Garmin ráðgjöf – tegundir

Sæll Maxi,

Gott er ef einhver óháður getur leiðbeint þér en skoðanir manna eru nú misjafnar og það sem einum þykir best þykir öðrum ómögulegt. Ég hef það að markmiði að stýra mönnum sem ég er að selja tæki að tækjum sem henta því sem þeir ætla að nota og eftir situr smá val viðskiptavinar á milli tækja.

Í jeppamennsku eru eftirfarandi tæki best; GPSmap 421, 521, 526, 620 og 276C. Oregon eru líka skemmtileg tæki. Ekki geta öll tæki tengst tölvu til að stýra hvaða forriti sem er en ekkert tæki býður uppá að tengjast skjá til að stækka skjáinn, slíkur vélbúnaður er ekki í tækjunum. Öll fyrrgreind tæki geta tengst tölvu og sent staðsetningu inná forrit eins og Ozi, Fugawi og Nobeltec en til að tengjast Garmin nRoute geta 276C og Oregon það eingöngu.

Nuvi tækin eru ekki hentug til að nota í jeppamensku því ferilritinn er mjög einfaldur og ekki er hægt að vista ferla, einnig geta bara sum nuvi tæki unnið með leiðir. Hægt er að bjarga sér á fjöllum ef staðarþekking er til staðar með nuvi tæki en ég mæli alls ekki með að menn kaupi það tæki til að nota í jeppamennsku.

182C er rjóminn sem tækin hafa byggt á síðan það kom út. Í dag er rjóminn að mínu mati 526 en það er dýrasta tækið. Það sem 526 hefur er mjög mikið minni fyrir ferla, leiðir og vegpunkta (meira en nokkurt annað eldra tæki) og hreint sagt frábæran skjá. Stýrikerfið í því tæki hefur verið gagnrýnt af gömlum hundum, en eins og er með gamla hunda þá er erfitt að kenna þeim upp á nýtt. Nýja stýrikerfið er ekki gallalaust en það var það gamla ekki heldur, það sem er aðall þessa nýja stýrikerfis er að það er mun auðveldara að læra á það og muna hvernig á að gera hlutina eftir mis langar pásur.

Oregon tækin eru með þeim flottustu tækjum sem hægt er að fá, bæði í grafík og tækni, en það sem þau skortir er skjástærð.

Ég vona að þetta hjálpi þér aðeins og vertu velkomin í Garmin Búðina í Ögurhvarfi.

Kveðja,

Rikki – http://www.garmin.is