4×4 og VÍK

Umhverfisnefnd fundar með 4×4 1.5.2004 16:25
Í dag hittust fulltrúar umhverfisnefndar VÍK og Hrafnkell formaður á stuttum fundi með formanni og fulltrúum Umhverfisnefndar 4×4. Á fundinum var ákveðið að taka höndum saman og vinna í sameiningu að sameiginlegum hagsmunum. Ferðaklúbburinn 4×4 hefur um langt skeið staðið fyrir öflugum áróðri fyrir bættri umgengni um landið og hefur það starf skilað sér í bættri ímynd almennings á jeppasportinu. Við getum margt lært af 4×4 og því mikill styrkur fyrir VÍK að fá til liðs við okkur eins öflug samtök og 4×4.
Nefndin

---

Fordæmum náttúruspjöll við Djúpavatn í verki 2.5.2004 10:05
Á mbl.is og hér á motocross.is má lesa um þau náttúruspjöll sem framin voru við Djúpavatn. Lögreglan í Keflavík, sem og hjólamenn úr okkar röðum, leita að sökudólgunum. Óvíst er að þeir finnist, og væri það miður, því verknaðurinn er vítaverður. Í stað þess að láta þessi spjöll vera sýnileg ferðamönnum framtíðarinnar, og vatn á myllu þeirra sem vilja koma á okkur höggi, hefur VÍK ákveðið að stefna fjölmennu liði að Djúpavatni á mánudagskvöld, 3. maí, og reyna að bjarga því sem bjarga verður. Hittumst því við afleggjaran að Djúpavatni/Vigdísarvöllum (Kleifarvatnsmegin) klukkan 19.00 á mánudag. Sýnum samstöðu og fordæmum svona verknað í verki. P.S. Ef þið eruð að hjóla á Reykjanesinu á mánudag er bara að renna við og hjálpa okkur í nokkrar mínútur.
Umhverfisnefnd.