Árshátíð 4×4 Skagafirði

First things first – takk fyrir síðast öll saman sem voruð á árshátíð 4×4 í Skagafirði í gærkvöldi, þetta var frábært í einu orði sagt og hópurinn sem undirbjó árshátíðina, þau Jói, Björg og Valdi sérstaklega, á heiður og þakklæti skilið.
Nú, eins og fram kom á vef deildarinnar, þá komum við saman á Selhótel Varmahlíð laugardagskvöldið 15. nóvember til að halda fyrstu formlegu árshátíðina okkar. Til þessa höfum við látið þorrablót duga sem árshátíð, en þar sem veturinn týndist í fyrra eins og flestir muna (en vilja þó helst gleyma að sjálfsögðu!) þá týndist skemmtinefndin, sem um hana átti að sjá og það svo gjörsamlega, að þeir hafa ekki einu sinni látið sjá sig á mánaðarlegum „saumaklúbbum“ okkar fyrsta þriðjudagskvöld hvers mánaðar. En þessi nefnd fékk sem sagt rauða spjaldið og ný hópur skipaður, sem tók að sér að halda árshátíð í mannabyggðum (eða svona því sem næst) svona til tilbreytingar. Við fengum frábæra veislu þarna á sanngjörnu verði hjá Selhótel – fólkinu og Hallgrímur eðalkokkur frá Akureyri, sem kennir sig við hvítlauk, er hreinn snillingur í einu orði sagt. Skemmtiatriði voru svo heimabökuð eins og jólasmákökurnar eru oftast nær. Jóhann Haraldsson, Nissan boy´s primus motor, var veislustjóri og með þvílíkum ágætum að brosið fer ábyggilega ekki af andlitum veislugesta fyrr en eftir jól úr þessu. Orðlengi þetta ekki meira en ég veit ég get talað fyrir munn allra veislugesta þegar ég segi við skemmtinefndina og Sel-hótel fólkið: Takk fyrir frábært kvöld!