Fréttaþráður helgarinnar 5.-7. mars 2004

Sælir ! Ég var að tala við Gunna "hása" og staðfestir hann það sem Boebbi sagði. Þeir eru búnir að snúa við vegna færis og skyggnis. Einar var alveg ákveðinn að fara með nýliðanna upp á hábungu en af því verður ekki í þetta sinn. Annars allt gott.

Meira seinna
Magnús G.

Maður að nafni Guðmundur Guðmundsson, úr hópi C er á Hilux SR5 38", coari Gísli Ófeigsson og sonur hans, hringdi í mig og sagði að þeir væru í 1400 metra hæð og að koma niður úr þokunni. Útsýni væri alveg frábært og glimrandi gengi. Lausamjöll yfir öllu. Lenntu þeir í því að þurfa að tappa eitt dekk stax í Hrauneyjum (líklega fúið dekk) og voru að hugsa um að fara í bæinn en Einar herti þá og sjá þeir ekki eftir því. Allir hóparnir fóru upp á Hofsjökul beint upp af Setrinu og áfram upp Blautukvíslarjökul. Ekki urðu þeir varir við neinar sprungur.

Langaði Guðmund til að koma kveðju til sonar síns 10 ára sem var ákv. að fara með en reyndist með 38° hita þegar til kom í morgun.

Meira seinna
Magnús G.

Já það er rétt.

Var að tala við Gulla. Eiga þeir ca. 20 km eftir inn í Laugafell þar sem þeir ætla að setjast að. Ekki virðist hafa orðið neitt tjón við vökvunina hjá honum. Færið er mjög gott, pínulítill skafrenningur ekkert sem á er gerandi og nánast búið að vera Mallorka veður í allan dag.

Meira seinna
Magnús G.

Sælt veri fólkið! Jón Snæland var að hringja í mig og var með slæmar fréttir. Kjartan formaður þaut fram af 1.5m hárri hengju í Hnjúkakvíslinni og lenti í hengunni hinu meginn. Var hann heppinn að vera í belti því annars hefði illa farið. Bíllinn er allur í döðlu að framan og ókeyrsluhæfur. Þeir eru búnir að ná honum upp úr ánni og eru að reyna að toga hann í sundur til að geta dregið hann til byggða. Sagði Jón að þeir myndu líklega byrja á því í kvöld þar sem veðurspáin er mjög versnandi.

Meira seinna
Magnús G.

Sælt veri fólkið!

Veðurhorfur fyrir miðhálendið til kl. 18:00 á morgun.

Vaxandi suðlæg átt og þykknar upp, 10 – 15 m/s undir kvöld, en hægari og bjartviðri austantil. Hvessir í nótt, sunnan 20 – 25 m/s víða á morgun. Slydda eða rigning, en úrkomulítið norðan Vatnajökuls. Hlýnar smám saman, hiti 0 – 6 stig í nótt og á morgun.

Meira seinna
Magnús G.

Sælir félagar!

Af Nýliðaferðinni er það að frétta að allir eru komnir í hús eftir frábæran dag. Þrándur og Skúli eru báðir glaðbeittir og reyndar mannskapurinn allur. Þegar niður af jökli kom fóru sumir að reyna bílana betur, aðrir í að skemmta börnum á slöngum og einhverjir í smáviðgerðir. Stór LC80 hefur átt við hitavandamál að stríða og reyndist það vera vatnslásinn og síðan er Scout sem er með einhverjar gangtruflannir. Talsverður snjór virðist vera við Setrið. Byrjað er að kynda undir lærunum og önnur skyldustörf eru í fullum gangi svo sem vökvun ofl..

Tal við þá aftur í kvöld, sæl að sinni
Magnús G.

Já nú er kátt í höllinni okkar og menn saddir og glaðir eftir frábæran dag.

Eftir frábæra matarveislu, sé ég Nýliðafarana fyrir mér eins og dverga sem eru saddir og ánægðir, en þá viðhafa þeir sérstakt háttalag: [Þeir kveikja sér í löngum pípum og spúa reykhringjum út í loftið. Síðan hlægja þeir hátt og mikið, stundum í marga klukkutíma.] Lýsing fengin úr bókinni "Hobbit" eftir J.R.Tolkien. Allavega var mikið fjör og mikið sungið og skrafað nú um miðnættið.

Einstaka menn þurtu þó að dytta að farskjótum sínum m.a. Hjálmar sem var í vandræðum með vatnslás í LC80 á 44" og Ásgeir á Grænum Scout 38" þurfti að sjóða einhverja upphengju. Að sögn Guðmundar Guðmundssonar á Toyotu Hilux SR5 38" dró þá nokkuð niður í ljósmagni inni í Setri.

Þegar þetta er skrifað um og uppúr kl 0100 voru ca. helmingur genginn til náða en Einar leiðangurstjóri var farinn undir feld að hugsa út væntanlega heimleið.

En ég ætla að kveðja alla ferðalanga í bili, en kem með nýjar fréttir um og uppúr 0900 í fyrramálið.

Bless í bili
Magnús G.

Sælir lesendur!

Nýjustu fréttir af Nýliðaferð eru þær að veerið er að leggja síðustu hönd á frágang og undirbúning brottfarar frá Setrinu. Eru þeir að spá í að fara Klakksleið heim. Ágætis veður er hjá þeim þ.e. þokubakkar á stangli smá stinningskaldi en engin ofankoma eins og Ómar lýsir þessu. Það var demparafesting að aftan sem Ásgeir þurfti að sjóða í gærköldi.

Af Rottugenginu er það að frétta að þeir eru lagðir af stað og eru að nálgast Spengisandsleið, nánar tiltekið voru þeir nýfarnir eða að fara yfir Bergvatnskvísl Þjórsár. Stefna þeir á Nýjadal/Jökuldal á áætla 5 – 6 tíma í heimferð. Náðist að púsla Toyotu Kjartans formans saman og gengur hún nú fyrir eigin vélarafli. Eftir fregnum frá Lúther "Skemmtitrúð" í gærkvöldi þegar hann talaði við þá var, þá var vatnskassinn eitthvað laskaður. Voru hann og Reynir "rottufjölgari" í sambandi við þá upp á væntanlegann björgunarleiðangur, en Yfirrotturnar afþökkuðu allt slíkt.

Næstu fréttir eftir kl 15:00 í dag, vegna Formúlunnar
Pr. Magnús G.