Breyting á stikuferð.

Var að hlusta á þennan mann á rás 2. Meiri jeppamannahatarinn þessi blessaði illa upplýsti maður. Alger skandall að hann skuli vera í þeirri stöðu sem hann er í. Ekki seinna vænna fyrir stjórnendur þessa klúbbs að fara að berjast fyrir rétti okkar til þess að ferðast um hálendið. Það er greinilegt að við verðum að bregðast hart við. EIK getur þú ekki jarðað hann? Og Skúli nú duga engin vettlingatök!

Ég get nú ekki tekið undir það að að útvarpsmaðurinn og 4×4 félaginn Páll Ásgeir hafi verið grimmur við mig um daginn frekar en endra nær. Hann var vissulega ekki heldur neitt grimmur við Árna, enda ekki hans hlutverk sem spyrjanda.
Í stuttu máli fannst mér Árni tala svolítið út frá þeim veruleika sem hann vill koma á frekar en þeim sem er. Í dag má keyra eftir vegum og vegir eru skilgreindir í vegalögum og ef það sem þú keyrir á fellur ekki undir þá skilgreiningu ertu í utanvegaakstri. Skilgreiningin er hins vegar nógu víð til að rúma fjallaslóða, hvort sem þeir eru inn á skipulagi sveitarfélaganna eða ekki (enda fæstir þar og hálendið væri nánast lokað með öllu ef það væri krafan). Og hingað til alla vega hefur verið heimilt að stika vegi sem má keyra, enda gríðarlega mikilvægt verkefni út frá umhverfisverndarsjónarmiðum. Það virðist vera landlægur misskilningur að stikun á vegslóðum feli í sér að taka sér eitthvað ákvörðunarvald um hvað megi keyra og hvar ekki, við höfum aldrei verið í neinu slíku, enda er það ákveðið í lögum. Það má vel vera að lög komi til með að breytast um það á komandi árum, en það er bara allt annað mál og kemur þessu stikuverkefni okkar núna í raun ekki nokkurn hlut við. Í sjálfu sér fátt nýtt í málinu með þessu viðtali, nema það varpar betur ljósi á hvaða meinloka virðist orsaka allt þetta upplaup út af engu.
Kv – Skúli

Þetta viðtal við Árna er stórslys að mínu mati og fyrir hvern þann sem hefur ekki þekkingu á þessu málefni þá koma jeppamenn MJÖG illa út.

Það sem mér finnst aðallega vanta er að það komi fram hver ástæðan er fyrir þessum stikuferðum klúbbsins. Skúli kom engan vegin nógu vel inná það og Árni túlkaði stikunina sem einhvers konar staðfestingu á gildi viðkomandi slóða sem vegar en ekki sem umhverfisvernd. Hingað til hefur verið litið á þetta verkefni okkar sem þjóðþurftarmál og ekki nokkur maður hreyft andmælum við þessu (Árni þ.m.t.). Hann sá bara gott tækifæri þarna til að koma höggi á jeppamenn.

Það er augljóst að Árni þolir ekki ferðalög með jeppum (jeppamenn) og er því óhæfur til að sinna starfi sínu hjá Umhverfisstofnun þegar að kemur að þessum málaflokk. Ég held að menn verði bara að fara að gera sér grein fyrir að þessi og fleiri menn og konur munu ekkert hlusta á einhver eðlileg eða skynsamleg rök í þessum málaflokk og engar málamiðlanir verða í boði þegar fram líða stundir.

Það sem einnig vantar er að það komi fram að þetta eru ekki nýir slóðar (þó Árni hafi minnst á það), margir þeirra hafa verið eknir svo áratugum skiptir enda gerðir af bændum og/eða frumherjum í ferðalögum á Íslandi. Áframhaldandi akstur þeirra er ekki óeðlilegur að mínu mati enda merki um þá komnir til að vera. Aftur á móti verða ALLIR jeppamenn að fara að hysja upp um sig buxurnar á vorin og HÆTTA að aka slóða sem eru lokaðir vegna aurbleytu. Þessir fáu sem gera það eru farnir að skaða okkur allverulega að mínu mati.

Þriðja sem þarf að koma fram er hvað F4x4 stendur fyrir og kynna þarf umhverfisstefnu klúbbsins o.s.frv.

Fjórða sem þarf að koma fram er að útskýra hvað við meinum með því að fá ekki að koma að starfi því sem fer fram núna um kortlagningu slóða, Árni fór að vísa í skipulagsferlið sem hinn rétta farveg fyrir okkur sem er náttúrulega bara þvættingur enda vita allir sem vilja að við eigum við störf slóðanefndarinnar á vegum ráðuneytisins. Páll hefði átt að vita þetta og ganga á manninn!

Mér fannst Páll ekkert beita sér neitt sérstaklega á móti okkur né með. Þetta er nú einu sinni dægurmálaútvarpið, engin hardcore fréttamennska þar í gangi og lítið við því að segja ef Páll hefur ekki metnað fyrir beittari fréttamennsku en þetta.

kveðja
Agnar Benónýsson