Er stærra betra ?

Nú var ég ekki á fundinum í gær, svo ég get ekki tjáð mig um það sem Snorri hefur sagt. En svo ég reyni kannski að svara spurningunni; stærra er stundum betra, ekki alltaf. Ég er sjálfur búinn að eiga og nota ýmsar stærðir bíla, allt frá Suzuki á 31" upp í Econoline 350 á 44" dekkjum. Stundum fannst mé ákaflega gott að vera á stórum og þungum bíl, beinlínis nauðsynlegt, en svo komu tímar þegar minni og meðfærilegri bílar hefðu komið sér betur, ég tala nú ekki um þegar druslan sat á svartakafi í einhverjum skaflinum og maður þurfti að moka.
Persónulega finnast mér "ofurtrukkarnir" mjög flottir og virðast samsvara sér vel, en þeir eru komnir langt upp fyrir það sem mig langar að eiga eða reka, en flottir eru þeir.
Jeppinn sem passar við allar aðstæður er sambland af Súkku og Ram og einhverskonar breytilegur bill, bæði í stærð og búnaði. Bíllinn er smábíll í snattinu en ofurtrukkur í krapaelgnum á fjöllum.
Sem betur fer er ekki búið að smíða hin fullkomna jeppa og vonandi verður það aldrei gert, því hvað yrði þá um áhugamálið okkar ?
Kv. Steinmar

Það sem mér finnst mest heillandi við þetta allt saman er þessi rosalegi eldmóður og áhugi sem þessir menn, Snorri og fleiri eru að setja í þetta. Þeir eru að setja í þetta lífið og sálina ásamt sjálfsagt alveg haug af peningum og eru svo tilbúnir að sýna mönnum allan sinn árangur og prófanir og eru sáttir við það að menn fari þær leiðir sem þeir eru búnir að fara í þessum smíðum öllum. Ef þið hafið verið á fundinum í gær þá hafið þið væntanlega tekið eftir að Snorri var eins og lítil drengur í leikfangabúð, brosandi út að eyrum þar sem hann fékk að tala um þetta áhugamál sitt og félaganna og kynna okkur það sem þeir eru að gera og græja í þessum ofurtrukkum. Og allt kom þetta beint frá hjartanu. Hann kom einmitt inn á það að ástæðan fyrir því að þessi þróun á jeppum hefði átt sér stað væri sú staðreynd að mönnum hefði á sínum tíma verið treyst fyrir því að smíða bíla í skúrunum hjá sér og þar hefði þessi þróun átt sér stað. Og spurningin sem hann varpaði fram um hvar ferðamennska væri í dag ef mönnum hefði ekki verið leyft að þróa þetta viðfangsefni og þroska vakti mann til umhugsunar. Kannski væri þá veröldin hér á Íslandi á þann veg að Páll Ásgeir væri búinn að finna upp ,,,,, göngustafinn,,,,. Það þætti mér aum þróun og mundi ekki vilja skifta á því og því sem er í gangi í dag. L.