This topic contains 14 replies, has 1 voice, and was last updated by 
-
Topic
-
Átti fróðlegt spjall í gærkvöldi við Árna Alf sem fóstrar flugvélaflök í Eyjafjallajökli af mikilli natni. Það hafa farist tvær flugvélar á jöklinum, B17 vélin og Albatros vél sem fórst 1952. Það hefur verið skrifað nokkuð um slysið þegar B17 vélin fórst, en eitthvað lítið um slysið 1952. Það var fimm manna áhöfn og fórust allir, en fjórir lifðu slysið af, en hurfu í jökulinn og fundust ekki fyrr enn mörgum árum seinna. Draslið sem jökullinn hefur verið að skila af sér undanfarinn ár er úr þessari Albatros vél, en hún endaði í skálinni efst í skriðjöklinu. (Gýgjökull)
Þá fór ég að velt því fyrir mér hvað margar flugvélar hafa farist á íslenskum jöklum. Ég man eftir fjórum slysum núna. Geysir í Bárðarbungu, þessar tvær í Eyjafjallajökli og síðan vélarnar sem fundust fyrir stuttu upp af Eyjafirði. Á stríðsárunum hrundu vélar niður út um allt, en ég man ekki eftir fleiri slysum á jöklum.
Hlynur
-
Replies
-
Var ekki fyrr búinn að setja þetta inn þegar mig fór að ráma eitthvað í slys á Eiríksjökli. Veit ekki neitt um það, en er nokkuð viss um að flugvél hefur farið þar.
Hlynur
21. Júní 1984 fórst bresk Piper PA-28 á Eiríksjökli.
Flugmanni og farþega var bjargað eftir sólahrings leit. Hluti af flakinu var fjarlægður á sínum tíma, en það er eitthvað eftir þarna ennþá.
Þar sem jeppamenn eru með mikinn græjuáhuga þá geri ég ráð fyrir að það sé áhugi á þessum flugvélaflökum. Árni er hafsjór af fróðleik um þessi mál og búinn að fara örugglega hátt í 100 ferðir á Eyjafjallajökul og held ég að það gæti verið gaman að fá hann til að sýna okkur myndir úr þessum leiðöngrum á einhverjum fundinum. Ég ræddi þetta einhvern tíma við hann og tók hann ekki illa í það þannig að Hlynur þú verður að koma þessu í kring!
Kv. Davíð
Gaman að sjá þessa umræðu ykkar. Maður hefur alltaf haft smá áhuga á Þessu. En mér langaði að minnast á eitt flugslys sem gerðist nú samt ekki á jökli.
Það var sjóflugvél sem fórst á Hvammsfyrði við búðardal í kringum 1940(held 1947 en er ekki viss). Þar var að ég held 14manns í vélinni, 2-3 manna áhöfn og farþegar. Þetta var sjóflugvél og skekktist hún á rétt eftir að hún hafði tekist á loft og brotlenti í sjóinn. Sjö manns var bjargað en sjö létust(að mig minnir. kem með leiðréttingu þegar ég finn þetta aftur í öldinni okkar). Veður var víst mjög fínt þegar þetta gerðist. Mestum hluta vélarinnar var safnað saman í land. Sumt fannst ekki og stærsta hluta vélarinnar sem ekki var hægt að ná í land vegna þyngdar var dreginn út á miðjan fjörð og sökkt.
Svo til okkar tíma. Fyrir 3-4 árum fór ég að grennslast fyrir um þetta slys. Átti spjall við mann sem ég þekki sem sá þetta gerast sem barn og hefur haft mikinn áhuga fyrir þessu. Hafði hann hluta úr skrúfu þessarar vélar sem hann hafði fundið nokkrum árum áður.
Þá ákvað ég að fara í könnunarleiðangur og sjá hvort ég gæti fundið eitthvað úr þessari vél. Og viti menn þegar ég hafði þrammað ströndina og leitað vel við laxárósinn og var að fara halda heim sá ég grunsamlegan stóran stein dálitið útí fjörum sem var byrjað að glytta í þar sem það var að koma fjara. Náði ég með naumindum að vaða þarna út. Og þarna var það: Stóri hlutinn sem var á sínum tíma sökkt úti á miðjum fyrði.
Ég hef ekki farið lengi þarna en skylst mér að hann sé núna alveg kominn uppí fjöru.
Má bæta við þetta að 10 manna B-17 bandarísk herflugvél fer 16. sept. 1944. Eina slysið sem skilaði mönnum lifandi aftur til byggða. 5 manna Albatross vélin (björgunarflugbátur frá varnarliðinu) 16. maí 1952. 1975 fórust bandarísk hjón í sunnanverðum jöklinum á lítilli einkavél. 15. desember 1953 fórst Neptune vél frá varnaliðinu með 9 manns á Mýrdalsjökli. Hún snjóaði í kaf eftir að þyrla náði einu líki úr vélinni. Hún kom fram haustið 1982 í sunnanverðum jöklinum.
Við leitina að Albatross vélinni þá varð flugslys neðan við bæina í Stóru-Mörk. Lítil Piper Cub ætlaði að lenda í Veitunni en Jarpur úr Hábænum stóð á miðju túninu og fipaði flugmanninn eitthvað. Vélin krækti stélhjólinu í gaddavírinn á Veitugarðinum og vélin lenti á hvolfi ofan í skurði. Flugmanninn sakaði ekki.
Sælir félagar.
Eftir að við félagarnir fórum með Pajeróinn á Eiríksjökul og það spurðist út, komumst við að því að við höfðum "óvart" valið leiðina upp (og niður) klettabeltið þá sömu og flugvélaflakið var tekið niður á sínum tíma.
Kv
Palli
Ég er nú svo gleyminn að það hálfa væri þriðjungi of mikið og það tekur sérstaklega til mannanafna. Ég er þessvegna ragur að nefna nöfn, bæði fólks og heimilda. – Sögulegar sem og áþreifanlegar minjar um hernaðarflug og -flugslys eftir að landið var hernumið 1940 og fram úr, hafa lengi verið áhugamál mitt sem fleiri einstaklinga. Nokkrir ágætismenn hafa lagt á sig skipulega rannsóknavinnu um þetta atriði og þótt það sé varasamt, einkum fyrir jafn gleyminn mann og mig, að nefna nöfn í þessu samhengi, minnir mig að einn þeirra heiti Arngrímur Sigurðsson. Ég sá t.d. s.l. sumar bók um þetta efni og lýsingar á staðsetningu og staðháttum flugslysa og flugvélaflaka hjá góðum vini mínum í flugmannastétt, sem reyndar er einn af fyrrverandi formönnum 4×4! Hann notaði bókina m.a. til að finna eitt slíkt flak á Síðuafrétti og fór kunningjahópur þangað með honum og fékk ég að slást í þann hóp. Af einhverjum ástæðum er sú hugmynd þaulsætin í mínum kolli að hjá Flugmálafélagi Íslands séu tiltækar upplýsingar um þessa hluti.
kv. gþg
Sælir!
Einhver allra fróðasti Íslendingur um flugvélaflök heitir Eggert Norðdahl og lúrir nærri örugglega á upplýsingum um öll finnanleg og fundin flök hérlendis. Eggert er næsta örugglega í símaskránni. Þá hefur Hörður Geirsson á Akureyri átt vænan þátt í uppgrefti slíkra flaka og er maður vænn viðtals.
Góða skemmtun og góða nótt; Þorvaldur
Sunnudaginn 14. september 1975 nokkru eftir kl 18:30 fórst Piper Commanche er hún rakst á hátind Eyjafjallajökuls, Goðastein og með henni nýgift ung bandarísk hjón. Vélin var að koma frá Edinborg í Skotlandi.Á sunnudeginum 14. september voru einmitt 25 ár liðin frá því að Geysir fórst á Vatnajökli.
Gott að fá nákvæmari upplýsingar og leiðréttingu frá Gumma. Ég er hins vegar vanur að tala um Guðnastein í sunnanverðum Jöklinum en Goðastein í norðvestanverðum gígnum. Ég held að ég hafi heyrt að þessi vél hefði farist sunnan við Guðnastein en ekki Goðastein. Þarna er stór munur á. Ég luma á lærðri grein um rétt nöfn þessara steina og kannski væri við hæfi að fá hana birta.
Kv. Árni Alf.
Goða eða Guðnasteinn það fer eftir ýmsu og sitt sýnist hverjum en ég mæli samt með að þú skellir þér á gagnasafn Moggans á netinu og skoðir þessa hluti þar því þetta sem ég skrifaði er haft eftir mogganum þann 16. sept 1975 😉
Aðgangur að mogganum frá fyrsta eintaki til 1986 er frír á netinu í gagnasafni mbl.is og er þar margur annar skemmtilegur fróðleikur.
Góða skemmtun við lesturinn Árni minn
Það kom söguskýring á þessum nöfnum hérna á vefinn fyrir 1-2 árum og síðan þá hef ég kallað nyrðri klettinn Goðasteinn, En Árni endilega skella þessari söguskýringu hérna inn, það er alltaf áhugavert og fróðlegt.
kv. vals.
Á [url=http://his.origo.is/tripdefault.asp?trippath=20040320eyjafjallajokull&title=Eyjafjallajökull,%2020.%20mars%202004]Spottafélagssíðunni[/url] er skemmtileg skýring á nöfnum steinanna.
Kveðja
Snjókallinn
Má til með að benda á grein Árna Alf í nýjast tölublaði Útiveru um steinana í Eyjafjallajökli.
Fyrst þetta er flugslysaþráður, þá var ég að glugga í Vatna Brand, en þar er fróðleg lýsing um snjóbílaferð sem hann fór til að leita af flugvél sem fórst á Mýrdalsjökli 1953. Mjög áhugaverð lýsing.
Hlynur
You must be logged in to reply to this topic.