um þjóðvegi landsins og margir jeppamenn gera?
Tökum dæmi; Þið eruð dyraverðir á skemmtistað, á staðnum eru tveir karlmenn sem eru stjórnlausir af reiði, annar er 160 cm og 50 kíló, annar er 199 cm og 150 kíló, hvorn væruð þið til í að fara og stoppa?
Ef báðir þessir menn eru til friðs, þá er ekkert vandamál,,, ;o)

Einnig mætti líka fara yfir það hverjir eru að breyta bílum á Íslandi, í dag er þetta öflugur ?iðnaður? að breyta bílum, ég trúi því að þeir aðilar sem þar standa fremstir séu að gera þetta að mikilli fagmennsku. En hvað um það sem gerist í hinum ýmsu bílskúrum um landið?
Þar held ég að oft á tíðum viðgangist fúsk sem getur haft afdrifaríkar afleiðingar, ég er ekki að segja það algilt þvert á móti en of mikið samt.

Jeppamenn verða gera sér grein fyrir því að þetta er alvörumál sem vert er að ræða, ekki taka á móti efasemdamönnum með fordómum.
menn verða að sýna fram á að í þessum geira sé verið að gera hlutina með ábyrgð og metnaði til að hafa hlutina í lagi

það má samt sem áður benda á að þegar breyttir jeppar eru partur af slysum þá eru þau í flestum tilfellum mjög alvarleg, eins má álikta á sama hátt með rútur og vörubíla.
Hlutfallslega eru mikið breyttir jeppar lítill partur af flórunni og er þar kannski smá partur af skýingunni. Það er varla sanngjarnt að flokka breytta jeppa með óbreyttum.

Við skulum halda ró okkar og ekki rísa upp á tærnar. Þetta er ekki fyrsti rugludallurinn sem ræðst á okkur jeppamenn af einhverju undarlegu kappi frekar en þekkingu.

Sagði refurinn ekki "þau eru súr" þegar hann náði ekki að teygja sig í berin?

Ég tek annars undir það að þetta er skýrt dæmi um það hvað léleg þekking getur verið verri en engin.

Það er staðreynd að jeppabreytingar eru með stórkostlegri tækninýjungum sem komi hafa fram og þróaðar hafa verið á Íslandi. Nýleg rannsókn um slysatíðni sýnir að breyttir jeppar valda marktækt færri slysum en óbreyttir.

Nokkir punktar sem gott er að hafa í huga í umræðunni:

1. Jeppabreytingarnar lifðu af forstjóravæðinguna. Þegar það komst í tísku meðal þeirra sem eru í aðstöðu til að láta vinnuveitandann splæsa á sig flottum bíl, að aka um á 38" breyttum jeppa fór um marga jeppamenn vegna þess að flestir þessara manna vita ekkert um jeppa. Ekkert slæmt gerðist með alla þessa nýgræðinga á þessum tröllum, sem bendir til þess að breytingarmálin séu nú í nokkuð góðu horfi.

2. Veltið fyrir ykkur stærð á framhjólalegum í jeppum á móti framdrifslausum bílum. Þær eru miklu stærri. Það er til að koma framöxlinum í gegnum þær. Þessar legur er því í yfirstærð. Sem er mjög heppilegt vegna þess að álag á þessar legur eykst vissulega með stærri hjólum, en álagaaukningin er alls ekki of mikil eins og reynslan sýnir best.

3. Álag á bremsur fer eftir því hversu mikilli hreyfiorku þarf að breyta í varma við hemlun. Hreyfiorkuaukningin fer ekki eftir hlutfallslegri stækkun hjóla heldur þyngdaraukningu bílsins plús aukningu í snúningshreyfiorku hjólanna (sem hefur verið reiknað út að er ekki ráðandi). Reyndar koma fleiri þættir inn, til dæmis þarf að ýta 40% fastar á bremsuklossa til að fá sama hemlunarkraft með 40% stærri hjólum. Það er þó óralangt undir þeim öryggismörkum sem gefin eru við hönnun á hemlum. Og mesti mögulegi heildarþrýstingur í kerfinu hækkar ekki með stærri hjólum (það er við nauðhemlun). Mikið hefur verið ruglað í þessum fræðum.

4. Jeppar á stórum hjólum eru öruggari í ám heldur en jeppar á minni hjólum, allavega á meðan yfirbyggingin á þeim stóru fer ekki að virka eins og þvottabali (eins og gerist með óhækkaða jeppa í mun grynnra vatni).

5. Almennt virðist ríkja mikið ofmat á bílaframleiðendum í tali um nákvæma hönnun og þrauprófanir. Þetta er bara ekki svona fullkomið hjá þeim eins og mörg dæmi eru til um. Munum við ekki eftir Broncounum árið 74 sem voru veltandi út um allar trissur þangað til búið var að fjölga dempurum að framan (íslensk breyting)?

Svona má lengi telja.

Reyndar hafa hafa komið fram veikir punktar í breytingum en bransinn hefur hingað til borið gæfu til að lagfæra slíka galla, oft með aðstoð tækninefndar 4×4, áður en alvarleg slys hafa orðið. Dæmi um það er frágangur stýrisarma, en lélegum frágangi á þeim var nánst útrýmt fyrir áratug. Nú er í gangi gott framtak hjá tækninefndinni um að taka á þekktum göllum, t.d. með hrútshornið á Toyotunum. Það er gert með því að gefa út í samráði við skoðunarmenn að þessir bílar skuli vera með stýristjakk þegar 38" eða stærri eru undir þeim. Þá er búið að setja undir þann leka að ekkert skikkar menn í slíkt með þeim opna regluramma sem er í gildi.

Ég tel jeppabreytingar vera í góðum málum almennt séð, við þurfum þó að halda vöku okkar og leggjast á eitt um að taka á vandamálum þegar þau koma upp. Það hefur tekist hingað til og mun líklega verða þannig áfram.

Við verðum þó að stöðva svona sleggjudómaskrif byggð á vanþekkingu því að það er ferlega auðvelt að sá efasemdum um þetta sport með svona LMJ framsetningu, og það skaðar okkur mikið.

Munum svo að slys verða á meðan menn aka bílum. Ef við viljum útrýma öllum umferðaslysum, þá verðum við að leggja niður alla umferð. Það gildir bæði um breytta bíla og óbreytta. Það sem gildir er að halda slysum í lágmarki og er ekki einmitt niðurstaða slysarannsóknarinnar að þau eru færri á breyttum jeppum?

Reyndar tel ég að mikill árangur næðist með því að eyða ekki nema broti af því sem eytt er í skoðun ökutækja til að kikja inn í hausinn á bílstjórum. Til dæmis má spyrja hvers vegna ekki er til ein einasta hálkuæfingabraut fyrir ökunema á íslandi en búið er að fjárfesta í húsnæði og tækjum til að skoða bíla fyrir milljarða?

Snorri Ingimarsson

Nú er rétti tíminn til að selja jeppan, það er að segja ef einvher vill kaupa hann.

Nokkara ástæður þessa að svo ætti að vera.

1.
Nú eru margir menn að tala um það sama og Leo um "skort á eðlilegum reglum frá hendi hins opinbera…" og "löggjafi og dómsvald ekki sinnt þessum málum sem skyldi…" (Bara leiðinlegir menn, reglusjúkir menn sem pissa ekki nema í samþykkt gustafsberg klósett með ISO 9001 öryggisstaðli) Þetta eru mál sem eiga ekki eftir að auðvelda okkur jeppamönnum. Það á eftir að auka eftirlit með þessu til muna og jafnvel að banna breytta jeppa, enda ísland á leið í Evrópu helvíti og það þarf reglur, lög og leyfi fyrir öllu þar. Norska aðferðin.

2. Vatnajökulsþjóðgarður, og hvað svo? Það verður örugglega erfitt að fá að fara á þessa jökla á jeppum nema með sérstöku leyfi þegar fram í sækir. Vatnajökull núna svo koma hinir.

3. Ólíugjald. Það er engin spurning að það á eftir að auka kostnað helling, bæðir þeira sem eru á fastagjaldinu og þeira sem eru með ökumæli.

4. Loftslagsbreytingar og hlýnun andrúmslofts. Áhrif loftslagsbretinga hefur óneytanlega gert okkur erfitt fyrir og er það ekki spurning að nú er svo komið að það er hægt að skynja þessar breytingar vel. Menn eru að spá því að þetta sé að gerast miklu hraðar heldur en menn þorðu að vona í fyrstu. Mín stutta æfi hefur meira að segja fundið fyrir þessum breytingum.

Núna verður maður bara að breyta til. Fá sér fólksbíl með díselvél, góða gönguskó og stuttbuxur og ganga um hálendið. Frelsið til þess verður seint stoppað.

😉

kv,
heijo

Ég skil ekki þessi viðbrögð. Þegar ég sá umræðuna las ég grein Leós, sem mér þykir ágæt. Ég gef mig ekki út sem sérfræðing um eðlisfræði og þó ég hafi gert mér grein fyrir ýmsu því, sem Leó segir í grein sinni, og jafnvel vitað sumt fyrir, dettur mér ekki í hug að gera lítið úr honum fyrir það. Ég er þess fullviss, að margir þeirra ungu manna, sem þeysa um á misvel breyttum tröllajeppum, hafi ekki hugmynd um það, sem um er að ræða, og því séu ábendingar hans þeim mjög þarfar (að ég nú ekki tali um þá, sem hafa hugsað sér að fá e-rn handlaginn bílskúrsmann til breyta jeppanum sínum fyrir lítið eða þá, sem maður sér oft á vefspjallinu vera að leita ráða um breytingar, sem þeir ætla sér að ráðast í sjálfir). Að segja manninn rugludall, eins og einn virðulegur verkfræðingur(?) leyfir sér, eða segja að hann sé að "ráðast á jeppamenn" lýsir betur ritaranum sjálfum, en þeim sem um er rætt. Ég endurtek, ég skil ykkur ekki.V

Mér líður strax betur að lesa sannfærandi málflutning Snorra í þessu máli, enda veit ég að hann og fleiri innan klúbbsins vita sínu viti í þessu og við fengjum þessar breytingar ekki samþykktar af reglugerðaveldinu ef röksemdirnar væru ekki sterkar og faglegar. Sjálfur ætla ég ekki að þykjast hafa vit til að leggja mat á tæknilegu röksemdirnar hjá Leó (s.s. með tannstangarstýrið), en það sem mér fannst ósannfærandi í hans málflutningi er að menn væru svona sofandi á verðinum. Það fannst mér ekki stemma við þá staðreynd að tækninefnd hefur í gegnum árin verið í góðu samstarfi við yfirvöld á þessu sviði.

Látum þetta ekki taka okkur á taugum, heldur höldum áfram góðu og faglegu starfi til að auka umferðaöryggi breyttra jeppa. Eins tek ég undir hugmynd Snorra að það verði tekinn félagsfundur í það að tækninefndarmenn fræði okkur hina um grundvallaratriðin í þessu, þó ekki sé nema til að gera okkur mellufæra í að svara fyrir okkur þegar við mætum bullinu út í bæ.

Kv – Skúli

Heiðskírt, sól og brakandi blíða þannig að ég er farinn út að leggja mann og annan í lífshættu með plaststuðaranum á heimamixaða jeppanum mínum.