Fréttir af Norðanmönnum

41 km í Laugafell, segir bóndinn. Mikill skafrenningur kominn og þar af leiðandi ekkert skyggni. Þeir fara hægt yfir og eru hættir að pompa niður. Færið er harðfenni og frostið stendur í 7 gráðum.

AÁ

Sæll, Lúther.

Var að heyra í bóndanum, 30 km eftir í áfangastað. Ennþá kóf. Benni heyrði í öðrum hóp sem var 16 km sunnan við Laugafell og þar var veðrið skaplegra.

Samkomulagið er sem betur fer ágætt á heimilinu en Blazerinn er löglega afsakaður núna. Og ég verð það líklega líka um næstu helgi þó vissulega hefði verið gaman að þeysa um snjóbreiðurnar á Svaðilfara mínum. En koma tímar og koma ráð, ég á vonandi eftir að slást í för með ykkur seinna.

Lifi amerískir eðalvagnar með 6.2 í húddinu!
AÁ

Norðlendingarnir voru komnir í Laugafell um hálf-3 í nótt. Heyrði í þeim um 11 í morgun og þá var glampandi sól og andvari en ekki alltof mikill snjór. Það virtist ekki vera búið að ákveða framhaldið í dag enda voru þeir rétt að rísa úr rekkju. En hinsvegar virtist þá vera farið að kitla í dieselfótinn af tilhugsuninni við að aka í svona góðu veðri.

AÁ

Hinir norðlensku fjallafarar eru nú við Háöldur sem eru u.þ.b. 9 km sunnan við Laugafell. Stefnan er sett á Setrið en hvað svo kemur í ljós…

AÁ

Það nýjasta í fréttum af Norðlendingunum er að þeir eru staddir á Hofsjökli. Nánar tiltekið við Miklafell en það er á norðausturhorninu á Hofsjökli. Veðrið er brilliant, útsýnið gæti ekki verið betra. Þeir horfa víst með kaffibollann í hönd yfir á drottningu íslenskra fjalla, sjálfa Herðubreið. Þeir þræddu leið inn að jöklinum sem þeir telja að ekki hafi verið farin áður.

Hætt var við að fara í Setrið þar sem þeim fannst full þungskýjað að horfa þangað. Næsti áfangastaður hefur ekki verið ákveðinn.

Kveðja,
AÁ

E.S. Það hefur líka verið ritað á spjallsíðu Eyfirðinga um þessa ferð http://ey4x4.net/phpbb2/viewtopic.php?p=140#140.

Samkvæmt síðustu fréttum þá eru hinir norðlensku hálendisfarar komnir aftur í náttstað í Laugarfelli. Þeir fóru einhverja aðra leið tilbaka frá jöklinum og voru komnir í skála um 6 leytið. Þá var grillað, spjallað, baðast og haldin myndasýning. Andinn er góður og einhver samskipti hafa verið á milli hins norðlenska hóps og hins sunnlenska sem einnig er í Laugarfelli.

Það fylgir víst sögunni að miklar umræður hafa spunnist upp um hvernig megi virkja okkur konurnar í þessari ferðamennsku. Allar tillögur eru víst vel þegnar.

Á morgun er meiningin að leggja af stað fyrir hádegi og fara niður Bárðardalinn og heim til Akureyrar.

kv.
Alma

Norðlendingarnir lögðu af stað frá Laugarfelli um hálf 11. Heyrði í þeim milli 12 og 1 og þá voru þeir að sötra kaffi 2 km frá Kiðagili sem er u.þ.b. 40 km frá Laugafelli (samkv. kortadisk Landmælinga). Aðstæður voru góðar og fór Patti fyrir hópnum og fór víst geyst, full geyst að sumra mati og var beðinn um að hægja ferðina.

kveðja úr blíðunni á Akureyri,
AÁ