Drepa á eða láta ganga?

Hefur enginn frekari kenningar um þetta?

Án þess að hafa lagst djúpt í pælingar um þetta hef ég og mínir ferðafélagar bílana í gangi í svona tilfellum, en það hefur kannski aðallega verið til að halda hita. Þó maður sé vel klæddur og finni ekki fyrir kulda í akstri (þó lokað sé fyrir miðstöðina) kólnar manni meira við að sitja í kyrrstöðu, allavega ef um langan tíma er að ræða. Einhver trú hefur líka verið að það sé betra að vélin sé heit og bræði af sér þannig að snjór safnist ekki í vélarrýmið. Þetta er hins vegar líklega vitlaus kenning, ef dautt er á vélinni skefur snjó inn í vélarrýmið sem maður einfaldlega hreinsar burt áður en gangsett er á ný, rétt eins og að morgni dags. Á hinn bóginn vilja lofthreinsarar (á sumum bílum allavega) safna í sig snjó meðan vélin gengur og getur verið miklu meira vesen að hreinsa það heldur en að sópa snjóinn ofan af vélinni.

Kv – Skúli

Ég hef aldrei lent í því að vera stopp vegna veðurs, nema í skála. Þó hef ég sofið nokkrum sinnum í bílnum, af ýmsum ástæðum.

Meðan ég var á bensín bíl þá lét ég bílinn aldrei ganga í stoppum, dísel vélin fær stundum að malla í styttri stoppum.
Í miklu frosti ræsi ég vélina annað slagið og læt hana ná upp hita. Þetta er aðallega vegna þess að það getur farið illa með vélar að ræsa þær þegar hitastig smurolíu er um eða undir -20°C

Það hafa orðið dauðaslys þegar fennt hefur að bílum í gangi, þó vélar nú til dags framleiði minna CO í lausagangi (þegar allt er í lagi) en áður var, þá er alveg óþarfi að taka þessa áhættu.

Þegar bíll er gangsettur eftir að hafa verið í miklum skafrenningi, er ráðlegt að hafa miðstöðina stillta á mesta blástur þegar kveikt er á hanni, annars getur mótstaðan sem minnkar bĺastur á öðrum stillingum, brunnið yfir.

-Einar