f4x4 tekin á beinið

Páll hefur örugglega komið gangandi inn í Nautöldu og vissulega töluvert um það að þarna sé gengið að sumarlagi.
En hárrétt hjá Ofsa að sumt kann að vera rétt í þessu hjá Páli, allavega það að margumræddur slóðagrunnur er það sem þarf til að fá einhverjar skýrar línur í þessu. En ég spurði mig einmitt þegar ég hlustaði á þetta á hvaða tíma Skagafjarðardeildin var þarna og hvað hefur Páll fyrir sér í því að þetta hafi verið utanvegaakstur en ekki snjóakstur. Tímasetning kom ekki fram.
Eins finnst mér alltaf villandi framsetning þegar blandað er saman umræðu um utanvegaakstur og umræðu um hvaða slóða eigi að leyfa akstur á. Akstur á slóða, þó umdeildur kunni að vera, er ekki utanvegaakstur. Jafnvel má segja að akstur á slóða sem búið er að banna akstur á er ekki utanvegaakstur þó það sé vissulega brot af öðru tagi. Með því að blanda þessu saman eins og Páll og fleiri hafa gert er verið að þvæla umræðuna og flækja og það verður ekki til að auðvelda baráttu gegn landspjöllum af völdum utanvegaaksturs.
Raunverulegur utanvegaakstur sem skilur eftir sig ummerki í landinu er hins vegar til staðar, því miður. Hvort hann fari minnkandi eða vaxandi veit sjálfsagt enginn, þó ýmsir hafi eitt og annað á tilfinningunni í þeim efnum. Það skiptir raunar litlu hvort er. Ég gekk um daginn hringinn í kringum Hrafntinnuhraun og verð að segja að það olli mér vonbrigðum hvað ég sá víða bílför, langt frá öllum slóðum. Töluvert af förum sunnan eða vestan við slóðina sem dæmi. Þetta var tæplega eftir útlendinga á bílaleigubílum, heldur greinilega breyttir jeppar að finna sér leið framhjá krapa. Ég hef alltaf sagt að við sem ferðumst á jeppum eigum að viðurkenna tilvist vandans og reyna að hafa áhrif innan okkar hóps til að útrýma vandamálinu, en það verður að segjast að órökrétt sleggjudómaumræðan sem á alltaf svo greiðan aðgang í fjölmiðla er svosem ekkert að hjálpa til í þeim efnum.
Kv – Skúli

Ágæt og málefnaleg umræða, Páll hefur rétt fyrir sér í mörgu sem hann segir þó hann hafi augljóslega horn í síðu margra og hefur gaman af því að hnýta í hina og þessa til að fá viðbrögð. Það sem mér finnst pirrandi við Pál er að hann segist tala um hlutina eins og hann sjái þá en sleppir alveg allri sanngirni í umræðunni eins og Jón kemur inn á. Því skal þó haldið til haga að það í sjálfu sér skiptir ekki máli hvenær Skagafjarðardeild F4x4 var inn í Nautöldu, akstur er bannaður innan friðlandsins, sumar sem vetur skv fyrrnefndri reglugerð …. hvort sem það er eitthvað vit í því eða ekki.

kv / AB

Utanvegaakstur „breyttra“ bíla er lang mesta vandamálið þó auðvitað komi það sér vel að kenna útlendingum á óbreyttum bílum um.

Menn mega ekki falla í þá gryfju að gerast kaþólskari en páfinn og halda því fram að þyngdarlögmálið gildi ekki um bíla á blöðrudekkjum. Að halda því fram að hér séu á ferð einhverjir svifnökkvar er málstað jeppamanna varla til framdráttar.

Skúli hittir naglann á höfuðið. Menn verða að viðurkenna vandamálið. Og það verður að ræða hlutina opinskátt.

Ég veit að ég má ekki nefna þetta en hvað með ferðaþjónustuna? Hvað með pressuna á þá sem þurfa að skila ferðamönnum á tilteknum tíma á tiltekin topp eða trússara sem ég veit að oft eru undir pressu að koma farangri til göngufólks. Og það á öllum tímum árs.

Ég held að það viti allir sem eitthvað hafa jeppast að margt sem við höfum gert og gerum eru á gráu svæði.

Á öðrum þræði hér eru margir að styðja það að opna fyrir umferð „breyttra“ bíla um vegi í aurbleytu á vorin. Ég held að menn verði að hugsa það mál til enda. Undanþágur fyrir útvalda eru alltaf varhugaverðar.
Og hvernig á að skilgreina nógu „breytt“ ökutæki og hver fylgir því eftir.

Páll nefnir reyndar í viðtalinu að undanþágur geti verið snúnar í framkvæmd og opnuðu í raun leið fyrir alltof marga. Hélt reyndar að Páll styddi undanþágur til handa ferðaþjónustunni í Vonarskarði.

Dettur í hug í þessu samhengi misnotkun á undanþágum kringum gosin í og við Eyjafjallajökli í fyrra. Þrátt fyrir og kannski vegna lögregluvaktar þá sást hvað kerfið var gjörspillt og ónothæft. Heilu jeppahóparnir með börn og gamalmenni sem fengu út á blaðsnepil frá einhverri ríkisstofnun eða ferðafélagi að rúlla þarna innúr meðan öðrum var meinaður aðgangur.

Kv. Árni Alf.

Akstur utanvega er vissulega vandamál og held ég að vanþekking sé aðal ástæða þess að ekið er þar.
Ég er ekki sammála Alfreð hér að ofan að utanvegaakstur breyttra bíla sé aðavandamálið, enda sé ég nýleg utanvegahjólför eftir minni ökutæki oftast á ferðum mínum um landið.
Hinsvegar meiga allir taka sig á til að koma í veg fyrir utanvegaakstur, og stöða þá sem ekki eru að gera rétta hluti.
En að viðtali Páls á Rás2, kemur mér á óvart að hann hafi fjallað mikið um utanvegaakstur á bloggi sínu, heldur hefur hann verið með skæting sem vart hefur verið svara verður og í engu svarað rökum , eða tekið þátt í vitrænni umræðu.
Hans málflutningur hefur einkennst af sleggjudómum og útúrsnúningum, sem engum er til gagns.
Að vinna að lausn í þessum málaflokki er nauðsynlegt og er það ekki lausn að loka af stór landsvæði fyrir akandi bara vegna þess að sjá ökutæki spilli náttúrusýn einhverra ferðalanga, eins og er gert með lokun Vonarskarðs fyrir akandi umferð og er engin rökstuðningur vegna náttúruverndar tilgreindur.
Að fullyrða eins og hann gerir í útvarpinu að eingöngu er beltatækum heimil för í þjórsárverum að vetri er skáldskapur, en í auglýsingunni um Þjórsárverin, er bönnuð umferð ökutækja nema snjóbíla, án þess að skilgreina hvað er snjóbíll.
Ábyrgu fólki er annt um sitt land og ætti auðvitað að vernda það gegn öllum spjöllum, eins og hægt er, ásamt því að gera fólki kleift að njóta náttúrunnar.
Páll Ásgeir hefði kanski betur skoðað starfsemi hans félags, en ýmislegt getur hann áorkað sem stjórnarmaður í FÍ og nefni ég hér dæmi:
Að koma í veg fyrir náttúruspjöll þegar skáli FÍ er byggður í óleifi við Álftarvatn í friðlandinu að fjallabaki.
Að hindra að skálinn við Hvítárvatn er látinn grotna niður, þótt FÍ hafi fengið miljónir í opinberan styrk til viðhalds á skálanum, einum fyrsta skála FÍ.
Að koma í veg fyrir landspjöll við Landmannalaugar vegna gesta FÍ.
Náttúrvernd og nýtingu þarf að skoða heildrænt, en ekki altaf benda á aðra um allar misfellur og reyna að koma til móts við annað fólk.
Kveðja Dagur

Stórundarlegt að einn maður nái að setja klúbbinn algjörlega á hausinn og í fleiri hringi en það sem jeppamenn hafa keyrt….
Er klúbburinn ekki í sambandi við blaðamenn eða er enginn talsmaður fyrir klúbbinn til að koma með svör á móti… það getur ekki verið hollt fyrir klúbbinn að félagsmenn karpi hér endalaust út í horni / við eða út í einn aðila sem tekur F4x4 á beinið í fjölmiðlum.

Kv Dolli

Fór upp á Hamragarðaheiði s.l. föstudagskvöld. Trúði varla því sem fyrir augu bar. Það sem þarna er að byrja að gerast, alveg úr dalbotninum þar sem gamli slóðinn endar og alla leið upp að jökli, eru stórfelld landspjöll vegna utanvegaaksturs.

Þannig háttar til að þarna í dalbotninum byrjar snjóskafl sem liggur upp að jökli framan af sumri. Nú er hann byrjaður að slitna í sundur og þarmeð neyðast menn að keyra á auðri jörð. Þarna er klaki ekki farin úr jörðu og aurbleyta mikil.

Eyjafjallajökull hefur ekki verið söluvara að sumri fyrr en núna. Held að engin hafi neitt á móti því að menn geri út þarna á jökulinn. Það verður hins vegar aldrei sátt um það meðan það er gert með því að níðast á náttúrunni.

Það er nokkuð ljóst að menn eru að reyna sitt besta að halda sér í snjó. Snjórinn er bara að hverfa. Það er einfaldlega ekki hægt að fara þarna upp nema að valda landspjöllum í leiðinni.

Lítur út fyrir að þetta séu nær eingöngu ferðaþjónustuaðilar á mikið breyttum bílum sem þarna eru á ferðinni.

Þarna er líka útgerð á fjórhjólum á beltum. Þrátt fyrir léttleika og mikið flot og þau geti fylgt skaflinum mun betur þá spora þau tæki líka út. Það fer engin þarna yfir í þessari bleytu nema að skilja eftir sig ummerki.

Skora á alla þessa aðila að hugsa málið til enda.

Hvað getur klúbburinn gert í svona máli?

Eða eiga menn bara að líta undan, leyfa landspjöll og lögbrot og bíða þess að þarna verði komin slóði sem allir mega þá væntanlega keyra?

Kv. Árni Alf.

Fyrir tilviljun rakst ég á netinu á félagskap sem nefnist Jeppavinir. Ef þessu er slegið upp á Google og skoðaður stjórnarfundur frá 1. mars 2011 kemur ýmislegt fróðlegt í ljós. Þar eru m.a. uppi hugmyndir um að lengja umræddan slóða á Hamragarðaheiði.

Mér finnst menn ansi sparir á upplýsingar hér á spjallinu. Margir af þungavigtarmönnum klúbbsins virðast vera innanborðs í umræddu félagi. Skil núna af hverju menn þegja þunnu hljóði. Finnst trúverðugleika klúbbsins f4x4 setja dálítið niður.

Kv. Árni Alf.

Það er ekki takmark okkar jeppamanna að komast á eitthvern eilífðar leiðarenda. Við erum ánægðir ef við komumst framm og til baka. Þegar peningar og gróðahyggja stjórna ferðinni verður fjandinn laus. Íslensk náttúra étur þá með húð og hári sem ofbjóða henni með fávisku.

Kv. SBS.

Ef lenging slóða eftir hentisemi hverju sinni telst sjálfsagt mál þá er tómt mál að tala um að banna utanvegaakstur. Fyrir utan það það þá hefur aldrei verið hægt að fara á slóða að Eyjafjallajökli að vestanverðu þegar snjóa tekur upp.

Mér finnst alls ekki sjálfgefið að ferðaþjónustan fái að vaða um landið á skítugum skónum án nokkurra takmarkana.

Skv. fundargerð Jeppavina þá að leggja uppbyggðan heilsársveg að Jaka við Langjökul. Ég reikna með að ferðaþjónustuaðilar sem geri út á jökulinn hafi gert kröfu um lagningu slíks vegar.

Hvað er þá langt í að krafan verði uppbyggður heilsárvegur upp Hamragarðaheiðina að jökli? Vænti þess að í kjölfar aukinnar útgerðar þarna fylgi húskofar og krafa um bætt aðgengi. Niðurgrafin slóði misfær t.a.m. vegna aurbleytu verður seint talin uppfylla kröfur rekstraraðila. Held að ekki verði hægt að mismuna mönnum eftir því hvar þeir gera út fyrst komin verður uppbyggður vegur á Langjökul. Held að menn ættu aðeins að hugsa þessi mál til enda.

Ekki eru mörg ár síðan FÍ og Kynnisferðir o.fl. gerðu kröfu um uppbyggðan heilsársveg inn á Þórsmörk. Sú veglagning var reyndar stöðvuð með einni blaðagrein. Sú veglagning fór reyndar svo leynt að komnir voru 5km af vegi þegar ég áttaði mig og sendi inn greinina. Mér finnst alveg sama hvar borið er niður. Ferðaþjónustan vill fá að rústa landinu með endalausum kröfum um bætt aðgengi.

Spurningin er hvað á að ganga langt. Mér finnst nóg komið af uppbyggðum vegum,varnargörðum og mannvirkjum á vegum ferðaþjónustunnar í óbyggðum. Mér finnst alveg nóg af slóðum í landinu.

Ef nýir slóðar til handa ferðaþjónustunni og hugsanlega uppbyggðir heilsársvegir í framhaldinu er eitthvað sem klúbburinn leggur blessun sína yfir eða getur ekki tekið afstöðu til þá er ágætt að hinn almenni félagi viti af því.

Held reyndar að þetta sé málstað hins almenna jeppamanns ekki til framdráttar. Hélt að jeppamenn ættu í vök að verjast með að fá að aka þá slóða sem nú þegar eru fyrir hendi.

Mér finnst að afstaða og stefna klúbbsins skyndilega orðin allt annað en skýr. Hef ég misskilið orðið ferðafrelsi eitthvað? Eða er verið að tala um alveg óheft ferðafrelsi?

Kv. Árni Alf.