Ánægðir með Þingvallanefnd

Fréttatilkynning frá Ferðaklúbbnum 4×4
Klúbburinn hefur sent þessa fréttatillkynningu til fjömiðla nýlega og hefur hún byrst í DV http://www.dv.is/frettir/2009/11/12/anaegdir-med-thingvallanefnd/

Ferðaklúbburinn 4×4 lýsir ánægju sinni með að Þingvallanefnd hyggst sporna við því að aðgengi almennings að landi innan þjóðgarðsins sé heft með lokun á vegum. Með þessu tekur Þingvallanefnd gott frumkvæði í að verja rétt almennings til að ferðast um náttúru landsins sem er sameign þjóðarinnar.

Í náttúruverndarlögum er sérstaklega kveðið á um rétt almennings til að ferðast um landið, enda náttúra landsins sameign þjóðarinnar hvað sem líður eignarhaldi. Lagaákvæði sem stefna í sömu átt má einnig finna í vatnalögum og vegalögum. Lengst af hefur almennt verið góður skilningur landeigenda á þessum rétti almennings til að ferðast um landið og reynsla ferðamanna af samskiptum við bændur þessa lands almennt mjög góð. Á síðustu árum hefur færst mjög í vöxt að þéttbýlisbúar og eignarhaldsfélög kaupa upp landareignir og virðist fylgja því sú óheillaþróun að sett eru upp læst hlið og keðjur sem loka almennum ferðaleiðum og hindra för almennings um náttúruna. Þó svo slíkt sé í flestum tilfellum gert í fullkomnum órétti, virðist hafa verið tregða til að taka á þessum málum og erfitt fyrir hinn almenna ferðamann að standa á rétti sínum. Það er því mjög ánægjulegt að Þingvallanefnd taki á málum sem þessum innan þjóðgarðsins og sýni þannig í verki að hún ber hag hins almenna ferðamanns fyrir brjósti.

Stjórn Ferðaklúbbsins 4×4

Ferðafrelsisnefnd Ferðaklúbbsins 4×4